http://www.gossiplankanews.com/

Gossip Lanka News, Nugegoda (2026)

07/09/2026

🔥 ඉන්දීය ආරක්ෂක අමාත්‍ය රාජ්නාත් සිං හෙට (08) ශ්‍රී ලංකාවට

ඉන්දීය ආරක්ෂක අමාත්‍ය රාජ්නාත් සිං මහතා සැප්තැම්බර් 8 වනදා සිට 10 වනදා දක්වා කාලය තුළ ශ්‍රී ලංකාවේ තෙදින නිල සංචාරයක නිරත වීමට නියමිතව ඇත. නව දිල්ලියේ පිහිටි පුවත් තොරතුරු කාර්යාංශය (PIB) විසින් ඉන්දීය ආරක්ෂක අමාත්‍යාංශය වෙනුවෙන් නිකුත් කරන ලද නිවේදනයක මේ බව තහවුරු කර තිබේ.
මෙම සංචාරයේදී ඒ මහතා ශ්‍රී ලංකා නායකත්වය සමඟ විවිධ කරුණු සම්බන්ධයෙන් සාකච්ඡා පැවැත්වීමට මෙන්ම කොළඹදී ඉන්දීය ප්‍රජාව හමුවී සංවාදයේ යෙදීමට ද කටයුතු කරනු ඇත.

ඉන්දීය ආරක්ෂක අමාත්‍යාංශයේ සහ විදේශ කටයුතු අමාත්‍යාංශයේ ජ්‍යෙෂ්ඨ නිලධාරීන්ගෙන් සමන්විත උසස් පෙළේ නියෝජිත පිරිසක් රාජ්නාත් සිං මහතා සමඟ මෙම සංචාරයට එක්ව සිටිති. ඉන්දියාව සහ ශ්‍රී ලංකාව අතර පවතින සබඳතාව ගැඹුරු ශිෂ්ටාචාරමය මුල් සහිත එකක් වන අතර එය කලාපීය ආරක්ෂාව, ආරක්ෂක ක්ෂේත්‍රය, ආර්ථික හා වෙළඳ සහයෝගීතාව මෙන්ම ශක්තිමත් මහජන සබඳතා පදනම් කරගත් බහුවිධ හවුල්කාරිත්වයකින් යුක්ත බව අදාළ නිවේදනයේ සඳහන් වේ.

ශ්‍රී ලංකාව මුහුණ දුන් ආර්ථික අර්බුද සමයේදී ඉන්දියාව ලබා දුන් සහය සහ 2025 වර්ෂයේ ඇති වූ 'ඩිට්වා' සුළි සුළඟින් (Cyclone Ditwah) පසු මුලින්ම සහන සැලසූ රටක් ලෙස ඉන්දියාව ඉටුකළ කාර්යභාරය දෙරටේ ද්විපාර්ශ්වික සබඳතාවන් තවදුරටත් ශක්තිමත් කිරීමට හේතු වී ඇත. මෙම සංචාරය මගින් ඉන්දියාවේ 'අසල්වැසියාට මුල් තැන' (Neighbourhood First) ප්‍රතිපත්තිය සහ අග්‍රාමාත්‍ය නරේන්ද්‍ර මෝඩි මහතාගේ 'මහාසාගර්' (MAHASAGAR - Mutual and Holistic Advancement for Security and Growth Across Regions) සංකල්පය කෙරෙහි පවතින නොසැලෙන කැපවීම නිරූපණය කෙරේ.

බලගතු නාවික හා ආරක්ෂක හවුල්කාරිත්වයක් ඇතුළුව දෙරටටම අන්‍යෝන්‍ය වශයෙන් වාසිදායක ක්ෂේත්‍රයන්හි ද්විපාර්ශ්වික සබඳතා තවදුරටත් වර්ධනය කරගැනීමට මෙම සංචාරය මගින් මගපෑදෙනු ඇති බව ඉන්දීය ආරක්ෂක අමාත්‍යාංශය වැඩිදුරටත් සඳහන් කරයි.

(first 150 characters...)

වැඩිදුර කියවන්න 👇
ඔබේ අදහස comment කරන්න 💬

indian-defense-minister-rajnath-singh-to-visit-sri-lanka-tomorrow-08

07/09/2026

ජාතික රූපවාහිනියේ අවුරුදු කුමාරි තරගයෙන් දෙවැනි ස්ථානය දිනාගෙන, අරුණ ජයවර්ධනගේ 1970 Love Story සිනමා නිර්මාණය හරහා සිනමාවට පිවිසි සඳනි ප්‍රනාන්දු අද වන විට පුංචි තිරයේත් රිදී තිරයේත් තමන්ටම අනන්‍ය ගමනක් ගොඩනගාගෙන සිටින රංගන ශිල්පිනියක්.

1970 Love Story තිරගත වීමටත් පෙර ටෙලිනාට්‍ය සහ වෙළෙඳ දැන්වීම් සඳහා ඇයට ආරාධනා ලැබුණා. පසුව ගමේ ලස්සනම ලේලි මියුසික් වීඩියෝව හරහාත්, මෑතකදී අවසන් වූ විසේකාරි ටෙලිනාට්‍යයේ කළ රංගනය හරහාත් ඇය ප්‍රේක්ෂක අවධානය දිනාගත්තා.

ඒ අතරතුර සඳනිගේ සිනමා ගමනත් නැවතත් වේගවත් වෙලා. ඇයගේ දෙවැනි සිනමා නිර්මාණය වන ‘නම්බර් ප්ලේට්’ සඳහා මේ වන විට ගිවිසුම් අත්සන් කර අවසන්. සද්ධාමංගල සූරියබණ්ඩාරගේ තිර රචනයෙන් සහ ඔහුගේ පුත් ඉඳුවර සූරියබණ්ඩාරගේ අධ්‍යක්ෂණයෙන් නිර්මාණය වන මෙම චිත්‍රපටය ක්‍රයිම්, ත්‍රිලර් සහ ඩිටෙක්ටිව් සිදුවීම් රැගත් නිර්මාණයක්.

සඳනි කියන්නේ තමන්ට කවදාවත් අනෙක් නිළියන් අභිබවා යාමේ තරගයක් තිබුණේ නැති බවයි.

“මම තැනක් ගැන ටාර්ගට් කරලා තිබුණේ නැහැ. අහවල් තැනට යනවා කියන හීනයක හිටියෙත් නැහැ. සෙසු නිළියන්ව පහුකරගෙන යන්න, රේස් එකක් දුවන්න මට කවදාවත් ඕනෑකමක් තිබුණේ නැහැ. මම මගේ ගමන මගේ පාඩුවේ බොහොම හෙමින් යනවා.”

ඇයගේ ඒ ‘හෙමින් යන ගමන’ තුළ අද වන විට ඇයටම ආදරය කරන ප්‍රේක්ෂක පිරිසක් නිර්මාණය වී තිබීම ගැන සඳනි සෑහීමකට පත්ව සිටිනවා.

“මාව පහුකරගෙන කවුරු ගියත් මට ඒකේ වගක් නැහැ. මගේ ගමන මම පාඩුවේ යනවා. ප්‍රේක්ෂකයන්ගේ ආදරය තුළින් මම අත්දකිනවා මගේ ගමන සාර්ථකයි කියලා.”

