25/05/2026
قصة المصممة المغربية بنت كازا لي كتقن بزاف د لغات, وبهرات الصحافة فميريكان.
-----------------------------------------------------------------
زينة ݣسوس مصممة مغربية تولدات فكازا عام 1925. ف 1959، جريدة (Birmingham Post-Herald) هضرات على القدرات اللغوية ديالها، وبلي كتدوي ب (Français) و (English) و (Español).
ف 1966، شاركات فعرض فنيويورك نظمو (Lord & Taylor)، والتصاميم ديالها تعرضو تما مع المصمم (Emilio Pucci).
(Diana Vreeland)، رئيسة تحرير مجلة (Vogue America)، عجباتها خدمتها وشجعاتها باش تعرض فميريكان.
ف 1967، جريدة (Courier-Post) دارت عليها مقال، وشرحات فيه زينة الفرق بين الفصالة والخياطة ديالها لي على اليد، وبين القفاطن ديال السياح لي كيتباعو فالأسواق.
ف 1968، جريدة (The Sacramento Bee) علنات على ديفيلي ديال القفطان غادي تنظمو الأميرة للا نزهة فالسفارة فميريكان. المقال ذكر بلي هاد القفاطن من تصميم زينة ݣسوس، وبلي كتخيط لشخصيات معروفة بحال (La duchesse de Windsor) و (Lee Radziwill).
السمية ديالها تذكرات فموسوعة (World of Fashion) لي نشراتها (Eleanor Lambert) ف 1976.
كان عندها محل سميتو (Kenz Boutique) فاوطيل المامونية فمراكش، وبوتيكات خرين فكازا.
اليوم، الخدمة ديالها، لي فيها قفاطن وجابادورات وكابات وصيكان مطرزين بالنطع والمجبود، كاينين فمتحف (Victoria and Albert Museum) فلندن.
زينة ݣسوس توفات ف 1998.
