17/07/2024
- البحر هو المالديف ولا ميامي ولا هواي طبلة عامرة بالديسير مقاد و مستف قدامك و عصير بارد ورولاكس مع راسك مرة مرة كتنزل تعوم غاااااا بوحدك نتا و البحر و السما ..
- هدا لي عندنا حنا را و الله ما بحر ، كتلقا بنادم كيعمر اتاي وشي كيشوي السردين ..
و ها لي كتفور كسكسو ، و بين پراسول وپراسول كتلقا گيطون و شي طالق الشعبي شي طالق الواي واي شي كيسوط ليك الشيشا على نيوفك ..
- شوية كيوصل واحد القوم كيجيو خمسين فبيكووپ جايبين عترووس و ثلاثين دلاحة كيبركو على الماكلة تا يتنفخو و ينزلو يجريو للبحر فخطرة ، البحر كيرجع اللور بقوة الخلعة كيدخلو خمسين كيرجعو غا عشرة الباقي داه لبحر ..
- و واحد المنضر تاني تيجيب الردان دوك الرجال لي لابسين دوك الگراصن ديال السبعينات مخيطينو من الخنشة ديال الدقيق لي كانو ديال التوب .. كتلقى القدام مكتوبة فيه الوزن الصافي 25kg واللور مكتوبة فيه مطاحن ترودانت الكبرى ..
- اما العيالات كيما دارو وحلة لي لابسة دوپياس كتعيف ،
و لي لابسة بيجاما غا كتعوم بيها كتلصق عليها وكتولي تبان كلها قنات بحال شي ميكا ديال النفحة ..
و بنادم تيقولك سعداتنا عندنا البحر ..