සඳනිගේ රංගන තේරීම්වලත් ඇයටම අනන්‍ය සීමාවක් තිබෙනවා. එකම ආකාරයේ චරිතවලට කොටුවීමට ඇය කැමැති නැහැ.

“හැමදාමත් පෙම්වතිය හෝ ශුද්ධවන්තියට රඟපාලා එකම තැනකට කොටුවෙන්න මම කැමැති නැහැ. නපුරු චරිත වුණත් මම භාරගන්නවා.”

ඒ නිසාම ඇයගේ රංගන ගමන තුළ විවිධත්වය තබාගැනීමට සඳනි උත්සාහ කරනවා.

කලා ක්ෂේත්‍රයේ රංගන ශිල්පිනියකට තමන්ගේ සීමාවන් දැන සිටීම වැදගත් බවත් සඳනි කියනවා.

“අපි හැමෝටම යම් සීමාවන් තිබිය යුතුයි. ඒ සීමාවන් අප ඇතිකර ගන්නේ අපේ පරිස්සමට, අපිව සහ අපේ හොඳ නම රැකගන්න ඕනේ නිසා. මොන වගේ නිර්මාණයක් වුණත් ඒ සීමාව තුළ රිජෙක්ට් වෙන එක සාමාන්‍ය දෙයක්.”

ඇයගේ මෙම සීමාවන් සම්බන්ධයෙන් ඇගේ සැමියා වන පියත්ගෙන් බලපෑමක් තිබෙනවාදැයි ඇසූ විට සඳනි දෙන පිළිතුරත් පැහැදිලියි.

“පියත් මට කිසිම බලපෑමක් කරන්නේ නැහැ. මගේ සීමාව මම දන්න බව ඔහු දන්න නිසා මට නීති දාන්න ඔහුට අවශ්‍ය වෙන්නේ නැහැ. අපි දෙන්නා බොහොම හොඳින් අපිව තේරුම් අරගෙන ඉන්නවා.”

අවුරුදු 19දී පටන් ගත් ගමන..

සඳනි 1970 Love Story සඳහා කැමරාව ඉදිරියේ පෙනී සිටියේ ඇයට වයස අවුරුදු 19ක්ව තිබියදීයි. එහි රූගත කිරීම් 2017දී ආරම්භ වූ අතර චිත්‍රපටය තිරගත වූයේ 2024දී.

එය දිගු කාලයක් තිරගත නොවීම ගැන ඇය විශේෂයෙන් කලකිරීමකට පත්ව සිටියේ නැහැ.

“මට ඩිසපොයින්ට් වෙන්න කාලයක් ආවේ නැහැ කිව්වොත් ඒ උත්තරය හරි. අරුණ ජයවර්ධන වගේ ප්‍රවීණයකුගේ චිත්‍රපටයක රඟපාන්න ලැබීමත් එක්ක මට ටෙලිනාට්‍යවලට වගේම කොමර්ෂල්වලටත් අවස්ථා ලැබුණා.”

සද්ධාමංගල සූරියබණ්ඩාර, ජයප්‍රකාශ් ශිවගුරුනාදන් වැනි ප්‍රවීණ නිර්මාණකරුවන් යටතේ වැඩ කිරීමට ලැබීමත් තමන් ලැබූ භාග්‍යයක් ලෙසයි ඇය සලකන්නේ.

අහිමිවීම් ගැනත් ඇයට ඇත්තේ වෙනස්ම අදහසක්…

කලා කටයුතු අතරතුර විදේශගත වීමට සිදුවීම නිසා ඇතැම් නිර්මාණ අවස්ථා මගහැරුණු බව සඳනි කියනවා. ඒ ගැන යම් පසුතැවීමක් තිබුණත්, ඇය ඒ දෙස බලන්නේ වෙනස්ම ආකාරයකින්.

“පසුතැවීම් නැත්තෙම නැහැ. ඒත් අපි යමක් මගහරින්නේ තවත් යමක් ලබාගන්නනේ. ඒ නිසා ඒ සමහර අහිමිවීම් ගැන දුක් නොවී අපට ලැබෙන දේ දිහා බලලා සතුටු වෙන්න පුළුවන්.”

සඳනිගේ කතාවේ විශේෂත්වයත් එතැනයි.

රේස් එකක් නැහැ.

තරගයක් නැහැ.

අනෙක් අය පසුකර යාමේ උත්සාහයක් නැහැ.

ඇයගේම වේගයකින්, ඇයගේම සීමාවන් තුළ, තමන්ට ලැබෙන අවස්ථා තෝරාගෙන හෙමින්… නමුත් ස්ථාවරව ඉදිරියට යන සඳනිගේ ගමන තව කොතැනකට ගෙන යාවිද කියන එක ඉදිරියේදී බලාගන්න

(වැඩි විස්තර හා ඡායාරූප සඳහා ක්ලික් කරන්න)

Gossiplanka.lk -News Maker in Sri Lanka

07/09/2026

🔥 ගල්අඟුරු ආනයනයේ අක්‍රමිකතාවලට වගකිවයුත්තන් වෝහාරික විගණනයකින් හඳුනාගන්න පුළුවන්

ශ්‍රී ලංකාවට ගල්අඟුරු ආනයනය කිරීමේදී සිදුව ඇති දූෂණ සහ අක්‍රමිකතාවලට වගකිවයුතු පුද්ගලයන් කවුරුන්දැයි වෝහාරික විගණනයක් මගින් නිශ්චිතවම හඳුනාගත හැකි බව ජ්‍යෙෂ්ඨ විගණන නිලධාරියෙකු ප්‍රකාශ කරයි. ගල්අඟුරු ආනයන ක්‍රියාවලියේ අක්‍රමිකතා පිළිබඳ සොයා බලන විශේෂ ජනාධිපති පරීක්ෂණ කොමිෂන් සභාව හමුවේ සාක්ෂි ලබා දෙමින් විගණකාධිපතිවරයා වෙනුවෙන් පෙනී සිටි එම නිලධාරියා පසුගියදා පස්වරුවේ මේ බව සඳහන් කළේය.

වසර 2009 සිට 2016 දක්වා කාල සීමාව ආවරණය වන පරිදි නිකුත් කරන ලද විශේෂ විගණන වාර්තාවේ අක්‍රමිකතාවලට සම්බන්ධ පුද්ගලයන්ගේ නම් සඳහන් නොවීම පිළිබඳව කොමිෂන් සභාව කළ විමසීමට පිළිතුරු දෙමින් හෙතෙම මෙම කරුණු අනාවරණය කළේය.

අමාත්‍ය මණ්ඩල අනුමැතිය සඳහා ගල්අඟුරු ආනයනයට අදාළ සංදේශ ඉදිරිපත් කිරීමේදී විවිධ ආයතන හා පුද්ගලයන් ලබා දෙන තොරතුරුවල නිවැරදිභාවය තහවුරු කරගැනීමේ වගකීම බලශක්ති ලේකම්වරුන්ට මෙන්ම අදාළ ඇමැතිවරුන්ට ද පවතින බව විගණන සොයාගැනීම් ඇසුරෙන් හෙතෙම පෙන්වා දුන්නේය. විශේෂයෙන්ම මහජන අභිලාෂයන්ට අනුව මහජන මුදල් වැය කිරීමේදී වත්කම්, වගකීම්, ආදායම්, වියදම් සහ හිමිකම් යන කරුණු පහ සම්බන්ධයෙන් විගණන ක්‍රමවේද ඔස්සේ විශේෂ අවධානයක් යොමු කරන බව ද ඔහු පැවසීය.

