Tafan'Iarivo Katôlika

24/07/2025

Ny Evanjely Anio

Alakamisy 24 Jolay 2025

Herinandro Fahaenina ambin'ny folo tsotra Mandavan-taona

Evanjely Masina nosoratan’i Md. Matio 13, 10-17.

"Ianareo no nomena hahalala ny zava-miafina amin’ny fanjakan’ny lanitra, fa izy ireo tsy mba nomena izany."

Tamin’izany andro izany, nanatona an’i Jesoa ny mpianany ka nilaza taminy hoe: “Nahoana no fanoharana no itenenanao aminy?” Namaly Izy ka nanao taminy hoe: “Satria ianareo no nomena hahalala ny zava-miafina amin’ny fanjakan’ny lanitra, fa izy ireo tsy mba nomena izany. Fa izay manana dia homena ka hanam-be izy, ary izay tsy manana kosa, na dia izay ananany aza dia hesorina aminy. Ary noho izany, dia fanoharana no itenenako aminy: satria mijery izy fa tsy mahita, ary mandre fa tsy mahazo na mahalala; ka tanteraka aminy ilay faminanian’i Izaia manao hoe: ‘Handre amin’ny sofinareo ianareo fa tsy hahalala, ary hijery amin’ny masonareo, fa tsy hahita; fa ny fon’itý vahoaka itý efa nihamafy, ny sofiny efa nihadonto, ary ny masony efa nakimpiny, sao mahita ny masony sy mandre ny sofiny, ka hahalala ny fony, dia hibebaka izy ary hositraniko.’ Fa ianareo kosa, sambatra ny masonareo fa mahita, ary ny sofinareo fa mandre. Lazaiko aminareo marina tokoa, fa maro ny mpaminany sy ny olo-marina naniry hahita ny hitanareo fa tsy nahita, ary handre ny renareo fa tsy nandre.”

Izany àry ny Tenin’ny Tompo!

23/07/2025

Ny Evanjely Anio

Alarobia 23 Jolay 2025

Herinandro Fahaenina ambin'ny folo tsotra Mandavan-taona

Evanjely Masina nosoratan’i Md. Matio 13, 1-9.

"Ao ny mamoa avo zato heny."

Tamin’izany andro izany, rahefa nivoaka avy tao an-trano i Jesoa, dia nipetraka tao amoron-dranomasina. Ary be ny vahoaka nitangorona teo aminy, ka niditra teo an-tsambo kely Izy, dia nipetraka teo, ary ny olona rehetra kosa teo amoron-drano. Ary nilaza zavatra maro tamin’ireo tamin’ny fanoharana Izy nanao hoe: “Indro nivoaka hamafy ny mpamafy, ary nony namafy izy, ny sasany latsaka teny amoron-dalana, dia tonga ny voromanidina ka nitsindroka azy; ny sasany latsaka tamin’ny tany be vato sady manify nofo, ka nitsimoka vetivety, satria tsy lalina ny nofon-tany; kanjo nony niposaka ny masoandro, dia nalazo izy ka maina, satria tsy latsa-paka. Ny sasany latsaka tany anaty tsilo, dia nitombo ny tsilo ka dia nahafaty azy; ary ny sasany latsaka tamin’ny tany tsara, dia namoa: ao ny tonga avo zato heny, ao ny enimpolo, ary ao ny telopolo. Izay manan-tsofina hihainoana, aoka izy hihaino!”

Izany àry ny Tenin’ny Tompo!

22/07/2025

Ny Evanjely Anio

Talata 22 Jolay 2025

Fetin'i Mb Maria Madelenina

Evanjely Masina nosoratan'i Md Joany 20, 1-2. 11-18.

"Ravehivayy, nahoana no mitomany ianao? Iza no tadiavinao?"

