10/11/2024
مقروض الطاجين😋يدوب في الفم
الطريقة:
3كوب سمدينة ناعمة
كوب ونص دقيق
رشة ملح
تخلطيهم مع كوب وربع زيت فاتر
خليهم علي جنب
كل ماتخليهم يرتاحو كل مايجي هش ويدوب
تقدري تخليهم حتى 6ساعات او ليلة كاملة عادي لكن اني خليته 3ساعات
بعد مايرتاح تحطي عليهم زرف BB
وتعجنيهم بالزهر
متعجنيش هلبا حاولي انك تلميه لمان
حتحتاجي حوالي كوب زهر
بعدين اقسمي العجينة علي زوز
افردي نصها في الطاجين
الطبقة التانية التمر:
التمر وتيه قبل العجينة
خودي نص مربع تمر معجون
واعجنيه مع كاشيكين زبدة وسمسم لن يولي رطب
افرديه علي نايلو علي كبر الطاجين
وبعدين حطيه في الطاجين وباقي لعجينة ديريلها نفس الشي افرديها علي نايلو وحطيها فوق التمر
بعدين قصيها كيف ماتبي ومنقشيها بالمنقاش
حطيها في الكوشة علي درجة حرارة 200 وخليه يتحمر كيف ماتبي
اول ماطلعيه صبي عليه العسل يكون هو سخون والعسل بارد او العكس
العسل متاعه يكون تقيل شوية
وصحتين