අදාළ විගණනයේදී රජයට සිදු වූ විශාල අලාභයන් රැසක් අනාවරණය වූ අතර, නිසි ලෙස කටයුතු කළේ නම් එම අලාභ වළක්වා ගැනීමට ඉඩ තිබූ බව ද නිරීක්ෂණය වී තිබේ. ලංකා ගල්අඟුරු සමාගම ප්‍රසම්පාදන ක්‍රියාවලිය සඳහා කල්තියා නිසි සැලසුම් සකස් නොකිරීම මෙන්ම ටෙන්ඩර් කැඳවීමේදී තාක්ෂණික හා ටෙන්ඩර් කමිටු ගනු ලැබූ අත්තනෝමතික සහ අදූරදර්ශී තීරණ මේ සඳහා ප්‍රධාන වශයෙන් හේතු වී ඇත. එමෙන්ම ටෙන්ඩර් අභියාචනා කමිටුවේ නිර්දේශ නොසලකා හරිමින් අමාත්‍ය මණ්ඩලය ගත් තීරණ සහ අමාත්‍ය මණ්ඩල තීරණවලට පිටින් ගල්අඟුරු ප්‍රසම්පාදන කමිටු කටයුතු කිරීම ද මෙම කාලය තුළ දක්නට ලැබුණු බව ජ්‍යෙෂ්ඨ විගණන නිලධාරියා වැඩිදුරටත් සඳහන් කළේය.

(first 150 characters...)

වැඩිදුර කියවන්න 👇
ඔබේ අදහස comment කරන්න 💬

forensic-audit-may-identify-those-responsible-for-coal-import-irregularities

07/09/2026

🔥 සීයාගේ කැබ් රථයට යටවූ එකහමාරේ සිඟිත්තිය මරු‍ට

කිලිනොච්චිය, උත්තිරපුරම්, ශිව නගර් ප්‍රදේශයේදී සීයා විසින් පණගන්වන ලද කැබ් රථයකට යටවීමෙන් වයස අවුරුදු එකහමාරක දැරියක් එම ස්ථානයේදීම අවාසනාවන්ත ලෙස ජීවිතක්ෂයට පත්වීමේ පුවතක් පෙරේදා (5) වාර්තා විය.

මෙලෙස අනතුරින් මියගොස් ඇත්තේ එම ප්‍රදේශයේම පදිංචිව සිටි රූබන් අනාමිකා නමැති කුඩා දැරියයි. තම සීයා කැබ් රථය පණගන්වා ඉදිරියට ධාවනය කිරීමට උත්සාහ කළ අවස්ථාවේදී නිවස තුළ සිටි මෙම දැරිය කැබ් රථය දෙසට දිවවිත් ඇති අතර, එහිදී රථයට යටවීමෙන් මෙම ඛේදනීය අනතුර සිදුව තිබේ.

කිලිනොච්චිය පොලිස් වසමට අයත් ඌරුතිරපුරම්, සිවනගර ප්‍රදේශයේදී සෙනසුරාදා පෙරවරු 11 ට පමණ සිදු වූ මෙම සිද්ධියෙන්
මියගිය දැරියගේ සිරුර පශ්චාත් මරණ පරීක්ෂණ කටයුතු සඳහා මේ වන විට කිලිනොච්චිය දිස්ත්‍රික් මහ රෝහලේ තැන්පත් කර ඇත. මෙම සිදුවීම සම්බන්ධයෙන් කිලිනොච්චිය පොලීසිය විසින් වැඩිදුර පරීක්ෂණ මෙහෙයවනු ලබයි.

(first 150 characters...)

වැඩිදුර කියවන්න 👇
ඔබේ අදහස comment කරන්න 💬

one-and-a-half-year-old-girl-dies-after-being-run-over-by-grandfathers-cab

07/09/2026

🔥 ගිනි කන්දක් විදාරණය වීමෙන් ජාකර්තා නුවර ප්‍රධාන ගුවන් තොටුපළ වැසී යයි

ඉන්දුනීසියාවේ ජාවා සහ සුමාත්‍රා දූපත් අතර පිහිටි සුන්ඩා සමුද්‍ර සන්ධියේ පිහිටි අනක් ක්‍රකටාවු (Anak Krakatau) ගිනි කන්ද පසුගිය සැප්තැම්බර් 4 වනදා රාත්‍රියේ සිට පැය 25 කට ආසන්න කාලයක් පුරා අඛණ්ඩව විදාරණය වීමත් සමඟ ප්‍රබල අළු වලාකුළක් වායුගෝලයට එක්වී තිබේ. අහසට විසිවූ අළු කිලෝමීටර් 15 ක් තරම් ඉහළට ගමන් කර ඇති අතර, කිලෝමීටර් 150 කට වඩා වැඩි දුරකට පැතිර යාම හේතුවෙන් ජාකර්තා නුවර ප්‍රධාන ගුවන් තොටුපළ ඇතුළු ගුවන් තොටුපළවල් කිහිපයක් තාවකාලිකව වසා දැමීමට බලධාරීහු පියවර ගත්හ.
මෙම හදිසි තත්ත්වය නිසා ලක්ෂ සංඛ්‍යාත ගුවන් මගීන් පිරිසක් දැඩි අපහසුතාවයට පත්ව සිටින නමුත්, වර්තමාන තත්ත්වය හමුවේ කිසිදු සුනාමි තර්ජනයක් නොමැති බව බලධාරීන් තහවුරු කරයි.
ANTARA News

ජූලි මස මුල් භාගයේ සිටම සක්‍රීය මට්ටමේ පැවැති මෙම ගිනි කන්දේ ප්‍රබලම විදාරණය සැප්තැම්බර් 4 වන සිකුරාදා රාත්‍රී 23:07 ට පමණ ආරම්භ වූයේ විශාල ගර්ජනා සහ ලාවා විසිවීම් සමඟිනි. ඉන්පසුව පැය 25 කට ආසන්න කාලයක් පැවැති මෙම අඛණ්ඩ විදාරණ තත්ත්වය සැප්තැම්බර් 6 වන ඉරිදා අලුයම නිමා වූ අතර, ඉන්පසුව නැවතත් සාමාන්‍ය මට්ටමේ කළු අළු පිටකිරීම් වාර්තා වී ඇත. කෙසේ වෙතත්, ඉදිරියේදීත් තවත් විදාරණයන් සිදුවීමේ ඉහළ ප්‍රවණතාවක් පවතින බව විද්‍යාඥයෝ පවසති. මෙම අළු වලාකුළු පළාත් පහක් පුරා පැතිර ගොස් ඇති අතර, ඇතැම් ප්‍රදේශවල ජනතාවට ඇස් දැවිල්ල වැනි රෝගී තත්ත්වයන් හටගැනීම නිසා පාසල් පන්ති අන්තර්ජාලය ඔස්සේ පැවැත්වීමටත්, ධීවරයන්ට මුහුදු යාමෙන් වළකින ලෙසටත් උපදෙස් දී තිබේ.
VOI.ID

