Човекот Пред Сè

Човекот Пред Сè Contact information, map and directions, contact form, opening hours, services, ratings, photos, videos and announcements from Човекот Пред Сè, News & Media Website, Skopje.

Тимот – креатор на порталот „Човекот пред сè“ е создаден од поединци кои го гледаат светот на ист начин, преку призмата на човекот и неговата моќ!

Идејата за антропоцентрично општество, со човекот како централна фигура е она што ни беше „spiritus movens“ при креирање на овој портал и понатаму е ѕвезда водилка на нашето дејствување. Човекот е основната ќелија на секое општество. За човекот да биде

вистински дел од општеството во кое ќе си ги обезбеди својата иднина и развој, потребни му се квалитетно образование, квалитетна здравствена заштита и секако здрав и чесен разум кој ќе обезбеди иднина токму во земјата од којашто потекнува. Ние граѓаните на Република Македонија имајќи ги прекрасните климатски услови, прекрасните води и планини, каде може да се развијат сите гранки од виталното значење за нашето опстојување, а тоа се земјоделието и сточарството се она на што треба да го темелиме нашиот натамошен развој. Се зависи од нас. Почитувани, ова е личен став на Трифун Костовски.

Преку рубриките на порталот нудиме можност секој да учествува со своите идеи и предлози и секако своето искуство само во интерес за креирање на поубава, просперитетна и безбедна држава. Во поединецот е силата. За прв пат кај нас промовираме концепт на компаративна анализа на поединечни ставови на власта и опозицијата како и нивна добронамерна критика од страна на еден од најуспешните бизнисмени во Македонија – Трифун Костовски.

Како иновативен концепт, нашиот портал содржи рубрика „Луѓе“ каде што секој слободно ќе може да се изрази, да сподели мислења и ставови, предлози, искуства и приказни … Се со една цел – кревање на пиедестал на основната клетка на секое општество – човекот.

Дел од нашето дејствување е и делот наречен „Оштетени од системот“ во кој се споделени реални ситуации, каде што граѓаните биле директно оштетени или не биле заштитени од институциите на државата во Македонија и поради тоа страдале самите тие, нивните бизниси и семејствата.

Заедно со останатите рубрики коишто се посветени на различните видови на образование, култура, историја на влијателни семејства, екологија и други содржини, овој портал е пионер во своето делување!

Основните вредности на кои се темели нашата работа се: чесност, достоинство, слобода на изразување, без говор на омраза, лојалност, љубов кон татковината и сите сограѓани, со посебен акцент на општествена одговорност и филантропија.

Следете не, имаме што да покажеме!

