26/02/2023
لي كيقوليك أن الحياة ديما كاتكون ساهلة و زوينة و كلشي فيها مثالي، راه مزال ماشاف منها والو و ما عارف عليها حتى شي حاجة، و لي كيحاول يقنعك أنها صعيبة و قاسحة بزاف ما كترحمش، هاداك راه باغيك تهز الراية البيضا و تستسلم بلا ما تعتامد على الإختيارات و القناعات ديالك، حيت هو إنسان مكلخ ما فاهمش الكونسيبت مزيان و الهدف ديالو هو حتى نتا تولي فاشل و مكلخ بحالو، و بجوجهم سوا فالمثال اللول أو الثاني عندهم شوفة محدودة للأمور حيت الحياة ماشي كيفما وصفوها هوما و لكن هي بحال شي معركة ما ساهلاش و لكن فنفس الوقت ما صعيباش بزاف حتال ديك الدرجة ... و العِيشَة فوسط هاد المعادلة المعقدة هو لي كيخليها تعطينا ديك المتعة و الإثارة.
ديما كنسمعوا أن الحياة مدرسة كنتعلموا منها بزاف ديال الدروس لي كتفيدنا و كتخلينا نزيدوا القدام ... و حيت هي مدرسة خاص يكونوا عندها تلاميذ، و حيت كاينين فروقات فالمستوى و القدرة على التركيز و الفهم ... خاص هادوك التلاميذ ديال الحياة تكون عندهم أمور كتفرقهم و كتميز ما بيناتهم و لكن القضية هنا مختالفة شوية على هاديك لي عند التلاميذ ديال المدرسة العادية.
كنلقاو فيها التلاميذ الاذكياء لي فهموا الدروس مزيان و حفضوا القواعد و عرفوا كيفاش يوظفوها، و النتيجة كانت أنهم وصلوا للاهداف ديالهم و حققوا النجاح لي ديما كانوا كيحلموا بيه و طمحوا ليه.
و فيها لي النيڤو ديالهم متوسط كيتقاتلوا باش يبقاو قراب من الفئة اللولة بلا ما يوصلوا للنيڤو ديالهم، حيت هوما كيخدموا باش يبقاو فالسباق و ما يعلنوش الهزيمة ديالهم. كيخدموا بنيتهم، كيتقاتلوا💪 و كيديروا لي فجهدهم🏋️
و كيحاولوا ما أمكن باش يتأقلموا مع هاد الدروس و القواعد.
أما الفئة اللخرة هي ديك لي كتقوليك بلي حتى شي حاجة فهاد الحياة ما كتستاحق تخدم ولا دْمَر عليها يا إما تكون فالطريق ديالها🛣️ لي منورة و زوينة و إما تكون فالطريق الاخرى لي مظلمة و كلها شوك و حفاري ... و الحاجة الخايبة فهادشي ما تقدرش تختار اشمن طريق غاتمشي فيها ؟ يا إما تكون لاباس عليك عندك شلا لفلوس يا إما تكون مگرد ما فراسمالك والو، يعني يا بيض يا كحل ما كاينش عندك شي خيار أو حل آخُر💁
فهاد المقال غادي تعرف داكشي لي كاتعرفوا الفئة اللولة لي خلات الاحلام ديالها تولي حقيقة فالواقع و وصلات للاهداف ديالها، الفئة لي كاتعرف أن قواعد الحياة ما عندها حتى علاقة بالقواعد ديال المدرسة، كاتعرف أن المعدلات الكبيرة لي كنحصلوا عليها فالجامعة ما كافياش باش تخلينا نحققوا داك النجاح لي حنا كانتخيلوه، كاتعرف أنه باش تلقى وظيفة مرموقة كيفما كتمناها ماسهلاش، و أن الطموح بوحدو ما كافيش باش تاخد داكشي لي نتا باغيه من الحياة.
نبداو على بركة الله 🔽
➊ أصعب خطوة هي الخطوة اللولة :
البداية ديما كتكون صعيبة، هي داك الحيط لي كيفصل ما بين الشخص الناجح و الفاشل، بين هاداك لي كياخد داكشي لي بغا و لاخور لي كيبقى بعيد عليه.
