26/07/2025
قصة "الثور الخبير" 🇲🇦
فواحد الحظيرة، جاو المسؤولين وفصلو بين البقريات والثيران بسور كبير فيه سلاك شائكة، باش ما يكونش التلقيح عشوائي، وبغاو يحددوه فنهار معين.
واحد النهار، ثور شاب تزاد عليه الحال، الغريزة خدامة 100%، وبدأ كيدور بحال المهبول حدا السور، كيشوف البقريات فالجنب الآخر.
قال فراسو:
"والله لا صبرت تال داك النهار! خاصني نلقا حل!"
سول صحابو:
"واش شي واحد عارف كيفاش نقدر نطير هاد السور؟"
قالو ليه:
"شوف داك الثور الكبير لي جالس تماك؟ هداك راه الخبير الاستراتيجي ديال الحظيرة!"
مشا عندو وقال ليه:
– "آ الحاج، كاين شي خطة نخرج بها من هاد العذاب؟"
– جاوبو الخبير:
"آه، بسيطة بزاف... خاصك تبعد 100 متر، وتجري بسرعة 60 كلم فساعة، وتنقز بزاوية 60 درجة، وغادي تطير فوق السور وتوصل. ومنين تسالي، ترجع بنفس الطريقة."
الثور الشاب حك راسو وقال:
"واش نتا جربتيها؟"
– جاوبو الخبير:
"أنا؟ لا لا، أنا نحلل فقط."
– الثور قال ليه:
"واش إيلا غلطت فالسرعة ولا الزاوية؟ واش نتقطع ولا نتعلق فالسلاك؟!"
– الخبير قال ليه:
"ماشي مشكل... تجي تجلس حديا، وتولي خبير استراتيجي بحالي!"
