Moafrika Radio Television - Mr TV

21/07/2025

MASHOLU A TS'OELISOA LIKHOMO TSA BOSHOLU, MASERU

Likhomo tse ts’eletseng tsa moahi oa Thaba-Bosiu, Ha-Phaloane, Maseru, li ts’oelisitsoe masholu, ka Labohlano le fetileng li patiloe Belekomo, ka lehlakoreng le leng la thaba ea Machache, le hoja ho ile ha kupa e mahlo-mafubelu ka majoe lipakeng tsa masholu le babatli ba tsona, empa ba a hlola.

Ea buileng lebitsong la mong’a tsona, o re masholu a fihlile ha habo tsona, a li bulela, molisana a letsetsa baahisane ba ileng ba tsosana ka liroja-roja bosiung ba Labone, sechaba sa tsoa ka makhalo, le ka thuso ea monyenyetsi o tsoang ho Moafrika FM, sa li fihlela li le ling athe masholu a tsona a ipatile.

20/07/2025

BAFU BA ILENG BA TIMELLA KOTSING EA LIKOLOING TSE BILENG TSA TUKA LERIBE, BA BOLOKILOE MAFELO A BEKE

Bafu ba leshome le motso o mong, ba ileng ba timella kotsing ea likoloi tse bileng tsa tuka Kolonyama Ha-Molipa libekeng tsa ho feta, Leribe, ba bolokiloe ka thuso ea lefapha la thibelo le taolo ea likoluoa, DMA, ka Labots’elela le fetileng, libakeng tse fapakaneng tsa naha ena, ho rialo ofisiri ea liphatlalatso ea DMA Mahlape Koali.

O re lefapha la habo, le phalletse ka makase le tse ling, sesole sa phehela ba neng ba il’o lla mosoanng ’me masalla a bafu bao, a ile a ts’oareloa ts’ebeletso e kopanetsoeng ea phupu Maputsoe, Leribe, moo ho neng ho robellane mekhahlelo e fapakaneng ea sechaba le botsoka-sephali ba puso ena pele ba isoa ha habo bona ho ea bolokoa.

20/07/2025

BACHA BA FAHLANA KA MEKOETLA HOLIM’A PHATLALATSO EA TLHOKAHALO EA MESEBETSI HO BONA

Molula-setulo oa Mokhatlo o boulellang litokelo tsa mantlha tsa botho oa Section 2, o re mekhatlo ea bacha e Ikemetseng le ea lipolotiki, e se iphetole melomo ea tonakholo ea e-ba khahlanong le eona ha e re ’muso, o iphosisitse ha o phatlalatsa tlhokahalo ea mesebetsi ho bacha e le koluoa, eena o ne a e-ja lekomo le tonakholo eseng mekhatlo eo, ka hona, e emise hang-hang ho hula-hulana, bacha ba loanele ho theheloa mesebetsi ke ’muso.

Monghali Kananelo Boloetse o bua a ipapisitse le polelo ea mekhatlo e boleloang, e reng e hanana le Section2 ka ’muelli oa eona Fusi Sehapi hobane tonakholo, e nepile ha e phatlalalitse koluoa ea mesebetsi, ho seng ho e saletse ke h**e e thehe likomiti tse tlang ho sebetsana le taba eo, ’me o tle ka leano la h**e bacha ba kenyelletsoe maanong a tlang ho sebetsa litaba tsa bona.

Bacha ba Democratic Congress le ba mokha oa sechaba sa Basotho BNP, ba se ba ikhutse selekaneng seo, ka le reng mekhatlo e bonahala e se e buella tonakholo, e sitoa ho tsitlalella ntlha-kemo ea oona.

20/07/2025

'MUSO OA INDIA O TLA ETELA OA LESOTHO, HO RIALO MPOTJOANE

Letona la tsa Machabeng monghali Lejone Mpotjoane, le re ’muso o tla matlafatsa maqhama le India litabeng tsa thuto, ho thakelana ka malebela ts’ebelisong ea marang-rang le litabeng tse amang bosebetsi le khoebo ho tloha ka Lapele la ha khoeli ena e hlola matsatsi a 21 ho fihlella ka la 22, moo ’muso o tla beng o amohetse letona la tsa Machabeng la naha eo.

