01/05/2023
بعد ما بردات النفس نقدر دابا نهدر بالمنطق... يمكن كبرنا الطموح وبدينا كانشوفوا الرباعية، يمكن قلنا بلي عندنا أحسن سكواد فالمغرب وفرحنا كتر من القياس، ولكن اللي متأكد منو أن الجمهور العسكري دار اللي عليه بالعربية، جا حضر شجع صفر صفق غوت ومانزلش يديه حتى لخر...كانبغي نشكر بعدا جميع العساكر اللي جاو من مختلف المدن و منين كاتشوف سيدة قد الأم ديالك جايبه صفارة هي وبناتها وتاهيا خالقة الجو والجمهور الواعي دخل وخرج فأمان الله هادا هو المكسب هاد الموسم.
تقنيا، المتدرب دخل اللي خصو يدخل بعد ما قلب بينا الكار ووقع اللي وقع فالذهاب...مستحيل أخويا تشوف الدراك وحدراف البارح ومادخلهمش فباقي الموسم وماتحاولش تشرح ليا. لاعبين بحال الصوابي،اكمان درنا عليهم ضغط كثر من اللي كايتحملوا وبان غياب الحرفة والتجربة، لكرد بروفيل حارس احتياطي فالجيش ومتجيش تقوليا لا بولبير لا الخياطي يتعلموا فينا جيب بنعبيد لا باغي الألقاب. الأظهرة ضعاف فكولشي ورا شفنا الظهير الأيمن دالإتحاد رضواني ماركا ألي روتور ودار ما بغا فالكولوار. غياب سليم بان الفرق شاسع وهادشي أثر تا على مفيد وحمودان مرة يعطي مرة لا مايمكنش تعول عليه بوحدوا وخاص جناح آخر فالمستوى العالي. وأخيرا فقلب الهجوم، كانشوف أوريبوني اللي تحبسنا مع خريبكة على ثلاثين مليون لاعب جناح مزور ودار مابغى ومحيوس اللي ربح أغلب الكرات مع الصوابي، ف هادشي كايخليك تفكر كثر من مرة فالإنتدابات لا باغي تنافس ديال بصح.
الكرة ماشي غي تقني، كاين الطاكتيك اللي قراه لينا بنشيخة البارح واللي ماعندناش شكون يديروا فالفرقة على أكمل وجه، وكاين ما هو بدني وخسرناه البارح فجميع النزالات خصوصا الهوائية، وكاين ما هو نفسي وذهني وخسرنا ف 5 جويرية.
كل التفكير فالبطولة، لا بديل على الفوز، الحضور ديال الجمهور واجب تطبيقا لبمبدأ تكافؤ الفرص، الحكم خصو
يكون أجنبي، والسي داكروز خلاها البيغ باراكا من الخوف.