Ary tamin'ny andro voalohan'ny herinandro, dia lasa maraina koa mbola maizina nankany amin'ny fasana i Madelenina, ka nahita fa voaesotra tamin'ny fasana ny vato. Dia lasa izy nihazakazaka nankany amin'i Simôna Piera sy ilay mpianatra malalan'i Jesoa, ka nanao tamin'ireo hoe: Nalain'olona tao am-pasana ny Tompo, ka tsy fantatray izay nametrahany azy. Fa i Maria kosa nijanona nitomany teo ivelan'ny fasana. Ary teo am-pitomaniana, dia niondrika nitsirika ny tao anaty fasana izy, ka nahita anjely roa niakanjo fotsy, nipetraka tao amin'izay nipetrahan'ny vatan'i Jesoa, ny iray teo an-doha, ary ny iray teo an-tongotra. Dia hoy izy ireo taminy: Ravehivavy, nahoana no mitomany ianao? Ka hoy izy namaly ireo: Satria nalain'olona ny Tompoko, ka tsy fantatro izay nametrahany azy. Nony avy nilaza izany izy dia nitodika, ka nahita an'i Jesoa nitsangana teo, nefa tsy fantany hoe i Jesoa io. Ary hoy i Jesoa taminy: Ravehivavy, nahoana no mitomany ianao? Iza no tadiavinao? Nataony ho mpiandry saha io, ka hoy izy taminy: Raha ianao re no naka Azy, Tompoko, mba atoroy ahy kely izay nametrahanao azy, hangalako Azy. Dia hoy i Jesoa taminy: Ry Maria! Dia nitodika izy ka nanao taminy hoe: Rabony! (izany hoe Mpampianatra). Aza mikasika ahy, hoy i Jesoa taminy, fa mbola tsy niakatra tany amin'ny ray Aho, fa mandehana mankany amin'ny rahalahiko, ka lazao aminy hoe: Miakatra ho any amin'ny Raiko sy ny rainareo Aho, ary any amin'Andriamanitro sy Andriamanitrareo. 18 Dia lasa i Maria Madelenina ka nilaza tamin'ny mpianatra hoe: Efa nahita ny Tompo aho, ary izany no nolazainy tamiko.

Izany àry ny Tenin'ny Tompo!

21/07/2025

Ny Evanjely Anio

Alatsinainy 21 Jolay 2015

Herinandro Fahaenina ambin'ny folo tsotra Mandavan-taona

Evanjely Masina nosoratan’i Md. Matio 12, 38-42.

"Ilay mpanjakavavy avy any atsimo hitsangana hanohitra itý taranaka itý amin’ny andro fitsarana."

Tamin’izany andro izany, ny sasany tamin’ny mpanora-dalàna sy ny Farisianina namaly an’i Jesoa nanao hoe: “Tompo, mba te-hahita famantarana avy aminao izahay.” Fa namaly Izy ka nanao hoe: “Mangata-pamantarana itý taranaka ratsy sy mpijangajanga itý fa tsy homena famantarana hafa afa-tsy ny an’i Jônasa mpaminany izy; fa tahaka ny nitoeran’i Jônasa hateloan’andro sy hateloan’alina tany an-kibon’ny hazandrano lehibe no hitoeran’ny Zanak’Olona hateloan’andro sy hateloan’alina ao anatin’ny tany koa. Ny olona tany Niniva hitsangana hanohitra itý taranaka itý amin’ny andro fitsarana ka hanameloka azy, satria nibebaka izy ireo nony nitorian’i Jônasa teny; nefa indro misy lehibe noho i Jônasa eto. Ilay mpanjakavavy avy any atsimo hitsangana hanohitra itý taranaka itý amin’ny andro fitsarana ka hanameloka azy; fa niala avy tany amin’ny fara vazan-tany izy ka nankaty hihaino ny fahendren’i Salômôna, nefa indro misy lehibe noho i Salômôna eto.”

Izany àry ny Tenin’ny Tompo!

20/07/2025

20/07/2025

Alahady 20 Jolay 2025

Alahady Fahaenina ambin'ny folo tsotra Mandavan-taona - Taona D

"MAHAIZA MAMPIANTRANO AN’ANDRIAMANITRA"

Fanambaràna ny Tenin'Andriamanitra
**************************************

Boky Jenezy 18, 1-10a.

