03/02/2025
دخلت للدوش.. لعند ماما.. باش نحك ليها ضهرها.. أففف الصهد فهاد الدوش . نگرت عليها مزيان كالعادة.. حيت عيطات عليا نحك ليها ضهرها..
_شديت الكيس.. وهزيت عيني و شفت جسمها.. تأملتو مزيان.. مبقاتش ديك الصبية تاع نهار الأول .. كرشها كلها خطوط ديال الحمل.. و يدين حرشين بالتصبين و الماعن.. ركابي كحلين بالحكان ديال الزرابي .. هزيت عيني و شفت عينيها.. تأملتهم مزيان.. لقيت فيهم عيا ديال سنيين اللي أنا ماعمري لاحضتو..
بديت كانحك ليها فضهرها.. واه ضهرها بدا تايتقوس بتركاب ديالنا ملي كنا صغار.. تفكرت شحال ركباتني .. و تا كبرت و مازالا إيلا نعست فبلاصة ماشي بلاصتي تاتهزني لبلاصتي و تحطني.. و تغطيني..
__تفكرت هاد الأم اللي ديما تانتنفخ عليها حيت ماعجباتنيش ماكلتها.. و لا حيت صدعاتني بالتصخار.. شحآل .. و ديما تاتسيفطني نقية لمدراستي.. تفكرت شحال لعبات معايا و تخلعات عليا و هزات ليا الهم.. شحال حرمات راسها باش تشري ليا أنا الحوايج باش ماتبان عليا تا بنت و نكون ديما مرتاحة وفرحانة تفكرت شحال كنسا حنانها وكنضربو في الزيرو..
ساليت الحكان.. تمنيت نعنقها و نبقا هاكاك الحياة كلها.. و نبكي عليها و نقوليها أنها هي الوحيدة اللي هزات هبالي و بغاتني بصدق.. نعاود ليها كلشي ونقوليها أنني ملي خرجت من يديها و بغيت نولي مسؤولة و كبيرة ندمت.. و تعدبت.. بغيت نعنقها و نقوليها بلي البشر خايب و بلي ظلموني و ستهزؤ بيا أماما.. جرحو بنتك الصغييرة.. ماكرهتش نقول ليها ضربيهم أماما ماكرهتش نقول ليها ضربيهم أماما كيف كنتي تاتضربي خويا ملي تايبكييني.. خبيني عندك و ماتخليش شي حد يقيسني و لا يقلقني.. .... !
تمنيت نرجع صغيرة.. فين مشات ديك البراءة.. كان صوتي ماتايعلاش على صوتك.. كنت تانجي نطلبك باش نغسل الماعن و تاتقولي ليا لا أبنتي راك مازالا صغيرة.. هاني كبرت و وليت نغسلهم بالنفآخة..
نسييت أ ماما شكون كان كايجمع ليا "وسخي" و يستحمل ريحتو المقززة.. نسيت بزاف ووليت تا أنا هازا خنافري لسما..
تخربقو افكاري.. وبقيت ساهية فيها بزاف.
وهي تقولي : واش أبنيتي فيا الوسخ ياك
_ قلت ليها : لا ماموسخاش ماموسخاش انا اللي موسخة وخرجت حاضرة راسي بالحشمة من راسي
_ فاش خرجات عنقتها وبستها من رجليها وطلبت السماحة حيت هي أعز شخص عندي منقدرش نكمل بلا بيها
وهضرتها هي الأولى دائما
__ باش حسيتي فاش قريتي هادشي اختي😐😭 منقول
