Човекот Пред Сè

Home
Macedonia
Skopje
Човекот Пред Сè

Contact information, map and directions, contact form, opening hours, services, ratings, photos, videos and announcements from Човекот Пред Сè, News & Media Website, Partizanski Odredi 70b, Skopje.

Тимот – креатор на порталот „Човекот пред сè“ е создаден од поединци кои го гледаат светот на ист начин, преку призмата на човекот и неговата моќ!

Идејата за антропоцентрично општество, со човекот како централна фигура е она што ни беше „spiritus movens“ при креирање на овој портал и понатаму е ѕвезда водилка на нашето дејствување. Човекот е основната ќелија на секое општество. За човекот да биде

вистински дел од општеството во кое ќе си ги обезбеди својата иднина и развој, потребни му се квалитетно образование, квалитетна здравствена заштита и секако здрав и чесен разум кој ќе обезбеди иднина токму во земјата од којашто потекнува. Ние граѓаните на Република Македонија имајќи ги прекрасните климатски услови, прекрасните води и планини, каде може да се развијат сите гранки од виталното значење за нашето опстојување, а тоа се земјоделието и сточарството се она на што треба да го темелиме нашиот натамошен развој. Се зависи од нас. Почитувани, ова е личен став на Трифун Костовски.

Преку рубриките на порталот нудиме можност секој да учествува со своите идеи и предлози и секако своето искуство само во интерес за креирање на поубава, просперитетна и безбедна држава. Во поединецот е силата. За прв пат кај нас промовираме концепт на компаративна анализа на поединечни ставови на власта и опозицијата како и нивна добронамерна критика од страна на еден од најуспешните бизнисмени во Македонија – Трифун Костовски.

Како иновативен концепт, нашиот портал содржи рубрика „Луѓе“ каде што секој слободно ќе може да се изрази, да сподели мислења и ставови, предлози, искуства и приказни … Се со една цел – кревање на пиедестал на основната клетка на секое општество – човекот.

Дел од нашето дејствување е и делот наречен „Оштетени од системот“ во кој се споделени реални ситуации, каде што граѓаните биле директно оштетени или не биле заштитени од институциите на државата во Македонија и поради тоа страдале самите тие, нивните бизниси и семејствата.

Заедно со останатите рубрики коишто се посветени на различните видови на образование, култура, историја на влијателни семејства, екологија и други содржини, овој портал е пионер во своето делување!

Основните вредности на кои се темели нашата работа се: чесност, достоинство, слобода на изразување, без говор на омраза, лојалност, љубов кон татковината и сите сограѓани, со посебен акцент на општествена одговорност и филантропија.

Следете не, имаме што да покажеме!

07/12/2025

Празници се ближат

Ете нѐ пред прагот, пред портите, пред влезот на нови животни мигови, нови 365 деноноќија. Чувството дека доаѓа нешто ново, дека влегуваш во нешто ново е добрата стара предновогодишна илузија, која како магија нѐ обзема сите. Наскоро ќе ја испратиме старата и ќе ја дочекаме Новата 2026-та година. Ја прелетавме како еден ден. Нашата неминовност е токму минливоста. Времето е предизвикувач и господар. Не се натпреварувајте со времето и со часовникот, немилосрдни се. Не се враќаат назад, не можеш да ги контролираш. Да не е украсувањето на домовите, излозите, дворовите, улиците и институциите, нема да ни текне дека празници се ближат. Красиме и китиме, ја маскираме тагата. Но како да се раскитиме од низата непријатностите наредени како издувани балони. Како да украсиме души празни, порозни, снеубавени. Ќе славиме, како и секоја година, ќе си посакуваме, подаруваме, пријателствуваме, но каде да ги оставиме тагата, болката, загубите, несреќите. Кој да тагува место нас? Годинава многу несреќи, многу тага, многу болки неизлечиви. Ни најблескавите лампиони, ни најраскошните новогодишни трпези нема да ни ја накитат и заситат напатената душа. Душа која што губи друга душа, вечно гладува. И само што ќе посакам да се израдувам, да ги израдувам ученици, со радост да ја поставиме повторно на сцена хуманитарната Корчагинска ⚜️Сказноприказна ⚜️за да ги израдуваме дечињата, ќе ми текне на сите оние наши и ваши небесни ангели, на нивните најблиски, на нивните празни кревети, соби, празни шкафови и куфери, на празнината оставена зад себе, па ќе се посрамотам пред себе дека имам право да се радувам додека некој тагува. Многу празнини годинава. И покрај многуте индивидуални задоволства, свадби, крштевки, животни радости и успеси, сите сме со колективна грутка во грлото. Додека некаде се гладува и војува, ние живееме слободно. Барем така мислиме. Па ете така, слободно, најслободно да се преиспитаме претпразнично, колку добрини сме направиле и споделиле во текот на изминатава година. Ќе ни ги детектираат со камера сообраќајните прекршоци за да се види на дело дека сме сообраќајно неписмени. Прекршокот за 51 км, ме асоцира на книгата 50 нијанси на сиво. Алгоритми далтонисти. А кој ќе ни ја проверува емоционалната писменост. Емоционално писмен е апсолутни писмен. Одлично знае што му треба на човештвото. Кој ќе ни ги детектира гревовите, злосторствата, криминалите... Ех да има некои премерувачи на добрина и на лошотија, на пример љубометри и злометри, доброметри и човекометри, па да нѐ уштекаат сите и да си sирнеме во душите. Ќе имаме можност да бегаме на време едни од други, емпатите од контра бандата на антиемпати, да бегаат како ѓавол од крст, пред да е доцна. Невозможно, емпатот во сѐ гледа добро и предизвик да го поправи лошото. Непоправливо е. Посакувам добрината да добие сила, да се избори против злото во сите можни облици. Добрината секогаш мисли за однапред и за сите, првин за другите, па за себе. Мисли на детето пред да му пука во грб, мисли на безбедноста на пешаците пред да ги прегази, мисли на безбедноста на локалот, објектот, пред да ги отвори, мисли што би било кога би било...Многу мисли за однапред пред да потпише непристојни предлози, донесе хаотични закони, исече дрвореди, упропасти јавен превоз, воздух, образование, здравство и сѐ по список. А на списокот сѐ, освен добрина. Добрина ни треба, добрина на тони, купишта добрина за да го исчисти сметот од лошотии и лошотилаци. А да, и подобри контејнери ќе ни требаат, многу ѓубре ќе се собира. Да добрееме, да си ги смилуваме срцата во добрина, таа не е глупост. Исто како и љубовта, тие се врв на емоционалната интелигенција. Лош човек не знае да сака. Не може и да сака, оти не научил од најраната возраст што е добро срце. Празници се ближат, да се зближиме во добрини и добри дела, да добрееме и кога ни е лошо.

