28/02/2026
අලුත් පොත ගැන ඉඟි අංක - 2
මොනවද මේ චක්ර හත?
මිනිස් සිරුර කියලා කියන්නෙ පටක සහ අවයවවල එකතුවක් විතරක් නෙමෙයි. ගොඩක් සංකීර්ණ ශක්ති ජාලයක් තියෙන පද්ධතියක්. පුරාණ ඉගැන්වීම් වලට අනුව ශක්ති ශරීරයක "ශක්ති සුළි" (Energy Vortexes) කියලා ප්රධාන මධ්යස්ථාන තියෙනවා. මේවා තමයි 'චක්ර' කියලා හඳුන්වන්නෙ. මේවා තමයි අපේ ජීව බලය නැතිනම් ශක්තිය ගලා යාමේ ප්රධාන මර්මස්ථාන ලෙස ක්රියා කරන්නෙ. අද කාලෙ මානසික සහ කායික සුවය පවත්වගෙන යන්න නම් මේ ශක්ති කේන්ද්රයන් තුලනය කරන්න එක අත්යවශ්ය වෙනවා.
සමස්තයක් විදියට අපේ සිරුරේ චක්ර 114 ක් තියෙනවා කියලා කියනවා. මේ අතරින් ප්රධාන චක්ර හත Master Hubs එහෙම නැත්තම් පාලන මධ්යස්ථාන විදියට ක්රියා කරනවා. ඒ එක්ක සම්බන්ධ ද්විතීයික චක්ර 21 ක් සහ තෘතියික චක්ර 86 ක් ශක්ති නාලිකා මගින් එකිනෙකට සම්බන්ධයි.
මේ සමස්ත ශක්ති පද්ධතියම තියෙන්නෙ අපේ කොඳු ඇට පෙළ දිගේ සිරස් අතට පෙළගැස්විලා.
කොඳු ඇට පෙළේ පහළ කෙළවරින් පටන් ගන්න චක්ර පද්ධතිය අපේ හිස් මුදුන දක්වා විහිදෙනවා. මේක භෞතික පිහිටීමක් විතරක් නෙමෙයි. චක්ර හත ආධ්යාත්මික වර්ධනට මඟ පෙන්වනවා.
මේ තියෙන්නෙ ප්රධාන චක්ර හතේ අනුපිළිවෙල සහ ඒවායේ මූලික ගුණාංග.
01. මූලාධාර චක්රය (Muladhara):
පිහිටීම: කොඳු ඇට පෙළේ පහළ කෙළවර (Root).
වර්ණය: රතු.
02. ස්වාධිෂ්ඨාන චක්රය (Svadhisthana):
පිහිටීම: උදරයේ පහළ ප්රදේශය (Sacral).
වර්ණය: තැඹිලි.
03. මනිපුර චක්රය (Manipura):
පිහිටීම: සූර්ය ස්නායු මණ්ඩලය හෙවත් ආමාශය ආශ්රිත ප්රදේශය (Solar Plexus).
වර්ණය: කහ.
04. අනාහත චක්රය (Anahata):
පිහිටීම: හදවත ආශ්රිත ප්රදේශය (Heart).
වර්ණය: කොළ
05. විශුද්ධි චක්රය (Vishuddha):
පිහිටීම: උගුර ආශ්රිත ප්රදේශය (Throat).
වර්ණය: නිල්.
06. ආඥා චක්රය (Ajna):
පිහිටීම: නළල මැද හෙවත් තෙවැනි ඇස (Third Eye).
වර්ණය: ඉන්ඩිගෝ.
07. සහස්රාර චක්රය (Sahasrara):
පිහිටීම: හිස් මුදුන (Crown).
වර්ණය: දම්.
දෙයක් පේනවද? මේ අනුපිළිවෙල දෘශ්ය ආලෝක වර්ණාවලියේ (Visible Light Spectrum) විද්යාත්මක රටාව. එහෙම නැත්තම් දේදුන්නෙ වර්ණ හතේ පිළිවෙළ.
මේකෙන් පැහැදිලි වෙනවා ඝන භෞතික ශක්තියේ (රතු) ඉඳලා වඩාත් සියුම් ආධ්යාත්මික ශක්තිය (දම්) වෙනකම් මිනිසාගේ ශක්තිමය පරිණාමය.
මේ පාටවල් ඇහැට අලංකාරයක් ගෙනල්ලා දෙනවට වඩා ඒවා එක් එක් චක්රයට අදාළ ක්රියාකාරී කම්පන වේගයන් (Functional Vibrations) නිරූපණය කරනවා.