Mpotjoane o re lengosa leo, le tla be le etele sekolo sa Lerotholi Polytechnic, seo tebello e leng India e tle e se thuse haholo ho matlafatsa lithuto tsa marangrang ’me le lebelletsoe ho lula majoana le Letona la likhokahanyo, la khoebo, la bosebetsi le la Tsa Machabeng ka kotloloho.

20/07/2025

MOLLO O SA TSEJOENG O FETOLA LELAPA LA NKHONO LESUPI, MASERU

Mokhethoa oa Puso ea Libaka oa Setlekeng, Maseru, Motebang Ramokoatsi, o re mollo oo ho ntse ho e-so tsejoe sesosa sa oona, o ile oa hlabara, oa hotetsa thepa eohle ea nkhono ’Mamatheko Makatla le karolo e kholo ea matlo a hae, ho setse lesupi mafelong a beke e kololumelang ka Labosupa la ha khoeli ena e hlola matsatsi a 20.

Ramokoatsi o re erekaha liepamere le bohle ba lekile ho jela paate, empa ho se pheko, ’muso o kenye letsoho, nkhono a phalelloe ka khaho ea matlo, lijo le liaparo hoba o setse ka tse ’meleng, eena le litho tsa lelapa la hae.

20/07/2025

'Mathabo Chobokoane
Bohashana: Ke letsatsi la bobeli monna a noetse letamong Mafeteng.

19/07/2025

BAMAMELI BA FAPAKANA KA MAIKUTLO HOLIM'A KHAHO EA LETAMO LA MAKHALENG

Bamameli ba lenaneo la Puso ea libaka le Borena la Labots’elela la beke ena, ba fapakane ka maikutlo tabeng ea letamo le tlil’o ahoa Matelile nokeng ea Makhaleng, Mafeteng, ha morena Sekhonyana Seeiso.

Ba bang ba re ha ho nepahetse, ho ka be ho ile ha batloa maikutlo a sechaba pele ’muso oa Lesotho le oa Botswana e tekenela tumellano, hobane litla-morao li le teng ho sechaba, ha ba bang ba re methati eno e ntse e nepahetse kaha ho tla nne ho tluoe sechabeng.

Morena Sekhonyana Seeiso ea amohetseng baeti, o re Poresidente ea Botswana e itse h**e ho tla ba le lintlafatso tse kang tsela e eang Matelile, lipompo tsa metsi malapeng, metsi a nosetso masimong le tse ling tseo a itseng li tla hlahella ha ts’ebetso e ntse e tsoelapele.

19/07/2025

KHATHANG TEMA E TLOTLA LITHO TSA EONA, KA HO LI ABELA MANGOLO

Mokhatlo o moholo oa baits’okoli, Khathang Tema, o phethetse koetliso ea ho bua ka mekhoa e nepahetseng ea ho atamela lipuisano le tsamaiso, ka ho abela litho tse kaholimo ho mashome a mabeli mangolo a li pakang li koetlisitsoe, Maseru, ka Labohlano la beke ena.

Molula-Setulo oa mokhatlo, monghali Ts’olo Lebitsa, o re koetliso e nkileng matsatsi a mahlano, e koetsoe ke ’Musi oa setereke sa Maseru, Ts’epo Lethoba, ea bileng a fuoa mosebetsi oa ho nehelana ka mangolo ho ba boletsoeng, ’me bakoetlisi ba
menahana le mehlala ho khutlela ntlo-kholo ea mokhatlo oa lefats’e oa baits’okoli, ka Labots’elela la beke ena.

19/07/2025

BAAHI BA PELA-TS'OEU BA LLA KA LEFAPHA LA LIKOLUOA LE RENG BA FUMANE NAEPENE EA TSOHA-U-IKETSETSE, EMPA HO SE JOALO, LERIBE

Ofisiri ea liphatlalatso ea lefapha la Thibelo le Taolo ea likoluoa, DMA, Mahlape Koali, e re Basotho ba leng seboko ka h**e ha ba hlahe lethathamong la ba sebelitseng morerong oa ’Muso oa Tsoha-u-iketsetse, Pela-Ts’oeu, Leribe, ba atamele marena a bona, a ba etsetse mangolo a ba fetisetsang ofising ea habo h**e ba tle ba fumants’oe naepene ea bona.

