09/10/2023
أخربيش عندو رمزية تاريخية خاص تحتارم...
اخربيش وخا كحل بفضل الدخاخن الا عندو مكانة بيضاء في قلوبنا حنا لي عشنا وكبرنا في اخربيش وتعلمنا منو ما لم نكم نعلم...
” اخربيش” ماشي مجرد مكان عادي ، هو مكان الإتحاد والتضامن لي كايجمع أهل الدوار وكايوحد بينتهم وفيه كايحلوا مشاكل القرية وكايتاخدوا فيه القرارات المناسبة... .
والإخوان لي مكايعرفوش اشناهو ”اخربيش” هو واحد المكان في مساجد تمازيرت مخصص يسخنوا فيه الناس ماء الوضوء هذه هي الوظيفة الخاصة “لأخربيش” لكنه تجاوزها إلى وظائف اجتماعية وترفيهية أخرى كثيرة
“أخربيش” في وقت البرد والثلج كايكون المكان المحبوب والمفضل تقدر تلقا بلاصتك فينما مشيتي الا اخربيش الى لقيتي شي بلاصة فانت محظوظ هههه غادي يسخن عظامك وتسخن دماغك بشي نكتة ولا قصة ولا شي واقعة وقعات لاحد الجالسين في اخربيش.. هو المكان لي كايعاودو فيه الناس تجاربهم في الحياة
هو المكان لي كايعرضوا فيه الناس الولائم غدا مرحبا بكم
هو المكان لي كايتاخدوا فيه الناس قرارات تخص مصلحة القرية
منو خرج طريق تسلي، منو خرج طريق ايت عتيق،تسلنت، تكوخت،
توفغين،اكرضان ،تغفيست ،اكنسنوانوارك.. الى اخره
هو مقر الجمعية هو مركز الدوار هو برلمان القرية، هو مذياع وتلفزة اهل القبيلة منو كايعرفوا احداث العالم وحالة الطقس... .
وزيد عليه الترفيه مكاين لا سهرة السبت لا رشيد شو لا ريال ولا بارصا لا البطولة الوطنية ...
اخربيش كاتلقى فيه ترفيه حوادث طريفة والنكت والقصص العجيبة والغريبة لي كايعاودوها الجالسين بينتهم كل مرة كاتلقى موضوع مرة الالغاز مرة شكون يهز العود (كي ارراتياسي) مرة الجد ادنقن امان انهيا تلگيت انعاو افلان كيڤودا تيويزي دار فلان
اخربيش، كان مكان رائع ملتقى لي كايتلاقاو فيه الناس بلا مواعيد مكان رائع كايوفر ليك الجو الحميمي وأنت كاتشوف ولاد دوارك صغار كبار مجمعين يجمعهم الحب والود والايخاء والانتماء....
