Gofa Tv, Gofa, Monrovia (2026)

29/09/2026

በጎፋ ዞን “በጎነት ለኢትዮጵያ ከፍታ” የ2018/19 ዓ.ም የክረምት በጎ ፈቃድ አገልግሎት ማጠቃለያና የ2019 ዓ.ም የበጋ በጎ ፈቃድ አገልግሎት ዞናዊ ማስጀመሪያ መድረክ እየተካሄደ ነው

ሣውላ፦ መስከረም 19/2019 ዓ.ም

በጎፋ ዞን የ2018/19 ዓ.ም የክረምት ወራት በጎ ፈቃድ አገልግሎት ማጠቃለያና የ2019 ዓ.ም የበጋ ወራት በጎ ፈቃድ አገልግሎት ዞናዊ ማስጀመሪያ የንቅናቄ መድረክ “በጎነት ለኢትዮጵያ ከፍታ” በሚል መሪ ቃል በሣውላ ከተማ መካሄድ ጀመረ።

በመድረኩ የጎፋ ዞን ዋና አስተዳዳሪ ኢንጂነር ዳግማዊ አየለን ጨምሮ የዞኑ ሥራ አስተባባሪ አካላት፣ የመምሪያና የጽሕፈት ቤት ዋናና ምክትል ኃላፊዎች፣ ከሁሉም መዋቅሮች የተውጣጡ አስተዳዳሪዎችና ባለድርሻ አካላት እየተሳተፉ ይገኛሉ።

የመድረኩ ዋና ዓላማ በ2018/19 ዓ.ም የክረምት ወራት የተከናወኑ የበጎ ፈቃድ ሥራዎችን መገምገም፣ የተገኙ ስኬቶችንና ተሞክሮዎችን ማጋራት እና በ2019 ዓ.ም የበጋ ወራት የሚከናወነውን የበጎ ፈቃድ አገልግሎት በተሻለ አሰራር ለማስጀመር ነው።

በጎ ፈቃደኝነት የማኅበረሰብ አባላት በጋራ ችግሮቻቸውን እንዲፈቱ፣ የመረዳዳትና የመተባበር ባህልን እንዲያጠናክሩ ከማስቻሉም በላይ ለልማት ሥራዎች ተጨማሪ አቅም የሚፈጥር ማኅበራዊ እሴት ነው።

በዚህም የበጎ ፈቃድ ሥራዎችን ከአካባቢያዊ የልማት ፍላጎቶች ጋር በማስተሳሰር፣ የማኅበረሰቡን ተሳትፎ በማስፋትና በተቀናጀ መልኩ በመፈጸም የበጎነት ተግባራት ዘላቂነት እንዲኖራቸው ማድረግ ይጠበቃል።

የ2018 ዓ.ም የበጎ ፈቃድ አገልግሎት አፈጻጸምን በተመለከተም በጎነትን በተገቢው መንገድ በመፈጸም የላቀ ውጤት ያስመዘገቡ አካላት ዕውቅና ያገኛሉ። በመድረኩም አፈጻጸማቸው ልዩ የሆኑ አካላትን ለማበረታታት የዋንጫና የሜዳሊያ ሽልማት ይበረከታል።

ይህ የዕውቅናና የሽልማት ሥርዓት በበጎ ፈቃድ ሥራ የተሳተፉ አካላትን ከማበረታታት ባለፈ የተሻሉ ተሞክሮዎችን ለሌሎች አካላት በማስተላለፍ የበጎነት እንቅስቃሴውን ይበልጥ ለማስፋት ያግዛል።

በ2019 ዓ.ም የበጋ ወራት የሚከናወነው የበጎ ፈቃድ አገልግሎትም የተለያዩ የልማትና የማኅበራዊ ጉዳዮችን በማስቀደም፣ የማኅበረሰቡን ሰፊ ተሳትፎ በማረጋገጥና የተለያዩ ባለድርሻ አካላትን በማስተባበር በተቀናጀ መልኩ ለመፈጸም ዝግጅት ተደርጓል።

በጎፋ ዞን የበጎ ፈቃደኝነት ባህልን በማጠናከር፣ በጋራ መሥራትንና መረዳዳትን በማስፋት የማኅበረሰቡን አቅም በማሰባሰብ በጎነትን ለልማትና ለሀገር ከፍታ የሚያበረክተውን አስተዋፅዖ ማሳደግ የንቅናቄው ቀጣይ ትኩረት ይሆናል።