الفرق بين واحد غليض طيح 5 كيلو من الوزن ديالو و بين هاداك لي زاد غلاض اكثر، هو أن اللول قرر يخرج من 𝗖𝗼𝗺𝗳𝗼𝗿𝘁 𝘇𝗼𝗻𝗲 و ناض جمع الوقفة باش يمشي لاصال ادير الرياضة، و الثاني عگز ما قدرش ادير نفس البلان و بقى عاطيها غير الراحة مكسَّلْ فبلاصتو نهار و ما طال قدام التلفازة ...
الفرق ما بين المدير و الموظف هو أن المدير فواحد النهار قرر يبدا فالبروجي ديالو، خدا هاد القرار و دار الخطوة اللولة باش يوصل الهدف لي هو مسطرو، ما خافش من الخسارة ولا الفشل و إنما ركز التفكير ديالو كامل على شنو غادي يوقع ايلا حقق الحلم ديالو و كيفاش يمكن الحياة لي كيعيش فيها حاليا تبدل و تولي احسن من الوضعية لي هو فيها دابا.
فاش كاتبقى گالس كاتفكر🤔 باش دير شي حاجة، عمرك ما غادي ديرها خاصة ايلا كانت فيها تمارة، غادي تبقى ديما تلقى ليها الأعذار لي كاتخليك مربوط ما تقدر دير حتى شي خطوة.
»»» ايلا بغيتي تزيد القدام خاصك ضروري دير الخطوة اللولة، حيت الناس لي تخرجوا من مدرسة الحياة كيعرفوا مزيان الأهمية ديال هاد النقطة، هي لي كتخليهم اديرو شي حوايج قليل فاش كيديروها الأغلبية ديال الناس.
➋ تا واحد ما غادي دير داكشي لي خاصك ديرو نتا ...
ما تسناش من شي واحد يعاونك باش تبدل حياتك، ما تسناش شي واحد يقوليك آجي ها كيفاش تطور راسك و ها شنو دير باش تغير، ما تسناش شي واحد يوريك الطريق لي من المفترض أنك تكتاشفها نتا براسك، هادشي قليل فاش كيوقع، و حتى لا وقع گاع غادي تسنا بزاف ... باش تشوف النتيجة!
ايلا كنتي كتعاني من شي عادة خايبة، صافي حبس منها❌ و بدلها بعادة اخرى تكون زوينة✅، ايلا كان عندك مشكل فالوقت⏰ ما كيشيطش ليك، بسبب الخدمة لي ما خلاتكش دوز وقت كافي مع عائلتك و تستافد من الفترة لي كاتكون عندك فيها الراحة، خاصك ضروري ديك ساع تحرك و تلقى شي حل لهاد المشكل.
ايلا كان عندك شي مشكل خاصك تقلب ليه على الحل براسك و ديك ساع غاتلقى الخرين كيعاونوك حتى هوما حيت باغين يشوفوك كاتحسن و تقدم فحياتك، من العائلة حتال الصحاب و الحباب ... و لكن قبل من هادشي ما تسناش من شي واحد يعاونك، حيت غير بالمنطق، كيفاش بغيتي الخرين يعاونوك
و نتا ما معاونش راسك🤷
داكشي علاش خاصك تشوف النقاط السلبية ... لي كاينة فالشخصية ديالك و فحياتك، و تحاول تخدم عليها باش تصححها✓ و ما تسناش حتى ينبهوك ليها الناس.
واش خاصنا ضروري نقولوليك بلي الگارو غادي يخرج ليك على صحتك عاد تنوض نتا تقطعوا ؟ واش خاصنا حتى نفكروك بالواجبات ديالك الدينية عاد تولي تصلي ؟🤔 ...
راه كاينة أمور بديهية خاصك تنتابه ليها، و نتا بوحدك لي تقدر تصلحها.
➌ قوة المعرفة ...
كلما تزادت المعرفة ديالك كلما تزادت قيمتك، و هكذا ... في أي مجال فالحياة، ايلا كنتي مثلا موظف فشركة هنا خاصك تعرف أن السمعة و الترقية و الصالير ديالك ديما كيكونوا مرتابطين بالخدمة لي كادير و حجم المعلومات و الخبرة لي عندك، زائد الكفاءة ديالك فالمجال لي نتا كاتشتاغل فيه.