02/12/2025

КОЛУМНА
Раздели па владеј – балканската болест што трае со векови“

Стариот континент Европа, распослан како продолжена рака на Азискиот континент и одделен од континентот Африка со Средоземното море од Северна Америка со Атлантскиот океан, важи како цивилизациска колевка на народите од денешниот западен свет.

Цивилизациски колевки има на сите континенти, почнувајќи од големата Азија, Северна и Јужна Америка, Африка и од поново време Австралија.

Културното наследство кое го носи Европа е неспоредливо со културното наследство на останатите цивилизации, според моите сопствени погледи.

Европското културно наследство во изминатите 3000 години е богатство распослано на сите цивилизациски полиња и придобивки како историја, уметност, култура, архитектура и сл.

Трите големи полуострови на европскиот континент имаат своја историја. Во време на моќниот Рим пред и после новата ера, Пиринејскиот Полуостров бил претежно населен од дивите племиња дојдени од големиот Азиски Континент. Главно се населувале на овој полуостров, како прекрасно парче од Земјината топка, поради убавата клима.

На овој полуостров со векови наназад е присутна Арапската култура која несомнено во себе носи многу напредни идеји во цивилизацискиот развој.

За местото и улогата на арапската култура се говори уште во 9-от век преку Емиратот Кордоба каде што на медицинскиот факултет прв пат е воведена праксата за операција на катаракта (перде на очи).

Местото и улогата на Апенинскиот Полуостров е колевка на Средоземното море, каде со илјадници години владеела Римската империја која има сериозни цивилизациски наследства на денешната цивилизација.

Третиот полуостров е Балканот, кој претставува вистинска крстосница на цивилизацискиот развој. Почнувајќи од Античко време , па до ден-денес Балканот е транзитен дел меѓу мешањето европската, азиската и африканска култура.

Во што е разликата меѓу овие три Европски полуострови? Пиринејскиот Полуостров е поделен меѓу две силни соседни држави Шпанија и Португалија со меѓусебна почит и желба за натамошен развој. Италија е владетел на Апенинскиот Полуостров. Со текот на владеење успеа да го претвори во силна држава, силниот север со бедниот југ од овој полуостров.

Третиот полуостров е Балканот, кој што и денес претставува сериозен проблем не само за иднината на Балканот, туку и за иднината на целиот Европски континент. Проблемот е меѓу нас луѓето, жителите на овој полуостров, каде битисуваат 11 независни држави. Културата и традицијата меѓу сите овие држави има многу сличности со мали разлики.

Зошто!

Многумина и денес Балканот го доживуваме како „Буре барут”.

Мини национализмот сѐ уште е длабоко присутен меѓу балканските држави.

Кај поголемите држави на нашиот полуостров имаме мегаломански потреби за нови територијални поделби, што за нас обичните жители на овој полуостров е неприфатлив апсурд.

Не извлековме никакви поуки од историјата, како се создаваа државите Италија на Апенинскиот Полуостров и како се создаваа државите Шпанија и Португалија на Пиринејскиот Полуостров. Не извлековме поуки од мајката историјата! Историјата е наука, образовен предмет кој нѐ учи за минатото, но и нѐ подготвува да не ги повторуваме грешките од минатото. Целта е една, да градиме сигурен и спокоен живот за сите жители на овој полуостров.

Нашата Македонија ја плаќа цената на балканскиот егоизам. Токму историјата нѐ натера да го промениме името на сопствената држава по желба на соседна Грција.

