شركة المطاحن الوطنية/بنغازي

18/08/2025

﷽" يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي " صدق الله العظيم

أنتقل إلي رحمة الله الحاج ( محمد الراشد المسماري )
أحد العاملين بالشركة بصومعة المرج .
وتعازينا للأخت فتحية محمد الراشد . رئيس المراجعة الداخلية بالمطحن . في وفاة والدها .

وتقام ليالي المأتم بمدينة المرج بالقرب من عمارات الضمان .
والثلاثاء ثالث ليلة فالعزاء .

نسأل الله ان يتغمد الفقيد بواسع رحمته وأن يسكنها فسيح جناته وأن يلهم اهله وذويها جميل الصبر والسلوان
ومانقول إلاما يرضى ربنا:إنا لله وإنا إليه راجعون٠٠

14/08/2025

مادور نقابة العمال في بنغازي؟هذا وقتها المفروض هي التي تتبنى القضيه وتتصل باعلى مسؤول في البلاد لانها هي القناة الرسميه التي تضمن حقوقكم اسوة بنقابة المعلمين ونقابة النفط... ياريت تقابلوا حماد وتحكوله. وتمشوا بعلاقاتكم للمشير والفريق. وعقيلة صالح ... ورب السماوات السبع في ناس تشكي ماعندها حق خبزه وحق دواء. ولي أمرنا من فالبلاد اللي يبي يتحاسب علي كل فرد بات جيعان ومش قادر يسلك حق أجار ..نبوا مرتب بس ياريت أتواصلوا معا المشير شخصيآ .ماوصلتوش فيه .عدوا للمشايخ الشيخ ف*ج حفتر والشيخ الأ طيوش.. البلاد صغيره وتعرف بعضها كلها .تو توصلوا لحل .. الحاج سعد العمروني يوصلنا في أحسن أعطيه ولا علي القطراني يقولونا من الراجل اللي يقدر يحل مشكلتنا..لاحول ولاقوة الابالله العلي العظيم وحسبي الله ونعم الوكيل

11/08/2025

إلي كل العاملين بالشركة داخلين في 8شهور من غير رواتب والحبل عالجرار وتواصلنا معا جميع الجهات المعنيه حتي وزارة المالية مفش أي حل لنا . ونبوا نوكلوا محامية ودرسة ملف القضية وطلبت من كل موظف قيمة عشان اترافع عالقضية . وتطالب بتعويضنا وتنزيل مرتباتنا. ياريت الكل يتواصل معانا ولا نمشوا ل650 نردوا للإدارة ومكان عملنا .

06/08/2025

06/08/2025

﷽" يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي " صدق الله العظيم

ننعي وفاة المرحومة دكتورة نساء والولادة فاطمة الشيخي . .
أرملة المرحوم محمد الصابر أحد العاملين بالشركة بالقسم المالي سابق..

نسأل الله ان يتغمدهم بواسع رحمته وأن يسكنها فسيح جناته وأن يلهم اهله وذويها جميل الصبر والسلوان
ومانقول إلاما يرضى ربنا:إنا لله وإنا إليه راجعون٠٠

05/08/2025

الصفحة فيها 3 مسؤولين لما واحد يفتح رسالة معش يشوفها الادمن التاني الا لما يراجع البريد .عمومآ نأسف لعدم الرد علي بعض الرسائل لعدم رؤويتها. ونتأسف من الزميلة بتول السنوسي لعدم تنزيل تعزية لوالدها .

نتقدم بأحر التعازي والمواساة للزميلة بتول السنوسي في وفاة والدها ونسأل الله أن يتغمده بالرحمه والمغفرة وا يسكنه فسيح جناته ويلهم أهله وذويه جميل الصبر والسلوان. ونتأسف للتأخير الخارج عن الإرادة

05/08/2025

﷽" يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي " صدق الله العظيم

نتقدم بأحر التعازي والمواساه لعائلة العبيدي في وفاة الزميل السابق بالشركة المرحوم (سالم علام العبيدي )

وتقام ليالي المأتم بشارع مسجد السيدة عائشة
واليوم ثاني ليلة فالعزاء .