حنا فعصر المعلومة داكشي علاش خاصك تجمع ولا يكون عندك واحد القدر كبير ديال المعلومات و توفر على خبرة كبيرة بزاف، لي تقدر تنفعك فالخدمة ديالك و حياتك فنفس الوقت. ما تحبسش بقى ديما كاتبحث و كاتعلم و اكتاسب مهارات جديدة ... حيت هاديك الورقة لي كتشدها نهار لي كاتْخَرَّجْ من لافاك و لي كاتسمى الشهادة هي نفس الورقة لي غادي تكون عند بزاف ديال الناس لي دازوا من نفس المراحل لي درتي منها نتا، و باش تخرج من هاد المنافسة و تسبقهم خاصك تزيد على داكشي لي تعلمتيه مع هادوك لي تقاسمتي معاهم سنوات الدراسة، خاصك تعلم بوحدك و تقوي المهارات ديالك.
👈 الخلاصة : خاصك تكون متميز و مختالف على الخرين.
➍ حتى حاجة ما فابور ...
الدروس لي كنتعلموها فهاد الحياة بعض المرات ما ماتكونش فابور خاصنا نخلصوا باش نستافدوا منها، و هنا فين كيكون الفشل و الهزيمة و الإحباط هو الثمن لي كندفعوه كمقابل، داكشي علاش ما تستسلمش💪 ايلا تصادفتي شي نهار مع "الفاكتورة ديال حياة" حيت هي هكا دايرا ما كاتعطيش كلشي فابور.
و لكن كاين واحد البلان زوين فهادشي، عرفتي شناهو ؟ هي ديك الخبرة لي كاتكتاسبها و الأخطاء لي كاتعلم منها، حيت بزاف ديال المرات فاش كيكون الفشل طريق ديال بداية جديدة، و كيكون الإحباط هو السبب لي كيشعل فينا داك الحماس و العزيمة لي كتدفعنا بدورها للقمة و كاتكون سبب باش نعرفوا القدرات ديالنا الحقيقية لي كنا ما عارفينهاش
و ما كناش غادي نكتاشفوها كون ما دزناش من ديك الفترة الصعيبة.
➎ ديما كيكون عندك خيار ...
هادشي لي نتا كاتعيشوا دابا هو نتيجة ديال هاديك الخيارات
و القرارات لي سبقليك خديتيها من قبل، يعني فاش كتاخد شي قرار ولا كتختار شي توجه معين غادي تحصد النتائج
و التبعات ديالو من بعد، بمعنى آخُرْ داكشي لي زرعتي دابا هو لي غادي تحصدو فاللخر، و نتا و شطارتك ايلا كانت القرارات
و الإختيارات ديالك صحيحة✅ غاتنجح و تحقق داكشي لي بغيتي، و ايلا كانت غالطة❌ غاتفشل و ما توصل لحتى شي نتيجة، داكشي علاش خاصك ديما تكون مستاعد باش تاخد قرارات صحيحة و سليمة 💁 لي توصلك للهدف ديالك، ما تقولش ليا بلي راه ما عندكش خيار و أن هادشي لي واقع ليك دابا ماشي نتا لي تسببتي فيه، بالعكس نتا هو السبب فهادشي لي واقع دابا حيت الإختيارات ديالك من اللول كانت غالطة و ما خديتيش القرارات الصحيحة لي غاتعطيك نتائج مزيانة✓
➏ الخدمة ثم الخدمة ثم الخدمة ...
كون كان هادشي ساهل كون كلشي داروا، و هاديك الصعوبة لي كاتوقف ليك فطريقك هي لي كاتخلي كلشي باغيه، حيت الحاجة كلما كانت قليلة ولا ما سبقش لشي واحد دارها من قبل ... كلما تزادت القيمة ديالها و الرغبة ديالنا باش نوصلوا ليها، واش عمرك بغيتي شي حاجة كاينة عند كلشي ؟ بطبيعة الحال لا. داكشي علاش حنا ديما كنبغيو نوصلوا لهاداك النجاح الباهر لي صعيب يتحقق على أرض الواقع و قلال هوما الناس لي سبق ليهم حققوه. و لكن كيبقى السؤال المهم هنا هو : واش حنا مستعدين باش ندفعوا الثمن مقابل هاد النجاح ؟
🟥🟥🟥 شفتي ها حنا رجعنا "الفاكتورة" عاوتاني🙂
راه كلشي باغي و لكن قليل لي مستاعد يدفع المقابل ديال داكشي لي هو باغيه حيت ملي كادير هدف كبير قدام عينيك خاصك تشوف راسك واش نتا مستاعد تواجه الصعوبات
و العراقيل لي غاتوقف ليك فطريقك ؟ واش قادر تخرج من 𝗖𝗼𝗺𝗳𝗼𝗿𝘁 𝘇𝗼𝗻𝗲 ديالك باش توصل الهدف لي نتا مسطرو ؟ ...