Соседна Бугарија нѐ кочи во отпочнување на преговорите со ЕУ за внесување на 3 504 Бугари во Уставот на Македонија. ,,Авангардната” Европа стои зад целата оваа небулоза.

Кога во минатото не се појавиле моќни визионери за Балканот да создадат Балканска нација, денес ние Македонците кои во многу нешта имаме заедничко на полето на културата, уметноста, традицијата, па и религијата со останатите Балкански народи, ставени сме на отстрел.

Изјавата на бугарскиот Премиер Росен Жељазков во емисијата „Недела 150“ на БНР, во соседна Бугарија, содрѓи небулоза, дека уставот на Република Македонија мора да се отвори за влез на Бугарите во него. Тој појаснува дека тоа е едногласна одлука на бугарскиот парламент и целата ЕУ заедница.

Не говориме за љубов, не говориме за интерес, говориме за иднина на Балканот. Кога не успеавме да станеме сите народи Балканци тогаш е тешко, мене како Македонец со длабоко чувство за припадност, да бидам уценуван на нечесен и подмолен начин.

Националното чувство нема цена. Нема цена за луѓето кои длабоко ја чувствуваат својата национална припадност. Компромис за вакви националистички расчеречување на Балканот, не постои.

Токму ваквите несогласувања меѓу балканските нации го прават Балканот нестабилен. Изминатите илјадници години наназад постоеле многу крвопролевања на национална и верска основа.

Господине Премиер на Бугарија Росен Жељазков, дајте да пораснеме вие како Бугари, а ние како Македонци! Доколку има мудрост меѓу нас, да создадеме силна Балканска нација која ќе го подигне кредибилитетот и стандардот на народите коишто живеат на овој полуостров, ќе станеме моќен полуостров на светско ниво.

Начинот на кој што вие размислувате, ме потсетува на старата римска поговорка која гласи: „раздели, па владеј”.

Зошто правите бариера меѓу Македонците и Бугарите? Во многу нешта сме блиски , имаме заеднички нишки во сите полиња на нашето живеење.

Зошто креирате карма на омраза. Дајте да создадеме иднина во која што сите народи и националности на Балканот ќе живеат во мир и спокој. Ако ние го решиме овој проблем меѓу нас, бидете убедени дека на Балканот ќе се разрешат сите останатите проблеми, посебно со Босна и Херцеговина. Ставете го дијалогот како приоритет и како директен дијалог со носителите на високите функции. Не го практикувајте системот на пренесени пораки преку настапи во емисии и социјални мрежи. Ве почитувам како Бугари, ве молам почитувајте нѐ и нас како Македонци.

01/12/2025

Третиот полуостров е Балканот, кој што и денес претставува сериозен проблем не само за иднината на Балканот, туку и за иднината на целиот Европски континент. Проблемот е меѓу нас луѓето, жителите на овој полуостров, каде битисуваат 11 независни држави. Културата и традицијата меѓу сите овие држави има многу сличности со мали разлики.

Зошто?!

Многумина и денес Балканот го доживуваме како „Буре барут”.

Мини национализмот сѐ уште е длабоко присутен меѓу балканските држави...

Ова е извадок од мојата утрешна колумна насловена "Раздели па владеј – балканската болест што трае со векови“

