تفسير الأحلام

21/11/2025

20/11/2025

01/08/2025

ما تضحكوش عليا، والله هاد الشهر داز عليا ثقيل، مدوشت ما والو، مكتئبة بزاف، دعيو معايا الله يفرجها.
باقية كنحاول نطيب لوليداتي ميّاكلو، عندي جوج وليدات فنين: واحد عندو سبع سنين، والآخر ربع سنين.
ولكن والله ما فرحناش...
من اللي كيبدا النهار وأنا كنحسب غير باش يوصل الليل وينعسو.
كنت إنسانة زوينة، فرحانة، نشيطة، كلها طاقة... حتى تزوجت بواحد طفاني.
راجل بخيل، كبر مني، كيسبني، كيضربني، وكيهين والديّ بلا سبب.
كل نهار كنقول نوضي، ديري شي حاجة... ولكن ما كنقدرش.
كنبكي على ولادي، كيقطعوني فقلبي.
دعيو معايا الله يصاوب لي الحال، الله يفرج عليا.
#المتابعين #الأمومة #الصبر

31/07/2025

هادي بصح ولا لا؟ 😂
البنات، واش من بعد ما تغسلو الماعن، تسيقو الدار، وتجمعو كلشي...
كتوقفو دقيقة قدّام الباب، غير باش تشوفو الخدمة ديالكم وتقولوا:
"آه شحال زوينة!" 😎💅

ولا غير أنا؟ 😅

30/07/2025

رسائلكم
أنا معجبة بواحد خدام ليفرور فواحد المطعم، وبصراحة كنحس براسي ماشي طبيعية من كثرة ما كنخمم فيه!
كنفيق كنخمم فيه، كندوز النهار كنخمم فيه، كننعس وأنا كنخمم فيه!
كنطلب من داك المطعم 6 مرات فالنهار، مع أن الماكلة ديالهم كتجي باردة وماشي بنينة…
ولكن آش ندير؟ المهم نشوفو، يسمع صوتي، يقولي "تفضلّي" ونقول مع راسي "آه يازينك!"

وصلت لواحد المرحلة كنحس براسي كنرمي فلوسي فشي حفرة، غير باش يجي يشوفني دقيقة ويمشي.
دابا بغيت شي طريقة نوصّل ليه أنني كنموت عليه، بلا ما نطيّح وجهي،
ولا نبان خفيفة، ولكن نبان واضحة!

وخا تقولولي نحبس الطلبات… مستحيل،
نفضل نحول ليه هو الفلوس، منّهم للمطعم الخانز لي ماكلة كاملة كتسالي فالكارطونة.

شنو تقترحو عليّا؟
بغيت نربحو قبل ما شي وحدة أخرى تفيق وتخطافو. 😤💔

29/07/2025

صاحبي قال لي خطيبتك ماشي زوينة كفاية… واش ممكن كلامو يكون بصح مع انه صديق الطفولة؟

29/07/2025

#رسائلكــــــــم
عندي طموح ندير مشروع، ولكن خايفة نخسر كُلشي
جمعت مبلغ مزيان 70 ألف درهم، وكنفكر نفتح محل ديال القهوة أو محل تجميل صغير.
المشكلة؟ ماعنديش تجربة، وخايفة نخسر كلشي وندم.
كلشي كيقولي "خدمة الدولة حسن"، ولكن قلبي مع المشروع.
هل نتبع العقل ولا نتبع القلب؟

29/07/2025

أنا مزوجة هادي غير 20 يوم، ولكن عندي واحد المشكل غريب ومحيّرني بصراحة…
كنحشم ناكل قدام راجلي، كنقولو "ماشي جوعانة" وكنكتافي بكاس د الما، غير باش نبان خفيفة وبنت الناس…
ولكن هو؟
والله حتى كياكل بطريقة كتخليني مصدومة!
دجاجة كاملة كيصرطها بوحدو، كياكل حتى العظم هه، وكيقولي: "خاصني نعمر القنات"!

أنا كنت نقول يدلعني، يعرض عليا، يشاركني الطبلة، ولكن لا حياة لمن تنادي…
البارح مثلاً، جاب 2 بيتزات كبار،
قلت ليه بدلع: "ما بغيتش"
توقعتو يقوليا: "خدي غير طريف"
لكن لا!
كلاهم بجوج، بلا ما يخلّي حتى قطعة!

دابا أنا مبقيتش كنقدر ناكل، كنحس قلبي مسدود، ومابقيتش عارفة واش نواجهو؟
ولا نقولها لدارنا يتصرفو؟
ولا نصبر ونقول "بداية الزواج كلها مفاجآت"؟

بغيت آراءكم بكل صراحة، كيفاش كنتو غادي تتصرفو بلاصتي؟

29/07/2025

تزوجت وخدمت... ولكن حماتي كتعتبرني خدامة عندها!
أنا موظفة، كنخرج بكري ونرجع معطلة، ومع ذلك خاصني نطيب ونغسل ونخدم كلشي فالدار.
رجلي ساكت، وكيقولي "صبري شوية، هادي غير مرحلة".
ولكن أنا كنحس براسي كنموت بشوية بشوية.
علاش الخدمة ديال المرا كتحسبوها عادية؟

29/07/2025

#رسائلكــــــــم
خطيبي طلبني نحبس الخدمة ملي نتزوجو
أنا خدامة ومرتاحة فخدمتي، كتخليني نعتمد على راسي، نعاون دارنا ونعيش بكرامتي.
خطيبي كيقولي: "الرجل هو اللي يصرف، وانتي غير ريحي فدارك وربي وليداتك"
أنا محتارة... كنحماق عليه ولكن مابغيتش نكون تابعة!!
شنو ندير ..حرت؟

29/07/2025

راجل اختي ما كيشري ليها والو من عندو، وهي كتخدم وكتصرف على راسها وكلشي، وهو فرحان! واش هادشي طبيعي فالعصر ديالنا؟
#رسائلكم