04/08/2025
"صعصع " القصر الصغير بلطجي كيتحدى العدالة وداير "حفلة براءتو قبل نطق الحكم
كود طنجة goud.ma ////
ماشي غريبة غير فمدينة فحال طنجة تلقى مجرم متابع فواحد من أخطر الملفات، وداير غدًا حفلة مع صحابو يحتفل بـ "البراءة"، وكأنه عايش فيلم من أفلام المافيا!
هادشي اللي كيتقال على الملقب بـ"صعصع" أو "بوكليطة"، البلطجي المعروف فالقصر الصغير اللي دايز غدا أمام المحكمة بطنجة فواحد الملف اللي فيه تهريب دولي للمخدرات، التزوير، استعمال السلاح دخول وخروج غير قانوني من المغرب، وتكوين عصابة إجرامية.
مصادر "كود" أكدت أن الملف جاهز للمرافعات وكيتجه للحجز للتأمل، ، بعد ما اقتنع قاضي الحكم بجميع المعطيات والتهم الثقيلة، وتوصل بتقرير الأنتربول لي عندو فيه سوابق في إسبانيا.
لكن المفاجأة الكبيرة هي أن المعني بالأمر كيوجد لحفل ليلي مع صحابو البلطجية، وكيقول فالمحيط ديالو أنه غادي يخرج براءة، رغم كل هادشي، وقام بالحجز في ملهى ليلي مشهور للاحتفال بالبراءة!
المثير، حسب مصادر "كود"، أن المصرّح الرئيسي فالقضية اللي سبق خدم مع "صعصع " فعمليات التهريب عطى تصريحات مفصلة قدام الضابطة القضائية وعاودها قدام قاضي التحقيق، وهاد التصريحات هي لي قادت إلى اعتقال هاذ صعصع.
أكثر من ذلك البحث الاجتماعي اللي دارو قاضي التحقيق زاد ورّط المتهم، بحيث تبين أنه ما عندوش لا سيارات لا دراجات للي ادعى ان مداخيلو من كراءها، بمعنى أن كل الفلوس اللي عندو جاية من النشاط الإجرامي.
الأخطر من هادشي هو أن المتهم عندو سوابق فإسبانيا وسبق تعتقل على نفس النوع من القضايا المرتبطة بالمخدرات، وهادشي موثق رسمياً.
وحتى الطريقة اللي كان كيدخل ويخرج بيها من المغرب كتدل على أنه خدام مع شبكات منظمة، حيث ما كيستعملش الباسبور وكيدوز من طرق سرية.
ورغم كل هاد المؤشرات اللي كتشير إلى الإدانة، "صعصع" مزال كيدير الاستعراض وكيوزع الثقة الزايدة وهادشي كيطرح أكثر من علامة استفهام واش فعلاً كاين شي تواطؤ ؟ ولا غير الغرور ديال
المجرمين ؟ الملف فيه بزاف ديال الحقائق الصادمة.
العدالة غادية تقول كلمتها اليوم نتمناو يطبق القانون