28/09/2026

የመስቀል በዓልን አስመልክቶ የሣውላ ማረሚያ ፖሊስ ተቋም ለህግ ታራሚዎች ማዕድ አጋርቷል።
‎
‎ መስከረም 18/2019 ዓ.ም(ጎፋ ቴሌቪዥን)

28/09/2026

በክልሉ የሰብአዊ ድጋፍ በራስ አቅም የዝግጁነትና ሉዓላዊነት የግለ ዳሰሳ ሥራ ክልላዊ የማጠቃለያ ሪፖርት ላይ ዉይይት ተካሄደ

መስከረም 18/2019 ዓ.ም

በደቡብ ኢትዮጵያ ክልል የሰብዓዊ ድጋፍ ሉዓላዊነትን በማረጋገጥ ለማብሰር በየደረጃው በሚገኙ መዋቅሮች የዝግጁነትና ሉዓላዊነት የግለ ዳሰሳ ስራ ክልላዊ የማጠቃለያ ሪፖርት ላይ ዉይይት ተካሂዷል።

በክልሉ እስከ ታህሳስ 2019 ዓ/ም ድረስ ሰብዓዊ ድጋፍን በራስ አቅም ለመሸፈን፣ ሰዉ ሰራሽና ተፈጥሯዊ አደጋዎችን በዉስጥ አቅም በመቋቋም አይበገሬ ክልል ለማድረግ የተጀመረው ጥረት ተጨባጭ ዉጤት እየተገኘበት መሆኑ ተመልክቷል።

በፓርቲው የተነደፈዉን ስኬታማ ኢንሼቲቭ በዉጤታማ ሁኔታ ለማብሰር ሁለንተናዊ ዝግጅት እየተጠናቀቀ መሆኑ በመስክ ምልከታዉ መረጋገጡ የተነገረ ሲሆን ይህም ተቋማዊና ስርዓታዊ ቁመና በመፍጠር በሀገራችን ብሎም በክልል ደረጃ የተለየ ዉሳኔና ስኬት እንደሚሆን ተጠቁሟል።

ተግባሩን በተሟላ መንገድ በተቀመጠው ጊዜ በማጠናቀቅ ለማብሰር አሁናዊ ሥራዎችን በአካል ለማረጋገጥና በተግባራዊ እንቅስቃሴ ወቅት የታዩ የግንዛቤና አፈጻጸም ክፍተቶችን በፍጥነት ለመሙላት የታሰበ ምልከታ መካሄዱ ተመልክቷል።

የግለ ዳሰሳ ስራዉ በክልሉ 49 ወረዳና ከተማ አስተዳደሮች ዉስጥ በሚገኙ 172 ቀበሌያት ቁልፍ የዉጤት አመልካቾችን መነሻ በማድረግ የተካሄደ መሆኑም ተገልጿል።

በክልሉ የሰብዓዊ ድጋፍ ሉዓላዊነትን በማረጋገጥ በመጪው ታህሳስ በይፋ በማብሰር ከተረጂነት ወደ ምርታማነት ለተሟላ ሀገራዊ ክብርና ሉዓላዊነት ለመሸጋገር በመከናወን ላይ የሚገኙ ተግባራት በተለየ ቁርጠኝነት እየተፈፀሙ እንደሚገኙ የክልሉ ብልጽግና ፓርቲ ቅ/ጽ/ቤት ኃላፊ አቶ ገብረመስቀል ጫላ ተናግረዋል።

በክልሉ በሚገኙ ሁሉም የማህበራዊ መሰረቶች የተረጂነትና ልመና አስከፊነት ላይ ተጨማሪ የመግባባት ዉይይቶችን በመፍጠር ግንዛቤ ማዳበር እንደሚገባም አስገንዝበዋል።

በተለይም ከእርሻ መሬቶች አጠቃቀም ጋር በተያያዘ በኃይማኖት ተቋማት፣ ኢንቨስተሮች፣ ወል መሬቶች እና የመንግስት ተቋማት ወጥነትና የማስፈፀም ችግር የሚስተዋልበት መሆኑን ጠቁመዋል።

የክልሉ ስትራቴጂክ ፈንድ ገቢ ማሰባሰቢያ ምንጮችን አሟጦ መጠቀም፣ የስትራቴጅክ ፈንድ እና የቅጽበታዊ ሀብት አሰባሰብ አፈጻጸም አሁን ካለበት ዝቅተኛ ደረጃ ማሻገር እንደሚገባም አፅንኦት ሰጥተዋል።

