https://www.facebook.com/109103044979613/

Sri Lankan Tv, Welisara (2026)

07/08/2026

ගනේමුල්ල සංජිව ඝාතනයේ
වෙඩික්කරු බව කී පළමුවැන්නා
බොරැල්ල මැගසින් බන්ධනාගාරයේ
ගැටුමෙන් ඝාතනය වෙලා !

බොරැල්ල නව මැගසින් බන්ධනාගාරයේ රැඳවියන් දෙපිරිසක් අතර ඊයේ (06) මධ්‍යම රාත්‍රියේ ඇතිවූ දැඩි නොසන්සුන්කාරී තත්ත්වයක් සහ ගැටුමක් හේතුවෙන් පාතාල කල්ලි සාමාජිකයෙකු ජීවිතක්ෂයට පත්වූ අතර ඔහු ගනේමුල්ල සංජිව ඝාතනයේ වෙඩික්කරු බවට මුලින්ම පොලිසිය සැකකළ පුද්ගලයායි.

මෙලෙස මියගොස් ඇත්තේ හෝමාගම කටුවන ප්‍රදේශයේ පදිංචිව සිටි මොහොමඩ් අස්මාන් ෂෙරිෆ්ඩීන් (35) නැමැති අයෙකි.

චෝදනා ලැබූ අපරාධ:

ගල්කිස්ස වටරප්පල පාරේ සිදුවූ ද්විත්ව ඝාතනය, මීගමුවේ ද්විත්ව ඝාතනය ඇතුළු බහුල ඝාතන සිද්ධීන්.

සම්බන්ධතාවය:

"හෝමාගම හඳයා" නැමැති පාතාල නායකයාගේ ප්‍රධාන කොන්ත්‍රාත් වෙඩික්කරු ලෙස කටයුතු කිරීම.

වෙනත් නඩු:

ගාල්ල, අම්පාර, මීගමුව සහ හෝමාගම අධිකරණ කිහිපයකම නඩු පවතින අයෙකි.

විශේෂිත සිදුවීම්:

ගනේමුල්ල සංජීව ඝාතනයේ වෙඩික්කරු ලෙස මුල් අවස්ථාවේදී සැකයට ලක්වූයේ ද මොහුය.

07/08/2026

රිමාන්ඩ් කළ හිටපු ඇමති අකිලට
බන්ධනාගාරයේ ගැටුම් අතරේ
මොකද වුණේ..
එජාප නායකයන් කලබල වෙලා

මැගසින් බන්ධනාගාරයේ රිමාන්ඩ් වී සිටින එක්සත් ජාතික පක්ෂයේ උප නායක අකිල විරාජ් කාරියවසම් මහතාගේ ආරක්ෂාව සම්බන්ධයෙන් සාකච්ඡා කිරීමට කඩිනමින් වේලාවක් ලබාදෙන ලෙස එක්සත් ජාතික පක්ෂ මහලේකම් නීතීඥ තලතා අතුකෝරළ මහත්මිය වැඩ බලන බන්ධනාගාර කොමසාරිස් ජනරාල්වරයාට ලිපියක් යවමින් ඉල්ලා සිටිනවා.

මේ අවස්ථාවේ මැගසින් බන්ධනාගාරයේ ඇතිවී තිබෙන තත්ත්වය මත අකිල විරාජ් කාරියවසම් මහතාගේ ජීවිතය අනාරක්ෂිත වී ඇතැයි එජාප මහ ලේකම්වරිය අදාල ලිපියෙන් සඳහන් කර තිබෙනවා.

මැගසින් බන්ධනාගාරයේ රිමාන්ඩ් වී සිටින අකිල විරාජ් කාරියවසම් මහතා මේ වන විට සිටින්නේ බන්ධනාගාර කොමසාරිස්වරයාගේ භාරයේ වන හෙයින් හමුවී සාකච්ඡාවක් පැවැත්වීමට එක්සත් ජාතික පක්ෂ සභාපති වජිර අබේවර්ධන මහතාට සහ තමාට කඩිනමින් වේලාවක් ලබාදෙන ලෙසයි අතුකෝරල මහත්මිය ඉල්ලා සිටින්නේ.