"Tompo ô, aza lalovana fotsiny lahy ny mpanomponao."

Tamin’izany andro izany, ny Tompo niseho tamin’i Abrahama teo amin’ny lohasahan’i Mambre raha ilay nipetraka teo am-baravaran’ny lainy iny izy, tamin’ilay nigaingaina iny ny andro. Nanopy ny masony ary nijery izy, ka indreo olona telo lahy nijoro nifanandrify aminy. Vao nahita azy izy, dia nihazakazaka avy eo am-baravaran’ny lainy, nitsena azy, ary rehefa niankohoka tamin’ny tany izy, dia nanao hoe: “Tompo ô, raha nahita fitia eo imasonao aho, aza dia lalovana fotsiny lahy ny mpanomponao, fa aoka hangalàna rano kely ianareo, hanasana ny tongotrareo. Mialà sasatra eo ampototr’ity hazo ity ianareo; dia hangalako m**o kely ianareo hataonareo tohan’aina, vao manohy ny dianareo ianareo, fa izany no nandalovanareo amin’ny mpanomponareo”. Dia hoy ny navalin’ireo: “Ataovy àry, araka izay voalazanao”. Dia niverina faingana i Abrahama nankeo an-day amin’i Sarà ka nanao hoe: “Faingàna ianao, mangalà lafarîna intelon’ny famarana, ditio ka ataovy m**o”. Avy eo i Abrahama dia nandeha faingana ho any amin’ny andian’omby, dia naka zanak’omby anankiray tanora sy tsara izy, ary nomeny ny mpanompony izay nahandro izany faingana; dia nandray mena-dronono sy ronono mbamin’ilay zanak’omby efa nandrahoina izy, ary narosony izany teo anoloan’izy ireo, ary izy kosa nitsangana teo anilany, teo ampoto-kazo. Ary nihinana izy ireo. Raha efa izany dia hoy izy ireo taminy: “Aiza i Sarà vadinao?” Hoy ny navaliny: “Ao an-day ao izy”. Ary hoy izy: “Hiverina aty aminao indray aho, raha avin-taona toy izao, ary hanana zazalahy i Sarà vadinao”

Izany àry ny Tenin’ny Tompo!

******************************

Fandraisana ny Tenin'Andriamanitra
--------------------------------------------------------

Salamo 14. 2-3ab. 3de-4ab. 5.

Fiv.: Tompo ô, iza no hiantrano ao an-dainao?

Iza, ry Tompo, no horaisinao an-trano sy honina ao am-bohitrao masina? Izay mahitsy famindra sy mitandro ny rariny: ny fony misaina ny marina; ny lelany tsy ekeny handainga; fady azy ny manisy ratsy sy ny maneso ny miara-monina.

Ny olo-meloka tsy hasohasoiny; ny matahotra ny Tompo no hajainy. Tsy mba maka zana-bola izy na mandray tamby hahameloka ny marina.

Izay manao izany tsy hihontsona mandrakizay.

******************************

Taratasin’i Md. Paoly Apôstôly ho an’ny kristianina tany Kôlôsy 1, 24-28.

"Ilay hevi-miafina tsy nambara taloha hatramin’ny taranaka maro nifandimby dia naseho ankehitriny tamin’ny olona masina."

Ry kristianina havana, ankehitriny dia mifaly amin’ny fiaretako fahoriana ho anareo aho, fa mameno ao amin’ny nofoko izay tsy ampy amin’ny fahorian’i Kristy ho an’ny Tenany, dia ny Eglizy; fa voatendry ho mpandraharaha Azy aho noho ny nanomezan’Andriamanitra ahy ny fiadidiana anareo, mba hitoriako ny tenin’Andriamanitra an-tsakany sy an-davany, dia ilay hevi-miafina tsy nambara taloha hatramin’ny taranaka maro nifandimby, fa naseho kosa ankehitriny tamin’ny olona masina, dia ireo tian’Andriamanitra ho nampahafantarina ny maha-sarobidy amin’ny Jentily ny voninahitr’izany hevi-miafina izany, dia i Kristy fanantenana ny voninahitra ho anareo. Izy no torînay, ary ny olon-drehetra samy ampandrenesinay sy ampianarinay avokoa araka ny fahendrena rehetra mba hahatongavanay ny olon-drehetra ho lavorary ao amin’i Kristy Jesoa.