30/11/2025

Визиготи - крвожедни гости

Човек треба добро да процени кого во куќа да прими. За жал, недоволно е sиркањето низ клучалка затоа што само визуелно ни ги доловува гостинот пред врата. Кога ќе го пуштиш низ врата и испиеш кафе со него, појасно ќе го видиш. Но јасноста не секогаш е длабочина. Јасно го гледаш црвеното јаболко, но само кога подлабоко ќе гризнеш можеш да видиш дека е црвливо. Кои биле Визиготите, коишто упаѓале на ,,визита" кога им се скита по туѓи дворови? Визиготите биле западната гранка на готските племиња, германски народ кој помеѓу 3 до 5 век се населувал на териториите околу денешна Украина, Романија и низ Балканот. Ќе го молат царот на источно-римското царство, Валенс, да ги прими во Царството, за да се засолнат од наезда на Хуните. Услов за влез е да го предадат орудието. Под водство на Аларих, Визиготите го ограбиле гостољубивиот Рим. Набргу, царската златна кочија е изгорена, а царот сотрен. И така Визиготите се населуваат на Балканот. За жал, варварството постои и ден-денес, но во малку поинаква политичка обланда и под други имиња. Како вонземјани напаѓаат каде ќе стасаат. Најпривлечни им се туѓите територии. Првин добронамерно тропаат на порти, молејќи за помош (соработка), а потоа постепено, ,,домаќински" го туркаат домаќинот од сопственото огниште...Сѐ ми се чини дека поговорката ,,рани куче да те каса" со време се ублажила во ,,рани куче да те лае". Не ја ни користам од почит кон кучињата, кои ниту лаат ниту напаѓаат без причина, туку ја бранат својата територија. Нашата, типично балканска гостопримливост, ќе нѐ изеде. Нѐ ништи постепено ама сигурно. Мислам Македонецот оро води кога гостољубивоста е во прашање. Со локум ги пречекуваме узурпаторите. Им се смееме, ни се смеат. Ние од срце, тие од интерес. Само малкуте може да осетат диво месо во грлото. Но тие обично не се луѓето од власта кои решаваат кому порти да отворат. Тие се оние чувствителните, емотивно интелигентните, воспитани и воздржани пред дрскоста на емотивните манипулатори. Драмата ,,Диво месо" на колосот Горан Стефановски е драма на секој од нас, како од минатото, така и во сегашноста. За иднината да не зборуваме, барем не за однапред, тоа маестрално го правел уште еден колос како Мисирков. Колку многу визија во таа совршено сложена и длабока едноставност на Горановизијата, неговиот длабок поглед кон сите можни и неможни перспективи. Го нема физички, но нѐ sирка од секоја педа на оваа земја која ја сакал до болка, невидлива за нас обичните. Ги опишал, ги раскажал варварите, дивите облечени во фина одежда, во неговата драма ,,Диво месо" и ни најавил за однапред какви драмолетки допрва ќе нѐ чекаат, колку влакна од диво месо ќе нѐ гушат во гркланите. Секојдневно се ништиме, духовно и физички, се газиме, силуваме, труеме и убиваме. Сѐ поретко благородни души и благодарни луѓе. А всушност, сите ние сме малку кралеви, малку питачи. Секој од нас во својот родослов има некој крал и некој скитник. Но, вистинските кралски синови и ќерки знаат да почитуваат, знаат да се заблагодарат, знаат да ти го облагородат денот. Благородникот благороднички се однесува и во арно и на мака. Па и грофот, не е гроф ако е циција. Благородник не питачи, не моли за милост, не бара, затоа што знае дека некогаш некој од неговите предци гладувал. Питачот проси и моли за милостина затоа што бедно се чувствува. Тој не знае дека некогаш некој од неговите предци бил крал, како ни ,,грдото пајче" што не знае дека е лебед меѓу патки. Но знае како да преживее. Знае да грабне, да украде, откорне и мечтае да стане крал. Кралот нема бујна мечта. Има сѐ. Во имањето нема услови за креативност. Сиромаштијата раѓа креативноста. Сиромавиот од ништо прави нешто. Богатиот од сешто може да дојде до ништо. Сиромав не е исто што и питач. Исто како што и богатиот не мора да е благородник. Има сиромашни со раскошна душа и бедни богаташи. Има сѐ, од кога е светот и векот... Благородни манири се учат од најраното детство, уште во утробата на мајката. Ништо не може да ги осиромаши, извалка, уништи... Моќни се, помоќни и од моќта на парите. Само благородник пропаѓа достоинствено. Но ги нема, за да учиме од нив за достоинство. Тлото не нѐ држи од пропаѓање. Од тешка бетонизација и железарија ќе потонеме. Се лизгаме. Се лизга и Водно. Ни се лизга природата низ раце. Сами себе сме си Визиготи. Ќе се избркаме до последен.

27/11/2025

КОЛУМНА
Кермес

Почитувани читатели, поводот за моето денешно пишување е судбината на еден објект, кој полни19 години зјае како авет во централниот дел на Градскиот парк во Скопје. Како дух од минатото тажно нѐ потсетува дека некогаш тука некогаш било весело. Говорам за легендарниот Кермес, скопјани сѐ уште го доживуваат како прекрасен симбол на едно минато време на растење и созревање, на живеење по скопски, на фамилијарно уживање во амбиентот на градскиот парк.

Од 2004 година до денес овој објект припаѓа на моето семејство. Купен е од Љупчо Николовски-Фуфо, со градежна дозвола, платени комуналии и отпочнати градежни работи.

Истиот беше стопиран зашто не дозволив, како градоначалник на Скопје тогашниот, премиер Никола Груевски да владее со градот.

Дозволата за градба беше стопирана од страна на Општина Центар . Тогашната влада без факти обзнани дека тоа е споменик на културата и треба да биде под заштита на институција задолжена за негување на културното наследство на Република Македонија. Таков документ, дека Кермес е културно наследство, никогаш не бил евидентиран во оваа институција.

Ни беше одземена маркицата и доделена на тогашниот претседател Иванов со цел да се изгради парк на нациите.

Судските процеси за овој предмет се завршени уште во 2016 година. Врховниот суд носи одлука со која ни се враќаат маркицата и дозволата да продолжиме со градба.

Дозволата за градба Општина Центар веднаш ни ја издаде, меѓутоа враќањето на маркицата сѐ уште трае, затоа што Советот на Општина Центар треба да го измени ДУП-от каде се наоѓа објектот Кермес и да ни биде вратена таа маркица .

Се сменија пет градоначалници во Општина Центар и пет Совети на Општина Центар. До овој момент не забележав дека имаат потреба за враќање на маркицата за Кермес , во сопственост на моето семејство, почнувајќи од времето на градоначалникот Тодоровиќ, Жерновски, Богдановиќ и денес Герасимовски, кој деновиве отпочна да го работи својот втор мандат како градоначалник на Општина Центар.

Сите горе споменати градоначалници ветуваа дека ова прашање е формално и ќе биде средено во најкраток рок.