ගිනි කඳු විදාරණයේ උපරිම අවස්ථාවේදී ජාකර්තා හි සුකර්නෝ-හට්ටා ඇතුළු ගුවන් තොටුපළවල් අටක් තාවකාලිකව වසා දැමීමට සිදුවිය. මෙහි ප්‍රතිඵලයක් ලෙස ගුවන් වාර දහස් ගණනක් අවලංගු වූ අතර, විශාල මගීන් සංඛ්‍යාවකට බලපෑම් එල්ල විය. සිංගප්පූරු එයාර්ලයින්ස් ඇතුළු ජාත්‍යන්තර ගුවන් සේවා කිහිපයක් ද ජාකර්තා වෙත යන ගමන් වාර අවලංගු කළ අතර, තත්ත්වය පාලනය කිරීම සඳහා දුම්රිය සහ බස් රථ වැනි විකල්ප ප්‍රවාහන සේවා යොදවා ඇත. වාතයේ ඇති අළු ප්‍රමාණය අඩු කිරීම සඳහා කෘතිම වැසි ඇතිකිරීමේ පියවර කෙරෙහි ද රජයේ අවධානය යොමු වී තිබේ.
The Guardian

ගිනි කන්ද අවට කිලෝමීටර් 3 ක ආරක්ෂිත කලාපයක් පනවා ඇති අතර, සංචාරකයන්ට සහ ප්‍රදේශවාසීන්ට එම සීමාවට ඇතුළු වීම තහනම් කර ඇත. 2018 වසරේදී මෙම ගිනි කන්දේ කොටසක් මුහුදට කඩා වැටීමෙන් ඇතිවූ දරුණු සුනාමි තත්ත්වය මතක් කරමින් ජනතාව භීතියට පත්ව සිටියද, වර්තමාන නව ගිනි කඳු කට තවමත් ප්‍රමාණයෙන් කුඩා බැවින් මුහුදු මට්ටමේ වෙනසක් හෝ සුනාමි අවදානමක් නැති බව කාලගුණ සහ භූ විද්‍යා දෙපාර්තමේන්තු තහවුරු කර ඇත. එබැවින් ව්‍යාජ සුනාමි කටකතාවලට නොරැවටෙන ලෙස වෙරළබඩ ජනතාවගෙන් ඉල්ලා සිටියි.

ක්‍රකටාවු ගිනි කන්දේ ඉතිහාසය දෙස බැලීමේදී, 1883 වසරේ සිදුවූ දැවැන්ත විදාරණයෙන් 36,000 කට අධික පිරිසක් ජීවිතක්ෂයට පත්වූ අතර, එහිදී පැවැති ගිනි කන්දෙන් තුනෙන් දෙකක්ම විනාශ වී මුහුදට බිඳ වැටිණි. පසුව 1927 දී මුහුදු පතුලෙන් නැවත මතුවූ නව ගිනි කඳු කට "අනක් ක්‍රකටාවු" හෙවත් "ක්‍රකටාවුගේ දරුවා" ලෙස නම් කෙරිණි. වසර ගණනාවක් පුරා ක්‍රමයෙන් වර්ධනය වූ මෙම ගිනි කන්ද 2018 දී නැවත වරක් කඩා වැටීමෙන් 400 කට වැඩි පිරිසක් මියගියහ. වර්තමානයේ නැවත ගොඩනැගෙමින් පවතින මෙම ගිනි කන්ද, 2018 වසරේ පැවැති තරම් විශාල නොවන බැවින් වත්මන් විදාරණය ගුවන් ගමනාගමනයට බාධා කළ ද දරුණු සුනාමි තත්ත්වයක් ඇති කිරීමට සමත් නොවන බව භූ විද්‍යාඥයින්ගේ නිගමනයයි.

(first 150 characters...)

වැඩිදුර කියවන්න 👇
ඔබේ අදහස comment කරන්න 💬

jakartas-main-airport-closed-due-to-volcanic-eruption

07/09/2026

🔥 මැදපෙරදිග අර්බුදයෙන් මතුවූ බාහිර ආර්ථික බලපෑම මැද රුපියල බේරාගත්තා

මැදපෙරදිග අර්බුදයෙන් මතුවූ බාහිර ආර්ථික බලපෑම් හමුවේ වුවද ශ්‍රී ලංකා රුපියල ස්ථාවර මට්ටමක පවත්වා ගනිමින් ශ්‍රී ලංකා මහ බැංකුව 2026 අගෝස්තු මාසයේදී දේශීය විදේශ විනිමය වෙළඳපොළෙන් ඇමෙරිකානු ඩොලර් මිලියන 579 ක ශුද්ධ විදේශ විනිමය ප්‍රමාණයක් මිලදී ගෙන ඇත. මෙය 2025 ජනවාරි මාසයෙන් පසුව තනි මාසයක් තුළ මහ බැංකුව විසින් සිදු කරන ලද ඉහළම විදේශ විනිමය මිලදී ගැනීම ලෙස වාර්තා වේ.
අතීතයේදී මෙන් රුපියල ආරක්ෂා කර ගැනීම සඳහා විදේශ සංචිත වියදම් කිරීම වෙනුවට, රුපියලේ පැවැති ස්ථාවර භාවය ප්‍රයෝජනයට ගනිමින් සංචිත වැඩි කර ගැනීමට මුදල් බලධාරීන්ට මෙහිදී හැකියාව ලැබී තිබේ.

මෙවර අගෝස්තු මාසයේ සටහන් වූ අගය, 2026 පෙබරවාරි මාසයේදී වාර්තා වූ ඩොලර් මිලියන 461 සහ 2025 අගෝස්තු මාසයේදී වාර්තා වූ ඩොලර් මිලියන 356 යන පෙර ඉහළම අගයන් අභිබවා ගොස් ඇත. මේ සමඟ 2026 වසරේ මුල් මාස අට තුළ මහ බැංකුව විසින් සිදු කරන ලද ශුද්ධ ඩොලර් මිලදී ගැනීම් ප්‍රමාණය ඩොලර් බිලියන 1.48 ඉක්මවීය. 2025 මුළු වසර සඳහාම මහ බැංකුව සටහන් කර තිබූ ශුද්ධ මිලදී ගැනීම් ප්‍රමාණය ඩොලර් බිලියන 2 ක් විය.

ශ්‍රී ලංකාව මීට පෙර මුහුණ දුන් ගෙවුම් ශේෂ අර්බුද හමුවේ මහ බැංකුව අනුගමනය කළ ක්‍රියාමාර්ගවලට වඩා පැහැදිලි වෙනසක් මෙවර මිලදී ගැනීම්වල මට්ටමෙන් පෙන්නුම් කරයි. පෙර පැවති අර්බුදයන්හිදී රුපියල පාලනයකින් තොරව අවප්‍රමාණ වීම වැළැක්වීම සඳහා මහ බැංකුව සිදු කළේ තම විදේශ සංචිත ක්ෂය කරමින් ශුද්ධ ඩොලර් විකුණුම්කරුවෙකු ලෙස කටයුතු කිරීමයි. එමගින් සංචිත ශීඝ්‍රයෙන් අඩුවී ගිය අතර, වෙළඳපොළට මැදිහත් වීමේ හැකියාව අවසන් වූ පසු රුපියල නැවතත් දැඩි පීඩනයකට ලක් විය. කෙසේ වෙතත්, මෙවර බාහිර බලපෑම් අවශෝෂණය කරගනිමින් ශුද්ධ මිලදී ගැනීම් පවත්වාගෙන යාමට සහ විදේශ සංචිත ඉහළ නංවා ගැනීමට මහ බැංකුවට ඉඩකඩ සැලසී ඇත.