ايلا بغيتي شي حاجة خاصك تخدم عليها، حيت الخدمة بوحدها هي لي غادي تخليك تحقق الهدف و الحلم ديالك، ماثيقش هاداك لي كيقوليك راه كاين طريق ساهلة باش توصل لداكشي لي نتا باغيه، حيت مايمكنش توصليه ايلا ماخدمتيش عليه، دير جهدك و استثمر الوقت ديالك باش تحقق داكشي لي بغيتي.
➐ تا واحد ما غادي يثيق فيك من غير …
بعض المرات غاتحس براسك بوحدك بسبب الأهداف و الأحلام ديالك لي صعيب يثيقها ولا دخل الراس ديال شي واحد خاصة فاش كاتكون جاية من عندك نتا، غادي تلقى فطريقك لي غادي يحاول يهرسك بجميع الوسائل، أول حاجة كيديرها كيبدا يشكك فالقدرات ديالك، ولا كيقوليك راك تحمستي بزاف اكثر من القياس باش يقتل فيك ديك الرغبة و العزيمة لي عندك، و ايلا ما ثقتيش فالقدرات و الطموح ديالك غادي تسمح فكلشي و غاتولي تسمع ليهم و تقتانع بالهضرة الإنهزامية ديالهم.
الخلاصة : حتى واحد ما غادي ثيق فيك ايلا ماثقتيش نتا فراسك و فالقدرات ديالك.
➑ مازال باقي عندك الوقت ...
ملي تبغي دير شي حاجة مزيانة ماتسمعش لهادوك لي كيقولو ليك راك بديتي معطل غير حبس عليك هادشي، راه كان خاصك ديرو شحال هادي، سبقوك ليه الناس، صافي هرب عليك التران! بينما العكس هو لي كاين، مزال عندك الوقت فين تخدم و توصل ...
ماتسوقش ليهم، ما دام عندك الرغبة و القوة و الإرادة و مازال ما استسلمتيش، باقي عندك بزاف ديال الفرص لي غادي يبانوا قدامك وحدة تابعة الاخرى، غير وجد ليها راسك مزيان، دير لي فجهدك باش تحقق داكشي لي بغيتي، حقق الحلم ديالك واخا تكون عندك خمسين عام، حيت ماشي نتا أول و آخر واحد غادي ديرها، داروها ناس كثار قبل منك و حققوا حتى هوما الأحلام ديالهم، داكشي علاش ماتخافش غير بدا ...
➒ الحياة ما ساهلاش ...
ايه الحياة ما ساهلاش و لكن ايلا درتي هادشي فعقلك🧠
و ركزتي عليه مزيان، ثيقني غادي يشكل واحد القوة كبيرة بالنسبة ليك، ما غاتبقى تبان ليك لا عقبة لا والو و ما غايجيك لا إحباط لا استسلام لا حتى شي حاجة، حيت نتا عارف من اللول أن الامور ما غاتكونش ساهلة، صافي حطيتي الأحلام ديالك فوق واحد الطريق طويل🛣️ صعيب، كلو عراقيل و مشاكل ...
🔴 بهكا نكونوا وصلنا لنهاية الموضوع ديالنا و لي كانت فيه بعض النقاط لي خاصك تكون فاهمها مزيان باش ماتصدمش بشي حاجة لي ماكنتيش ضارب ليها الحساب، دير هدف قدام عينيك و توكل على الله و على راسك، و دير جهدك و أهم حاجة خاص ثقتك فراسك و فالقدرات ديالك ماتزعزعش.
تحياتي✎
™⁴•
𝗖𝗼𝗽𝘆𝗿𝗶𝗴𝗵𝘁 : MIND⁷
