07/08/2025
من بعد ما خرج المقال البارح اللي فضح القايد بدر والمقدم نورالدين زرطة، اليوم صباح وقعات الفضيحة الكبيرة!
هشام، صاحب المقدم زرطة، بدا كيدور على الناس اللي كانوا بارح كيحضّرو للبناء، وكيعلّمهم باش يوقفو كلشي، وݣال ليهم بالحرف: اللجنة غادي تدور.. حبسو.
الناس تخلعات، وهادشي كامل واقع فـ دوار جبيرات، والغلالثة، وولاد بورنجة، في مقاطعة الرابعة الحضرية بسيدي سليمان، اللي ولاو سكانها تايقولو: "راه ولا لعب على عينك يا بن عدي!".
الفضيحة ماشي جديدة، ولكن اللي خطير، هو كيفاش نفس الوجوه دايرة عصابة منظمة: ابتزاز، رشوة، تساهل مع البعض وتشديد على البعض الآخر، وكلشي حسب شحال خلّصت!
الناس اللي ما عندهمش باش "يشريو سكوت القايد ومقدم ديالو"، صبحو اليوم محبوسين، والبني موقف، وكيعيشو في الرعب من هاد الشبكة ديال الفساد.
نوجه نداء عاجل للسيد العامل باش يفتح تحقيق نزيه ويوقف هاد المهزلة.
الساكنة اليوم كتهضر بصوت واحد:
"بغينا القانون يطبق على الجميع، ماشي على اللي ما عندوش!"
راه القايد بدر، والمقدم زرطة، وصاحبو هشام، دارو من المقاطعة الرابعة ملك خاص، واللي خلّص كيبني، واللي ما خلّصش كيتحكر عليه قدّام عينيه.
فين هي الدولة؟ فين هي المراقبة؟
راه السكوت على الفساد تواطؤ!
#منقوووووووووول #بارطاجيو