የስትራቴጅክ መጠባበቂያና የዕለት ደራሽ እህል ክምችት የእርሻ ማሳ ዝግጅትን ለብቻ መያዝና ተቋማዊ ማድረግ፣ ተረጂዎችን ከሌማት ትሩፋት፣ ከፕሮግራሞች፣ ከፕሮጀክቶችና ሌሎች ምቹ ሁኔታዎች ጋር በመጠቀም ማሸጋገር ትኩረት ተሰጥቶታል።

የመጋዝን ዝግጅት በየደረጃው በሚገኙ ሁሉም መዋቅሮች ስታንዳርዱን በጠበቀ መንገድ እንዲኖር ማድረግ፤ በክልል ደረጃ በቁልፍ አመራሩ ድጋፍና ክትትል የተጀመረው ተጨባጭ ለውጥ እስከ ቀበሌ ድረስ እንዲወርድ የተጀመረዉን የድጋፍና ክትትል ስራ በታችኛዉ መዋቅር ማጠናከር ይገባል ተብሏል።

በመድረኩ በቀረበዉ ሪፖርት ላይ በጥልቀት በመወያየት በሁሉም መዋቅሮች በመከናወን ላይ የሚገኙ ተግባራትን በተቀመጡ አቅጣጫዎች መሰረት በተቀናጀ እና በተደራጀ አግባብ በመፈጸም ለውጤት ለማብቃት የሚያስችል የጋራ መግባባት ላይ በመድረስ ተጠናቋል፡፡

በዉይይቱ የደቡብ ኢትዮጵያ ክልል "ከተረጂነት ወደ ምርታማነት ለተሟላ ሀገራዊ ክብርና ሉዓላዊነት" ዐቢይ ኮሚቴ አባላት ተሳታፊ ሆነዋል።

28/09/2026

ጠቅላይ ሚኒስትር ዐቢይ አሕመድ (ዶ/ር) ፣ ከመስከረም 18 ቀን 2019 ዓ.ም ጀምሮ ወ/ሮ ጫልቱ ሳኒን የፌዴራል ቤቶች ኮርፖሬሽን ዋና ስራ አስፈጻሚ አድርገው ሾመዋል።

28/09/2026

በዛላ ወረዳ ለአረጋውያንና ለአቅመ ደካሞች የተገነቡና የታደሱ 66 መኖሪያ ቤቶች ተመረቁ

መስከረም 19/2019 ዓ.ም

በጎፋ ዞን በዛላ ወረዳ በ2018 በጀት ዓመት በክረምት በጎ ፈቃድ አገልግሎት ለአረጋውያንና ለአቅመ ደካሞች በአዲስ የተገነቡ 32 እና 34 የታደሱ በአጠቃላይ 66 መኖሪያ ቤቶች ተመርቀው ለተጠቃሚዎቻቸው ተላልፈዋል።

በተለይም በዛሬው ዕለት በሜላ ማዘጋጃ ቀበሌ በወረዳው አስተዳደርና በሕብረተሰቡ ትብብር ለአንድ አረጋዊ የተገነባው መኖሪያ ቤት ተመርቆ ከሙሉ የቤት ቁሳቁስ ጋር ለባለቤቱ ተረክቧል።

የዛላ ወረዳ ዋና አስተዳዳሪ አቶ አንበስ ሀነና እንደገለፁት በክረምት በጎ ፈቃድ አገልግሎት ለአረጋውያንና ለአቅመ ደካሞች የተገነቡና የታደሱ ቤቶች መመረቃቸው የሕብረተሰቡን የመረዳዳትና የመደጋገፍ እሴት የሚያጠናክር መሆኑን ገልጸዋል።

አያይዘውም በጎነት ከልብ በሚመነጭ ቅንነትና በመደመር መንፈስ በጋራ ሲሰራ ተቸግረው የሚኖሩ ወገኖችን ከችግር ማላቀቅ እንደሚቻል ጠቁመው፣ ይህ የበጎ ፈቃድ ተግባር በቤት ግንባታ ብቻ ሳይወሰን ቀጣይነት እንዲኖረው አሳስበዋል።

የዛላ ወረዳ ወጣቶችና በጎ ፈቃድ ጽ/ቤት ኃላፊ አቶ መምህሩ ማልዳዬ በበኩላቸው፣ በ2018 በጀት ዓመት በመንግሥት ድጋፍ፣ በአመራሩ ቁርጠኝነትና በሕብረተሰቡ ንቁ ተሳትፎ 32 አዳዲስ ቤቶች ተገንብተውና 34 ቤቶች ታድሰው 66 ቤቶች መጠናቀቃቸውን ገልጸዋል።