Цели 19 години отпочнатиот градежен објект Кермес го чека својот ,,најкраток рок” да оживее. Кому се нанесува штета со ваквата неодговорност од страна на градоначалниците и советниците во Општина Центар? Ние како семејство сме оштетени, бидејќи отпочнавме капитален објект во далечната 2006 година кој нѐ чинеше повеќе од 3 милиони евра.

Наместо денешната руина од Кермес, требаше да никне прекрасен објект кој по многу нешта ќе наликуваше на палатата Лихтенштајн во Виена, објект со прекрасни угостителски содржини за граѓаните на Скопје да уживаат во централниот дел на паркот.

Како семејство имавме намера да ѝ понудиме на Општина центар простор за матична служба, за венчавки на младите жители од Општината, нудејќи прекрасен амбиент за таков голем чин.

Непочитување на законите во Република Македонија претежно го прават институциите на Локално и централно ниво. Вината за денешниот авет од Кермес не е во граѓаните, туку во градоначалниците и советниците на Општина Центар.

Ако мене и моето семејство нѐ казнувате од неразбирливи причини, зошто ги казнувате нашите сограѓани од кои го црпите легитимитетот за вашите функции.

Зошто дозволувате законите да не се применуваат? Цената за ваквиот башибозлук ја плаќаме сите. Непочитување на законите значи хаос. Во хаосот нема перспективи за колективен напредок, затоа што владеат љубомората, омразата и криминалот.

До кога ќе молчиме? Правдата мора да биде наше секојдневие. Правдата е единствениот начин да изградиме современо општество во кое сите граѓани без разлика на нивната национална, верска и партиска припадност ќе живеат во еден подобар свет.

Почитта кон законите и правдата ќе го сопре егзодусот на заминувањето на нашата млада популација. Го губиме најсилниот капитал, ЧОВЕКОТ.

Ако вака продолжиме ќе станеме земја на пензионери и старци.

Кермес, некогашниот симбол на Скопје, може повторно да блесне. Дали и кога тоа ќе се случи исклучиво зависи од моментот кога во Македонија навистина ќе почне да функционира правната држава. До тогаш не можам да градам имот за кој што не можам да добијам тапија. Тапа ни е работата...

26/11/2025

Почитувани читатели, поводот за моето денешно пишување е судбината на еден објект, кој полни 19 години зјае како авет во централниот дел на Градскиот парк во Скопје. Како дух од минатото тажно нѐ потсетува дека некогаш тука некогаш било весело. Говорам за легендарниот Кермес, скопјани сѐ уште го доживуваат како прекрасен симбол на едно минато време на растење и созревање, на живеење по скопски, на фамилијарно уживање во амбиентот на градскиот парк.

Ова е извадок од мојата утрешна колумна насловена „Кермес“

24/11/2025

СТАВ
Кога образованоста не носи мудрост - Реакција на ставовите на Кирил Петков

Кокошката, свињата и францускиот предлог: политичка алегорија за нашата иднина

Со внимание го следев интервјуто на екс премиерот на Бугарија Кирил Петков, објавено на порталот ,,Журнал” на 23.11. 2025 година. Единствени теми беа државните односи помеѓу Бугарија и Македонија, како и местото на ЕУ во нашите меѓусебни односи.

Кирил Петков е високо образован политичар кој завршил на Универзитетот Британска Колумбија во Ванкувер -Канада и магистрирал на Харвард меѓу десетте најсилни од неговата генерација магистри.

Вокабуларот во целиот разговор беше на пристојно ниво, но целите кои ги искажа како ставови се целосно неприфатливи за мене, а убеден сум и за многумина мои сограѓани.

Францускиот предлог за отпочнување на преговори за влез во ЕУ, според кој Македонија мора да го отвори Уставот за внесување на 3 504 Бугари, регистрирани во Република Македонија, за господинот Петков е многу лесна одлука, бидејќи со ваквото прифаќање на Бугарите во нашиот Устав, ние ќе креираме заедничка иднина не само меѓу Македонија и Бугарија, туку и на целиот Балкан.

Ваквата изјава ми делува несериозна, а еве и зошто: за бугарските водечки политички партии, во основа македонската национална посебност е лажна, како и нашиот литературен македонски јазик и нашата македонска историја, култура и уметност. Замислете, не ни го признаваат нашиот национален идентитет во сопствената матична држава, Македонија!

Од друга страна, Македонците коишто живеат во соседна Бугарија немаат право да се декларираат како Македонци.

За односот на бугарската држава кон Македонци во Пиринскиот дел, говорат пресудите за човекови права во Стразбург , а ги има повеќе од 15. Советот за човекови права носи пресуди во корист на Македонците во соседна Бугарија, а бугарската држава целосно ги игнорира.

Господинот Кирил Петков во времето на неговиот мандат како премиер беше присутен при отворањето на бугарскиот клуб ,,Ванчо Михајлов” во Битола, (историски лик кој што оставил длабоки траги во минатото, непријатни за нас Македонците).

За господинот Петков отворањето на Уставот на Македонија е нормална работа, додека отворањето на Уставот на соседна Бугарија е сериозен проблем зашто Македонците би сакале да им се дозволи на етничките заедници кои не се чувствуваат како Бугари, да се изјаснат согласно сопствените чувства на национална припадност.

