29/07/2026
🌿 “𝑽𝒐𝒂𝒈𝒆𝒋𝒂 𝒎𝒂𝒏𝒐𝒅𝒊𝒅𝒊𝒏𝒂 𝒊𝒛𝒂𝒉𝒂𝒚, 𝒏𝒆𝒇𝒂 𝒕𝒔𝒚 𝒕𝒆𝒓𝒚; 𝒗𝒆𝒓𝒚 𝒉𝒆𝒗𝒊𝒕𝒓𝒂, 𝒏𝒆𝒇𝒂 𝒕𝒔𝒚 𝒎𝒂𝒎𝒐𝒚 𝒇𝒐; 𝒆𝒏𝒋𝒆𝒉𝒊𝒏𝒂, 𝒏𝒆𝒇𝒂 𝒕𝒔𝒚 𝒏𝒂𝒇𝒐𝒚, 𝒑𝒐𝒕𝒓𝒂𝒌𝒂, 𝒏𝒆𝒇𝒂 𝒕𝒔𝒚 𝒎𝒂𝒕𝒚. 2 Korintiana 4:8-9” 🕊️
Tsy ilaozan’ny fijaliana ny fiainana miaraka amin’ny Tompo. Mety ho fanerena, fahasahiranana, fanenjehana ary fahalavoana, sy ny maro hafa.Kanefa ny azontsika kristiana antoka dia izao : tsy maintsy mandresy isika ao Aminy.
Na inona na inona fahoriana hoetin’ny fiainana eo : na olana ara-bola, aretina, fahadisoam-panantenana, fahasahiranana ao an-tokantrano... Hoy ny Tenin'Andriamanitra: "tsy tery", "tsy mamoy fo", "tsy nafoy", "tsy maty."
Izany no mampiavaka ny fiainan'ny olona matoky an'Andriamanitra. Tsy hoe tsy misy tafio-drivotra, fa misy Tompo miaraka aminy ao anatin'ny tafio-drivotra. Misy tanana mamafa ranomaso sy mampahery ny fo reraka. Ary manafy hery sy mampitraka hatrany Izy.
Ny fahasoavan'Andriamanitra no teny farany.
Tranga lalovana mihitsy ilay reraka sy resy androany, fa tsy maintsy mandresy koa isika raha mbola mitohy mifikitra Aminy. Maro ny zavatra tsy takatry ny saintsika lalovantsika eo amin’ny fiainana, nefa afaka matoky fa tsy mahafoy antsika ny Tompo ary fitiavana no ambadika ireny rehetra ireny.
Koa aza avela hibahan-toerana eo amin’ny fiainanao ny fahatahorana, ny famoizam-po, ny eso-teny ataon’ny manodidina. Matokia mandrakariva fa mandalo ny toe-javatra lalovanao, ary eo amin’ny fanatrehan'Andriamanitra indrindra ianao ao anatin’io.
Ka mbola tokony hatahotra ve isika, ry sakaiza? Na enjehina, na hoetina tsaraina aiza isika, na atao an-tranomazina, na misedra aretina goavana, na very fananana…Tsy ho very mandrakizay ny fanantenana. Eo ny Tompontsika. Ilay Mpiaro antsika. Ilay mifehy izao tontolo izao. Satria tsy misy zavatra mitranga eo amin’ny fiainantsika raha tsy efa nekeny izany. Ary feno fahasoavana, fahendrena sy fitiavana Izy. ❤️
