07/04/2026
වවුනියාව කසල ගැටළුවට කඩිනම් විසඳුම් සෙවීමට අමාත්ය උපාලි සමරසිංහ පිටියට
වවුනියාව පම්පමඩුව සාලම්බකුලම් කසල අංගනය හේතුවෙන් උද්භව වී ඇති පාරිසරික හා සමාජීය ගැටළු පිළිබඳ සොයාබැලීම සඳහා සමූපකාර සංවර්ධන නියෝජ්ය අමාත්ය උපාලි සමරසිංහ මහතා 2026 අප්රේල් 06 දින එම ප්රදේශයේ නිරීක්ෂණ සංචාරයක නිරත විය.
වවුනියාව මහනගර සභා බලප්රදේශයේ දෛනිකව එකතු කරනු ලබන කසල මෙම ස්ථානයට රැගෙන එන අතර, එම තත්ත්වය හේතුවෙන් ප්රදේශවාසීන් දැඩි පීඩාවට පත්ව සිටින බව වාර්තා වේ. මේ සම්බන්ධයෙන් වඩාත් කාර්යක්ෂම හා පරිසර හිතකාමී විසඳුම් සොයා බැලීම අරමුණු කරගනිමින් වවුනියාව දිස්ත්රික් ලේකම් කාර්යාලයේදී විශේෂ සාකච්ඡාවක් ද පැවැත්විණ.
එහිදී කසල අංගනය වෙනත් සුදුසු ස්ථානයකට මාරු කිරීම සඳහා ඇති ඉඩප්රස්ථාව සොයා බැලීමට වවුනියාව අතිරේක දිස්ත්රික් ලේකම්වරයාගේ ප්රධානත්වයෙන් නිලධාරී කමිටුවක් පත් කිරීමට යෝජනා කෙරිණි. එතෙක්, දෛනිකව රැගෙන යන කසල නිසි පරිදි වළ දැමීම සිදුකරන ලෙස ද උපදෙස් ලබා දී තිබේ.
තවද, මාසයක් ඇතුළත මෙම කසල ගැටළුවට ස්ථිර විසඳුම් ලබාදීමට කටයුතු කරන බව අමාත්යවරයා සඳහන් කළේය.
සංචාරය අතරතුර, කසල ගැටළුව හේතුවෙන් පීඩාවට පත්ව සිටින ප්රදේශවාසීන් සමඟ අමාත්යවරයා සාකච්ඡා කළ අතර, ගැටළුව පිළිබඳ අවධානය යොමු කර කඩිනමින් විසඳුම් සෙවීමට ඉදිරිපත් වූ වන්නි දිස්ත්රික් පාර්ලිමේන්තු මන්ත්රී රිෂාඩ් බදියුදීන් මහතාට ප්රදේශවාසීන් විසින් විශේෂ කෘතවේදීත්වය පළ කරනු ලැබීය.
1992 වසරේ සිට වවුනියාව මහනගර සභාව විසින් පවත්වාගෙන යනු ලබන මෙම කසල අංගනය අක්කර 15ක පමණ භූමි ප්රමාණයක පැතිරී ඇති අතර, වර්තමානයේ එය ප්රදේශයේ ප්රධාන පාරිසරික ගැටළුවක් ලෙස පවතින බව ද වාර්තා වේ.
මෙම අවස්ථාවට වන්නි දිස්ත්රික් පාර්ලිමේන්තු මන්ත්රී රිෂාඩ් බදියුදීන් මහතා සහ වවුනියාව දිස්ත්රික් ලේකම් පි.ඒ. සරත්චන්ද්ර මහතා ඇතුළු පිරිසක් එක්ව සිටියහ
සමූපකාර සංවර්ධන නියෝජ්ය අමාත්ය