Ka lehlakoreng la ba reng ba hlaha lethathamong la ba ts’oasitseng naepene empa ho se joalo, o re taba ea bona e tla sebetsoa ha ho phethetsoe litefo tsa ba bang hobane taba ea bona e batla liphuputso tse tebileng.

Sena se latela h**e Basotho ba sebelitseng k’hanseleng ea Menkhoaneng, Leribe, ka molomo oa monghali Ratlali Masuoe Teanye, ba khutlisoe k’hanseleng ka Laboraro la beke e fetileng, ka le reng ba bang ha ba hlahe, ha ba bang ba hlaha ba fumane naepene, empa esa fihla matsohong a bona.

Ka Lehlakoreng le leng, Mahlape Koali o re lefapha la habo le sa emesitse ha nyenyane ka ho reka lijo-thollo tsa Basotho, kamor’a ho etsa phatlalatso ea ho li reka, lebaka ke h**e lihoai li ile tsa phalla ka matla, ’me litoro tsa bona li tletse.

19/07/2025

BANNA BA MOETLO OA LEBOLLO BA K’HOEFELA KA MATLA LIKETSO TSA BAJAKI BA HA RASENKISI

Banna ba moetlo oa lebollo, likanta tsohle tsa naha, ba k’hoefetse ka matla liketso tsa bajaki ba Thaba-Bosiu Ha Rasenkisi, Maseru, ka le reng ba lubana le bana ba sechaba ka h**e lekhotla la Lepeli Ngope le sebakeng seo, le nts’oe ka har’a motse, tsena ba li buile lenaneong la Bosotho le bileng la fela ka khitla e le sepenya, ho petetsanoe mong le mong a batla ho ts’oaela.

Se boetseng sa hlahella lenaneong, ke h**e banna ba Ha Rasenkisi le metse e ahisaneng, ba se ba felletsoe ke mamello ea bajaki. Ho feta moo, bo Ntate Mothobi oa Ha Sepenya sa bana ba Moholi Semonkong ’Maletsunyane, ba re lekhotla leo le khutlisetsoe ha bo lona, kapa Morena Letsoabo Jobo a hoelehetse lipere li boee, ba tla qhaneha ba itlise moo ha ba ts’abe

19/07/2025

HA MAPANTITI A AMERIKA A KA TLA LESOTHO, 'MUSO O ITOKOLLE HO BITSOE LIKHETHO

Bakhethi ba lenaneo la Pusong ea Sechaba ka Sechaba ba re ebang ’muso oa Lesotho ha o ka fumanoa o amohetse mapantiti a litlokotsetse a tsoang Amerika, o itokolle hang. Sena se latela h**e Amerika e ise litlokotsebe tse hlano tse sa batloeng ke linaha tsa bo tsona Eswatini, bekeng e fetileng.

Letona la Machabeng, Lejone Mpotjoane, le itse Amerika ha eso ferehe Lesotho, ebile ’muso oa habo ha o na thahasello ea ho amohela litlokotsebe. Bakhethi ba akile Mokoena eo, le ho itela ho se khahloe ke ho amohela noha ho ja ba batla tlhapi, ka lebaka la tlala.

’Mesa mohloane ea sa fanyeng o itse o lumela taba ea mapantiti ana, e le maholi a patile maeba ka ha Amerika ena le mekhahlelo e meraro ea likahlolo tsa litlolo tsa molao tse kenyang motho ka har’a chankana, e leng kahlolo ea nako e itseng, kahlolo ea hoea-hoile le kahlolo ea lefu. Potso ke h**e na ha li sebelisoe ke eng? O re na ha motho eo a qeta sekoebo sa hae, Lesotho le tla lebelloa ho etsa eng ka eena, a sa batloe ke ba habo.

19/07/2025