የቤቶቹ ተጠቃሚዎችም መንግሥትና ሕብረተሰቡ በትብብር ቤቶቹን በመገንባትና በማሟላት ከዝናብና ከብርድ ስቃይ እንዲያርፉ ላደረጉላቸው ድጋፍ ምስጋና አቅርበዋል።

በዛላ ወረዳ በክረምት በጎ ፈቃድ አገልግሎት የተከናወነው የመኖሪያ ቤት ግንባታና እድሳት ተግባር የተቸገሩ ወገኖችን የኑሮ ሁኔታ ከማሻሻል ባሻገር የሕብረተሰቡን የመደጋገፍ፣ የአንድነትና የበጎነት እሴቶች ያጠናከረ መሆኑ ተገልጿል።

በርክክቡ ቦታ፣የዛላ ወረዳ አስተባባሪ አካላት ጨምሮ ሜላ ማዜጋጃ ቀበሌ አመራሮችና ባለድርሻ አካላት ተገኝተዋል።

28/09/2026

የኦሮሚያ ክልላዊ መንግሥት የሕዝብን ተጠቃሚነት ያረጋግጣሉ ያላቸውን ውሳኔዎችን አስተላለፈ
***********************

ጨፌ ኦሮሚያ ባካሄደው 7ኛው የሥራ ዘመን 1ኛ ዓመት መደበኛ ጉባኤው የኦሮሚያ ክልላዊ መንግሥት አስፈጻሚ አካላትን እንደገና ለማደራጀት የቀረበውን የአዋጅ ረቂቅ መርምሮ አጽድቋል።

የኦሮሚያ ፍትሕ ቢሮ ኃላፊ አቶ ጉዮ ዋሪዮ ውሳኔውን አስመልክተው በሰጡት መግለጫ፣ ጨፌ ኦሮሚያ የሕዝብን ተጠቃሚነት የሚያረጋግጥ ታሪካዊ ውሳኔ ማሳለፉን ገልጸው፣ አዋጁ የመንግሥት አካላትን ቅንጅታዊ አሠራር እና ውጤታማነት የሚያጠናክር መሆኑን ተናግረዋል።

ሪፎርሙ በሕግ የተደገፈ እና ሥልጣንን ወደ ታች ለማውረድ ያለመ መሆኑን ያብራሩት አቶ ጉዮ፣ በዚህም መሠረት ቀደም ሲል የነበሩት 21 ዞኖች በ6 ዋና ዋና ዞኖች እንደገና እንዲዋቀሩ መደረጉን ገልጸዋል።

በአዲሱ መዋቅር መሠረት የተደራጁት 6ቱ ዞኖች፦

የምሥራቅ ኦሮሚያ ዞን

የማዕከላዊ ኦሮሚያ ዞን

የምዕራብ ኦሮሚያ ዞን

የደቡብ ኦሮሚያ ዞን

የደቡብ ምዕራብ ኦሮሚያ ዞን

የደቡብ ምሥራቅ ኦሮሚያ ዞን ናቸው።

ይህ አዲስ አደረጃጀት መንግሥትን እና ሕዝብን ይበልጥ የሚያቀራርብ እንዲሁም የመንግሥትን የአገልግሎት አሰጣጥ የሚያፈጥን እና የሚያቀላጥፍ መሆኑን የክልሉ መንግሥት ኮሙኒኬሽን ቢሮ አስታውቋል።

28/09/2026

ጨፌ ኦሮሚያ አቶ ሽመልስ አብዲሳን የክልሉ ርዕሰ መስተዳድር አድርጎ ሾመ

መስከረም 18፣ 2019 ዓ.ም

የጨፌ ኦሮሚያ 7ኛ የሥራ ዘመን የ2019 ዓመት የመጀመሪያ ጉባዔ እየተካሄደ ነው፡፡

‎ጨፌ ኦሮሚያ በጉባዔው አቶ ሽመልስ አብዲሳን በድጋሚ የክልሉ ርዕሰ መስተዳድር አድርጎ ሾሟል።

በተጨማሪም አቶ ከፍያለው ተፈራን በጨፌ ኦሮሚያ የመንግሥት ተወካይ እና የኦሮሚያ ክልል ምክትል ርዕስ መስተዳድር አድርጎ መርጧል።

