30/01/2025
O LAHLELA LESEA KA NTLOANENG
‘Mampopo Monaheng – Mokhotlong
Lekhotla la ’Maseterata Mokhotlong le fumane ’Malebohang Nkeane (42) oa Sepatleng Moremoholo, Mokhotlong a le molato oa ho pata tlhaho ea lesea, nyeoeng e neng e le ka pel’a ‘Maseterata Taole, bochochising ba Mochochisi Mohapinyane, ka La 28 Pherekhong Monongoaha.
Puisanong le Detective Women Police Constable (D/W/P/C) Mpolokeng Lebusa oa Ofisi ea Mafokisi Mokhotlong, o re ka La 26 Pherekhong Monongoaha, ofisi ea habo e ile ea fumana tlaleho ka Morena oa Sepatleng h**e ho na le mosali ea patileng tlhaho ea lesea.
D/W/P/C Lebusa o re tlaleho e boetse ea re sechaba se ile sa belaela ha se sa bone moqosuoa moo motseng ho tloha ka La 22 Pherekhong Monongoaha, kaha le ka La 26 Khoeling ena, a ne a le sieo pitsong ea morena. A re basali ba motse ba ile ba ea mo hloela ‘me ba mo fumana hae; a re ha ana bophelo ke litaba tsa bokhachane.
O re basali ba motse ba ile ba ba le khoao ha ba bona h**e mpa ha e sa bonahala, ba nt’o hloma eo lipotso. O re eo, o ile a re o ile a senyeheloa, eaba ba tlalehela sepolesa.
D/W/P/C Lebusa o re liphuputso li supa h**e moqosuoa e ne e le mokhachane ea neng a kanna a kena tlung. O re tsa boela tsa sibolla h**e ka La 22 Pherekhong Monongoaha, ’Malebohang o ile a ipepisetsa ha hae. O re pelaelo ea bona ke h**e eo o ile a bupetsa lesea leo la ngoanana, eaba o le phuthela ka malapi, a nt’o le lahlela ka mokoting oa ntloana.
O lletsoe ke litšepe ka La 26 Pherekhong Monongoaha, a hlaha lekhotleng ka letsatsi le boletsoeng. O ahlotsoe ho hoehla Lilemo tse Hlano ka Setsing sa Tlhabollo ea Batšoaruoa kapa ho itefella M5, 000.00; lekhotla la fanyeha halefo ea kahlolo, a sa etse tlolo ea molao e tšoanang nakong ea Selemo. O ile a hloleha ho itefella, 'me a theohela ka Setsing.
Mookameli oa lefapha le tšoang Detective Senior Inspector (D/S/Insp.) Thabiso Daemane o tšoetse ka mathe liketso tsena tse lihlong, haholo ha li etsoa ke basali ba baholo joalo ka 'Malebohang. O lebohile morena le basali ba motse oa hae ka mosebetsi oo ba o entseng.