نسأل الله ان يتغمد الفقيد بواسع رحمته وأن يسكنها فسيح جناته وأن يلهم اهله وذويها جميل الصبر والسلوان
ومانقول إلاما يرضى ربنا:إنا لله وإنا إليه راجعون٠٠

03/08/2025

والله والله أنا نزلت رسالة وحدة والله ناس كل شوية تسأل عالوضع والمرتبات ناس تبهدلت والناس تشكي من سوء المعيشة وأجارات ومرض ومصاريف دراسة وفي اللي مش قادر حتي علي حق الخبزة .ياريت اتوصلوا صوتنا لعقيلة صالح والفريق صدام وجبريل البدري اللي واخذ مصنع 650 وكان سبب في قرار نقلنا وتوقيف حالنا حددوا يوم نمشوا ل650 نديروا بيان ولانمشوا لمجلس النواب نخشوا علي عقيله صالح ولا نمشوله فالقبه .لنا 8 شهور وضع مزري قعد تعبنا بجد ..
الحمد لله ناس فيها الخير تواصل فاعل خير ودفع 400 دينار موبي لشراء مواد غذائية للعائلة اللي نزلنا عليها أمس نشالله في ميزان حسناته واللي يبي يقدم مساعدة ولايعرف حد يبي يساعد يتواصل معايا خاص نربطه بالعائلة .

02/08/2025

#البريد الوارد
الأخت زوجت احد موظفين الشركة تعاني الجوع وضيف المعيشة .

واقسم بالله لنا كم يوم من غير أكل اطفال تأكل في عجينه بملح وشاي مر تعبنا معش في شغل برا والرجل مريض مايقدر يخدم بره حتي سياره مافي ولا نقال نقال جارتي هضا سألتكم بالله نبي وكال بس معش نبوا مرتب ولا تنسيب الراجل مريض حتي حق الدواء مانقدرو علي حقه حتي الخبزه نطلع نلمول فالخبزه اليابسة من الشارع وانقعوا فيها بالميه عشان نأكلوها .لاحول ولاقوة الابالله العلي العظيم وين الدوله وين مجلس الإدارة وين الرقابة .والله عيالي حتي المدرسة بطلوا منها معندهمش حق دبش الله المستعان . الي أسامة حماد والقيادة العامة نناشدكم نناشدكم ضاق بينا الحال خلاص سادنا

26/07/2025

#مناشدة
قد تعبنا وسأمنا من الظلم الذي وقع في حقنا وحرماننا من أبسط حقوقنا فالدولة الليبية وهو فالقانون يعتبر خط أحمر .المعاش او الراتب .نحنا عمال وموظفين ومهندسين الشركة داخلين في الشهر الثامن دون مرتب 8شهور لا راتب ولا تنسيب . ومفش حد من مجلس الإدارة فالشركة طلع في بيان ولا وضح للناس شن وضعهم والله 633 موظف وكل موظف عنده عيله يعول فيها يعني 633 عيله كلاهم الفقر خوذ ولا خلي وتم اخذ الشركة الوحدات الإنتاجية من قبل الجهاز الوطني للتنمية .وتم قرار باحالة جميع العاملين للوحدات الإدارية فالدولة. من 8شهور وبعد مراجعة الموظفين للخدمة المدنية وهيئة الرقابة الإدارية طلع القرار .لازم من راجل فالدولة يوقع عليه مرة تانية وينسبنا ويصير افراجات وينزل مرتباتنا المهم قالونا لازم ترفعوا قضية .علي من نبي نرفعها علي أسامة حماد رئيس الوزراء ولا عالدوولة نحنا ناس بسطاء نبوا نعيشوا في بلادنا حياة بسيطة ونطالب بأقل الحقوق اللي هو مرتب .والله في ناس معانا ماتوا من القهر وفي اللي مريض واللي انجلط مش قادر أيأمن لقم عيش لعياله .ياريت التدخل من الفريق صدام وحل مشكلتنا ونحنا ناشدنا كم مرة ..وياريت جميع العاملين يردوا لوحداتهم الإنتاجية وبالذات 650 يردوا لعملهم. حسبي الله ونعم الوكيل فاللي كان سبب فاللي وصلناله.