28/09/2026

የሚኒስትሮች ምክር ቤት በተለያዩ ጉዳዮች ላይ ተወያይቶ ውሳኔ አሳለፈ

መስከረም 18/ 2019 ዓ.ም

የሚኒስትሮች ምክር ቤት በዛሬው ዕለት ባካሄደው 59ኛ መደበኛ ስብሰባ በተለያዩ ጉዳዮች ላይ ተወያይቶ ውሳኔ አሳልፏል፡፡

የሚኒስትሮች ምክር ቤት ያሳለፋቸው ውሳኔዎች ዝርዝር እንደሚከተለው ቀርበዋል፡-

1. ምክር ቤቱ በቅድሚያ የተወያየው የአስፈጻሚ አካላትን አደረጃጀት፣ ሥልጣንና ተግባር ለመወሰን በቀረበ ረቂቅ አዋጅ ላይ ነው፡፡

በኢ.ፌ.ዴ.ሪ ህገ መንግስት እና ምርጫ ህግ በየአምስት አመቱ የሚደረገውን ሀገራዊ ምርጫ ተከትሎ በህገ መንግስቱ አንቀጽ 56 መሰረት አዲስ የአስፈጻሚ አካላት ስልጣንና ተግባር ማደራጀት የሚጠበቅ በመሆኑ፣ በ2018 ዓ.ም በተደረገው ሀገራዊ ምርጫ ተከትሎ የፌዴራል አስፈጻሚ አካላትን በአዲስ መልክ ለማቋቋም እንዲያስችል ረቂቁ ተዘጋጅቶ ለምክር ቤቱ ቀርቧል፡፡ ምክር ቤቱም በረቂቅ አዋጁ ላይ በሰፊው ከተወያየበት በኋላ ግብአቶችን በማከል ወደ ህዝብ ተወካዮች ምክር ቤት እንዲተላለፍ በሙሉ ድምጽ ወስኗል፡፡

2. ቀጥሎም ምክር ቤቱ የተወያየው ብሔራዊ የዳታ አስተዳደር ረቂቅ አዋጅ ላይ ነው፡፡ የኢትዮጵያ የዲጂታል ትራንስፎርሜሽን ግቦችን ለማሳካት፣ የዳታ ደህንነትንና ሉዓላዊነትን ለማረጋገጥ፣ የዳታ መጋራትን፣ የዳታ ተናባቢነትንና የዳታ መልሶ አጠቃቀምን በማጠናከር የመንግሥት አገልግሎቶችን ለማዘመን፣ የአርቲፊሻል ኢንተለጀንስ ምርምርና የፈጠራ አቅምን ለማጎልበት፣ የኢኖቬሽንና የዲጂታል ኢኮኖሚ እድገትን ለማፋጠን እና በዳታ የተመራ የኢኮኖሚ ልማት ሥርዓት ለመገንባት እንዲያስችል ረቂቅ አዋጁ ተዘጋጅቶ ለሚኒስትሮች ምክር ቤት ቀርቧል፡፡ ምክር ቤቱም በረቂቁ ላይ በሰፊው ከተወያየበት በኋላ ግብአቶችን በማከል ወደ ህዝብ ተወካዮች ምክር ቤት እንዲተላለፍ በሙሉ ድምጽ ወስኗል፡፡

3. ከዚያም ምክር ቤቱ የተወያየው ከዓለም አቀፍ የልማት ማህበር ጋር በተፈረመው ለኃይል ሴክተር ሪፎርም፣ ኢንቨስትመንትና ዝመና ምዕራፍ አንድ ፕሮጀክት ማስፈጸሚያ የሚውል የአንድ መቶ አርባ አምስት ሚሊዮን ስምንት መቶ ሺ ኤስ.ዲ.አር ብድር ስምምነት ማጽደቂያ ረቂቅ አዋጅ ላይ ነው፡፡ ምክር ቤቱም ስምምነቱ ከሀገራችን የብድር ፖሊሲ ጋር የሚጣጣም መሆኑን በማጋገጥ ረቂቅ አዋጁ ለህዝብ ተወካዮች ምክር ቤት እንዲተላለፍ በሙሉ ድምጽ ወስኗል፡፡

4. የፌዴራል ገቢ ግብር ማሻሻያ ደንብ ሌላው ምክር ቤቱ የተወያየበት አጀንዳ ነው፡፡ ደንቡ የፌዴራል የገቢ ግብር ግልጽነትንና አስተዳደራዊ ቅልጥፍናን ለማረጋገጥ እና ከተሻሻለው የፌዴራል ገቢ ግብር አዋጅ ቁጥር 979/2008 ጋር የተጣጣመ እንዲሆን ለማድረግ እንዲቻል የተሻሻለውን የሚኒስትሮች ምክር ቤት የገቢ ግብር ደንብ ቁጥር 410/2009 እንደገና ማሻሻል አስፈላጊ ሆኖ በመገኘቱ ረቂቁ ተዘጋጅቶ ለምክር ቤቱ ቀርቧል፡፡ ምክር ቤቱም በረቂቅ ደንቡ ላይ በሰፊው ከተወያየ በኋላ ግብአቶችን በማከል በፌዴራል ነጋሪት ጋዜጣ ታትሞ ከወጣበት ቀን ጀምሮ በስራ ላይ እንዲውል በሙሉ ድምጽ ወስኗል፡፡

