26/02/2024
إيه أليام لاكارط كانت كدير 250 درهم
كانت التبعئة غير ديال 50 درهم كاتفوت بيها 6 شهور ، و ماتهضرش بيها لاحقاش كانت الدقيقة ساوية شي 8 دراهم، كتمشي لك غير فا "bip" على بنادم,
كتشارجي جوج مرات فالعام ، من 6 شهور ل6 شهور غير لاحقاش اتصالات كتقولك راه نهار كدا فالشهر كدا غادي تحرگ لك لاكارط الا ماشارجيتش.
كتقيد داك التاريخ و كتعقل عليه تبقا يوماين تمشي تجري تسلف 50 درهم وتشارجي تعتق راسك .
الابغيتي تعيط وتهضر كتمشي للتيلبوتيك ، تاترفحت اتصالات عاد درات ميساجات فابور من 00h ل 7h كل اربعاء 🙂
لا توحشت صاحبك وتفكرتو كتصوني عليه و تقطع : زعما "سلام صافا اش خبارك توحشتك "
وهو يرد عليك ب"bip" زعما "الحمدلله يسولك فيك الخير تا انا توحشتك ".
الباتري كثر من سيمانة تا ماكتبقاش عاقل على فين حطيت الشارجور آخر مرة ،و الصونيط مونوفوني حرفي كيدير ليك الشقيقة . ولا صونا ليك التلفون وسط الناس نتا هو القايد ،كتولي بحال رجل اعمال مهم و كلشي كيبقا يشوف فيك و يحسدك وكتنفح تانتا 😂😂😂😂
فراس العام و الاعياد كدور على النوامر كاملين لي عندك بيپ...بيپ لمومن زعما عواشرك مبروكة و هما كيردو عليك پيب "الله يبارك فيك " .😂
اكبر جريمة تقدر دير فحياتك هي واحد بغا يبيپي عليك و تبرك على اوك و تفوت المكالمة غتكون آخر حركة درتي فحياتك، ممكن يشد المركوب و تلقاه قدامك
