30/01/2025
السلام عليكم
الحمد لله كملت العمرة ديالي ورجعت بلادي وبغيت نتقاسم معكم نصائح ممكن تفيدكم.اول حاجة فهاذ الفترة لقينا المدينة ومكة سخان بجوج وخصوصا مكة لذلك متديوش معكم بزاف ديال لحوايج راه 3 لبسات كافيين .والملابس الداخلية 4 من الحاجة كافيين.العبادات هي الاصل علاش مشيتو فاحسن شئ فيقو ساعتين او ساعتين ونص قبل الفجر واستمتعوا بالعبادة ديالكم بقيام الليل الدعاء القران حيث هاذشي لي غادي يبقا لكم .وبقاو فالمسجد حتى تصليو الشروق ورجعو للفندق نعسو ومني تفيقو صليو الضحى.حاولو تبداو القران فالمغرب وتختموه فالمدينة،وتبداو فمكة وختموه فيها. ديرو مبلغ محدد للصدقة راه هي لي غتبقا فميزانكم .ردو البال من الشمس راها قاسحة غطيو راسكم.المشتريات كلللها موجودة فالقيصاريات ديال المغرب متمحنوش راسكم بالخروج وتضياع الوقت والوزن الثقيل،وفحالة عجباتكم شحاجة شريوها الايام الاولى،باش متضيعوش الايام الأخيرة فالتخربيق.حاولو تديرو الطواف يوميا راه ماشي حاجة صعيبة غير طلبو الله يعاونك يوفقكم ومني تخرجو للفجر خدو معكم الماء وبشوية الثمر او الزبيب باش تعاونو شوية .بداو بالطواف عاد ديرو القيام وبقاو تذكرو الله حتى يأذن الفجر.الباليزات مني تسدوهم ديرو لهم فاليد شي علامة،يا ريت يكون شي ثوب مشعشع الالوان ،باش مني تكون تقلب على باليزتك تشوفو جاي من بعييييييد ، ومني تكونو فالمطار الى بغيتو تسناو الباليزات ديالكم كنتو 2 او اكثر متوقفوش فنفس البلاصة تقسمو،شي يقلب هنا وشي يقلب جهة أخرى حيث كاين بزاف السمطات لي كينزلو منهم الباليزات،ويكون احسن انكم تعقلو على الخطوط لي ركبتو معها والتوقيت فاش نزلتو باش الى سولتو شي موظف على الباليزات كيعرف بالظبط رقم السمطة فين غينزلو الباليزات .مني تنزلون من الطيارة مابقاوش غادين مجرجرين وحالين فمكم،راه باش مزربتو باش ماكملتو الإجراءات فاسرع وقت وتخرجو مع الاولين.الاكل ديال الطيارة غالبا خايب باسل وخصوصا الخطوط السعودية ،هذا رأيي الشخصي،لدلك هزو معكم شي اكل لي يعتقكم،وهزو شي لباس يكون ساخن حيث برد المغرب ماشي بحال حرارة السعودية.والعمرة او الحج متغامروش وتمشيو مع اي واحد،حيث المشاكل كتوقع وكتولي منكد على راسك الى متفاهمتيش مع لي غادي معه،اختر الرفيق بعناية.
هاته تجربتي المتواضعة لي كنطلب الله تستافدو منها والله يتقبل من الجميع.