5. እንዲሁም ምክር ቤቱ የፌዴራል ተጨማሪ እሴት ታክስ ማሻሻያ ደንብ ላይ ተወያይቷል፡፡ ቀደም ሲል የሙያ አገልግሎት እና ሌሎች አቅርቦቶችን እየሰጡ የተርን ኦቨር ታክስ ይሰበስቡ የነበሩ ግብር ከፋዮች የተርን ኦቨር ታክስ የተሻረ በመሆኑ እነዚህ ግብር ከፋዮች ለተጨማሪ እሴት ታክስ ተመዝግበው ታክሱን እንዲሰበስቡ ለማድረግ፣ በአንዳንድ አቅርቦቶች ላይ የተጣለው ታክስ ለህብረተሰቡ በሚቀርቡ መሰረታዊ አቅርቦቶች እና በአገር ውስጥ ኢንዱስትሪዎች ተወዳዳሪነት ላይ ጫናን ያሳደረ በመሆኑ አቅርቦቶቹን ከታክሱ ነፃ ለማድረግ እንዲያስችል ማሻሻያ ደንቡ ተዘጋጅቶ ለምክር ቤቱ ቀርቧል፡፡ ምክር ቤቱም በረቂቅ ደንቡ ላይ በሰፊው ከተወያየ በኋላ ግብአቶችን በማከል በፌዴራል ነጋሪት ጋዜጣ ታትሞ ከወጣበት ቀን ጀምሮ በስራ ላይ እንዲውል በሙሉ ድምጽ ወስኗል፡፡

6. በመጨረሻም ምክር ቤቱ የተወያየው የመከላከያ ሠራዊት አዋጅን ለማሻሻል የቀረበ ረቂቅ አዋጅ ላይ ነው፡፡ ተቋሙ በኢ.ፌ.ዴ.ሪ ህገ መንግስት አንቀጽ 87 ድንጋጌዎች መሰረት የተሰጡትን ሃገራዊ ተልዕኮዎች በህግ አግባብ ለመፈፀም እንዲችል የመከላከያ ሠራዊት አዋጅ ቁጥር 1286/2015 ማሻሻል አስፈላጊ ሆኖ በመገኘቱ ረቂቁ ተዘጋጅቶ ለምክር ቤቱ ቀርቧል፡፡ ምክር ቤቱም በጉዳዩ ላይ በሰፊው ከተወያየበት በኋላ ግብአቶችን በማከል ወደ ህዝብ ተወካዮች ምክር ቤት እንዲተላለፍ በሙሉ ድምጽ ወስኗል፡፡

27/09/2026

የመስቀል በዓልን አስመልክቶ በሣውላ ማረሚያ ፖሊስ ተቋም ለህግ ታራሚዎች የማዕድ ማጋራት ተደረገ

ሣውላ፦ መስከረም 17/2019 ዓ.ም

የመስቀል በዓልን አስመልክቶ በሣውላ ማረሚያ ፖሊስ ተቋም ለህግ ታራሚዎች የማዕድ ማጋራት ተደረገ
።
በማዕድ ማጋራቱ ላይ የጎፋ ዞን ምክትል አስተዳዳሪና የሥራና ክህሎት መምሪያ ኃላፊ አቶ ምናሴ ኤልያስ፣ የደቡብ ኢትዮጵያ ክልል ማረሚያ ፖሊስ ኮሚሽን ኮሚሽነር ተወካይ ኮሚሽነር አዳነ ካሣ፣ የዞን አመራሮች፣ የሣውላ ከተማ ከንቲባ አቶ በላይነህ ባህሩ፣ የሣውላ ማረሚያ ፖሊስ ተቋም አዛዥ ዋና ኢንስፔክተር ታረቀኝ አጥናፉ እና የፖሊስ ማኔጅመንት አባላት ተገኝተዋል።

በፕሮግራሙ ላይ መልዕክት ያስተላለፉት የጎፋ ዞን ምክትል አስተዳዳሪና የሥራና ክህሎት መምሪያ ኃላፊ አቶ ምናሴ ኤልያስ፣ የማዕድ ማጋራት ተግባር ዛሬ ተከናውኖ ለነገ የሚተው ሳይሆን፣ በሠራነው ልክ የዕለት ተዕለት ተግባራችን ሆኖ ሊለመድ የሚገባው ትልቅ የፅድቅ ሥራ መሆኑን ገልጸዋል።

