19/09/2025
හක්මණ ප්‍රාදේශීය සම්බන්ධීකරණ කමිටු රැස්වීම - ග්‍රාමීය ආර්ථිකය ශක්තිමත් කිරීමට විශේෂ අවධානය
===================================
හක්මණ ප්‍රාදේශීය සම්බන්ධීකරණ කමිටු රැස්වීම, මාතර දිස්ත්‍රික් සම්බන්ධීකරණ කමිටුවේ සභාපති, කර්මාන්ත හා ව්‍යවසායකත්ව සංවර්ධන ගරු අමාත්‍ය සුනිල් හඳුන්නෙත්ති මහතාගේ ප්‍රධානත්වයෙන් පැවැත්විණි.
මෙහි දී ව්‍යවසායකත්ව මානව ගතිගුණ සහිත තරුණයන් තෝරා ගනිමින් ප්‍රදේශයේ පවතින ආර්ථිකය හා බැඳුණු භෞතික සම්පත්, එම මානව සම්පත සමඟ සම්බන්ධීකරණය කර ව්‍යවසායකත්ව කණ්ඩායම් ගොඩනඟමින් ග්‍රාමීය ආර්ථිකය ශක්තිමත් කිරීමට ඇති හැකියාව පෙන්වා දෙන ලදි.
එමෙන් ම කිරි නිෂ්පාදනය හා බැඳුණු ව්‍යවසායකත්ව කණ්ඩායම්, කුරුදු කර්මාන්තය ආශ්‍රිත ව්‍යවසායකත්ව කණ්ඩායම්, ඖෂධීය පාන වර්ග නිෂ්පාදනය ආශ්‍රිත ව්‍යවසායකත්ව කණ්ඩායම් ආදී ලෙස ව්‍යවසායකත්ව කණ්ඩායම් ගොඩනගා ඔවුන් සඳහා අවශ්‍ය කරන තාක්ෂණික දැනුම මග පෙන්වීම වෙළඳපොළ සමග සම්බන්ධ කිරීම හා බැංකු පද්ධතිය සමග සම්බන්ධීකරණය කරමින් ඔවුන්ට අවශ්‍ය මූල්‍ය පදනම සකස් කර දීම ආදී ලෙස රාජ්‍ය සේවකයින්ගේ මැදිහත්වීම අවශ්‍ය කරන බව ද වැඩිදුරටත් අවධාරණය කරන ලදි.
මේ වන විට කර්මාන්ත සහ ව්‍යවසායකත්ව සංවර්ධන අමාත්‍යාංශයට අනුයුක්තව හක්මණ ප්‍රාදේශීය ලේකම් කාර්යාලයේ සේවයේ නියුතු සියලුම රාජ්‍ය නිලධාරීන් සහ ව්‍යවසායකත්ව විෂය හා බැඳුණු අනෙකුත් ප්‍රාදේශීය නිලධාරීන් සහ ප්‍රදේශයේ බැංකු පද්ධතියේ සියලුම ආයතන ප්‍රධානීන් සම්බන්ධ කර ගනිමින් ප්‍රාදේශීය ව්‍යවසායකත්ව කමිටුව ශක්තිමත් ලෙස ගොඩනගා ඇති බවත් එම කමිටුව හරහා සෘජු මැදිහත් වීමක් මේ සදහා කළ හැකි බවත් පෙන්වා දුනි.
ප්‍රදේශයේ ජනතාවගේ යහපැවැත්ම උදෙසා සංවර්ධන කටයුතු රැසක් සිදු කිරීමට තීරණය කළ අතර පසුගිය සම්බන්ධිකරණ කමිටුවේ ගත් තින්දු තිරනවල ප්‍රගතිය සමාලෝචනය කිරීම ද සිදු විය.
හක්මණ - කොටබෝගහ හන්දියේ සිට ලාල්පේ දක්වා දිවෙන මාර්ගය සංවර්ධනය කිරීම, හක්මණ ලාල්පෙ ග්‍රාම නිලධාරි වසමේ රජ වේල්ල ආරම්භක ස්ථානයේ බොක්කුවේ පතුල සහ දෙපස පැතිබැමි සංවර්ධනය කිරීම, බුද්ධජයන්ති විද්‍යාලයේ නව ගොඩනැගිලි සංකීර්ණය විද්‍යාලයට පවරාගැනීමට අදාළ කටයුතු කිරිම, දෙනගම බටහිර ග්‍රාම නිලධාරී වසමේ දෙනගම මහ විදුහලේ අනාරක්ෂිත පැති පැතිබැම්ම ඉවත් කිරීම, නරවැල්පිට රෝහලේ ජල අවශ්‍යතාවය සම්බන්ධයෙන් කමිටුවේදී සාකච්ඡා වූ අතර ඇල්ලවෙල ප්‍රජා ජල ව්‍යාපෘතිය මගින් ජලය ලබා ගත හැකි බව ආදී වැදගත් ක්‍රියාමාර්ග රාශීයකට අවතීර්ණ විය.
මේ අවස්ථාවට හක්මණ ප්‍රාදේශීය සම්බන්ධීකරණ කමිටුවේ සභාපති, මාතර දිස්ත්‍රික් පාර්ලිමේන්තු මන්ත්‍රී අජන්ත ගමමැද්දගේ මහතා, හක්මණ ප්‍රාදේශීය සභාවේ සභාපති රංගන සෙනෙවිරත්න මහතා ඇතුළු මහජන නියෝජිතයින්, හක්මණ ප්‍රාදේශීය ලේකම් තීක්ෂණ දිසානායක මහතා ඇතුළු රාජ්‍ය නිලධාරීන් පිරිසක් සහභාගි වී සිටියහ.
