23/08/2025
🟢 Fitsipika fototra amin’ny fiompiana bitro
1️⃣ Fitsipiky ny fitiavana
Ny fiompiana bitro dia tsy atao fotsiny hoe "andramana", fa atao amin’ny fitiavana. Raha tsy misy fitiavana ny biby, dia tsy maintsy hiafara amin’ny tsy fahombiazana.
2️⃣ Fitsipiky ny fiofanana
Tsy misy fampiasam-bola atao raha tsy misy fiofanana. Ny mpiompy voaofana dia mitsitsy fotoana, vola ary misoroka fahaverezana tsy ilaina.
3️⃣ Fitsipiky ny trano fonenana
Clapier tsara = Bitro salama. Tsy azo hamaivanina ny fahadiovana, rivotra madio, toerana malalaka ary fiarovana amin’ny mpiremby.
4️⃣ Fitsipiky ny sakafo
Bitro voafahana tsara = Bitro mamokatra. Tsy maintsy mirindra ny sakafony: ahitra, sakafom-pameno, rano madio ary “compléments minéraux”.
5️⃣ Fitsipiky ny fiterahana voafehy
Tsy afangaro amin’ny kisendrasendra ny bitro. Mila fehezina ny fampiraisana, ialana ny fifandovana (consanguinité) ary tazonina an-tsoratra ny tantara.
6️⃣ Fitsipiky ny fahasalamana
Ny fisorohana dia mora sy tsy mandany loatra noho ny fitsaboana. Tsy maintsy atao ny vaksiny, fanafody kankana, fanadiovana ary fanaraha-maso isan’andro.
7️⃣ Fitsipiky ny fitantanana ara-toekarena
Ny fiompiana bitro dia orinasa ihany koa. Mila mitazona bokim-pitantanana, manara-maso ny fandaniana ary manao kajy ny tombom-barotra.
8️⃣ Fitsipiky ny faharetana
Na dia mitombo haingana aza ny bitro, ny tetikasa kosa mila fotoana. Ny faharetana sy ny fitohizan’ny asa no miteraka vokatra maharitra.
9️⃣ Fitsipiky ny tsena
Ny famokarana tsy misy mpividy dia fitambaran’ny fatiantoka. Ny mpiompy dia mianatra sy mandinika ny tsenany alohan’ny hanitarana ny famokarana.
🔟 Fitsipiky ny fizarana traikefa
Ny mpiompy tsara dia mizara traikefa, mampiofana ny hafa ary mandray anjara amin’ny fananganana fiaraha-monina mpiompy bitro mandroso.