ජනාධිපති ජ්‍යේෂ්ඨ උපදේශක කාර්යාලයට සේවකයන් සිව්දෙනෙකු බඳවාගෙන ඔවුන් පුද්ගලික කටයුතු සඳහා යොදාගත් බවට එල්ල වී ඇති චෝදනාවක් සම්බන්ධයෙන් අත්අඩංගුවට ගෙන අධිකරණයට ඉදිරිපත් කළ හිටපු අමාත්‍ය අකිල විරාජ් කාරියවසම් මහතා මේ මස 18 වැනිදා දක්වා රක්ෂිත බන්ධනාගාර ගත කිරීමට අධිකරණය කටයුතු කළා.

07/08/2026

බන්ධනාගාරවල නොසන්සුන් කමට
විසඳුමක් දෙමින් රජය අඩියක් පස්සට ගනී..
නීති වෙනස් කර ඇප දෙන්න
රජය සුදානම් වන හැටි මෙන්න

මහාධිකරණයෙන් මත්ද්‍රව්‍ය වැරදිවලට ඇප ලබා ගැනීමේ හැකියාව නැවත ඇති කරන බව අධිකරණ සහ ජාතික ඒකාබද්ධතා අමාත්‍ය, නීතිඥ හර්ෂණ නානායක්කාර විශේෂ ප්‍රකාශයක් සිදු කරමින් සඳහන් කළා.

මත්ද්‍රව්‍යවල ශුද්ධ බර ප්‍රමාණය ග්‍රෑම් දහයකට වැඩිවීම හේතුවෙන් අභියාචනාධිකරණය හරහා ඇප ලබා ගැනීමේ ප්‍රමාදයන් ඇති බව ද ඔහු පෙන්වා දුන්නා.

"බන්ධනාගාරවල සිටින රැඳවියන්ගේ ඥාතීන්ට ආදරණීයන්ට සහ මිත්‍රයන්ට යම් පණිවිඩයක් ලබාදීමේ අවශ්‍යතාවය තිබෙනවා. මුලිකවම දැනට වසරක් තිස්සේ බන්ධනාගාරවල තිබෙන තත්වයන් නිරීක්ෂණය කිරීමේදී රැඳවියන්ගේ මුලික චෝදනාවක් වුයේ රස පරීක්ෂක වාර්තා ප්‍රමාදවීම නිසා ඇප ලබා ගැනීමට නොහැකිව ඇති බවයි.

මෙම තත්වය අපි පසුගිය වසරේ හඳුනා ගෙන අවශ්‍ය පියවර ගැනීමට කටයුතු කළා. රස පරීක්ෂක දෙපාර්තමේන්තුව තුළ පුරප්පාඩු 118 ක් තිබුණා. ඒ නිසා කාර්යක්ෂම ලෙස රස පරීක්ෂක වාර්තා පැමිණියේ නැහැ. රස පරීක්ෂක වාර්තා පැමිණෙන තෙක් වසරක් පමණ රිමාන්ඩ් බන්ධනාගාරයේ ගත කරන්න සිදු වුණා. මේ වන විට රස පරීක්ෂක වාර්තා ලබාදීමට අවශ්‍ය කාර්ය මණ්ඩලය හැතතෑවක් පමණ බඳවා ගැනීමට පියවර ගෙන තිබෙනවා.

