25/08/2025
Новы раман! Агонь-полымя-глюкі-іронія-сарказм!
Марыя Пархімчык, "Эйфарыя", "Пфляўмбаўм", 2025
🫨 Анатацыя: На IT-востраў у цэнтры Еўропы прыязджаюць журналіст Пітэр Уордсварт і мастацкі кіраўнік танцавальнага калектыву Кацярына Фёдараўна. Ён збіраецца зрабіць яскравую гісторыю пра змрочную рэспубліку, яна — годна выступіць на свяце ўраджаю. Усё ад пачатку ідзе не па плане. Героям даводзіцца прайсці праз выпрабаванні, якія стварае для іх нехта на востраве. Аднак хутка прыгоды пачнуцца і для тых, хто імі кіруе… Дзе праўда, дзе выдумка — дакладна не адкажа ўжо ніхто.
Разам з героямі «Эйфарыі» чытач завітае на юбілей народнага артыста, зазірне ў цэнтр псіхічнага здароўя, наведае шыкоўны замак, паглядзіць лялечны спектакль, дасць драла ад лясных драпежнікаў і разгадае загадку ўсюдыісных помнікаў правадыру.
🧐 Пра аўтарку:
Марыя Пархімчык нарадзілася ў 1986 годзе на Бабруйшчыне. З адукацыі — філалагіня, з прафесіі — журналістка, рэдактарка, сторытэлерка, стваральніца падкастаў. Таксама працуе з гумарыстычнымі тэкстамі як камікеса і ўдзельніца фемінісцкага стэндап-клуба. Удзельніца Рэзідэнцыі маладога літаратара Беларускага ПЭН-цэнтра ў 2019 годзе. Раней друкавалася толькі з малымі формамі і ў самвыдаце. Дэбютуе ў «Пфляўмбаўм» з раманам «Эйфарыя», які ствараўся зімой 2021/2022 ў Мінску.
🥸 Цытата:
"Хлопцы і дзяўчаты ўзяліся дзяліцца здагадкамі, што іх чакае, якое надвор’е будзе, як хлебасольна сустрэнуць дарагіх гасцей на востраве. Танцор Міценька Шаўкапёраў там ужо бываў: ён распісваў усё ў колерах, расказваў тамтэйшыя анекдоты пра цвік і шыбеніцу, закочваў вочы пры ўспаміне пра смак мясцовых настоек і пра тое, як хутка яны б’юць па мазгах.
— Ой, Кацярына Фёдараўна, вам вельмі там спадабаецца, вельмі! — запэўніваў Міценька.
— Ой, і не знаю, адкуль ты ведаеш мой густ… — засмяялася Кацярына Фёдараўна. А пра сябе падумала, што Міценька — чалавек па жыцці назіральны, нездарма сын супрацоўнікаў паліцыі, таму яго высновам давяраць можна."
Фота аўтаркі © Віялета Саўчыц