පෙබරවාරි අග භාගයේදී මැදපෙරදිග කලාපයේ හටගත් ගැටුම් උග්‍රවීමත් සමඟ මෙරට බාහිර ආර්ථික අංශයට දැඩි පීඩනයක් එල්ල විය. ඇමෙරිකානු ඩොලරයට සාපේක්ෂව රුපියලේ අගය 2026 පෙබරවාරි අවසානයේදී 0.2% ක සුළු අධිප්‍රමාණයක පැවති නමුත්, මාර්තු අවසාන වන විට එය 1.6% කින්ද, අප්‍රේල් අවසාන වන විට 2.9% කින්ද අවප්‍රමාණ විය. මෙම අවප්‍රමාණ වීම මැයි අවසානයේදී 5.4% දක්වා වැඩි වූ අතර, ජූනි අවසානය වන විට එය 7.9% ක උපරිම අගයකට ළඟා විය.

එතැන් සිට රුපියල නැවතත් ස්ථාවර මට්ටමකට පැමිණීමට පටන් ගත්තේය. මැදපෙරදිග අර්බුදයේ පීඩනය තවදුරටත් පැවැතුණද, ජූලි අවසානය වන විට වසරේ මුල් කාලයේ සිට රුපියලේ පැවති අවප්‍රමාණ වීම 7.8% දක්වාත්, අගෝස්තු අවසානය වන විට 5.5% දක්වාත් අඩුවිය. 2025 මුළු වසර පුරාම ඇමෙරිකානු ඩොලරයට සාපේක්ෂව රුපියල අවප්‍රමාණ වී තිබුණේ 5.6% කිනි.

මහ බැංකුවේ ශුද්ධ ඩොලර් මිලදී ගැනීම් වසර පුරා එක සමානව සිදු නොවුණි. රුපියල වේගයෙන් අවප්‍රමාණය වූ කාලපරිච්ඡේදය හා සමගාමීව, අප්‍රේල් සහ මැයි මාසවලදී මහ බැංකුව ශුද්ධ විකුණුම්කරුවෙකු ලෙස කටයුතු කරමින් පිළිවෙලින් ඩොලර් මිලියන 12.9 ක් සහ ඩොලර් මිලියන 211.3 ක් වෙළඳපොළට මුදාහැරියේය. කෙසේ වෙතත්, රුපියල ස්ථාවර වීමත් සමඟ ජූනි මාසයේදී නැවතත් ඩොලර් මිලියන 70.5 ක ශුද්ධ මිලදී ගැනීම් සිදු කළ මහ බැංකුව, ජූලි මාසයේදී එය ඩොලර් මිලියන 348.6 දක්වාත්, අගෝස්තු මාසයේදී ඩොලර් මිලියන 579 ක වාර්තාගත අගයක් දක්වාත් වේගවත් කළේය.

(first 150 characters...)

වැඩිදුර කියවන්න 👇
ඔබේ අදහස comment කරන්න 💬

the-rupee-was-saved-amid-the-external-economic-impact-arising-from-the-middle-east-crisis

07/09/2026

පසුගිය කාලයේ ඇයව අපට මුණගැසුණේ වාලම්පුරි සිනමා නිර්මාණයෙන් දිල්ෂාර ජයමාන්න අධ්‍යක්‍ෂණය කළ රසික ජිනසේන නිෂ්පාදනය කළ “ක්‍රිකට් සාදු” සිනමා නිර්මාණයෙන් ද ඇයව අපට මේ දිනවල මුණගැසෙනවා. කාලෙන් කාලෙට වෙනස්ම සිනමා නිර්මාණවලින් ඔබ හමුවට එන ඇය නමින් උදයන්ති කුලතුංග. ඇයත් සමග මේ කතාබහ ක්‍රිකට් සාදු ගැනයි.

උදයන්ති ක්‍රිකට් සාදු චිත්‍රපටයට ආරාධනාව ලැබුණේ කොහොමද?

ක්‍රිකට් සාදු අධ්‍යක්‍ෂක දිල්ෂාර සහ නිෂ්පාදක රසික හරහා තමයි මට මේ ආරාධනාව ලැබුණේ. මේ චරිතය සඳහා කිහිපදෙනෙක්ම යෝජනා වෙලා තිබුණත් අවසානයේ මට මේ සඳහා ආරාධනාව ලැබුණා.

මේක ටිකක් වෙනස්ම කතා තේමාවක්. මේ වගේ නිර්මාණයකට ආරාධනාවක් ලැබුණහම මොකද හිතුණේ?

නළු, නිළියකට චිත්‍රපටයක රඟපාන්න ලැබෙනවා කියන්නේ පුදුම අවස්ථාවක්නේ. පිටපත කියවලා බලන කොට හරිම ආදරණීය මවකගේ චරිතයක් තමයි මට තිබුණේ. මොකද දැන් මමත් අම්මා කෙනෙක්. ඒක හින්දා මම හරි ආසාවෙන් මේ චරිතය භාර ගත්තා.

අම්මා කෙනෙක් විදිහට ‘ක්‍රිකට් සාදු’ චිත්‍රපටය ගැන දැනුන හැඟීම මොන වගේද?

ඇත්තටම අම්මා කෙනෙක් වුණහම තමයි ඒක ඇත්තටම තේරෙන්නේ. අම්මලාට ජීවිතයෙන් භාගයක්ම ඔවුන්ගේ ලෝකය වෙන්නේ දරුවොනේ. දරුවන්ගේ හීන වෙනුවෙන්නේ අපි දැන් මහන්සි වෙන්නේ. අනික ලංකාවේ සංස්කෘතිය අනුව පවුල මූලික කරගත් සමාජයක් තියෙන්නේ. මේ කතාව මට හරි ළඟයි. ලංකාව ගැන ලෝකය දැන ගත්තෙත් ක්‍රිකට් එක්කනේ. මගේ දරුවත් කවදාහරි දවසක ක්‍රිකටර් කෙනෙක් වෙනවා නම් මම ආසයි. ලස්සන වැඩක්.

‘ක්‍රිකට් සාදු’ මාධ්‍ය දර්ශනයේදී ලැබුණේ මොනවගේ ප්‍රතිචාරද?