Ваквите потези и изјави на екс премиерот Кирил Петков само ја потврдуваат идејата за обновување на Санстефанска Бугарија во која ние Македонците, како национална посебност, треба да исчезнеме од светската мапа на народи и нации.

Ваквата изјава ме потсетува на едни дамнешни времиња, кога во бившата СФРЈ во стопанството имаше недостаток на готовина финансиски средства. Во тие времиња се практикуваше компензација, што значи наместо плаќање во готово да се компензира стока со стока или услуга со услуга.

Во таквите моменти кога се правеа ваквите компензации мораше да постои дигнитет и заемен интерес. Непромислениот, налудничав начин на компензација знаевме да го дискутираме низ шега : „кокошката и свињата решиле да прават компензација само со една цел да преживеат. Кокошката и вели на свињата, ти ќе дадеш масленце, јас јајце, ќе јадеме и ќе си живееме. Најнапред свињата се согласила. Кога дошол моментот свињата да се заколе, таа во паника изјавила: ,, Па вие мене треба да ме заколете за да имате масленце”. Шегата настрана, првобитната одлука на свињата за прифаќање на компензација е многу слична на одлуката на експремиерот на Македонија Ковачевски кој го прифати Францускиот предлог.

Што е разликата меѓу шегата со кокошката и свињата и господинот експремиер Ковачевски. Свињата не дозволила да се заколе и компензацијата пропаднала, додека прифаќањето на Францускиот предлог од страна на Ковачевски е вистинско предавство за нас, колење на идентитетот, Македонците и нашата национална посебност. Болката е што тоа е официјално прифатен документ од страна на тогашната Влада на Република Македонија, што во основа значи државна одговорност за негово исполнување. Прашањето ми е, каква ќе биде нашата иднина ако истиот го имплементираме во нашиот Устав?

Многумина мои сограѓани се убедени дека со самото влегување на Македонија во ЕУ во Македонија ќе почне да тече мед и млеко за сите граѓани на државата, дека ЕУ заедницата ќе нѐ храни, чува и ќе води грижа за нас.

Бидете убедени мои сограѓани, додека сами за себе не покажеме интерес за себе одржување и натамошен напредок во сите сфери на нашето живеење, вклучително и националниот идентитет, нема никој од страна да нѐ чува.

Разочаран сум од експремиерот на Бугарија Кирил Петков од причина што на многу површен начин нѐ третира како држава, не покажувајќи почит кон нас Македонците.

Високо образован кадар од светски маштап , ама со тесни национални погледи, за мене претставува опасност со која тешко ќе се справуваме.

Деновиве одекна во јавноста информација дека во највисоките кругови (претседателот и премиерот на Македонија) се креира нов меѓудржавен предлог меѓу Македонија и Бугарија, со цел да се надмине овој проблем.

Порачувам, бидете внимателни! Карактерот што го покажавте како владеачка партија за нашата македонска посебност е силен.

За некои работи во денешната реалност, компромис не смее да има. Несериозноста може сериозно да нѐ чини.

23/11/2025

Белосветски фекалии

Едни гинат на бојно поле, други на политичките дувла, трети војуваат сами со себе. Мирот е само привид, пауза меѓу две војни чиешто растојание никогаш не било доволно долго, за да се заборави претходното. Светот војува без прекин. Џабе тебе мир, кога некаде е војна. Општ впечаток е дека сите војуваат и гладуваат, но некој за храна, некој за вино, некој за моќ. Се гладува, поткрадува и краде. Прегладнети за материјални добра, добро се крмат. Крадат на ситно ,,ситните", крадат на големо ,,големците". Најелегантно се краде законски. Оружјето е во најдемократскиот облик на слободата. Слободни (ослободени) вируси, бактерии и паразити. Вируси на завист, бактерии за самоуништување и човеколики облици на паразити, преоблечени во фина одежда на политичари. Ние сме во нова, милениумска војна, најсмрдлива до сега. Светот е екстравагантен, луксузен тоалет каде се уринира со клозетски манири, а фекалии се служат како десерт. ЕУ има своја клозетска историја. Американците дури после Колумбо, кој не ја открил тоалетната хартија. Британскиот клозет е како последното прибежиште на колонијализмот. Водата шушти над главата како Викториините водопади. За сурово прецизните Германци хартијата има свое раслојување. Германските клозети почитуваат класна разлика. Во вагоните од трета класа има груба кафена хартија. Во прва класа е бела, се вика Soezial Krepp. Германскиот клозет е единствен по својата мала сцена. Впрочем целиот свет е една сцена врз која паѓа фекалија. Таа ви овозможува добро да го погледнете вашиот метаболички продукт додека размислувате за политичките кандидати. За темпераментните Италијанци брзината не дава можност за восхит пред својот последен продукт од метаболизмот. Понекогаш може да прочитате делчиња од Corriere della Sera пред да си го избришете задникот со весникот. Тука клозетските школки бргу се мијат и фекалиите исчезнуваат пред да им се восхитувате како Германците. Бидејќи немаат сопствени гомна за да им се восхитуваат, Италијанците прават скулптури и слики. Ја имаат и Венеција - најуметничката канализација. Ерика Јонг за Француската тоалетна култура вели: ,,Старите хотели во Париз се со два џиновски железни стапала од секоја страна на смрдливата дупка. Стебла од портокали засадени во Версај за со мирисот да ја прикријат смрдеата од нужничките јами. Светлото во париските клозети се вклучува дури кога ќе ја свртите бравата. Il est defendu de faire oipi dans le chamvre de Roi - Забрането е да се моча во кралската соба! За Јапонците Ерика Јонг ќе забележи дека клечењето е основен факт за животот на Исток. Клозетската школка е сместена во процеп на земјата. Зад неа се наоѓа цветен аранжман. Ова нема никаква врска со зен-будизмот и Сузуки. Како и да е, ова е авторско и автентично поистоветување на тоалетите и клозетите со ентитетите, тоалетните хартии и партии (пардон папири) преку оригиналноста на писателката Ерика Јонг. Штета што не била низ Балканот да почувствува што е хартија од вредност, како се суши по дворови ( полувицот за Пироќаните) , се фрла од прозори и се складира по домовите во случај на ,,нужда“. За нас Балканците, тоалетната хартија нуди неверојатни можности за употреба и далеку сме покреативни од Европејците, особено кога тоалетниот ве-це папир е на попуст. Ќе ни требаат нови контејнери само за тоалетна хартија, идеална за рециклирање. Разликата помеѓу фекалијата и хартијата е што гомнениците беспомошно се вртат во ве-це школката, додека хартијата има избор и може да се рециклира. Ерика Јонг како инспирација, за да немаме страв од с....е ( летање).