አቶ ምናሴ አክለውም፣ በማረሚያ ተቋም በመሆን በዓሉን ከቤተሰቦቻቸው ተለይተው እያሳለፉ ያሉ ወገኖቻችን በዓሉን በብቸኝነት እንዳያሳልፉ ለማድረግና የቤተሰብ ስሜት እንዲሰማቸው የማዕድ ማጋራቱ መዘጋጀቱን ተናግረዋል።

ይህም ታራሚዎች ከማረሚያ ተቋሙ ታርመውና ታንፀው ከወጡ በኋላ በሚኖሩበት አካባቢ የመልካምነትና የመረዳዳት ተግባርን እንዲያዳብሩና እንዲያስተላልፉ ለማበረታታት ያለመ መሆኑን ጠቁመዋል።

የሣውላ ከተማ ከንቲባ አቶ በላይነህ ባህሩ በበኩላቸው፣ በሣውላ ማረሚያ ተቋም ተገኝተው ከህግ ታራሚ ወገኖች ጋር የመስቀል በዓልን ማክበር መቻላቸው ልዩ ስሜት የፈጠረላቸው መሆኑን ገልጸዋል።

ከንቲባው አክለውም፣ ሁሉም ታራሚ ከቤተሰቡ ጋር በመሆን በዓሉን እያሳለፈ ያለ እንዲሰማው፣ በወንድማማችነትና በመተሳሰብ መንፈስ በዓሉን እንዲያሳልፍ መልዕክት አስተላልፈዋል።

የደቡብ ኢትዮጵያ ክልል ማረሚያ ፖሊስ ኮሚሽን ኮሚሽነር ተወካይ ኮሚሽነር አዳነ ካሣ እንዳሉት፣ ህግ ታራሚዎች በመታረምና በመታነፅ ሂደት ውስጥ እያሉ እንደዚህ በነፃነት ተሰባስበው በጋራ በዓላትን እንዲያሳልፉ የሚደረጉ ተግባራት በቅርብ ጊዜ መጀመራቸውን ገልጸዋል።

የሣውላ ማረሚያ ፖሊስ ተቋም ግን ይህንን ተግባር በዘላቂነት በማስቀጠል፣ የፖሊስ አባላትን በማሳመንና ለሥራው በማስተባበር እንደዚህ ዓይነት ዝግጅት አዘጋጅቶ ታራሚዎችን በማሳተፉ በኮሚሽኑ ስም ልባዊ ምስጋና ማቅረባቸውን ገልጸዋል።

የሣውላ ማረሚያ ፖሊስ ተቋም አዛዥ ዋና ኢንስፔክተር ታረቀኝ አጥናፉ በበኩላቸው፣ አንድ ሰው በሕግ ምክንያት በማረሚያ ተቋም ውስጥ ቢገኝም የሰውነት ክብሩን እንደማያጣና የተስፋ መብቱም እንደማይነጠቅ ተናግረዋል።

አዛዡ አክለውም፣ የማረሚያ ፖሊስ ተቋም ኃላፊነት ሕግን ማስከበር ብቻ ሳይሆን፣ በሕግ ውስጥ ሰብአዊነትን ማስጠበቅም ጭምር መሆኑን ጠቁመዋል።

የዛሬው የማዕድ ማጋራት ተግባርም ለታራሚዎች ምግብ ብቻ የሚያቀርብ ሳይሆን፣ “እናንተም የማህበረሰባችን አካል ናችሁ፣ ክብራችሁ ይጠበቃል፣ ተስፋም አላችሁ” የሚል ሰብአዊና ተስፋ ሰጪ መልዕክት ያዘለ መሆኑን ገልጸዋል።

በመጨረሻም የተገናኙት ህግ ታራሚዎች፣ ተቋሙ እያደረገላቸው ያለው ድጋፍ በማረሚያ ቤት ውስጥ ያሉበትን ጭንቀት በማስረሳት ከቤተሰቦቻቸው ጋር አብረው ያሉ እንዲሰማቸው እንዳደረጋቸው ገልጸዋል።

የመስቀል በዓል የፍቅር፣ የመተሳሰብ፣ የይቅርታና የአብሮነት መልዕክትን የሚያጎላ በመሆኑ፣ በሣውላ ማረሚያ ፖሊስ ተቋም የተከናወነው የማዕድ ማጋራት መርሃ ግብርም የታራሚዎችን ሰብአዊ ክብርና ተስፋ በማጠናከር የበዓሉን መንፈስ የሚያጎላ ተግባር ሆኖ ተከናውኗል።

