28/07/2025
البوليس شبرو ديك النصاب مُنتحِل صِفة وكيل الملك ، نعم هو لي سرق هاد الميرسيديس من حي الولاية هنا في تطوان
واحد الشاب تطواني كان كايبيع هاد الميرسيديس ديالو ، نشرا في الأنترنيت ، اتصل به واحد السيد نهار 26 يونيو ، سلام سلام ، شحال اخاي الثمن ؟ فاين نتينا ؟ أنا في الولاية كانفطر ، أنا ماجي نشوفا ... جا "الشاري النصاب " تم تم راكب على سيارة بيجو ، پاركاها في الباب د كوفي شوپ Dahab و خلاها خارجة شوية ، قالو ديك الشاب رود البال عندو يجي البوليسي يقيدلك مخالفة ، قالو انا نائب وكيل الملك كايعرفوني
المهم الشاب رحب ب"الشاري" و قالو متشرفين استاذ ، عطاه السوارت و قالو جرب مع راسك ، آخور مشى يجرب الميرسيديس ... بطبيعة الحال الشاب سمع وكيل الملك و شافو خلى السيارة ديالو قال هانية يمشي بواحدو و هو كمل على فطورو على راحتو ... شوية كايشوف آخور غبر و مابقاشي كايبان لا ما يمكنشي ! اتصل به قالو أستاذ فاين مشيتي ؟ قالو غي صبار انا غي هنايا كانجربا شوية نجي ههههه
المهم الشاب ستنى و في الأخير اكتشف انه تعرض لعمية نصب !! ترون تخربق لأن عندو الطالون د الشيكيس في السيارة و حتى الپاسابورطيس ديالو و العيال ديالو !! المهم ترون !!
اتصل بالبوليس جاو في ديك الساعة كاملين ، جاو الشرطة العلمية عباو البصمات من ديك السيارة لي خلى تماك ، جا رئيس الدائرة السابعة و عناصر أخرى معه ، تلونصات في الراديوس كاملين باش يشبروه زاعما لكن ولد الحرام قدار يعلق داغيا ، الضحية عدل محضر في الدائرة ، موراها مشى الضوصي كامل لاپيجي و بدات الإجراءات من جديد.
السيارة لي سماح فيها تماك هزوها البوليس ، وطلعت كذلك مسروقة من وجدة ، و الماتريكولا لي فيها ماشي ديالا ، توصلو للمعلومات الشخصية ديالو جبروه ساكن في مكناس و روشيرشي و عندو سوابق بزاف.
من ديك الوقت و هوما خدامين فيه ، هو خطير كان خدام بشي طرق احترافية و مع ذلك هاد الصبح شبروه في مدينة سلا ، و جبرولو حتى ديك الميرسيديس كايدور بها و حاليا ماجين به لتطوان و ماجين حتى بالميرسيديس باش تتسلم لمولاها.
نقولولها و نعاودوها بكل فخر و اعتزاز ... الشفار واخا يكون محترف كايدور المغرب كامل كايرعى بكل حرية ... كايوصل لتطوان العملية الأولى ديالو كايطيح في المقلة ، كايشبروه واخا يكون كايطير ، واخا يكون جن.
المهم ... مبروك عليك خاي ياسين ... ها السيارة رجعت ... الله يقلل العثرات و الله يجعلها حد الباس 🤲
عن ادم أفيلال
