31/12/2022
هذا واحد من أهم المواضيع اللي كانحطو كل سنة فهاد الفترة ديال البرد لأن هاد الفترة هي اللي كاتعرف ضحايا كثر ديال التسمم بغاز أحادي الكربون فالحمام وقلت تسمم وماشي اختناق لأنه فعلا تسمم ماشي اختناق كيف كانعرفو، والأغلبية فينا ملي كانسمعو حادثة ديال شي واحد قتلو الغاز فالدوش كانقولو بينا وبين راسنا واش بنادم ماكايحسش بالاختناق ويهرب قبل مايطيح لأن الاغلبية كايحساب ليه راه بنادم كايموت بالغاز ديال البوطة اللي كايتسرب مع الماء لهذا كانقولو واش بنادم مايحسش ويهرب. هادي كلها كاتبقا مجرد هضرة عابرة لأننا مافاهمينش هاد العملية اللي كاتأدي للموت الحتمي. نتمنا الشرح يكون مبسط وتفهمو شوية هاد القضية وديرو الوقاية اللازمة قبل مادخلو للدوش لأنكم الى دخلتو ووقع اللي وقع راه ماغاتحسو حتى يضربكم اللحد.
اولا الموت ماكايكونش بسبب غاز البوطان وانما كايكون بغاز آخر ماعندو لا لون لا رائحة لا طعم وهو احادي اوكسيد الكاربون وبهاد الخاصية ديال ان مافيهش شيحاجة تميزو ولا تنبه ليه باش كايكون خطير جدا لأنك ماكاتشعرش بيه.
هاد الغاز كايتكون نتيجة احتراق غير كامل للبنزين ولا الخشب ولا الفحم وشحال من واحد اللي كايموت بنفس الطريقة ديال صحاب الدوش غي هي عن طريق الفاخر فمكان مغلق. ملي كايتبعث غاز احادي الكربون بسبب احتراق غير كامل وبعد ما كايستنشقو الانسان بدون شعور كايمشي داك الغاز فمجرى الدم والدم كولشي عارفين انه اصلا كايحتاوي على الاوكسجين اللي كايكون ضروري جدا للخدمة ديال الخلايا ديالنا, من بعد ماكايدخل غاز احادي الكاربون للدم كايكون قوي بزااف ومجهد مقارنة بالاوكسيجين وكايقوم بطرد الاوكسيجين من الكريات الحمراء وكاياخد بلاصتو فيها وهنا الكريات الحمراء كايسقط الدور ديالها فنقل الاوكسجين للخلايا لأنها اصلا بلا اوكسجين. فهاد الوقت الخلايا غادي تبقا بلا اوكسجين وغادي تفقد القدرة ديالها على العمل والانسان كايحس بالدوخة والتعب المرهق والفشل واهم حاجة انه كايفقد القدرة على التفكييير فشنو راه واقع، وهنا علاش ماكايقدرش يفكر انه يخرج ولا يتحرك لأن اهم حاجة هي التفكير كايفقدو الانسان بدون شعور وكايبدا يحس بخلل فالبصر كمرحلة اولى, من بعد كايبغي يدير شي ردة فعل اولية كايلقا العضلات فاشلة وماقادر يهز لا يد لا رجل ولا يطلب المساعدة وولو يكون بينو وبين الباب غي متر واحد ماكايقدرش يتحرك وكايدخل الانسان فغيبوبة وفقدان درجة الحرارة ديال الجسم واخيرا الموت المحتوم.
هاد الشي علاش قلت فالاول تسمم وماشي اختناق لأن الأغلبية كايحساب ليهم كايوقع اختناق وفحالة الاختناق كايقدر الانسان يخرج ويهرب ويسلك راسو ولكن فهاد الحالة ماكايكونش اختناق تنفسي وانما تسمم الدم بغاز احادي الكاربون وهاد التسمم هو اللي كايبلوكي بنادم عن التفكير والهرب والنجاة.
هاد الشي علاش ضروري ومؤكد خاص السخان يكون فمكان مهوي ومايكونش سخان ديال السلاك لأن هاد الشي مافيهش الديباناج الى ماكانش ذو جودة عالية سخن غي سطل دالما وحسن ليك وخرج سالم لعائلتك اللهم البرد نص ساعة ولا تسبب لراسك فالتهلكة ولو ان الموت بالآجال. كاين اجهزة الشوفو اللي فيهم لالارم غي كايرصد نسبة ديال غاز احادي الكاربون كايبقا يصوني وهادو هما اللي مزيانين. ماشي ضاروري الشوفو يكون قدام الدوش ولا فالكوزينة ممكن ديرو حتى فالسطح نتا كاع ولا البالكون المهم مكان يكون مهوي مزيان لأن ففصل الشتاء كاتكون النوافد ديال الدار كلها مغلقة والشوفو لداخل فالدار يعني ماكاينش فين يتصرف داك الغاز حيت كولشي مسدود ونسبة الاوكسجين قليلة.
وملي تكون فالدوش حاول ما أمكن ترد البال غي بمجرد تحس غييي بشوية حريق الراس ولا دوخة خفيفة حاول تزرب على راسك قبل مايزرب عليك الغاز كيف قلت ومن الاحسن الدوش يكون فيه نافدة تكون محلولة دائما ملي تكون دوش باش حتى الى داز الغاز تكون التهوية موجودة وتقلل من نسبة اصابتك بالتسمم.. دمتم سالمين معافين..
حتى الى مابغيتيش تبارطاجي غي كوبي كولي واخا ماديرش المصدر كايهمني الناس تعرف المنشور وتستافد وضرب حسابها لهاد الآفة..دوزو بخير