Izany àry ny Tenin’ny Tompo!

******************************

Evanjely Masina nosoratan’i Md. Lioka 10, 38-42.

"Nandray Azy tao an-tranony i Marta, fa i Maria kosa no nifidy ny anjara soa indrindra."

Tamin’izany andro izany, i Jesoa niditra tao amin’ny vohitra anankiray, ary nisy vehivavy atao hoe Marta nandray Azy tao an-tranony. Nanan-drahavavy anankiray atao hoe Maria izy, izay nipetraka teo anilan’ny tongotry ny Tompo nihaino ny teniny; fa i Marta kosa sahirana tamin’ny fanompoana be. Dia niato kely izy ka nanao hoe: “Tompoko, tsy mampaninona Anao ve ny amelan’ny rahavaviko ahy hanompo irery? Mba asaovy manampy ahy re izy”. Fa namaly ny Tompo ka nanao taminy hoe. “Marta, Marta, maro tadiavina sy be tebiteby ianao, nefa zavatra iray monja no ilaina; fa i Maria no nifidy ny anjara tsara indrindra izay tsy halàna aminy”.

Izany àry ny Tenin’ny Tompo!

19/07/2025

19/07/2025

Ny Evanjely Anio

Sabotsy 19 Jolay 2015

Herinandro Fahadimy ambin'ny folo tsotra Mandavan-taona

Evanjely Masina nosoratan’i Md. Matio 12, 14-21.

"Norarany izy ireo tsy hanao izay hahafantarana Azy mba ho tanteraka ny teny nolazainy."

Tamin’izany andro izany, i Jesoa nanasitrana lehilahy iray tamin’ny andro sabata. Ka lasa nivoaka ny Farisianina ary niara-nioko ny amin’izay hahafaty Azy. Fa nahalala izany i Jesoa ka dia niala teo. Maro ny vahoaka nanaraka Azy, ka nositraniny izay rehetra narary tamin’ireny; nefa noraràny izy ireo tsy hanao izay hahafantarana Azy, mba ho tanteraka ny tenin’i Izaia mpaminany hoe: Indro ny Mpanompoko izay nofidîko, dia ilay malalako izay ankasitrahan’ny foko indrindra; hapetrako ao aminy ny Fanahiko, ary hanambara ny marina amin’ny Jentily izy. Tsy hifanditra izy, na hiantso mafy, ary tsy hisy handre ny feony eny an-dalana; tsy hanapaka ny volotara vaky izy, na hamono ny lahin-jiro manetona, ambarapamoakany ny rariny ho mpandresy; ary ny Jentily hitoky amin’ny anarany.

Izany àry ny Tenin’ny Tompo!

18/07/2025

Ny Evanjely Anio

Zoma 18 Jolay 2025

Herinandro Fahadimy ambin'ny folo tsotra Mandavan-taona

Evanjely Masina nosoratan’i Md. Matio 12, 1-8.

"Tompon’ny sabata aza ny Zanak’Olona."

Tamin’izany andro izany, i Jesoa namaky ny tanimbary tamin’ny andro sabata, ary noana ny mpianany ka nioty salohim-bary, dia nihinana; fa nony nahita izany ny Farisianina, dia nilaza taminy hoe: “Indro ny mpianatrao manao izay tsy fanao amin’ny andro sabata.” Ary hoy Izy taminy: “Moa tsy novakînareo va izay nataon’i Davida raha noana izy sy izay nanaraka azy, fa niditra tao an-tranon’Andriamanitra izy, ka nihinana ny m**o alahatra, kanefa tsy nisy nahazo nihinana izany na izy na izay nanaraka azy, afa-tsy ny mpisorona ihany? Sa tsy novakînareo ao amin’ny lalàna va fa amin’ny andro sabata dia mandika ny sabata ny mpisorona ao amin’ny tempoly, kanefa tsy meloka izy? Ary lazaiko aminareo fa misy eto lehibe noho ny tempoly. Raha fantatrareo manko ny hevitry ny teny hoe: Ny famindram-po no sitrako fa tsy ny sorona, dia tsy ho nanameloka ny tsy manan-tsiny ianareo; satria tompon’ny sabata aza ny Zanak’Olona.”