20/11/2025

СТАВ
Расчеречување на Македонија

Деновиве, во етерот одекна информација дека нашиот сосед Албанија за само 12 месеци ќе стане членка во Европската Унија! Албанија е земја која за 12 месеци ги реши сите 36 поглавја.

Најнапред, честитки за нивниот лидер господинот Еди Рама и граѓаните на Албанија.

Треба да честитаме, но и да се запрашаме, која е иднината на Република Македонија?

Уште во далечната 1991 година, по распадот на СФРЈ, Република Македонија и Република Словенија беа единствените држави кои можеа веднаш да бидат примени во европската заедница, денешна ЕУ. Бевме држави кои по сите стандарди требаа да бидат членки на ЕУ.

Ни се случи ембаргото со соседна Грција, која успеа да ,,крене прашина” со прашањето околу името на нашата држава Македонија на светско ниво и да ни забрани секаков влез во меѓународните институции под нашето уставно име. Така станавме ФИРОМ.

Светот потпадна под влијанието на соседна Грција и најголемите светски сили САД и ЕУ. Бевме условени и станавме Северна Македонија за да станеме членка на НАТО и ЕУ.

НАТО членството ни го гарантираа Соединетите американски држави и си го одржаа зборот. ЕУ членството ни го гарантираше Брисел, но за жал не го одржа зборот. Ветеното е лага.

Република Македонија, опкружена со ултимативни соседи, ставена е на отстрел, на раскостување.

Ќе набројам факти, кои се мој личен став, а се базичниот проблем:

Славјанството, како групација на народи каде е најраспространето православјето и делумно муслиманството како вероисповед, земјите не се омилени членки во ЕУ заедницата. Единствена држава каде славјанскиот јазик е базичен и доминира православјето е соседна Бугарија.

Зошто Бугарија стана членка на ЕУ, иако како земја ни од далеку не беше спремна да биде дел од оваа заедница? Мое мислење е дека е чиста желба на нивниот вечен пријател Германија, водечката сила во ЕУ заедницата.

Историски гледано, во двете светски војни, со исклучок на Бугарите, славјанските народи на Балканот се бореле против Германците.

Историски, Бугарија доби цар од кралското семејство Хабсбурзи и тогаш, сѐ уште живиот цар Симеон, во времето на неговиот мандат за премиер на Бугарија ја внесе Бугарија во ЕУ.

Очигледно е дека Бугарија како држава е длабоко поврзана со нациите кои го говорат германскиот јазик.

Единствена држава од бившата СФРЈ која доби итно членство во ЕУ е Хрватска, која важела како сериозен поддржувач на германската политика. Јавноста знае дека базичната религија во Хрватска е католичка.

Сакам да појаснам дека не само религијата, туку и геостратешката позиција играат голема улога во големите планови на ЕУ, особено земјите од Балканот.

Да биде појасно, Хрватска, Албанија, Грција и Бугарија го контролираат целиот Медитерански приод кон Балканот.

За жал, Нашата Македонија нема море. Факт е дека има стратешка местоположба, ама не најбитна и пресудна.

За лицемерието на ЕУ кон православието ќе пишувам во некоја следна прилика. Во моментов ќе се осврнам само на нашата македонска реалност.

Ние сме држава која што три пати го менуваше своето уставно име, притиснати од нашите соседи, првенствено Грција, па денес силно притиснати од соседна Бугарија и малку провизорно или поточно кажано не така грубо, притиснати од Албанија.

