09/11/2025
නියත වශයෙන්ම "Love Languages" එහෙමත් නැත්තන් ආදර භාෂා සංකල්පය කියන්නේ සබඳතා ශක්තිමත් කර ගැනීමට ඉතා වැදගත් වන මනෝවිද්යාත්මක හා ප්රායෝගික මාතෘකාවක් .
ආචාර්ය ගැරී චැප්මන් -Dr. Gary Chapman ගේ The Five Love Languages එහෙමත් නැත්තන් ප්රදීප් කුමාර බාලසූරිය සිංහලයට පරිවර්තනය කරපු "ආදරයේ භාෂා" කියන පොතෙන් තමයි මම පහත කරුණු දක්වල තියෙන්නේ. මේ පොත මං මුලින්ම කියවනකොට විශ්වවිද්යාලයේ තුන්වන වසරේ වගේ.. ඇත්තටම මේ පොත ඊට කලින් හම්බ උනානම් හොදයි කියල එතකොට හිතුන.ජීවිතයේ සමහර ප්රශ්න සබදතා ඇතුලෙ ඇතිවෙන ගොඩක් ප්රශ්න වලට විසදුම් හොයාගන්න නම් අපි ලග ඉන්න පුද්ගලයන්ගේ ආදරයේ භාශාව දැනගන්න එක කොයිතරම් වැදගත්ද කියල ඇත්තටම මට අදහසක් ආවේ මේ පොත කියෙව්වම තමයි මුලින්ම. මොහු වගේම ලෝකය පුරා බොහොමයක් සම්බන්ධතා විශ්ලේෂකයන් පෙන්වා දෙන්නේ සාර්ථක සම්බන්ධතාවයක රහස ආදරයේ භාෂාවය බවයි ඉතින් එකිනෙකාගේ ආදරයේ භාෂාව නොදන්නා තැන නිතර ගැටුම් සහ අඩදබර ඇතිවෙන්න පුලුවන් .
❤️ ආදරයේ භාෂා පහ කියන සංකල්පය ගැන මේ විදියට මේ පොත ආශ්රයෙන්ම මුලින්ම දැනගමු.
මෙම සංකල්පයේ මූලික අදහස වන්නේ, පුද්ගලයන් ආදරය ලබා දෙන සහ ආදරය ලැබීමට කැමති ආකාරය එකිනෙකට වෙනස් බවයි. ඔබේ සහකරු හෝ සහකාරිය කතා කරන ආදර භාෂාව හඳුනාගෙන, ඒ අනුව ක්රියා කිරීමෙන් ඔවුන්ගේ "ආදර ටැංකිය" ඒකියන්නේ Love Tank එක පිරී ඇති බවක් ඔවුන්ට දැනෙන අතර, සබඳතාව ඉතා ශක්තිමත් කරගන්න මේක ඉතාමත්ම වැදගත් වෙනව.ඉතින් අපි බලමු මේ ආදරයේ භාෂා මොනවද කියල.
1.අගය කිරීම
•මෙම ආදර භාෂාව නියෝජනය කරන පුද්ගලයන් ආදරය හා ගෞරවය අත්විඳින්නේ වාචික ප්රකාශන මගිනි. ඔවුන්ට වැදගත් වන්නේ හදවතින්ම කියන පැසසුම්, කෘතඥතාව සහ දිරිගැන්වීම් කියන කාරණා ය.ඔවුන් පැසසුම් ආදර වචන ලබන තරම වැඩිවන තරමට පෙරලා ආදරය ලබාදීම වැඩි කරනව.
• උදාහරණයක් විදියට ගත්තම,
• "ඔබ මේ වැඩේ ගොඩක් හොඳට කළා." -ඒක පැසසුමක්
• "මම ඔයා ගැන ආඩම්බරයි." -මෙය දිරිමත් කිරීමක්
• "මම ඔයාට ආදරෙයි." -මෙහිදී සෘජුවම ආදරය ප්රකාශ කිරීමක් සිදුවෙයි.වගේ වචන ඒ වගේම තව ඕනතරම් ආදරණීය වචන තියනව මේ අයගේ හිත සතුටින් තියන්න පුලුවන් .
නමුත් මෙහිදී දැනගන්න ඕන අනිත් කාරණාව තමයි විවේචන සහ හිත් රිදෙන ඍණාත්මක වචන ඔවුන්ගේ සිතට දැඩි වේදනාවක් ගෙන දෙන බව. ඒ නිසා හිත රිදෙන වචන වලින් මේ වගේ අය රිදවනකොට ගොඩක් පරිස්සම් වෙන්න ඕන. ඉතිංආදරණීය වචන වලින් තමයි මේ අය සමග ශක්තිමත් සබදතාවයක් ගොඩනගා ගැනීම ඉතාමත් පහසු වෙන්නේ.