මේ මාසය වන විට නව යන්ත්‍ර ගෙන එනවා. ඒ නිසා රස පරීක්ෂක වාර්තා කඩිනම් කිරීමේ හැකියාවක් තිබෙනවා. මේ වන විට රස පරීක්ෂක දෙපාර්තමේන්තුව මසකට වාර්තා හත් දහස් පන්සීයත් නවදහසක් අතර ප්‍රමාණයක් නිකුත් කරන්න ඉදිරියේදී පියවර ගන්නවා. මත්ද්‍රව්‍යවල ශුද්ධ බර ප්‍රමාණය ග්‍රෑම් දහයකට වැඩි නිසා අභියාචනාධිකරණයට ඇප ලබා ගැනීමට යොමුවීමෙන් ඇප ලබා ගැනීමට ප්‍රමාද වන බව රැඳවියන්ගේ ඥාතීන් සඳහන් කළා. මේ නීතිය සංශෝධනය කිරීම සඳහා අමාත්‍ය මණ්ඩලයට ඉදිරිපත් කරනවා. ඒ අනුව යම් මත්ද්‍රව්‍ය වැරදිවලට මහාධිකරණයෙන් ඇප ලබා ගැනීමේ හැකියාව නැවත ඇති කරනවා.

මේ මොහොත වන විට යම් කූඨ අරමුණු ඇති පුද්ගලයින් බන්ධනාගාරවල සිටින අය මෙහෙයවලා කලබල ඇතිකිරීම් තත්වයන් ඇති කරනවා. ඔබගේ ගැටළු විසඳනවා. ඉවසීමෙන් කටයුතු කරන්න. පහසුකම් ප්‍රමාණවත් නොමැති නිසා බන්ධනාගාරවල අධික තදබදයක් තිබෙනවා. අපි ඒ පහසුකම් ලබාදීමට මෙන්ම බන්ධනාගාර තදබදය අඩු කරන්න අවශ්‍ය පියවර ගන්නවා.

කිහිප දෙනෙකුගේ කූඨ අරමුණු අනුව අපි සම්පත් ලබා දුන්නත් ඒවා ගිනි තියනවා නම් බාධා එන්නේ බන්ධනාගාරගතව සිටින රැඳවියන් වන ඔබටයි. රජය විසින් දැන් රස පරීක්ෂක වාර්තා කඩිනම් කිරීමටත් පහසුකම් වැඩි කිරීමටත් පියවර ගෙන ඇති බැවින් රජයට සහාය වෙන්න . බන්ධනාගාර තුළ කළහකාරී ලෙසින් හැසිරි තමන්ගේ සම්පත් විනාශ කර ගන්න එපා. සුළු දෙනෙකුගේ අවශ්‍යතාවය වෙනුවෙන් ඔබව මෙහෙයවන එක නවත්වන්න. ඉතා ඉක්මනින් රස පරීක්ෂක වාර්තා ලබාදී නීති සංශෝධනය කරදී ඇප ලබා ගැනීමේ හැකියාව ලබා දෙනවා."

07/08/2026

පල්ලන්සේන බන්ධනාගාරයේ
රැඳවියන් 28කට හොඳටම තුවාල
සියල්ලන් වැලිකඩ රෝහලට!

මීගමුව පල්ලන්සේන එළිමහන් බන්ධනාගාරයේ අද (07) උදෑසන හටගත් නොසන්සුන්කාරී තත්ත්වය අතරතුර තුවාල ලැබූ රැඳවියන් 28 දෙනෙකු වැඩිදුර ප්‍රතිකාර සඳහා වැලිකඩ බන්ධනාගාර රෝහල වෙත ඇතුළත් කිරීමට පියවර ගෙන තිබේ.

පල්ලන්සේන එළිමහන් බන්ධනාගාර පරිශ්‍රයේ උදෑසන ආරම්භ වූ මෙම නොසන්සුන්තාව පාලනය කිරීම සඳහා පොලීසිය, පොලිස් විශේෂ කාර්ය බළකාය (STF), කැරලි මර්දන ඒකකය සහ ශ්‍රී ලංකා ගුවන් හමුදා නිලධාරීන් වහාම කැඳවීමට පියවර ගැනුණි.