‘ක්‍රිකට් සාදු’ බලද්දී ඇත්තටම මට ඇඬුණා. මටත් හිතාගන්න බැහැ මම ටිකක් වටපිට බලන කොට හැමෝගෙම ඇස්වල කඳුළු. චිත්‍රපටය රඟපාන අවස්ථාවේදී ආපු හැඟීමම ෆිල්ම් හෝල් එකේ ඉඳල බලද්දී ආවා. ලොකු ස්ක්‍රීන් එකේ දකිද්දී මම නෙමෙයි වගේ තමයි දැනුණේ. ඒ දරුවගෙයි අම්මාගෙයි තියෙන බැඳීමට හැම කෙනෙකුගේම ඇහැකින් කඳුළක් වැටෙනවා වගේ මම දැක්කා. හැමෝම කිව්වා කාලෙකින් ඔයාව චිත්‍රපටයකින් දැක්කෙ කියලා. අනික මමත් හිතුවේ නැහැ එච්චර ප්‍රතිචාර හම්බවෙයි කියලා.

වාලම්පුරි චිත්‍රපටයෙන් පස්සේ නේද ඔබේ චිත්‍රපටයක් තිරගත වෙන්නේ?

ඔව්. ඔව්. මම අන්තිමට රඟපෑවේ වාලම්පුරි චිත්‍රපටයේ. ඊට පසුව තමයි දිල්ෂාරගේ ‘ක්‍රිකට් සාදු’ චිත්‍රපටයට මට ආරාධනාවක් ලැබෙන්නේ. ඇත්තටම ටික කාලයකට පසුව තමයි චිත්‍රපටයක් තිරගත වෙන්නේ.

නිහඬව හිටපු කාලය ගැන මොකද හිතෙන්නේ?

ඇත්තටම මම නිහඬව හිටියේ විවාහ වෙලා මට දරුවෙක් ලැබුණ හින්දා. මොකද දරුවා පුංචි හින්දා එයාට මූලිකත්වය දෙන්න ඕනෑ. දැන් නම් බබාට අවුරුදු හතරයි. බබාට අවුරුදු තුනහමාරක් වෙනකම් මම වැඩ කළේ නැහැ. ක්‍රිකට් සාදු එක්ක ආපහු කට්ටියට මාව මතක් වෙලා තියෙනවා. දැන් මට චිත්‍රපට දෙකකට ආරාධනා ලැබුණා හරිම සතුටුයි. ක්‍රිකට් සාදු එක්ක තමයි මට හැමදේම හම්බ වුණේ.

ක්‍රිකට් සාදු උදයන්තිගේ සිනමා ගමන අලුත් කළාද?

ඔව්. ඇත්තටම මට එහෙම හිතෙනවා. ක්‍රිකට් සාදු මට ලැබුණු ලොකු තෑග්ගක් වගේ. දැන් ඉස්සරහට වඩා දක්‍ෂ නළු නිළියෝ ගොඩාක් ඉන්නවා. ඒ අතරතුරේ මට අවස්ථාවක් ලබාදීම සම්බන්ධයෙන් නිෂ්පාදක කණ්ඩායමට සහ අධ්‍යක්‍ෂවරයාට ස්තුතිවන්ත වෙනවා.

වාලම්පුරි චිත්‍රපටය මතක් වෙනකොට මොකද හිතෙන්නේ?

වාලම්පුරි චිත්‍රපටයටත් මම හරි ආසයි. දක්‍ෂ ඒ වගේම ප්‍රතිභාපූර්ණ නළු නිළියෝ ටිකක් එක්ක තමයි ඒකේ රඟපාන්න මට හම්බවුණේ.

වාලම්පුරි නිර්මාණයට ලැබුණේ මොනවගේ ප්‍රතිචාරද?

මට ලොකුම ප්‍රතිචාරය ලැබුණේ මහේන්ද්‍ර පෙරේරා අයියගෙන්. මට මහේන්ද්‍ර පෙරේරා අයියා එක්ක රඟපාන්න අවස්ථාව හම්බ වෙලා නැහැ. ඔහු මට කිව්වා “යකෝ දක්‍ෂ කෙල්ලෙක්නේ, හොඳට රඟපාල තියෙනවා” කියලත් කිව්වා.

පසුගිය කාලයේ වෙනස්ම චිත්‍රපට ටිකකට ආරාධනා ලැබුණා නේද?

සිනමා නිර්මාණයක පුංචි චරිතයක් ලැබුණත් මම ඒකට හරි ආසයි. ඒ චරිතවලට ලැබෙන ප්‍රේක්‍ෂක ප්‍රතිචාර වගේම ක්‍ෂේත්‍රයේ අයගෙන් ලැබෙන ප්‍රතිචාර තමයි අපිව ජීවත් කරවන්නේ.

ඔබේ රංගන ජීවිතය ගැන ආපසු හැරී බැලුවොත්?

දැන් තමයි මට හොඳ නිර්මාණවලට ආරාධනා ලැබෙන්නේ කියලා හිතෙනවා. ටෙලි නාට්‍ය නම් රැසක මම රඟපාලා තියෙනවා. ඒ ලැබුණු අත්දැකීම් එක්ක මට හිතෙනවා තරුණ කාලේ රඟපානවාට වඩා පළපුරුද්දත් එක්ක මට යමක් කරන්න පුළුවන් කියලා. ඒ හින්දා දැන් චරිතයක් ලැබුණහම ඒ ගැන දැනෙන ප්‍රමාණය වැඩියි. මම හිතනවා ආපු ගමනත් එක්ක මගේ රඟපෑමේ කටයුතු දැන් වර්ධනය වෙලා කියලා.

ටෙලි නාට්‍ය රංගන වැඩකටයුතු එහෙම කොහොමද?

මේ දවස්වල මම එක ටෙලි නාට්‍යයක වැඩ කරනවා. දරුවත් එක්ක ගෙදර ඉන්න හින්දා ගොඩක් වැඩ භාරගෙන නැහැ. නිවන්ත ප්‍රසාරගේ සිරී ටෙලි නාට්‍යය හිරු නාලිකාවේ විකාශනය වෙනවා. ඒකටත් හොඳ ප්‍රතිචාර ලැබෙනවා.

ක්‍රිකට් සාදු ගැන මොන වගේ බලාපොරොත්තුවක්ද තියෙන්නේ?

පිරිසක් එකතු වෙලා චිත්‍රපටයක් නිර්මාණය කරනවා කියන්නේ ලොකු දෙයක්. දින සියයක් චිත්‍රපටය දුවනවා නම් කලාකාරිනියක් හැටියට මට තියෙන ලොකුම සතුට ඒක තමයි. අපි කරපු දේ ප්‍රතිඵලයක් හැටියට නිෂ්පාදකතුමාවත් ආරක්‍ෂා වෙලා ඔහුට තව චිත්‍රපටයක් කරන්න ජවය ලැබෙන්න කියලා තමයි ප්‍රාර්ථනා කරන්නේ. ක්‍රිකට් සාදු ලස්සන නිර්මාණයක්. ඒක හැමෝම බැලුවොත් හොඳයි කියලා හිතෙනවා.

(වැඩි විස්තර හා ඡායාරූප සඳහා ක්ලික් කරන්න)

Gossiplanka.lk -News Maker in Sri Lanka

07/09/2026

🔥 පූජ්‍ය අම්පිටියේ සුමනරතන හිමි අත්අඩංගුවට

මඩකලපුව භූ විද්‍යා සමීක්ෂණ හා පතල් කාර්යාංශයේ නිලධාරීන්ගේ රාජකාරියට බාධා කළ බවට එල්ල වූ චෝදනාවක් මත මඩකලපුව මංගලාරාම විහාරාධිපති පූජ්‍ය අම්පිටියේ සුමනරතන හිමියන් අත්අඩංගුවට ගැනීමට මඩකලපුව පොලීසිය පියවර ගෙන තිබේ.