2. කාලය සහ අවධානය ලබාදීම
මේ ආදරයේ භාෂාව නියෝජනය කරන පුද්ගලයන්ට ආදරය කියන්නේ ඔවුන් වෙත අප දක්වන අවධානය සහ ගත කරන කාලයයි.ඔවුන්ට වැදගත් වන්නේ බාහිර කිසිම බාධාවකින් තොරව එකිනෙකා සමඟ කාලය ගත කිරීමයි. මෙහිදී අවධානය සියයට සියයක්ම සහකරු හෝ සහකාරිය වෙත යොමු වී තිබිය යුතු අතර දුරකතන භාවිතය, රූපවාහිනී නැරඹීම වගේ දේවල් කරනකොට ඉතාමත් සැලකිලිමත් වෙන්න අවශ්යයි මේ වගේ අයත් එක්ක.මොකද තමාවෙත අවධානය නැතිවෙනකොට මේ අය කළකිරීමට පත්වෙනව.
• උදාහරණයක් විදියට ගත්තොත්,
• එකට ඇවිදින්න යෑම හෝ ආහාර ගැනීම.
• කිසිවක් නොකර එකට වාඩි වී, කතාබස් කිරීම.
• දෙදෙනාම කැමති විනෝදාංශයක යෙදීම.
වගේ දේවල් වලට මේ අය ගොඩක් කැමතියි. තමන්ගෙ වටිනා කාලයට නිසි වටිනාකමක් දෙන කෙනෙක්ට ආදරය කරන්න ලැබෙන එක තමයි මෙයාලගෙ ලොකුම සතුට.
3. තෑගි ලැබීම
මෙම ආදරයේ භාෂාව කතා කරන පුද්ගලයන්ට තෑගි කියන්නේ ආදරයේ සහ සැලකිල්ලේ සංකේතය යි.තෑග්ගේ වටිනාකමට වඩා, එය ලබා දීමට ගත් උත්සාහය සහ එය තමන් වෙනුවෙන් කල්පනා කර තෝරා ගත් බවකියන කාරණාව තමයි ඔවුන්ට වැදගත් වෙන්නේ. තෑග්ගක් තමන් වෙනුවෙන්ම තෝරා ගෙන් ඇතිබව දැනීමෙන් මොවුන් ඉතාමත් ප්රීති දායක තත්වයකට පත්වෙන අතර..හදවත තුල අනෙකා කෙරෙහි විශාල ආදරණීය බවක් ඇතිවෙනව.
• උදාහරණයක් විදියට ගත්තොත්,
• කුඩා මල් කළඹක් හෝ කැමති චොකලට් එකක් මිලදී ගැනීම.
• සැමරුම් දිනවලදී පමණක් නොව, හදිසියේ දෙන තෑගි.
• තමන්ට අවශ්ය දෙයක් කල්තියා හඳුනාගෙන එය ලබා දීම. වගේ දේවල් මොවුන් ඉතා සතුටට පත් කරනව.
ඉතිං මේ වගේ කෙනෙක්ට තෑගි දීමෙන් වැළකීම හෝ තමන්ට වැදගත් නොවන බොරු දේවල් තෑගි දීමෙන් ඔවුන්ට ආදරය නොලැබෙන බවක් දැනිය හැකි අතර තමා කෙරෙහි කිසි සැලකිලිමත් බවක් නැත යන උදාසීන හැගීම මොවුන්ට එහිදී ඇතිවෙනව. ඉතින් මේ වගේ කෙනෙක්ට ආදරේ කරනකොට පුංචි පුංචි තෑගි වලට ගොඩාක් ආදරේ ඇති කරන්න පුලුවන් බව අමතක කරන්න හොද නැහැ.
4. උදව් වීම
මෙම ආදරයේ භාෂාව කතාකරන පුද්ගලයන්ට ආදරය යනු ක්රියා වෙන් ඔප්පු කරන දෙයකි. ඔවුන්ට වෙනුවෙන් යම් වැඩක් කර දීම හෝ ඔවුන්ගේ ජීවිතයේ වගකීම් බර සැහැල්ලු කිරීමට උපකාර කිරීම ඔවුන් ආදරය ලැබෙන බවට දැනෙන දේවල් ය.
• උදාහරණයක් විදියට ගත්තොත්,
• වාහනය හෝ ගෙදර දොරේ කැඩුණු දෙයක් හදා දීම.
• තේ හෝ කෝපි කෝප්පයක් සාදා දීම.