Војната во 2001 година не беше производ без знаење на ЕУ заедницата и на нашите соседи Косово и Албанија! После војната Македонија стана мултиетничка држава со тотално променет кодекс на функционалност на државата. Кај нашите соседи Грција и Бугарија нема малцинства. За жал, кај нас да се појават само пет граѓани кои ќе ја искажат својата различна национална припадност, треба да се вметнати во Уставот.

Жална и грда слика за нашата реалност.

Соседна Бугарија од петни жили се бори за обновување на својата Сан Стефанска Бугарија, нудејќи пасоши не само на нас Македонците, туку на сите граѓани во Република Македонија, па дури и во Албанија. Целта е да покажат на ЕУ дека тоа е бугарска територија и таа територија припаѓа на Бугарија.

Денес, Македонија е стопирана во преговорите со ЕУ поради силната желба на ЕУ заедницата да се подржи нивната членка Бугарија за внесување во нашиот Устав 3.504 Бугари, кои согласно законите во Македонија може да се изјаснат за својата национална припадност. Додека истата таа Бугарија не негира како Македонец во сопствена држава, не признавајќи го нашиот македонски литературен јазик, историја и култура, нашите Македонци се сериозно обесправени за нивното изјаснување како Македонци во Бугарија.

За какво право и правда говориме? Типично лицемерие на ЕУ заедницата.

Брзото влегување на Албанија во ЕУ значи само едно: македонската држава да се разнебити, да се раскости, да се расчеречи...

Грција ни го промени името. Бугарија нѐ идентификува како Бугари. Албанија и Косово мудро молчат, бидејќи албанската заедница во Македонија е многу силна и сеприсутна во нашето секојдневие.

Кој ни е следниот чекор? Да ,,чекориме” ползечки, да коленичиме пред нашите соседи и целата ЕУ заедница или достоинствено да тргнеме по сопствен пат?

Балканот како регион е сѐ уште во тензична состојба. Босна и Херцеговина се клучниот проблем за кој мора да се најде решение. Се плашам дека со решавањето на огинот меѓу Босна и Херцеговина ќе настрада и мојата Македонија како колатерала.

Војната во Украина ќе заврши во блиска иднина. При секое завршување на вакви големи војни стануваат сериозни територијални промени во регионите каде што се можни конфликти.

Промената на Украинската граница ќе даде отворено светло за промена на границите и на Балканот. Повеќе од јасно е дека на Европската заедница многу побитни ѝ се интересите на нејзините членки, а наши соседи, како Албанија, Грција и Бугарија , отколку нашата Македонија.

Како членка на НАТО, единствен вистински поддржувач на Република Македонија се Соединетите Американски Држави. Поддржувач од чист интерес. Македонија вистински пријатели во ЕУ заедницата нема и убеден сум дека никогаш нема да ги има, бидејќи интересот е вечен, а нашата Македонија за жал не може да им понуди море како стратешки капитал.

Мултиетничноста уште повеќе ја поткопува иднината на нашата држава. Етникумите кои живеат во Македонија, чии матични држави се членки на ЕУ, ќе бараат час поскоро да се приклучат кон нивните матични држави. Што значи ова? Ова значи расчеречување на нашата Македонија. Апетитите од минатиот век преку Балканските војни не се минато, туку реална сегашност. При вакво черечење на Македонија зошто да не се вклучи и соседна Србија? Тогаш, ние Македонците ќе ја доживееме историјата на денешните Палестинци.

За да се одбегне ова зло, треба масовно подигање на националната свест на сите сограѓани, да си ја засакаме државата, а ние Македонците да бидеме комплетно поддржани од сите етнички заедници како водечки ентитет кој се бори за свој национален опстанок на денешната светска мапа. За жал сиромаштијата која владее во Македонија е фактор кој ќе биде рак-рана за наше опстојување.

Дали ќе успееме да опстоиме како држава и нација, одговорноста ќе ја имаат челниците во државата.

Доколку ЕУ продолжи со ваквиот понижувачки однос кон нас, ќе треба да бараме алтернатива. Дали таквата алтернатива ќе биде можна зависи до кога како мала држава ќе се чувствуваме и бидеме заробени. Единствена гаранција која Македонија ја има за опстанок е нашето членство во НАТО.

За жал историјата памети многу ветувања и спогодби кои биле игнорирани. На крајот од краиштата ваквото черечење на Македонија ќе биде од страна на ЕУ членките: Албанија, Грција и Бугарија, што практично значи НАТО ќе има една членка помалку. Сепак територијата и натаму останува под нејзина контрола.

Драги мои сограѓани, да се разбудиме и да бидеме упорни, нашите челници да обезбедат иднина на државата, иднина на нашите семејства, иднина на нашите потомства. Денеска е грев да се биде Палестинец. Можеби утре ќе биде грев да се биде Македонец.

Address

Partizanski Odredi 70b
Skopje
1000

Website

https://covekotpredse.mk/

Alerts

Be the first to know and let us send you an email when Човекот Пред Сè posts news and promotions. Your email address will not be used for any other purpose, and you can unsubscribe at any time.

Shortcuts

Want your business to be the top-listed Media Company in Skopje?