02/02/2026
هاد لبلان هضرنا عليه شحال هذا مي ماشي مشكل نعاودوه ، باش داك نوع ديال قطران بلادي يفهم بلي را ماشي كلشي كيهاجر غي على قبل باش يجمع لفلوس ويرجع لمغرب يدير قهوة ، باش سعيدة بنت جيرانهم تقول عليه راجل ونص
إلا كنتي باغي تهرب من لبلاد غي حيت كلشي كيقول لهربة غي خليك في لبلاد ،إلا ماكنتيش باغي تخرج باش تبدل لبيئة ولمجتمع لي كتعيش فيه باش تخلق لعقلك واحد لفضاء لي يجدد فيه تفكير بطريقة سليمة وفيه نوع من الإبداع ...غي خليك في لبلاد،إلا ماوصلتيش لدرجة تكره لبشر لي في زنقة تكره لڭودرون لي في الأرض ، ديزاين ديال ديور ولقهاوي غي خليك في لبلاد،إلا ماوصلتيش لمرحلة مابقيتيش كتحمل تسمع بنادم يعاود ليك على شي واحد ويشد فيه نميمة غي خليك في لبلاد ، لاموصلتيش لدرجة تفرق بين تعيش وتنفس غي خليك في لبلاد ،... نهار كتخرج من لمغرب ماكتخرجش غي بوحدك ، حتى لعقل ديالك كيخرج ! كيخرج ليك بأفكار غير عادية أفكار فيها إبداع فيها حرية ، كتولي مستقل شي لي كيرفع من مستوى ثقة في نفس عندك ...أتعول فقط على راسك،أهم دافع لهربة هو تجديد طاقة لي عندك،تعرف على ناس جداد ، لغات جديدة ، ثقافات جديدة ، هادشي كافي باش تبدل وتولي إجابي في حياتك ، داك الإحساس الإجابي لي كيتولد ملي كتوقف قدام لمطار ملي كتقرا ( المغادرة ) كتقراها روح ديالك من لذاخل ماشي غي لسانك،ماكيهمش شمن بلاد غدي ليها حيث كل واحد وأشنو مخبي ليه لقدر ، لمهم هو تبعد ... تبعد على شي حاجة سميتها لمغرب ، ملي كتهز طيارة فوق الأرض ، فوق السكان ، فوق لغيوم ، فوق سحاب ،...ضروري غدي تحس بواحد تغيير عظيم كتحس براسك كتولد من جديد كتجاوز حدودك الذاخلية قبل ماتوصل ڭاع فين غادي...ملي كتوصل لوجهة ديالك ومع أول خطوة خارج لمطار طلع نفس وتفكر واحد بنادم سميتو ريڤو باغي ليك لخير وخا ماكتعرفوش هههه حيث هذيك اللحظة ماعمرك غادي تنساها في حياتك.
سؤال الأول لي كيسول أي واحد باغي يمشي لشي بلاد ، واش فيها مايدار ؟؟ ... ناخدوه سؤال عادي بحال أي سؤال ولكن علامن غدي طرحو ؟ من عند من كتسنى الإجابة ؟ كتحط قدر ديالك بين يدين شخص وحسب الإجابة ديالو نتا كتكون فكرة إجابية ولا سلبية على ديك لبلاد ، فقط بحكم تجربة ديال داك شخص ، لي عندو حياة ديالو ونتا عندك حياة بوحدك ، هو غادي يتدفن في قبر بوحدو ونتا غدي تذفن في قبر بوحدك .........
كملتي هاد مقالة درب معاك شي جيم برطاج خوتي 😍
😍💚