මෙලෙස අත්අඩංගුවට ගත් උන්වහන්සේ මඩකලපුව මහේස්ත්‍රාත් අධිකරණය හමුවට ඉදිරිපත් කිරීමට කටයුතු යොදා ඇති අතර, මෙය පොලිස් පරීක්ෂණ මට්ටමේ පවතින නීතිමය ක්‍රියාමාර්ගයක් මිස අධිකරණය මගින් ලබාදුන් අවසාන තීන්දුවක් නොවන බව වාර්තා වේ.

අමරපුර ශ්‍රී කළ්‍යාණිවංශික මහා නිකාය නියෝජනය කරන පූජ්‍ය අම්පිටියේ සුමනරත්න හිමියන්, මඩකලපුව සහ අම්පාර යන දිස්ත්‍රික්ක මුල් කරගනිමින් බෞද්ධ විහාරස්ථාන, ඉඩම් හිමිකම් මෙන්ම පුරාවිද්‍යාත්මක හා ජනවාර්ගික ගැටලු සම්බන්ධයෙන් නිතර අදහස් දක්වන යතිවරයන් වහන්සේනමකි. උන්වහන්සේ විසින් සිදුකරනු ලබන ප්‍රසිද්ධ ප්‍රකාශ සහ විවිධ සිදුවීම් හේතුවෙන් කාලාන්තරයක් තිස්සේ මෙරට මහජනතාවගේ මෙන්ම මාධ්‍යවල විශේෂ අවධානයට ලක්වූ චරිතයක් බවට පත්ව සිටිති.

විශේෂයෙන්ම දෙමළ ජනතාව සම්බන්ධයෙන් උන්වහන්සේ සිදුකළ බව කියන ආන්දෝලනාත්මක ප්‍රකාශ කිහිපයක් හේතුවෙන් 2023 වසරේදී විශාල සමාජ කතාබහක් නිර්මාණය විය. එහිදී එම ප්‍රකාශයන්ට එරෙහිව සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුති (ICCPR) පනත යටතේ නීතිමය පියවර ගත හැකිද යන්න පිළිබඳවද ප්‍රසිද්ධ විවාදයක් මතුව තිබුණි.

(first 150 characters...)

වැඩිදුර කියවන්න 👇
ඔබේ අදහස comment කරන්න 💬

venerable-ampitiye-sumanarathana-thero-arrested

07/09/2026

🔥 නවදිල්ලියේ සරසවි නේවාසිකාගාර ගොඩනැගිල්ලක් කඩාවැටී 6 ක් මරුට

නවදිල්ලියේ සවුත් කැම්පස් පරිශ්‍රය ආසන්නයේ පිහිටි සත්‍යා නිකේතන් ප්‍රදේශයේ තට්ටු පහකින් යුත් පෞද්ගලික සිසු නේවාසිකාගාර ගොඩනැගිල්ලක් කඩා වැටීමෙන් පුද්ගලයින් හයදෙනෙකු මියගොස් තවත් කිහිපදෙනෙකු තුවාල ලබා තිබේ. 2026 සැප්තැම්බර් 6 වන ඉරිදා පස්වරු 1:30 ට පමණ මෙම අනතුර සිදුවී ඇති අතර, "හොස්ටල් ඩේස්" ලෙස හැඳින්වෙන මෙම ගොඩනැගිල්ලේ බිම් මහලේ අලුත්වැඩියා කටයුතු සිදුකෙරෙමින් පැවති අවස්ථාවේදී මෙම හදිසි කඩා වැටීම සිදුව ඇත.
අලුතින් සොයාගත් මෘතදේහයක් ද සමඟින් මරණ සංඛ්‍යාව හය දක්වා ඉහළ ගොස් ඇති අතර, සඳුදා උදෑසන වන විටත් සුන්බුන් අතර සිරවී සිටින පිරිස් මුදාගැනීමේ මෙහෙයුම් තවදුරටත් ක්‍රියාත්මක වේ.

අනතුර සිදුවන අවස්ථාවේදී සිසුන් සහ ගොඩනැගිලි කම්කරුවන් ඇතුළු 30 ත් 50 ත් අතර පිරිසක් ගොඩනැගිල්ල තුළ සිට ඇති බව පැවසේ. ඉරිදා දිනයක් බැවින් දේශන නොමැති නිසා බොහෝ සිසුන් තමන්ගේ කාමර තුළ රැඳී සිට ඇත. සුන්බුන් අතර සිරවූ ඇතැම් පිරිස් දුරකථන ඇමතුම් ලබා දෙමින් උපකාර ඉල්ලා ඇති අතර, එක් සිසුවෙකු සිරවී සිටියදීම තත්පර 11 ක හදිසි වීඩියෝ ඇමතුමක් ලබා ගනිමින් තමා මුදාගන්නා ලෙස ඉල්ලා තිබේ. සිද්ධියෙන් තුවාල ලැබූවන් AIIMS ජේපීඑන් ඇපෙක්ස් ට්‍රෝමා මධ්‍යස්ථානය වෙත ඇතුළත් කර ඇති අතර, ඉන් පස්දෙනෙකු රෝහලට ඇතුළත් කරන විටත් මියගොස් සිටි අතර තවත් අයෙකු පසුව මියගොස් ඇත.

අනතුර සිදුවූ මොහොතේ සිට ජාතික ආපදා ප්‍රතිචාර බලකාය (NDRF), දිල්ලි ගිනි නිවන සේවය, පොලිසිය සහ ප්‍රදේශවාසීන් එක්ව නොනවත්වා මුදාගැනීමේ කටයුතුවල නිරත වේ. අතුරුදහන් වූවන් සෙවීම සඳහා නිලධාරීන් විසින් විශේෂ ශ්‍රවණ උපකරණ, සෙවුම් සුනඛ කණ්ඩායම්, කැමරා පද්ධති, ගෑස් කටර් සහ ඔක්සිජන් සිලින්ඩර භාවිත කරනු ලබයි. එක් මහලක් තවත් මහලක් මතට පැතලි ලෙස කඩා වැටෙන "පෑන්කේක්" ස්වරූපයෙන් මෙම ගොඩනැගිල්ල කඩා වැටී ඇති බැවින්, යටවී සිටින පිරිස්වලට තවදුරටත් හානි සිදු නොවන සේ ජේසීබී යන්ත්‍ර ප්‍රවේශමෙන් යොදා ගනිමින් සුන්බුන් ඉවත් කෙරේ.

