04/03/2026
هادشي زوين بزاف كيفرح❤️✌️
خويا انا وقع لي واحد الجيست فهاد رمضان زوين بحكم أنني خدام ف glovo فأول نهار فرمضان كنت قربت نسالي حيت قرب الأذان ديال المغرب كنت عيان بزاف ياله كنت غادي لدار وهو صونا لي واحد سيد
سلام سلام خويا ممكن تجيب لي هاد الدواء لواليدة الله يرحم الواليدين؟
بقيت كنفكر عيان وقريب يأذن وفيا العطش وجوع وفلحطة وبدون شعور قلت لو
"مرحبا اخويا على رأس والعين"
الفطرة ديالي ولا ماعرت الأنا الأعلى ديالي هو لي قرر ماشي انا 🤣
اوا مشيت كنقلب على دوا والمغرب كيأذن الصيدليات أغلبهم سادين... وحدة قلت ليها عطيني هاد دوا قالت لي ضروري الاردونونس تكون ملموسة حتا ولينا مزايدين فالهضرة (عامرة عياقة وبريستيج) ايمتا وعلاش دارو هاد القانون منعرف
اوا بزز باش لقيت واحد الولد جون عطاني دوا ومشيت قصدت سيد لي مسخرني ( كتجيني هاد الكلمة عيب ولكن الظروف لي خلاتني نخدم هاكا)
وصلت لبلاصة فين قالي وكلشي ساد عليه دارو كيفطر مع عايلتو وانا باقي كنضور اوا قالي تسناني انا عايز عندك، دازت زوج دقايق هبط عندي سيد من واحد جار معرفتها فيلا معرفتها دار محوطة هه.
عطيتو دوا كان داير شي 80 درهم شدو وقالي واش فطرتي؟
قلت لو لا اخويا باقي
قالي :" ياله مرحبا بك" قلت مع راسي غا عطيني رزقي خليني نمشي هههه "
قلت لو لالا شكرا اوا سيد حلف عليا مشيت محطوط ما لك وطاب من المأكولات والمشروبات وسط وليداتو والأم نتاعو
كليت بلا حشوم بكل صراحة ههه
ساليت وجبد ليا 700 درهم قلت لو لا اخويا غا 80 قالي هادي ديالك حلال عليك جيتي عندي فهاد لوقت لي كلشي كيفطر تستاهل
قالي خلي لي نمرتك الا كانت شي خدمة مزيانة نصوني لك
شكرتو وخرجت راجع فطريق وكنقول سبحان الله ربي رزقني من حيت لا احتسب 700 درهم حلال طيبا فالوقت لي محتاج باش نشري تقدية ديال رمضان و تلاجة خاوية.
كاين لي غتبان لو 700 درهم ماشي شي حاجة ولكن انا رآه عندي كتيرة وفيها مصروف شهر ولا 20 يوم
والسبب لي خلاني نكتب هادشي هو أنه فعلا ليوم صونا ليا سيد وواقلة غنخدم خدمة نقية ان شاء الله بغيت نشكرو من خلال المنبر ديالكم باقين ولاد ناس الحمد لله باقين المحسنين... تسخرت سخرة عادية متستاهلش انه شي حد يوقف معايا هاكا بكل صراحة الحمد لله
دير الخير تلقا الخير والله يسهل عليكم جميع يارب ❤️🤲
#منقول