• ඔවුන්ගේ බර අඩු කිරීමට ස්වේච්ඡාවෙන් වැඩකට උදව් කිරීම.වගේ දේවල් මොවුන්ට ඉතාමත් වැදගත් කාරණාවේ.තමන්ට ක්රියාවේදී උදව්කරන අය සමග මොවුන් ඉක්මනින් ආදරයෙන් බැදේ.
මෙවැනි අයත් සමග සිටීමේදී, පොරොන්දු කඩ කිරීම හෝ කම්මැලි ලෙස සිටීම ඔවුන්ට තමන් ගැන සැලකිල්ලක් නොදක්වන බවට හැඟීමක් ඇති කරවයි.එය සබදතාව දුර්වල කරණ කාරණා ලෙස මොවුන් සලකයි. ඉතින් මේ වගේ කෙනෙක් එක්ක ආදරය කරනකොට පුංචි පුංචි උදව් ඔවුන්ගේ ආදරය ගොඩාක් වැඩි කරන බව අමතක කරන්න හොදනැහැ.
5. ස්පර්ශය
මෙම ආදරයේ භාෂාව කතා කරන පුද්ගලයන්ට ආදරය ලැබෙන්නේ ශාරීරික සමීපතාව එහෙමත් නැත්තන් ස්පර්ශය මගිනි. මෙයට ලිංගිකත්වය පමණක් නොව, සුළු ස්පර්ශයන් පවා අයත් වෙනව.තමාට ආදරය දැනෙන්නේ තමා ආදරය කරන අයගෙන් ලැබෙන ආදරණීය ස්පර්ශයන් හරහා බව මේ අය විශ්වාස කරනව.
• උදාහරණයක් විදියට ගත්තොත් ,
• අතින් අල්ලාගෙන සිටීම.
• වැලඳ ගැනීම සහ සිප ගැනීම.
• ඔවුන්ගේ උරහිස මත අත තැබීම , හිස අත ගෑම.
• සෝෆාවේදී හෝ ඇඳේදී එකට තුරුළු වී සිටීම.වගේ දේවල් වලින් මේ අය ඉතා සංවේදී වෙනව.
ඉතිං මේ වගේ අයට ඒ ආදරණීය ස්පර්ශ නොලැබෙන් බව දැනෙනකොට ඉතාමත් දුකට පත්වෙලා දුරස් වෙන්න පුලුවන් මොකද අනෙක් පුද්ගලයා භෞතිකව ඈත් වීම හෝ ස්පර්ශයෙන් වැළකීම ඔවුන්ගේ ආදරය ක්ෂණිකව හිස් කරන බැවින්.
ඉතිං,මෙම භාෂා පහ හඳුනා ගැනීමෙන් ඔබගේ සහකරු/සහකාරිය ඇත්තටම ආදරය ලැබීමට කැමති ප්රධාන භාෂාව කුමක්දැයි ඔබට තේරුම් ගන්න පුලුවන් .මේක ටිකක් සැලකිලිමත් විදියට නිරීක්ෂණය කරමින් හදුනාගන්න.. ආදරය කියන්නේ විවාහය කියන්නේ ලිංගික සබදතාව තුලින්ම පමණක් ගොඩනගා ගත යුතු දෙයක් නෙමෙයි. දීර්ඝ කාලීන සතුටු දායක ජීවිතයක් ගත කරන්න නම් මේ ආදර භාෂා එකිනෙකා තුලින් හදුනා ගැනීම ඉතාම වැදගත් එතකොට තමයි ශාරීරීක මෙන්ම මානසිකවත් සතුටු දායක ශක්තිමත් සබදතාවයක් ගොඩනැගෙන්නේ.. මේක අත්දුටුවයි ප්රත්යක්ෂයි..
මේක තමන්ගේ සහකාරිය හෝ සහකරුවට පමණක් නෙමෙයි තමන් අවට සිටින තමන්ගේ දෙමව්පියන්ට සහෝදර සහෝදරියන්ට යහලුවන්ව උනත් නිවැරදිව තේරුම් ගන්න බාවිතා කරන්න පුලුවන් දෙයක් . ඇත්තටම මම පුද්ගලිකවම මගේ සමීප සියලුම දෙනා ඉක්මනින් හදුනාගන්න මේක පාවිච්චි කරනව. ඒ කියන්නේ තව කෙනෙක් ඉක්මනින් හදුනාගන්න තේරුම් ගන්න හරිම පහසුවෙනම ඒ පුද්ගලයා ගේ ආදරය ලැබීමට කැමැත්ත ලැබීමට ඇති භාෂාව හදුනාගැනීම ඉතාම වැදගත්.
(Dr. Gary Chapman ගේ The Five Love Languages හි ආදරයේ භාෂා- ප්රදීප් කුමාර බාලසූරියගේ සිංහල අනුවර්තනය ඇසුරෙන්)