පාලනය නැවත බන්ධනාගාර දෙපාර්තමේන්තුවට
නොසන්සුන් ලෙස හැසිරුණු රැඳවියන් පාලනය කිරීම සඳහා ආරක්ෂක අංශ විසින් කඳුළු ගෑස් ප්‍රහාරයක් එල්ල කළ අතර, ඉන් අනතුරුව පරිශ්‍රයේ ආරක්ෂාව තහවුරු කරමින් බන්ධනාගාරයේ සම්පූර්ණ පාලනය නැවතත් බන්ධනාගාර දෙපාර්තමේන්තුව යටතට ගැනීමට ආරක්ෂක අංශ සමත්ව ඇත.

මෙම ගැටුම්කාරී තත්ත්වයේදී තුවාල ලැබූ රැඳවියන් 28 දෙනා වහාම ක්‍රියාත්මක වන පරිදි වැලිකඩ බන්ධනාගාර රෝහලට මාරු කර යවා ඇති අතර, ප්‍රදේශයේ ආරක්ෂාව තවදුරටත් තර කර තිබේ.

07/08/2026

උසස් පෙළ සිසුවියක් පුස්තකාලයේ
පාඩම් කරමින් සිටියදී
නිලධාරීන් දොරවල් වසා ගෙදර ගිහින්!..
මෙන්න දැරියට වෙච්ච දේ

උසස් පෙළ විභාගයට පෙනී සිටීමට නියමිත පාසල් සිසුවියක් මහරගම නගර සභා පරිශ්‍රයේ පිහිටි පුස්තකාලය තුළ පාඩම් කරමින් සිටියදී, එහි සේවකයින් කිසිදු විමසීමකින් තොරව දොරගුළු දමා පිටව යාම හේතුවෙන් ඇය පැය භාගයකට ආසන්න කාලයක් එහි සිරවී සිටීමේ පුවතක් වාර්තා වේ.

මෙම අවාසනාවන්ත සිදුවීම පිළිබඳව තොරතුරු අනාවරණය කළේ මහරගම නාගරික මන්ත්‍රීනි රසිකා ගුණසිංහ (පො.එ.පෙ) මහත්මිය විසිනි.

කෑගැසීම ඇසුණු මගීන් පිහිටට එයි

පාඩම් වැඩ නිමවීමෙන් පසුව සිසුවිය පිටව යාමට පැමිණි අවස්ථාවේදී පුස්තකාලයේ ප්‍රධාන දොරටු වසා දමා ඇති බව දැක දැඩි ලෙස බියට පත්ව කෑගසා තිබේ. එම අවස්ථාවේදී පුස්තකාලය ආසන්නයේ පිහිටි අතුරු මාර්ගයක ගමන් කරමින් සිටි පුද්ගලයින් දෙදෙනෙකුට මෙම කෑගැසීම ඇසී ඇති අතර, ඔවුන් වහාම ක්‍රියාත්මක වී නගර සභා පරිශ්‍රයේ සිටි නිලධාරීන් දැනුවත් කිරීමට කටයුතු කර ඇත.

කම්කරුවන් වීඩියෝ කළ බවටත් චෝදනා!

සිද්ධිය සැලවීමෙන් අනතුරුව, නගර සභා පරිශ්‍රයේ රැඳී සිටි කම්කරුවන් දෙදෙනෙකු කිසිදු නිල අවසරයකින් තොරව ඉහළ මහලයට නැග දොරවල් විවෘත කර සිසුවිය පිටතට ගෙන තිබේ.

කෙසේ වෙතත්, එම අවස්ථාවේදී එහි සිටි කම්කරුවන් විසින් අදාළ සිසුවියව සිය ජංගම දුරකථනවලින් වීඩියෝ ගත කර ඇති බවට ද මන්ත්‍රීවරිය වැඩිදුරටත් චෝදනා කර සිටින අතර, පාසල් සිසුවියකට මුහුණ දීමට සිදු වූ මෙම බියකරු අත්දැකීම සහ නිලධාරීන්ගේ පාර්ශවයෙන් සිදුවූ නොසලකා හැරීම සම්බන්ධයෙන් ප්‍රදේශවාසීන්ගේ දැඩි විරෝධය එල්ල වී ඇත.

