04/06/2026
ශ්රී ලංකාවේ අපනයන ආදායම ඉහළ නැංවීමේදී ඇඟලුම් කර්මාන්ත ක්ෂේත්රය ප්රධානතම දායකත්වය ලබාදෙන ක්ෂේත්රය බවත්, 2025 වසරේ අමෙරිකානු ඩොලර් බිලියන 17.25ක අපනයන ආදායමෙන් ඩොලර් බිලියන 4.9ක්ම ඇඟලුම් ක්ෂේත්රයෙන් ලැබී ඇති බවත් කර්මාන්ත සහ ව්යවසායකත්ව සංවර්ධන අමාත්යාංශයේ ලේකම් තිලකා ජයසුන්දර මහත්මිය පැවසුවාය.
2026 වසර අවසන් වන විට ශ්රී ලංකාවේ සමස්ත අපනයන ආදායම අමෙරිකානු ඩොලර් බිලියන 18 ඉක්මවනු ඇතැයි විශ්වාසය පළ කරන බවද තිලකා ජයසුන්දර මහත්මිය කියා සිටියාය.
ඇය මේ බව සඳහන් කළේ ශ්රී ලංකා පේෂකර්ම හා ඇඟලුම් ආයතනය (SLITA) යටතේ ක්රියාත්මක වන SLITA Campus විසින් සංවිධානය කළ බණ්ඩාරණායක ජාත්යන්තර අනුස්මරණ ශාලාවේදී අද (04) පැවැති ඩිප්ලෝමා සහ උසස් ජාතික ඩිප්ලෝමා සහතික ප්රදානෝත්සවය අමතමිනි.
ශ්රී ලංකාවේ රෙදිපිළි හා ඇඟලුම් ක්ෂේත්රයේ ප්රගතිය උදෙසා වෘත්තිකයන් බිහිකරන ප්රමුඛතම රාජ්ය උසස් අධ්යාපන ආයතනයක් වන ශ්රී ලංකා පේෂකර්ම හා ඇඟලුම් ආයතනය (SLITA), සිය අධ්යයන හා වෘත්තීය සුදුසුකම් සාර්ථකව සම්පූර්ණ කළ ඩිප්ලෝමාධාරීන් 596 දෙනෙකු සඳහා ඩිප්ලෝමා සහ උසස් ජාතික ඩිප්ලෝමා සහතික පිරිනමන ලදී.
2009 අංක 12 දරන පනත යටතේ ස්ථාපිත කර ඇති ශ්රී ලංකා පේෂකර්ම හා ඇඟලුම් ආයතනය, ශ්රී ලංකාවේ විශාලතම අපනයන කර්මාන්තයක් වන ඇඟලුම් ක්ෂේත්රය සඳහා අවශ්ය දක්ෂ උපාධිධාරීන් සහ තාක්ෂණික වෘත්තිකයන් පුහුණු කරන විශිෂ්ටතම මධ්යස්ථානයකි. අධ්යාපනය, නවෝත්පාදනය, පර්යේෂණ සහ විශිෂ්ටත්වය ඔස්සේ මෙරට ඇඟළුම් කර්මාන්තයේ අනාගතය සවිබල ගැන්වීම මෙම ආයතනයේ ප්රධාන අරමුණයි. දේශීය හා ජාත්යන්තර කර්මාන්ත ප්රමිතීන්ට අනුකූලව කෙටි පාඨමාලා, සහතික පත්ර, ඩිප්ලෝමා සහ උපාධි පාඨමාලා රැසක් ශ්රී ලංකා පේෂකර්ම හා ඇඟලුම් ආයතනය විසින් පවත්වනු ලැබේ. නවීන විද්යාගාර පහසුකම්, පළපුරුදු ආචාර්ය මණ්ඩලය, ශක්තිමත් කර්මාන්ත සහයෝගීතාව සහ ප්රායෝගික පුහුණු අවස්ථා හරහා, සීඝ්රයෙන් වෙනස් වන ඇඟළුම් ක්ෂේත්රයට අවශ්ය තාක්ෂණික හා වෘත්තීය නිපුණතාවයෙන් සිසුන් සන්නද්ධ කිරීමට මෙම ආයතනය කටයුතු කරයි.
ශ්රී ලංකා පේෂකර්ම හා ඇඟලුම් ආයතනය ඇඟලුම් ක්ෂේත්රයේ අධ්යාපනික ආයතනයක් ලෙස ජාත්යන්තර මට්ටමකට පත්වෙමින් ඇඟළුම් කර්මාන්ත ක්ෂේත්රයට විශාල මෙහෙවරක් ඉටුකරමින් එම ක්ෂේත්රයට අවශ්ය නිපුණ මානව සම්පත බිහි කිරීම සඳහා විශාල කාර්යභාරයක් සිදුකරන බව තිලකා ජයසුන්දර මහත්මිය මෙහිදී පැවසුවාය.