Izany àry ny Tenin’ny Tompo!

17/07/2025

Ny Evanjely Anio

Alakamisy 17 Jolay 2025

Herinandro Fahadimy ambin'ny folo tsotra Mandavan-taona

Evanjely Masina nosoratan’i Md. Matio 11, 28-30.

"Malemy fanahy sy manetry tena ao am-po Aho."

Tamin’izany andro izany, i Jesoa nanao hoe: “Mankanesa atý amiko ianareo rehetra mijaly sy vesaram-pahoriana fa hanamaivana anareo Aho. Ento ny jiogako, ary mianara amiko fa malemy fanahy sy manetry tena ao am-po Aho, dia hahita fiadanana ho an’ny fanahinareo ianareo; fa mora entina ny jiogako ary maivana ny hazofijaliako.”

Izany àry ny Tenin’ny Tompo!

16/07/2025

Ny Evanjely Anio

Alarobia 16 Jolay 2025

Masina Maria niseho tany Karmely

Evanjely Masina nosoratan’i Md. Matio 11, 25-27.

"Nanafina izany zavatra izany tamin’ny hendry Ianao fa nanambara azy tamin’ny tso-po."

Tamin’izany andro izany, niteny i Jesoa nanao hoe: “Misaotra Anao Aho, Raiko, Tompon’ny lanitra sy ny tany, fa nanafina izany zavatra izany tamin’ny hendry sy be saina Ianao, ary nanambara azy tamin’ny tso-po kosa. Eny, misaotra Anao Aho, Raiko, fa izany no sitra-ponao. Efa nomen’ny Raiko Ahy ny zavatra rehetra, ary tsy misy mahalala ny Zanaka afa-tsy ny Ray; ary tsy misy mahalala ny Ray afa-tsy ny Zanaka sy izay tian’ny Zanaka hanehoana Azy.”

Izany àry ny Tenin'ny Tompo!

15/07/2025

Ny Evanjely Anio

Talata 15 Jolay 2025

Herinandro Fahadimy ambin'ny folo tsotra Mandavan-taona

Evanjely Masina nosoratan’i Md. Matio 11, 20-24.

"Ho moramora kokoa ny hatao amin’i Tira sy i Sidôna ary amin’ny tanin’i Sôdôma noho ny aminareo amin’ny andro fitsarana."

Tamin’izany andro izany, i Jesoa dia nanomboka niteny mafy ireo tanàna nanaovany fahagagana maro; satria tsy nibebaka ireo; ka nataony hoe: “Loza ho anao, ry Kôrôzaina, loza ho anao, ry Betsaida! fa raha izay no tany Tira sy Sidôna no natao ny fahagagana natao taminareo, dia efa ho nibebaka ela tamin’ny akanjo malailay sy tamin’ny lavenona izy. Koa lazaiko aminareo, fa amin’ny andron’ny fitsarana, dia ho moramora kokoa ny hatao amin’i Tira sy i Sidôna noho ny hatao aminareo. Ary ianao, ry Kafarnaôma, hasandratra hatrany an-danitra va ianao? Hietry hatrany amin’ny afobe ianao, fa raha tany Sôdôma no natao ny fahagagana natao tao aminao, dia mbola ho nitsangan-ko tanàna mandraka androany izy. Koa dia lazaiko aminao fa ho moramora kokoa ny hatao amin’i Sôdôma amin’ny andron’ny fitsarana noho ny hatao aminao.”

Izany àry ny Tenin’ny Tompo!