07/08/2026

පොලිසියේ ලොකුම පුටු
රැසකට ක්ෂණික මාරුවීම්!
ජ්‍යෙෂ්ඨ නියෝජ්‍ය පොලිස්පතිවරුටත්
වෙච්ච දේ

ජාතික පොලිස් කොමිෂන් සභාවේ අනුමැතියට යටත්ව, ජ්‍යෙෂ්ඨ නියෝජ්‍ය පොලිස්පතිවරුන් (Senior DIGs) ඇතුළු උසස් පොලිස් නිලධාරීන් කිහිප දෙනෙකු සඳහා වහාම ක්‍රියාත්මක වන පරිදි ස්ථාන මාරුවීම් ලබා දීමට පොලිස් මූලස්ථානය පියවර ගෙන තිබේ.

සේවා අවශ්‍යතාවන් මත සිදුකර ඇති මෙම ස්ථාන මාරුවීම් අතරට පළාත් භාර ජ්‍යෙෂ්ඨ නියෝජ්‍ය පොලිස්පතිවරුන් සහ සහකාර පොලිස් අධිකාරීවරුන් (ASP) කිහිපදෙනෙකුම ඇතුළත් වේ.

ජ්‍යෙෂ්ඨ නියෝජ්‍ය පොලිස්පතිවරුන්ගේ ස්ථාන මාරුවීම්:

සම්පත් කුමාර මහතා: විශේෂ කාර්යාංශයේ සිට නැගෙනහිර පළාත භාර ජ්‍යෙෂ්ඨ නියෝජ්‍ය පොලිස්පති ලෙස.

කිත්සිරි ජයලත් මහතා: දකුණු පළාත භාර ජ්‍යෙෂ්ඨ නියෝජ්‍ය පොලිස්පති තනතුරේ සිට සබරගමුව පළාත භාර ජ්‍යෙෂ්ඨ නියෝජ්‍ය පොලිස්පති ලෙස.

කේ.පී. කරුණානායක මහතා: විශේෂ ආරක්ෂක දිසාව භාර තනතුරේ සිට උතුරු පළාත භාර ජ්‍යෙෂ්ඨ නියෝජ්‍ය පොලිස්පති ලෙස.

වරුණ ජයසුන්දර මහතා: ළමා හා කාන්තා කාර්යාංශයට අමතරව පුහුණු හා උසස් පුහුණු දිසාව භාර ජ්‍යෙෂ්ඨ නියෝජ්‍ය පොලිස්පති තනතුරේ වැඩ බැලීම සඳහා ද පත් කර ඇත.

සහකාර පොලිස් අධිකාරීවරුන් 06 දෙනෙකුටත් මාරුවීම්

මීට අමතරව සහකාර පොලිස් අධිකාරීවරුන් (ASP) 06 දෙනෙකු සඳහා ද ස්ථාන මාරුවීම් ලබාදීමට පොලිස් මූලස්ථානය කටයුතු කර තිබේ.

ඒ අනුව, ගාල්ල දිසා අපරාධ කොට්ඨාසයේ අධ්‍යක්ෂ ලෙස කටයුතු කළ සහකාර පොලිස් අධිකාරී නාමල් පෙරේරා මහතා එම තනතුරේ සිට පොලිස් ක්ෂේත්‍ර බලකා මූලස්ථානය (STF/Field Force) වෙත මාරු කර යවා ඇති බව වාර්තා වේ.

