06/09/2025
تيحونة... واش نسيتو راسكم؟
تيحونة، القرية اللي فيها ناس طيبين، اللي كيضحكو فوجهك وكيقولو "مرحبا"، ولكن فـالواقع، كاين شي حاجة خايبة كتخلي القلب يوجع. واش معقول؟ ناس ما عندهمش الماء، ما عندهمش الضو، ما عندهمش حتى أبسط الحقوق، ونتوما حضيين غي بنت فلان وبنت فرتلان؟ حضيين النميمة، الحضايَة، والهدرة اللي ما كتزيد لا تنقص؟
فين هو الضمير؟ فين هي الغيرة على البلاد؟ واش تيحونة خاصها تبقى مهمشة، غير لأن الناس فيها كيتفرجو وما كيتحركوش؟ واش المهرجانات والاحتفالات أهم من الماء؟ واش بنت فلان أهم من الطفل اللي كيمشي كيلومتر باش يجيب قنينة ديال الماء؟
راه العيب ماشي فالدولة بوحدها، العيب حتى فينا
الساكت على الحق شيطان أخرس. واللي كيشوف الظلم وكيبقى ساكت، راه مشارك فيه. تيحونة تستاهل الخير، تستاهل مشاريع، تستاهل صوت قوي، ماشي غي هدرة فالقهوة ولا فالدرب
خاصنا نفيقو
نطالبو بحقنا، نكتبو، نخرجو، نوجهو الرسائل، نكونو صوت الناس اللي ما عندهم صوت. راه الماء ماشي رفاهية، راه حق. و2026 ما خاصهاش تجي وتيحونة باقي فيها العطش.
كلمة أخيرة:
بلا ما تبقاو تحضيو الناس، حضيو تيحونة. بلا ما تبقاو تسبو وتعيّرو، ناضو ديرو شي حاجة. راه البلاد ما كتتبدلش بالنميمة، كتتبدل بالفعل، بالصوت، وبالنية الصافية
#تيحونة @أبرز المعجبين #الجميع
