23/02/2026
الروينة نايضة فإسرائيل بسبب مسلسل مصري.. "أصحاب الأرض" شعل العافية فرمضان 2026
هاد العام الدراما المصرية دخلات لعش الدبور بمسلسل "أصحاب الأرض".
المسلسل اللي كيتعرض دابا قلب الطابلة وخلّى القنوات الإسرائيلية تخرج على سيطرتها وتطالب بوقف البث ديالو.
وعلاش هاد الروينة كاملة؟ حيت المسلسل قرر ينقل "الرواية الفلسطينية" بكل تفاصيلها، وكيوثق داكشي اللي واقع فغزة بلا زواق، وهادشي اللي ما عجبش اسرائيل.
القصة كتحكي على الطبيبة اللي غامرات بحياتها ودخلات لغزة وسط القرطاس باش تقلب على خواتاتها وباها اللي محاصرين تما.
المجهود اللي تدار فهاد العمل كيبين بالصح المعاناة اليومية: من انقطاع الضوء، للقصف، لغياب أبسط حقوق العيش.
والواعرة هي أن بزاف ديال الأطباء اللي كانوا تما فالواقع، أكدوا أن داكشي اللي كنشوفوه فالمسلسل، خصوصاً فالمعابر والمستشفيات، هو الحقيقة المرة اللي عاشوها بالحرف.
هاد الهجمة الشرسة على المسلسل والمطالبة بمنعه، كتبين شحال "الفن والدراما" كيخلعوا وكيفاش يقدروا يغيروا الوعي ديال الشعوب كثر من الخطابات السياسية.
"أصحاب الأرض" ماشي غير مسلسل للتسلية، هو صرخة إنسانية كتحكي قصة شعب صامد ومأساة باقية مابغات تسالي.
الفن الحقيقي هو اللي كيقيس الجرح وكيقول الكلمة اللي خاصها تقال مهما كان الثمن.
#غزة #مصر
اسرائيل كلام_خفيف_مع_وحيد رمضان2026 كلاكيت كلاكيت_مع_وحيد منة_شلبي اياد_نصار