අවුරුදු 40 ත් 55 ත් අතර පැරණි මෙම ගොඩනැගිල්ල මුලින්ම බිම් මහල සහ පළමු මහල සඳහා පමණක් අනුමැතිය ලබාගෙන තිබුණද, පසුව නීති විරෝධී ලෙස තට්ටු පහක් දක්වා උසස් කර තිබේ. පහළ බිම් මහලේ ජලය පිරී තිබීම සහ එහි සිදුකළ කැණීම් හා අලුත්වැඩියා කටයුතු හේතුවෙන් ගොඩනැගිල්ලේ පදනම දුර්වල වී මෙම අනතුර සිදුව ඇති බව දිල්ලි මහ ඇමතිනී රේඛා ගුප්තා මහත්මිය ප්‍රකාශ කළාය. මීට පෙරද ගොඩනැගිල්ලේ අලුත්වැඩියා කටයුතු සඳහා සිසුන් ඉවත් කර තිබූ අතර, පසුව එය නැවත සිසු නේවාසිකාගාරයක් ලෙස විවෘත කර ඇත. අසල පිහිටි ආරක්ෂිත කැමරාවල සටහන්ව ඇත්තේ තත්පර කිහිපයක් ඇතුළත සම්පූර්ණ ගොඩනැගිල්ලම දූවිලි වලාකුළක් නංවමින් බිමට සමතලා වූ ආකාරයයි.

මෙම සිද්ධිය සම්බන්ධයෙන් ගොඩනැගිල්ලේ හිමිකරු වන හරිරාම් බන්සාල් සහ තවත් කිහිපදෙනෙකුට එරෙහිව දණ්ඩ නීති සංග්‍රහයේ මනුෂ්‍ය ඝාතනය, මහජන පීඩාව සහ ආරක්ෂාව අනතුරේ හෙලීම යන චෝදනා යටතේ නඩුවක් ලියාපදිංචි කර ඇත. සිද්ධියෙන් පසු පලාගොස් සිටින හිමිකරු සෙවීම සඳහා පොලිසිය විසින් විශේෂ පරීක්ෂණ ආරම්භ කර ඇති අතර නිරීක්ෂණ නිවේදනයක්ද (lookout circular) නිකුත් කර තිබේ. මේ අතර, දිල්ලි මහා නගර සභාව (MCD) විසින් අදාළ ගොඩනැගිල්ල න භයානක ස්ථානයක් ලෙස ප්‍රකාශයට පත් කර දින තුනක් ඇතුළත එය කඩා දැමීමට නියෝග කර ඇති අතර, නගරය පුරා ඇති තට්ටු හතරකට වැඩි නීති විරෝධී ඉදි කිරීම් සීල් තැබීමටද නියෝග කර ඇත.

සිද්ධිය සම්බන්ධයෙන් මහේස්ත්‍රාත් පරීක්ෂණයක් නියෝග කර ඇති මහ ඇමතිනිය, පොදුජන භාවිතය සඳහා යොදාගන්නා ගොඩනැගිලි සහ නේවාසිකාගාර සඳහා වරින් වර ව්‍යුහාත්මක ආරක්ෂණ සහතික ලබාගැනීම අනිවාර්ය කරන නව ප්‍රතිපත්තියක් සකස් කරන බව පැවසුවාය. ABVP සහ NSUI වැනි ශිෂ්‍ය සංවිධාන ද සහන සේවාවලට එක්වෙමින් ශිෂ්‍ය නේවාසිකාගාරවල ආරක්ෂාව තහවුරු කරන ලෙස ඉල්ලා සිටියි. පටු වීදි සහ පාලනයකින් තොර නීති විරෝධී ඉදි කිරීම් බහුල ඉන්දියානු නගරවල මෙවැනි ගොඩනැගිලි කඩා වැටීම් නිරන්තරයෙන් සිදුවන අතර, මෙම වසරේ දිල්ලියෙන් වාර්තා වූ තවත් මෙවැනිම අනතුරු කිහිපයකින් පසු මෙම ඛේදවාචකය වාර්තා වේ.

(first 150 characters...)

වැඩිදුර කියවන්න 👇
ඔබේ අදහස comment කරන්න 💬

6-killed-as-university-hostel-building-collapses-in-new-delhi

07/09/2026

🔥 GOV PAY ට සමාන හොර වෙබ් අඩවිය ගැන විමසිලිමත්වන්නැයි පොලිසිය දන්වයි

රථවාහන පදවන්නන්ගේ මුදල් සහ සංවේදී පෞද්ගලික තොරතුරු සොරකම් කිරීමේ අරමුණින්, GOV PAY පද්ධතියට සමාන වන ලෙස සකස් කරන ලද ව්‍යාජ වෙබ් අඩවියක් පිළිබඳව පොලිසිය විසින් මහජනතාවට අනතුරු ඇඟවීමක් සිදු කර ඇත.

ජංගම දුරකථන වෙත ලැබෙන එස්.එම්.එස්. (SMS) සහ වට්ස්ඇප් (WhatsApp) පණිවිඩවල ඇති සබැඳි (links) ඔස්සේ මෙම ව්‍යාජ වෙබ් අඩවිය ප්‍රචාරය වන බව පොලිසිය අනාවරණය කරයි. රථවාහන වැරදි සඳහා අදාළ දඩ මුදල් ගෙවන ලෙස උපක්‍රමශීලීව දන්වමින්, මෙම වංචනික වේදිකාව හරහා මුදල් ලබා ගැනීමට ජනතාව රැවටීමට ලක් කර තිබේ.

GOV PAY හරහා ගෙවීම් සිදු කිරීම සඳහා වෙනත් කිසිදු වෙනම වෙබ් අඩවියක් නොමැති බව පෙන්වා දෙන පොලිසිය, කිසිදු සැකකටයුතු සබැඳියක් ක්ලික් කිරීමෙන් හෝ තමන්ගේ මූල්‍ය හා පෞද්ගලික තොරතුරු ලබා දීමෙන් වළකින ලෙස රථවාහන පදවන්නන්ගෙන් ඉල්ලා සිටියි.

රථවාහන වැරදි සඳහා වන දඩ මුදල් අන්තර්ජාලය ඔස්සේ ගෙවීමේ ක්‍රියාවලිය වඩාත් පහසු කිරීම සහ මූල්‍ය වංචා සිදු වීමේ අවදානම අවම කිරීමේ අරමුණින් GOV PAY පද්ධතිය මෙම වසරේ මුලදී හඳුන්වා දෙන ලදී.

මේ පිළිබඳව අදහස් දක්වමින් රථවාහන භාර නියෝජ්‍ය පොලිස්පති ඩබ්ලිව්. පී. ජේ. සේනාධීර මහතා ප්‍රකාශ කළේ රථවාහන පදවන්නන් මේ සම්බන්ධයෙන් විශේෂයෙන් ප්‍රවේශම් විය යුතු බවයි. නිල වේදිකාව හැර වෙනත් කිසිදු වෙබ් අඩවියක් ඔස්සේ GOV PAY ගෙවීම් සිදු නොකළ යුතු බව ද ඔහු අවධාරණය කළේය.

(first 150 characters...)

වැඩිදුර කියවන්න 👇
ඔබේ අදහස comment කරන්න 💬

police-warn-of-gov-pay-fraudulent-website

Gossip Lanka News

07/09/2026

07/09/2026

07/09/2026

07/09/2026

07/09/2026

07/09/2026

07/09/2026

07/09/2026

07/09/2026

07/09/2026

Address

Telephone

Website

Alerts

Contact The Business

Shortcuts

Share

Category

Listing takedown request