15/10/2025
වතුකරයේ දරුවන් පාසල් නොයැවීමට බලපාන කරුණු පිළිබඳව සොයා බැලීමේ වැඩසටහනක් දෙණියාය - එන්සල්වත්ත දෙමළ විද්‍යාලයේ දී
===================================
වතුකරයේ දරුවන් පාසල් නොයැවීමට බලපාන කරුණු පිළිබඳව සොයා බැලීම සදහා වූ වැඩසටහනක් මාතර අතිරේක දිස්ත්‍රික් ලේකම් (පාලන) කුසලක නානායක්කාර මහතාගේ ප්‍රධානත්වයෙන් පසුගියදා දෙණියාය - එන්සල්වත්ත දෙමළ විද්‍යාලයේ දී පැවැත්විණි.
මෙහි දී වතු ජනතාව මුහුණ දෙන අභියෝග හා දුෂ්කරතා කෙරෙහි වැඩි අවධානයක් යොමු කරමින් දරුවන් පාසල් නොයාමට බලපාන කරුණු කාරණා පිළිබඳව සාකච්ඡා කරන ලදි.
මේ සඳහා සම්බන්ධ වූ ප්‍රදේශයේ ජනතාවට ඔවුන්ගේ ගැටළු ඍජුව ඉදිරිපත් කිරීමට ද අවස්ථාව සැලසිනි.
දරුවන් පාසල් නොපැමිණීමට හේතු වශයෙන් හදුනාගත් ගැටළු සදහා කෙටි කාලීන, මධ්‍ය කාලීන හා දීර්ඝ කාලීන විසදුම් අවශ්‍ය බවත් ඒ වෙනුවෙන් වූ නිසි වැඩපිළිවෙළක් සකස්කර, අදාළ අංශ සමග සම්බන්ධීකරණයෙන් එය ක්‍රියාත්මක කිරීම ආරම්භ කරන බවත් මාතර අතිරේක දිස්ත්‍රික් ලේකම් (පාලන) කුසලක නානායක්කාර මහතා පැවසී ය.
කඳුකරයේ වතුවල වැඩ කිරීම සඳහා මෙරටට මුලින්ම රැගෙන එන ලද කාන්තා සහ පිරිමි පුද්ගල කණ්ඩායම් පැමිණි ගමන අති දුෂ්කර ය. වසර ගණනාවක් මුළුල්ලෙහි දහස් සංඛ්‍යාත පිරිසක් මන්නාරමට ගොඩබැස එතැන් සිට මාතලේ දක්වා අනතුරුදායක ගමනක් පාගමනින් ගියහ. ඔවුහු රෝග විඳදරා ගනිමින්, කැලෑ එළිපෙහෙළි කරමින්, වනසතුන්ට නිර්භයව මුහුණදෙමින් ගමන් කර ඇත. බොහෝ දෙනෙක් (ඇතැම් කණ්ඩායම්වල 40 කට අධික පිරිසක්) ගමන අතරමඟ දී මියගිය අතර ඔවුන්ගේ සිරුරු භූමදානය කිරීම හෝ නැතහොත් බැහැරකර දැමීම සිදු කරන ලදි.
1820 දශකයේ මුල් භාගයේ සිට බ්‍රිතාන්‍ය කිරීටය යටතේ පැවති සමාගම් විසින් ඉන්දියාවේ සිට එකල ‘සිලෝන්’ නමින් හඳුන්වන ලද ශ්‍රී ලංකාවට මලෛයහ දෙමළ ප්‍රජාව රැගෙන එන ලදි. බ්‍රිතාන්‍යයන් විසින් මෙරට ‘වතු රාජ්‍යය’ ගොඩ නැගීමට යොදාගත් පදනම වූයේ එම ප්‍රජාවගේ ශ්‍රමයයි. ඔවුන් යටත් විජිත ව්‍යවසායන්හි අත්‍යවශ්‍ය කොටසක් විය. නිදහස දිනාගත් අවස්ථාව වන විට මෙම ප්‍රජාව මෙරට සිටි දෙවන විශාලත ම ජනවාර්ගික කණ්ඩායම විය.
නිදහසින් පසු මලෛයහ දෙමළ ජනතාව විසින් ප්‍රකාශ කරන ලද ඉල්ලීම් තුළ ශ්‍රී ලංකාවේ අනෙකුත් ප්‍රජාවන් හා සමානව ඔවුන් පූර්ණ පුරවැසියන් ලෙස පිළිගැනීමක් ලබාදීම ඇතුළත් විය. සමානාත්මතාව, වෙනස්කොට නොසැලකීම, ආරක්ෂාව සහ ප්‍රජාවගේ අයිතිවාසිකම් සහ අනන්‍යතාව ආරක්ෂා කෙරෙන දේශපාලන හා පරිපාලන විධිවිධාන සඳහා ඉල්ලීම්කර ඇත. මෙම ඉල්ලීම් ඉදිරිපත් කරනු ලැබුවේ නුවරඑළිය ප්‍රදේශයේ සංකේන්ද්‍රණය වී ශ්‍රී ලංකාවේ වෙනත් ප්‍රදේශ ගණනාවක විසිරී ජීවත්වන මෙම ජනතාවට අභිමානයෙන්, ආත්ම ගරුත්වයෙන්, සාමයෙන් සහ සුරක්ෂිතභාවයෙන් යුතුව ජීවත්වීමට සහ ඔවුන්ගේ කටයුතු කළමනාකරණයකර ගැනීමට අවශ්‍ය හඬ සහ බලය ලබාගනු පිණිසය.
