11/08/2026
رحمة الله على الشهيد اللّواء فوزي المنصوري، ربي يصبّر هله ويسكنه فسيح جنّاته.
في الطبيعي منحبش نشارك رأيي، تفادياً لأي صداع انا في غنى عنه. بس بعد اللي صار اليوم في بنغازي قعد واجبي اني نحكيلك.
مش حنحكيلك ع المتشمّتين، كلامهم مالاش قيمة، خلّيهم عادي. ما تخلّيش حد إمّعة يحرقلك دمّك، وما تعمّمش علي مدينة كاملة عشان حثالاث ما تسوى، حتى لو كانو واجد، مزالو شوية.
في كل مكان في الزين والشين.
اللي يقهر في الموضوع هم الجبناء اللي يفجّرو ويدّعو الاسلام. المنافقين الصعاليك. فيه سيناريو في راسهم خاطرهم يعاودوه. شكلهم نسو شن صار ويبّو بنغازي تذكّرهم أخرى وتذكّر كل حد نسى.
بنغازي وهي طايحة ما قدرو عليها، يبّو يقدروها وهي امصبّية؟
ف هذا هو، ما تخشّش في دوامة قلق وخوف من شي مش حيصير. الحرب هذك مش حتعاود بإذن الله، صح كانت فترة صعبة، بس خلّتنا أقوى. ولأن ربّي كريم وديما عند حُسن الظن؛ كل شي حيكون كويس.
ربّي يحفظ بنغازي وهلها وكل ليبي نيّتة نظيفة.
حنّو عليها، حبّوها وعطوها قدرها راهي حسّاسة شوية.
