09/01/2026
MAPOLESA A UTSOETSA LECHAENA, KETANE, MOHALE'S HOEK
Litaba tsa Sechaba ke lekoko le metsi. Re fumane tlaleho e nyarosang ka e mong oa Basebeletsi oa khoebo ea Lechaena e Ketane, Mohale's Hoek.
Ka la 29 Pulungoana Ngoahola,ene e le Moqebelo bekeng. Ha e le Moqebelo ho theohela Morekisi le Moqhubi oa teraka ea lebenkeleng moo. Ka hora ea bone mantsiboea, Morekisi o ile a kopa h**e Moqhubi a sale a ntse a rekisa joalokaha a ne a lokela ho ea Kerekeng ea Bosiu sebakeng se hole le moo, 'me Moqhubi a lumela ho sala a ntse a rekisa. Moqhubi o ile a koala lebenkele kamora hora ea bohlano a nto ea ha hae.
Moqhubi ha a qeta ho fihla ha hae o ile a fumana molaetsa oa h**e lebenkele le hlasetsoe 'me a mathela teng ka lebelo la phiri e putsoa. Moqhubi o fihlile lebenkeleng Sechaba se se se bokane ka bongata, ho fihleng hoa hae o ile a lemoha ha lemati le leng le kenang kahare le butsoe hanyane, a nka lejoe a betsetsa monyako. Ha a qeta ho otla lemati ka lejoe, ea kahare o ile a koala, a notlela. Sechaba se ne se ile sa tsebisa Sepolesa, 'me hoa fihla Mapolesa a mabeli.
Sepolesa se ile sa kopa Sechaba ho emella morao. Lepolesa le leng le ile la thunyetsa holimo ha nngoe ho ts'osa masholu kahare. Kahare ene e le banna ba babeli, Lechaena la monna le mosali oa lona. Masholu ana a entse mosebetsi oa bona ba iketlile ba sa potlaka. Ba khakhalile Machaena ana, ba ikhapela chelete le lithunya tsa khoebo tse molaong, 7.65 le pump action.
Masholu a kene ka lebenkeleng ka 18:05 ba tsoa ka 21:30, Mapolesa a mabeli esale a ema kantle ho lebenkele lihora tse tharo kaofela ba emetse h**e Masholu a tsoe. Nakong eo ba tsoang, Mapolesa ao a mabeli a ile a baleha a ea morao. Masholu ha a tsoa ka lebenkele ha a matha, ba itsamaetse hantle ba likela kahare ho muru, ba ile ba thunyetsa holimo ha beli ha ba likela, eaba Mapolesa morao moo a balehetseng teng a thunya ha nngoe.
Mapolesa a ile a kena ka lebenkeleng, a fumana Lechaena le Mosali oa lona ba fasitsoe 'me ba ba fasolla. Ha morao ho ile hoa ts'oaroa Moqhubi oa koloi ea baeti e tsamaelang hona Ketane eaba o tsoa ka tsona.Moqhubi eo ke eena ea neng a le ka lebenkeleng le Mohlankana e mong ea ileng a balehela lebollong kamora ho etsa mosebetsi ona. O bonts'itse ha ba ne ba bitsitsoe ke e mong oa Basebeletsi ba khoebo e joalo, a ba hlaloselitse h**e na ho keneha joang le h**e chelete le lithunya li hokae. Moqhubi o boetse a hlalosa ha kahare ho morero ona ho ne ho akha, Mookameli oa Sepolesa sa Ketane le le CID le leng le Sebetsang Motebong oa Sepolesa oa Ketane.
Mosebeletsi oa lebenkele o ile a fumana M6,500, le CID le Mookameli oa Sepolesa eka ba tsoile ka li M30,000 le Lepolesa le leng la boemo bo fats'e ha morero o qeta ho atleha. E mong o ne a ile a titimela ho ea lebollong hang kamora mosebetsi ona a baleha, 'me ena a ts'oaroa nakong eo a qetang ho ithoka. Mosebeletsi oa lebenkele le eena o ile a ts'oaroa a latoa mosebetsing, le ha ho le joalo ha a ka isoa khotla o lokolotsoe sepoleseng fela ntle le h**e Lechaena le tlaleheloe.
Lechaena le bonts'a le phela ka ts'abo kaha motho ea belaelloang e le ena ea rutuleng masholu ho kena khoebong ea hae a ntse a sasanka hara motse a sa ts'oaroe. Eane ea ileng a ts'oaroa ha a qeta ho ithoka, o ile a fumanoa ka lifono tsa Lechaena, a bua nnete h**e ba entse mosebetsi o joalo. Kakaretso ea Mapolesa a neng a le morerong ona a ne a le mararo.
Se makatsang ke h**e kamora h**e litaba tsena li loele, Mookameli eo oa Sepolesa sa Ketane le le CID le ameha morerong o, ba nyametse joaloka motoho oa ngoan'a 'Malehloa Ketane moo, pelaelo ke h**e mohlomong ba se ba sebetsa nqa e nngoe. Ho setse Lepolesa le le leng la boemo bo tlase. Ho fihlela kajeno, ha hona litlaleho tseo Sepolesa sa Ketane li ile tsa li fa Lechaena lena mabapi le nyeoe eo a e hlahletseng. Ba litlamong ke Lekoloanyane le Moqhubi oa koloi ea baeti.
Lechaena ha le botsa na Mapolesa ao a amehang a kae, le fumane tlaleho ea h**e ho tla emeloa h**e Mochochisi a fane ka taelo ea h**e ba ts'oaroe. Moqhubi oa koloi ea baeti o ts'oeroe a se a rekile bethe le oteropo ka chelete eo ba e utsoelitseng Lechaena.
Ka lebaka la mathata a khokahano ho latela sebaka sa Ketane, mohala oa Sepolesa sa Ketane ha o tholahale ho nka lehlakore la bona. Empa mamati a rona a butsoe.
