23/07/2025
Posa-kevitra tao Amin’ny Gazety Lakroan’i Madagasikara
“Misy ny Fanantenana ho an’ny hoavin’i Madagasikara”
Marc Ravalomanana - Filoham-pirenena teo aloha
Mahantra ny vahoaka malagasy amin'izao fotoana izao. Ny 82%-n'ny vahoaka no voakasik'izany fahan-trana izany. Tena mijaly, sahirana. Sarotra vao mahita sakafo hohanina. Sarotra vao afaka mampianatra ny zanaka ary indrindra ny rano fisotro madio sy ny jiro, izay zo fototra nefa sarotra ihany koa vao mahazo azy ankehitriny. Tsy vitan'izay fa eo koa ny tsy fisian'ny fandriam-pahalemana. Mijaly ny tantsaha, mamboly fa tsy izy no tompon'ny vokatra, misy mangalatra. Tena misy mihitsy olona mangalatra, ety andrenivohitra vilany misy sakafo eny ambony fatana misy maka. Tsy misy olona hamokatra mihitsy eto Madagasikara raha tsy mipetraka ny fandriam-pahalemana.
Zavatra tena ilain'ny vatan'olombelona ny sakafo sy ny fandriam-pahalemana. Ny zavatra irian'izy ireo
dia ny hahatafitan'ny zanany. Isika Malagasy miteny hoe na hivarotana taninketsa aza dia tsy maintsy ampianarina ny zaza, fa ny zaza mianatra tafita foana. Tany Morondava aho izao dia nahita ankizy kely vao valo taona, efa manao contrat hiandry omby. Ankizy tokony hianatra dia miasa miandry omby. Ankoatr'izany ireo mamaky vato. Mioty lavanila mbola izy koa izany, raha misy lavanila satria latsaka ambany be ny vidiny amin'izao. Fahantrana tsy mihoatra ny amin'izao fotoana izao. Ahoana izany ny hoavin'ny Firenentsika? Zaza tokony mbola hianatra nefa miasa. Hisy ny fanantenana raha mipetraka ireto zavatra telo ireto: fifampatokisana eo amin'ny vahoaka sy ny mpitondra, matoky ny vahoaka hoe miaro azy ny mpitondra, faharoa mba misy fidiram-bola hivelomany sy hamokarany ary farany ahoana no hananany tahiry kely hitsinjovany ny vodiandro merika. Amin'izao fotoana izao, tsy misy fitsinjovana ny vodiandro merika fa zava-doza be foana no miandry. Miankina amin'ilay mpitondra no hisian'ny fanan-tenana. Manana fanantenana ny olona rehefa ilay mpitarika no mampiseho amin'ny vahoaka ny modely. Tsy mijery miaraka ny soa iombonana isika, tsy maintsy miara-mientana isika hanao izay hampitombo haingana ny fivelomana. Taloha anie ny olona rehefa miasa eny an-tanimbary dia misy an'ilay atao hoe valitanana dia mifanampy, dia mifampatoky. Ankehitriny, tsy misy an'izany intsony. Taloha ny olona mahalala tsara izany fotoana fanetsana izany sy izany fararano izany satria mitandro tsara ny tontolo iainana izy ireo. Tamin'izaho nitondra dia tena nampitombo ny valanjavaboary, nahatratra 1 600 000 ha. Zavatra ilaina maika koa mba hahafahana mamonjy ny olona ny fanaovana ny lalana, zavatra haiko io. Nahavita 9200 Km. Ny nahavitana an'ireo dia fahaizana miara-miasa amin'ny Vondrona Eoropeana, aza hadinoina fa ny Vondrona Eoropeana rehefa manome vola dia tsy averina. Mila fahaizana ny miaraka aminy. Gaga aho amin'izao fotoana izao fa tsy misy intsony ny fiarahana amin'ny Vondrona Eoropeana. Ny antsika, ny lalana vita potika, satria ny vola tokony hikojakojana azy tao amin'ny amin'ny FER na fonds d'entretien routier lany. Isika izany sady tsy manana no tsy mikojakoja no tsy miraharaha.
Ny olombelona tsy maintsy manana fanantenana. Tsy maintsy misy ny fanantenana raha mbola misy koa ny farany. Ampandraisina anjara amin'ny asa daholo ny vahoaka indrindra fa ny tantsaha. Ampiana ireo amin'ny famokarana vary, legioma. Atao izay hampitomboana ny habetsahan'ny vokatra. Atao tsara ny tohodrano. Tsy fantatry ny olona ny atao hoe DAM, tena ilaina io satria io no hanangonana rano ka rehefa tonga ny maintany dia avoaka fotsiny ny rano ao dia afaka mamboly ny tantsaha. lalana ihany koa ny kolikoly, ny olona tokony higadra tsy migadra fa ny olona tsy tokony higadra no migadra.
Araka ny nambarako tery aloha dia tsy maintsy misy ny fanantenana raha mbola misy koa ny farany fa mila mpitondra atokisan'ny vahoaka no sady manome lanja ny vahoaka.
