27/08/2025
مهم أنا قصتي والله العظيم الى حقيقة واقعية ماشي كنعاود لك من الخيال مهم فاش كانت عندي 16 عام كنت كنعرف واحد دري هو صاحب خويا وكيجي عندنا لدار ومواعدني بزواج وصراحة كيتسنا غير يخدم وقاليا غيجي يخطبني انا فالعمر ديالي دبا حاليا 18 يعني عامين هادي وانا فعلاقة مع هاد صاحب خويا وفهاد عامين عمرنا خرجنا بجوج بينا ولا تلاقينا بجوج الى كنتشاوفو يا إما كيجي عندنا لدار ولا فاش كنخرج انا وخويا وكيخرج معانا
مهم باش منكدبش عليكم انا من عائلة بسيطة بزاااف الغني هو الله وهو عائلتو يدهم طويلة لباااس عليهم ولكن أنا عام هادي باش درت نقاب وصاحبتي بحال أختي هي جارتهم مهم كتعاود ليا عليهم وحتى انا فاش كنمشي عند صاحبتي كنشوف خواتاتو وماماه هما ماشي من ديك العائلة لي متدينة فهمتيني أختي يعني خواتاتو متبرجات وحتى ماماه وقالت ليا صاحبتي بلي مستحيل نتفاهم معاهم حيت كيف قلت لك هما لباااس عليهم كولشي عندهم بالماديات ولدهم لي هو معايا صراحة فيه واحد القاعدة مكتعجبنيش فيه لي هي أنه مفشش كيلي ميني قاليا بلي مستحيل يخدم فدوك الخدامي بحال البني ولا صباغة ولا نجارة مهم قاليا هو خاصو يخدم مع الدولة مهم هو كيقرا هادشي ديال طب بغا يكون فرملي
المشكل ديالي أختي رميساء ولي كنتمنى أي وحدة قرات قصتي تعطيني نصيحة شنو ندير
هو مؤخرا كنكتاشف بلي واحد دري قريت معاه فاش كنت ف سانكيام يعني 3 سنين هادي كيبغيني ولكن معمرو قدر يعتارف ليا ولا يلمح ليا مهم داك حب من طرف واحد درجة أنه تصاور لي درنا فالقسم فاش درنا حفلة مشا خرج تصاوري وعلقهم فالبيت ديالو ورسمني فواحد اللوحة وخا معمرو قرا الرسم ولكن لوحة جاات زوينة بحال الى رسمها شي رسام عالمي وعندو واحد دفتر كيكتب فيه الشعر مهم داك دفتر متعلق بيا فقط فيه تصاوري شعر على سميتي مهم دارو خيصيصا ليا
غتسولوني كفاش عرفت هادشي مهم هذاك لي قلت لكم انا وياه فعلاقة تخاصمنا درجة صور ليا يدو دار ليا فاك وبقا فيا الحال ومشيت عند صاحبتي نخوي عليها قلبي مهم خرجنا حتى جا واحد دري وقف علينا قالينا عافاك أختي واش أنت قاليا سميتي وكنيتي قلت له اه قاليا ممكن نهدر معاك قلت له سمح ليا اخويا منقدرش وقاليا عافاك أختي عطيني 5 دقايق وسيري صافي قلت له قول شنو عندك مهم وعاود ليا هادشي كامل وتصدمت وفنفس الوقت متيقتش راه بحال الى صرفقتيني قلت له باش غنتأكد هادشي لي قلتي بصح قاليا غذا نتلقاو ونجيب لك دليل صافي الغذ ليه تلاقيت معاه فبلاصة لي درنا وجاب ليا داك دفتر ولقيت فيه سميتي مكتوبة بدم ماشي مرا ماشي جوج وعطاني تلفون ديالو صور ليا البيت ديالو فيه غا تصاوري مهم فاش سولتو علاش معتارفش ليا ومقال ليا والو قاليا بلي قاليه بلي مستحيل نقبل به حيت هو ماماه مكتشوفش واختو كتكلس فكورسي متحرك وباه سمح فهم وهما عايشين غير فدويرة على قد الحال وهو خرج من قراية من سانكيام نيت ومشا خدام فالحلوة
ودبا هو ف سبيطار ضرباتو طموبيل وباقي فالإنعاااش
ومشيت عند أختو وماماه لدار وبقاو فيا صراحة حالتهم كتقطع فالقلب
مهم دبا تقريبا فهاد شهر 8 فاش عرفت هادشي ومعرفت شنو ندير كنتمنى تنصحوني وواحد ملاحظة هذا لي انا معاه فعلاقة مواعدين أنا وياه بزواج
خفت الى نقوليه مبقيتش بغيت نكمل معاك منوفيش بالوعد ديالي وخفت الى تزوجت به منتفاهمش مع عائلتو بالحكم قلت لكم عقليتهم فشكل وبالنسبة دري لي كيبغيني خاص غير يبرا انا قابلة به
ديما كنبكي ليل ونهار معرفت شنو ندير وكندعي الله يدير ليا شي تاويل الخير