07/08/2026

වෙඩිතබා කුරුවිට බන්ධනාගාරය
සන්සුන් කල හැටි

07/08/2026

මීගමුව පල්ලන්සේන බන්ධනාගාරයේ
තත්ත්වය තවත් දරුණු අතට..
රැඳවියන් ප්‍රධාන දොරටුව එයි..
කඳුළු ගෑස් ප්‍රහාර !

මීගමුව, පල්ලන්සේන එළිමහන් බන්ධනාගාරයේ අද (07) පෙරවරුවේ දැඩි නොසන්සුන්කාරී තත්ත්වයක් හටගෙන තිබේ. තත්ත්වය පාලනය කිරීම සඳහා ආරක්ෂක අංශ විසින් කඳුළු ගෑස් ප්‍රහාරයක් එල්ල කර ඇත.

නොසන්සුන්තාව අතරතුර රැඳවියන් විසින් ආරක්ෂක නිලධාරීන් වෙත ගල්මුල් ප්‍රහාර එල්ල කරමින් සිටින බව වාර්තා වේ.

වහලයෙන් පටන්ගෙන ප්‍රධාන දොරටුව දක්වා!

අද උදෑසන ආරම්භ වූ මෙම විරෝධතාවයේදී රැඳවියන් මුලින්ම බන්ධනාගාර ගොඩනැගිල්ලේ වහලය මතට නැග විරෝධය පළ කර ඇත. පසුව ඔවුන් බන්ධනාගාරයේ ප්‍රධාන දොරටුව දක්වාම පැමිණෙමින් නොසන්සුන් ලෙස හැසිරී තිබේ.

තත්ත්වය පාලනය කිරීම සඳහා පොලීසිය, පොලිස් විශේෂ කාර්ය බළකාය (STF), කැරලි මර්දන ඒකකය සහ ශ්‍රී ලංකා ගුවන් හමුදාව ඇතුළු බහුල ආරක්ෂක අංශ කණ්ඩායම් කැඳවීමට පියවර ගැනුණි. පිරිස පාලනය කිරීමට නොහැකි වූ තැන පොලීසිය විසින් කඳුළු ගෑස් ප්‍රහාර එල්ල කර ඇත.

ගැටුමට හේතුව?

පසුගිය මාසයේ මීගමුව බන්ධනාගාරයේ ඇති වූ ගැටුම්කාරී තත්ත්වයෙන් අනතුරුව, එහි සිටි රැඳවියන් පිරිසක් මෙම පල්ලන්සේන එළිමහන් බන්ධනාගාරය වෙත මාරු කර යවා තිබුණි. මෙම නොසන්සුන්තාවට එම මාරු කිරීම් ද හේතු වන්නට ඇති බවට සැක කෙරේ.

ආරක්ෂක අංශ එක්ව මේ වන විටත් බන්ධනාගාරයේ තත්ත්වය පාලනය කිරීමට සහ වැඩිදුර ආරක්ෂාව තහවුරු කිරීමට කටයුතු කරමින් සිටියි.

07/08/2026

ඊයේ රෑ පොලිස්පති සහ අගවිනිසුරු
නිල නිවාස වීඩියෝ කරලා..
කුමන්ත්‍රණයක් පිලිබඳ සැක..
කුරුඳුවත්තෙන් මාංචු දමයි!

කොළඹ පිහිටි පොලිස්පතිවරයාගේ (IGP) සහ අගවිනිසුරුවරයාගේ (Chief Justice) නිල නිවාස සහ ඒ අවට මාර්ග පද්ධතිය රහසිගතව වීඩියෝ ගත කරමින් සිටි සැකකාර පුද්ගලයෙකු ඊයේ (06) රාත්‍රියේ අත්අඩංගුවට ගැනීමට කුරුඳුවත්ත පොලීසිය සමත්වී තිබේ.

අත්අඩංගුවට ගන්නා අවස්ථාවේදී සැකකරු වීඩියෝ ගත කිරීමට යොදාගත් ජංගම දුරකථනය ද පොලිස් භාරයට ගෙන ඇත.