වතුවල පදිංචිකරුවන් ලෙස සිටින පිරිස ඇතුළු මලෛයහ දෙමළ ප්‍රජාවේ වර්තමාන තත්ත්වය වනාහි මෙරට අනෙකුත් සියලුම ප්‍රජාවන් හා සැසඳීමේදී මානව සංවර්ධන දර්ශක සියල්ලෙන්ම අඩුම අගයන් වාර්තා කරන රටේ වඩාත්ම කොන්වීමට ලක්වු කණ්ඩායම බවට පත්ව ඇත. මෙම තත්ත්වය වතු හාම්පුතුන්ට බැඳී සිටින සහ ඔවුන් මත යැපෙන කම්කරුවන්ව සිටීමේ තත්ත්වයෙන් මිදී අන් අය හා සමාන අයිතිවාසිකම් සහිත ශ්‍රී ලංකාවේ පූර්ණ පුරවැසියන් තත්ත්වයට පරිවර්තනය වීමට දැඩිව බාධාකාරී වී ඇත.
මලෛයහ ප්‍රජාවෙන් විශාල ප්‍රමාණයක් තවමත් අවම ජල සහ සනීපාරක්ෂක පහසුකම් සහිත ලයින් කාමර නිවාසවල ජීවත්වෙති. ළදරු මරණ, උපත් බර සහ වයසට සරිලන උස ඇතුළු බොහෝ සෞඛ්‍ය සහ පෝෂණ දර්ශක මෙරට ජාතික සාමාන්‍ය අගයන්ට සාපේක්ෂව පරම්පරාගත ලෙස පහළ මට්ටමක් පෙන්නුම් කරයි. කඳුකරයේ ළමයින් දශක ගණනාවක් තිස්සේ ජාතික අධ්‍යාපන පද්ධතියෙන් බැහැර කර ඇති බැවින් සැලකිය යුතු මට්ටමක අහිමි කිරීමක් නිර්මාණය කර ඇති අතර එය තවමත් සම්පූර්ණයෙන් නිවැරදිකර නොමැත. වතුවල ජීවත්වන ජනතාවට සේවා සපයන සෞඛ්‍ය පහසුකම් තවමත් ප්‍රධාන ධාරාවෙහි නොමැත. ඒ හා සමානවම මෙම ජනගහනයේ අ.පො.ස. සාමාන්‍ය පෙළ, අ.පො.ස. උසස් පෙළ සහ විශ්ව විද්‍යාල අධ්‍යාපනය ඇතුළු අධ්‍යාපනයෙහි සාධන මට්ටම්වලට ළඟාවීම සැලකිය යුතු ලෙස අඩු අගයක් ගනී. අනෙකුත් ප්‍රජාවන්ට සාපේක්ෂව සලකාබැලීමේදී මලෛයහ දෙමළ ප්‍රජාව රාජ්‍ය අංශයේ රැකියාවල සහ තෘතීයික අධ්‍යාපනයෙහි නිරත වී සිටීම ඉතා අඩු මට්ටමක පවතින අතර ඉඩම්, පරිපාලන සේවා සහ සුබසාධන වැඩසටහන් සඳහා ඇති ප්‍රවේශයෙහි දැඩි අසමානත්වයක් පවතියි. බොහෝ දෙනෙකුට ලිපිනයක් නැත. මෙම ප්‍රජාවේ සාමාජිකයින් අතර දරිද්‍රතා අනුපාතය ජාතික සාමාන්‍ය අගයට වඩා සැලකිය යුතු ලෙස ඉහළය. ඔවුන් ආපදාවලට ලක්වීමේ වඩාත්ම වැඩි අවදානම සහිත පිරිස වේ.
මේ අවස්ථාවට කොටපොල ප්‍රාදේශිය ලේකම් දම්සර කරුණාජීව මහතා ඇතුළු කොටපොල ප්‍රාදේශීය ලේකම් කාර්යාලයේ නිලධාරීන්, මාතර දිස්ත්‍රික් රාජ්‍ය නොවන සංවිධාන සම්බන්ධීකාරක නුවන් දිසානායක මහතා, ප්‍රදේශයේ අධ්‍යාපන ක්ෂේත්‍රයට අදාළ නිලධාරීන්, එන්සල්වත්ත දෙමළ විද්‍යාලයේ විදුහල්පති උදයකුමාර් වේලු මහතා ඇතුළු ප්‍රදේශයේ විදුහල්වල විදුහල්පතිවරු, පොලිසිය, ශ්‍රී ලංකා ජාතික සාම මණ්ඩලයේ ව්‍යාපෘති කළමනාකාර නිරෝෂා ඇන්තනී මහත්මිය, ජ්‍යේෂ්ඨ ව්‍යාපෘති නිලධාරී නෙත්මි ලියනගේ මෙනවිය, මාතර ප්‍රජා සංවර්ධන සංසදයේ උප සභාපති අමරසේන සමරතුංග මහතා, ජනමාධ්‍යවේදීන් ඇතුළු පිරිසක් සහභාගි වී සිටියහ.
මාතර දිස්ත්‍රික් ලේකම් කාර්යාලය, කොටපොල ප්‍රාදේශීය ලේකම් කාර්යාලය, එන්සල්වත්ත දෙමළ විද්‍යාලය, ශ්‍රී ලංකා ජාතික සාම මණ්ඩලය, මාතර ප්‍රජා සංවර්ධන සංසදය එක්ව වැඩසටහන සංවිධානය කරන ලදි.
