12/09/2020
فولاية تكساس، سنة 1996، غادي يتم اختطاف واحد الطفلة سميتها Amber Hagerman، و للأسف من بعد أربع أيام من عملية الإختطاف غادي يلقاوها مقتولة على يد وحش، و فقداتها العائلة ديالها..
هاد الواقعة أظنها صنعت أمر محمود جدا، و ناس مبقاوش تيبكيو و يشكيو، و لكن فكرو كيفاش ممكن يتصداو لهاد النوع من الجريمة، خصوصا و أنها كتقيص أطفال أبرياء مادارو تا حاجة باش يلقاو راسهم فهاد الحالة..
من تما بدات القصة ديال نظام Amber Alert، و لي تنظن أن الأمن المغرب اليوم مطالب باش يكون عندو منظومة بحالها باش يقدر يحمي وليدات المغاربة من كل سوء.
ف 2003 هاد النظام غادي يولي قانون، لي التزمت بيه جميع الولايات فأمريكا، و أكثر من ذلك، انه ولا تيخدم فدول أخرى لي جربات و لقاتو فعال فمثل هاد الحالات..
شنو كاتعني Amber Alerts ؟
هي اختصار لجملة America's Missing: Broadcast Emergency Response و لي أيضا تم اختياره تخليدا لذكرى الطفلة Ambert لي هدرت عليها من قبل..
كيفاش تيخدم هاد النظام د الإنذار ؟
كل ولاية و لي تتطبق هاد النظام، منين تتوقع شي حادثة اختطاف لا قدر الله، و تيتأكدو عناصر الشرطة و الأمن أن الشخص المختفي أصغر من 18 سنة، و أنه يمكن يكون ضحية اختطاف، و أن الحياة ديالو ممكن فخطر، و أنه عندو معطيات أولية على الطفل و الخاطف ( بحال فالحالة لي وقعات فطنجة، هاد العناصر كلها كانت موجودة)..
منين تيتوفر هادشي لي سبق، يتم إطلاق واحد الإنذار لي يتم بثه في التلفاز، الراديو، الهواتف النقالة، رسائل نصية قصيرة، بلاكات ديال لوطوروت، انذار في صورة، رقم لوحة السيارة، فيديو، اي شيء يمكن من معرفة المختطف و الضحية، و هادشي كاين دول لي تتقدر تديرو فمنطقة جغرافية معينة (مثلا طنجة فحالتنا ) او معندهاش القدرة بش تبقا فمنطقة وحدا فكاديرو فكافة التراب الوطني..
لنفترض أنه وقعت شي حالة فشي مدينة فالمغرب و كان عندنا هاد النظام، بالإضافة للجهود المشكورة ديال رجال و نساء الأمن..غادي يتم بث هاد الإنذار فكل وسائل الإعلام، الشبكات الاجتماعية، الهواتف، باش حتا المواطنين غادي يوليو جزء من عملية التصدي لهاد المختطف، و مغايجي فين يرجع لدارو أو يقدم على اي حماقة، تيكون حصل على يد الشرطة او مول حانوت، أو شي جار، أو شي موظف غادي لخدمتو، و اتصل بالشرطة فورا..
هذا مثال على الإنذار كيفاش تيكون و كيفاش تيخدم : https://youtu.be/O6NrtDmTbDI
و هادو أمثلة من بزاف، لي لقاو الوليدات بفضل هاد النظام :
= https://youtu.be/jC4CZ3Qds7k
= https://youtu.be/A7HApHmj37o
= https://youtu.be/96L_IKwweQc
وهنا موجود احصاءات ديال هاد النظام فأمريكا، مقدم من وزارة العدل : https://amberalert.ojp.gov/statistics
فمثل هاد الأوقات، لا داعي لجلد الذات و الركوب على مآسي الناس، لا إعلاميا، بالبهرجة لي تيدير مع عائلة الضحايا و اماكن وقوع الجرائم، و لا نقاشات خاوية لي كل واحد فينا تيقراها و تيحس بالسطحية فالتحليل..
هاد الوقيتة، هي حزن كبير على شنو وقع، و بحث عن حلول، باش ميمشيش شي واحد يفقد الكبدة ديالو..
هاد الجرائم مكيناش غير فالمغرب، هي فالعالم، و الطبيعة البشرية فيها الخير و الشر، و لكن دورنا كيفش ممكن نغلبو كفة الأمان و الخير على كفة الخوف و الشر..
رحم الله الطفل الملاك عدنان، و ألهم واليده و أسرته الصبر و السلوان
الله يحفظ وليداتكم كاملين من كل سوء
و أتمنى من كل قلبي ان الدولة المغربية تعتمد على شي نظام بحال هاكا لي يقدر يحمي أطفالنا، أو يشتغل على نظام قريب ليه أو حسن منو باش نتعاونو جميع للتصدي لهاد الإجرام..
Global News breaks down how a 911 call about the possibility of an abducted child turns into an Amber Alert. For more info, please go to http://www.globalnew...