මේ පාටවල් වලින් කියවෙන තේරුමක් තියෙනවා. ඒ වගේම ජීවිතයට දක්වන බලපෑම
මානසික සහ කායික තත්ත්වයන් සමඟ සෘජුව බැඳිලා තියෙනවා. මේ ශක්ති ප්රවාහයේ ගුණාත්මකභාවය මත තමයි කෙනෙක් ලෝකය දකින ආකාරය වගේම අත්දකින ආකාරයත් තීරණය වෙන්නෙ.
ඒ වගේම, අපේ පුද්ගලික ශක්ති ක්ෂේත්රය හුදෙකලා නැහැ. මේ චක්ර හරහා අපි අවට පරිසරය, සොබාදහම, සතුන් සහ අනෙකුත් මිනිසුන්ගේ ශක්තීන් හා කම්පන සමඟ නිරන්තරයෙන් සම්බන්ධ වෙනවා.
චක්ර හතේ මූලික කරුණු මෙහෙමයි.
මූලාධාර (Root): මේක තමා අපේ පැවැත්මේ පදනම.
දුර්වල නම් - අපි බය, ඒ වගේම අනාරක්ෂිත බවින් පීඩා විඳිනවා.
ශක්තිමත් නම් - ස්ථාවර භාවයක් සහ ආත්ම විශ්වාසය දැනෙනවා.
ස්වාධිෂ්ඨාන (Sacral): නිර්මාණශීලිත්වය සහ හැඟීම් පාලනය කරන්නෙ මේ චක්රය.
දුර්වල නම් - චිත්තවේග අස්ථාවර වෙනවා.
ශක්තිමත් නම් - සතුට සහ නිර්මාණාත්මක ශක්තිය ගලා එනවා.
මනිපුර (Solar Plexus): පුද්ගලික බලය සහ අභිප්රේරණය පාලනය කරන චක්රය.
දුර්වල නම් - අසරණ බවක් අත්විඳින්න වෙනවා
ශක්තිමත් නම් - දැඩි ආත්ම ශක්තියක් ඇති වෙනවා.
අනාහත (Heart): ආදරය සහ සහකම්පනය පාලනය කරන චක්රය.
දුර්වල නම් හුදෙකලා වෙනවා.
ශක්තිමත් නම් - අසීමිත කරුණාව සහ විවෘතභාවය ලැබෙනවා.
විශුද්ධි (Throat): සන්නිවේදනය සහ සත්ය ප්රකාශ කිරීම සම්බන්ධ චක්රය.
දුර්වල නම් - අදහස් ප්රකාශ කිරීමට අපහසු වෙනවා.
ශක්තිමත් නම් - පැහැදිලි සහ අවංක සන්නිවේදනයක් ඇතිවෙනවා.
ආඥා (Third Eye): ප්රඥාව සහ ප්රතිභානය සම්බන්ධ චක්රය (Intuition).
දුර්වල නම් - ව්යාකූල බවක් දැනෙනවා.
ශක්තිමත් නම් - පැහැදිලි දැක්මක් සහ අභ්යන්තර ඥානයක් ලැබෙනවා.
සහස්රාර (Crown): උත්තරීතර ආධ්යාත්මික සම්බන්ධතාවයේ චක්රය.
ශක්තිමත් නම් - මුළු විශ්වය සමඟම ඇති ඒකීයභාවය අවබෝධ වෙනවා.
චක්රවල ඇති ගුණාංග, සංකේත සහ වර්ණ ගැන අවබෝධ කර ගැනීම තමයි ශක්ති පෙළගැස්ම සහ සුවපත් කිරීමේ ක්රියාවලියේ පළමු පියවර. අපේ ජීවිතේ අසමතුලිත තැන් අඳුරගන්න නම් මේ ශක්තීන් වල අර්ථය වටහාගන්න ඕනෙ.
චක්ර සුවපත් කිරීමේ මූලික ක්රමවේදය තමයි එක් එක් චක්රයට අදාළ කම්පනය (Vibration) සමඟ වැඩ කිරීම. අදාළ චක්රයේ වර්ණයට අවධානය යොමු කරලා මෙනෙහි කිරීම (Visualization) මගින් අවහිර වූ ශක්ති මාවත් විවෘත කර ගන්න පුළුවන්. උදාහරණයක් විදියට, යම් චක්රයක් අඩපණ වෙලා කියලා දැනෙනවා නම්, ඒ චක්රයේ වර්ණය ඒ වගේම ගුණය ගැන මනස ඒකාග්ර කිරීමෙන් එම ශක්ති කේන්ද්රය නැවත සක්රීය කරන්න පුළුවන්. ඒ වගේම, ශරීරයේ ශක්ති ප්රවාහය ක්රමවත් කරන්නත් ඒ මගින් හැකියාව ලැබෙනවා.
මේ චක්ර හත ගැන තවත් විස්තර පසුවට අරන් එන්නම්.