සිද්ධිය වූ හැටි
සුඛෝභෝගී මෝටර් රථයකින් පැමිණි පුද්ගලයෙකු මෝටර් රථය නවතා පොලිස්පතිවරයාගේ නිල නිවස අසල මාර්ගයේ සිට සිය ජංගම දුරකථනයෙන් වීඩියෝ ගත කරන අන්දම, එහි ප්‍රධාන දොරටුවේ ආරක්ෂක රාජකාරියේ යෙදී සිටි පොලිස් විශේෂ කාර්ය බලකා (STF) නිලධාරියෙකුගේ නිරීක්ෂණයට ලක්ව තිබේ.

වහා ක්‍රියාත්මක වූ එම STF නිලධාරියා, ආසන්නයේ රථ වාහන රාජකාරියේ යෙදී සිටි පොලිස් කොස්තාපල්වරයා දැනුවත් කර ඇති අතර, ඔහු විසින් කොළඹ හදිසි ඇමතුම් අංශයට (119) ඒ පිළිබඳව වාර්තා කර ඇත.

ඒ අනුව ක්‍රියාත්මක වූ කුරුඳුවත්ත පොලිස් ස්ථානයේ රාත්‍රී ජංගම සංචාරක රාජකාරියේ යෙදී සිටි පොලිස් කණ්ඩායමක් වහාම එම ස්ථානයට පැමිණ විමර්ශන පවත්වා සැකකරු සහ මෝටර් රථය අත්අඩංගුවට ගෙන තිබේ.

"විනෝදාංශයට කළා" කීවත් සැක සහිතයි!
අත්අඩංගුවට ගත් සැකකරුගේ ජංගම දුරකථනය පරික්ෂා කිරීමේදී, පොලිස්පති නිල නිවස හා ඒ අවට මාර්ග පද්ධතිය මෙන්ම අගවිනිසුරුවරයාගේ නිල නිවස සහ ඒ අවට ප්‍රදේශය ද වීඩියෝ ගත කර තිබූ බව පොලීසිය තහවුරු කළේය.

පොලිස් ප්‍රශ්න කිරීම් හමුවේ සැකකරු පවසා ඇත්තේ තමන් විනෝදාංශයක් (Hobby) ලෙස මෙලෙස වීඩියෝ ගත කිරීම සිදුකළ බවයි.

කෙසේ වෙතත්, සිදුකළ දීර්ඝ ප්‍රශ්න කිරීම්වලදී ඔහු සිය පදිංචි ස්ථානය ඇතුළු කරුණු කිහිපයක් සම්බන්ධයෙන් පරස්පර විරෝධී ප්‍රකාශ සිදුකර ඇති බව උසස් පොලිස් නිලධාරියෙකු සඳහන් කළේය. සිද්ධිය සම්බන්ධයෙන් කුරුඳුවත්ත පොලීසිය වැඩිදුර විමර්ශන පවත්වයි.

07/08/2026

පල්ලන්සේන බන්ධනාගාරයත්
දැන් නොසන්සුන්..
මැගසින් බන්ධනාගාරයේ
රැඳවියෙක් මරුට ...

පල්ලන්සේන බන්ධනාගාරයේ නොසන්සුන්තාවක් හට ගෙන ඇති බවට තොරතුරු වාර්තා වේ.

මේ අතර මැගසින් බන්ධනාගාරයේ ඇති වූ නොසන්සුන්තාවයෙන් තුවාල ලබා රෝහල් ගත කර සිටි එක් රැඳවියෙකු ජීවිතක්ෂයට පත්ව තිබේ.

Sri Lankan Tv

07/08/2026

07/08/2026

07/08/2026

07/08/2026

07/08/2026

07/08/2026

07/08/2026

07/08/2026

07/08/2026

07/08/2026

Address

Website

Alerts

Shortcuts

Share

Category

Listing takedown request