27/09/2026

የመስቀል በዓልን አስመልክቶ በጎፋ ዞን ለአረጋውያን፣ ለአቅመ ደካሞችና ለአካል ጉዳተኞች ማዕድ የማጋራት ተግባር ተከናውኗል።

መስከረም 17/2019 ዓ.ም

የጎፋ ዞን ሴቶችና ማህበራዊ ጉዳይ መምሪያ የመስቀል በዓልን ምክንያት በማድረግ በሣውላ ከተማ ለአረጋውያን፣ ለአቅመ ደካሞችና ለአካል ጉዳተኞች ማዕድ አጋርቷል።

በፕሮግራሙ ተገኝተው የጎፋ ዞን ረዳት የመንግሥት ተጠሪና የብልፅግና ፓርቲ ቅ/ጽ/ቤት የፖለቲካና ህዝብ ግንኙነት ዘርፍ ኃላፊ አቶ ቦረና ቦላዶ እንደተናገሩት፣ በዓል በደረሰ ቁጥር በአቅም ማነስ ወይም በረዳትና ደጋፊ እጦት በዓላትን በአግባቡ ማክበር ለማይችሉ ወገኖች ድጋፍ ማድረግ ሰብዓዊነትን የሚያሳይ በጎ ተግባር ነው።

እንደ አቶ ቦረና ገለጻ፣ እንደዚህ ዓይነት ድጋፍ ማድረግ ምድራዊ ተግባር ብቻ ሳይሆን በሰማይ ዋጋ የሚያስገኝ ትልቅ በጎ ተግባር ነው።

መረዳዳትና መደጋገፍ የኢትዮጵያ ማህበረሰብ ከፍተኛ እሴትና ባህል መሆኑን ጠቁመው፣ በማንኛውም ጊዜ ድጋፍ ለሚፈልጉ ወገኖች በመድረስ የሰው ተኮር አገልግሎትንና ማህበራዊ ኃላፊነትን በተግባር ማሳየት እንደሚገባም አስገንዝበዋል።

የጎፋ ዞን ሴቶችና ማህበራዊ ጉዳይ መምሪያ ኃላፊ ወ/ሮ ፀጋነሽ እንግዳ በበኩላቸው፣ የሰው ልጅ በአኗኗሩ ውስጥ መረዳዳትና መደጋገፍ የተፈጥሮ ስጦታ ቢሆንም፣ ይህንን እሴት በተግባር ለመተርጎም ግን ቁርጠኝነት፣ መሰጠትና ተከታታይነት እንደሚያስፈልግ ገልጸዋል።

ረዳትና ደጋፊ የሌላቸውን ወገኖች መደገፍ ከመምሪያው ተግባራት አንዱ መሆኑን ያነሱት ወ/ሮ ፀጋነሽ፣ በዓላትን ምክንያት በማድረግ ድጋፍ ለሚፈልጉ ወገኖች ከጎናቸው መሆን እንዲችሉ የተለያዩ ድጋፎችን ማድረግ መቻሉን ገልጸዋል።

አክለውም፣ ይህንን በጎ ተግባር ለማሳካት ከጎናቸው በመሆን ለመርሃ ግብሩ ስኬት አስተዋፅዖ ላበረከቱ ወገኖች ልባዊ ምስጋናቸውን አቅርበዋል።

ድጋፍ የተደረገላቸው አረጋውያን፣ አቅመ ደካሞችና አካል ጉዳተኞችም በመስቀል በዓል ወቅት በደረሰላቸው ድጋፍ ከልብ ምስጋናቸውን ገልጸዋል።

በበዓል ወቅት ማዕድን ማጋራትና የተቸገሩ ወገኖችን መደገፍ የመስቀል በዓል የሚያስተምረውን ፍቅር፣ አንድነት፣ መረዳዳትና ሰብዓዊነት በተግባር ከማሳየት ባለፈ፣ ማንም ወገን ከማህበረሰቡ ተገልሎ በዓልን እንዳያሳልፍ የሚያግዝ ተግባር መሆኑ ተገልጿል።

Gofa Tv

29/09/2026

28/09/2026

28/09/2026

28/09/2026

28/09/2026

28/09/2026

28/09/2026

28/09/2026

27/09/2026

27/09/2026

Address

Website

Alerts

Shortcuts

Share

Category

Listing takedown request