Чорбаџии, итромани и останатиот полусвет Не очекувај да те почи...
17/08/2025

Чорбаџии, итромани и останатиот полусвет

Не очекувај да те почитуваат ако низ животот не научиш да создаваш услови за почит. Па и кога си создал услови, со лична заслуга, не секогаш ќе среќаваш само воспитани луѓе со развиени културни навики, кои ако не знаат да почитуваат, барем нема да навредуваат . Сѐ почесто слушаме за разни кондициони, психолошки тренинзи, мантраење како треба првин себе да се сакаш и почитуваш, за да те сакаат и почитуваат другите. Недоволно е. И не е така буквално. Да, сакај се себеси за да ги сакаш и другите... Или сакај ги луѓето како што се сакаш себеси...Љубовта кон себеси е вродена. Бебето не размислува дали мајка му може да има млеко, мисли на својот нагон за храна. Не ни мисли, бара! Мајката свесно се грижи за себеси, доволно јаде, спие и во мир се грижи за своето чедо. Но понатака, низ процесот на воспитување, колку љубов си вложил во тоа бебе и си го научил да почитува, во таков човек ќе порасне. Толку за примарната, нагонска љубов кон себеси. Останатото е уметност на живеење. Да умееш да создадеш услови за почит и љубов колку што сметаш дека ти се доволни за да знаеш како да возвратиш. И секако, да знаеш кога да ставиш граница, пред да бидеш згазен на сопствениот праг на толеранција, кога туѓи чевли се бришат од тебе како од чергиче. Она убавото, христијанското, библиското начело ,,кој тебе со камен ти него со погача" е возвишена димензија на ретките, божјите луѓе без мрвка суета. Ние обичните, не умееме така, колку и да сакаме, колку и да се стремиме. Првиот миг кога ќе навредиш некого или ќе вратиш на навреда со навреда , истиот миг си обичен, просечен човек со слабости. Мудриот не може да го навредиш со навреди, лаги и манипулации. Сѐ му е јасно, ама не ти кажува, под мудроста му е. Претерана, опсесивна грижа за себеси под парола ,,првин јас па сите други" може да прејде и во други крајности како егоизам, нарцизам. Може и не мора. Здрави односи мајка-дете се база за здраво семејство, а здрави семејства се услов за здраво општество. Во здраво општество се развиваат услови и за љубов и за почит. Првин почит, па љубов. Така се плетат историјата, културата, цивилизацијата... Се преплетуваат со љубов и почит, се распаруваат поради непочитување, се кинат со омраза. Какви услови ќе овозможиш, ќе им дадеш на луѓето можности, така ќе те третираат ( почитуваат). Исто е со државата. Каква услови за водење внатрешна и надворешна политика, таков домашен и меѓународен кредибилитет и респект ќе имаме. Крајно време е да се засакаме и да почнеме да се почитуваме! Ако домашното и институционално воспитување не успеале да воспитуваат здрави генерации, тежок е патот за превоспитување. Но можно е. Особено е можно ако се свртиме кон мајчински доброто читање. Учење преку читањето книги, уживање во квалитетна музика и уметност. Крајно време е да ги засакаме македонските автори како себеси, за да ги почитуваме и другите! Да ја сакаме македонската историја, култура и традиција како што се сакаме себеси, и да ги почитуваме туѓите! Кога доволно би ги познавале, како себеси, невозможно е да не ги почитуваме. Каде нема почит, нема ни љубов. Почетоците на психолошкиот реализам во руската литература се врзуваат со романите на Достоевски, чии разврски имаат хуманистички и христијански пораки. Со должна почит кон генијалното перо на Фјодор, неприкосновен е! Но и во македонската литература, ништо помалку маестрално Ѓорѓи Абаџиев преку психолошкиот роман ,,Пустина", длабоко психолошки ќе го долови пустошот во душите на младите атентатори по нивниот неуспех. Неговите испрекинати интроспекции при градењето сижејни линии на романот, се моќни филосовски фрагменти. Исто толку впечатливо, преку битово-социјалната драма ,,Чорбаџи Теодос", Васил Иљоски ќе проникне во психологијата на карактерите, доловувајќи ликови на надредени и подредени. Ликот на чорбаџи Теодос е прототип на современите мобери, некогаш деспоти, мизантропи, лажни авторитети себеодржливи преку ширење страв и изнудување стравопочит кај подредените и исплашените. Прецизен како часовник чорбаџијата калкулира со луѓето. Ситничари, умислен дека е над сите и во семејството и во општеството, само заради капиталот, стекнат со лихварење. Се богати на туѓа несреќа и манипулира со економска беда на подредените. Шири негативна енергија со своето лично убедување дека ,,стравот лозјето го чува". Сѐ додека не налета на поитар од него, лозарот Арсо, кој итропејовски и без страв ќе му дотера ум на егоистот кој малтретира со ултиматуми, бара беспрекорна послушност и воопшто нема емпатија да сочувствува со луѓето, дури ни со синот и сопругата. Убеден е дека треба да се задоволни што живеат во угледна чорбаџиска куќа задоволени со материјални добра. А кому може да му е добро, кога нема право на слободен избор? Изборот на синот е небитен, битно е само мислењето на таткото, кој веднаш менува став кога ќе се најде во небрано и кога лично тој е засегнат. Од тоа што се плашиш ќе те стаса! Преку комични ефекти, со едноставен стил и народен јазик, Васил Иљоски не бил ни свесен дека овековечил лик на манипулатор, на змија во одело. Чорбаџијата е лик на современите експлоататори кои потчинуваат, прават од луѓето не само физички туку и интелектуални робови. Чорбаџи Теодос е психолошки сложено изграден лик, многу подобро од други скржавци низ литературата, како Сржавецот на Плаут, Евгенија Гранде на Балзак, Кир Јања на Стерие, Дундо Марое на Држиќ! Не умееме да ги препознаваме нашите квалитети, мислејќи дека туѓото е подобро или пак, нашите скржавци се поавтентични... Патем, Васил Иљоски творел во тежок период меѓу двете светски војни, во тегобни услови без никакви привилегии како неговите европски и светски колеги. Вакви ликови на ,,чорбаџии" колку сакаш во нашево секојдневие, само со нови имиња и титули. Недостасуваат ликови како лозарот Арсо, по можност со мудроста на Одисеј, а не на Итар Пејо, кој исто така бил битанга, само од ниските социјални слоеви. Ни требаат во политиката мажи витези и жени хероини за да се справат со чорбаџии, итромани и останатата булумента...

КОЛУМНАПрогласен за виновен и невин обесенПочитувани читатели, изминаа полни 5 години од убиството на Еуостандард банка....
16/08/2025

КОЛУМНА
Прогласен за виновен и невин обесен

Почитувани читатели, изминаа полни 5 години од убиството на Еуостандард банка. Ме убија и мене. Ја барам правдата како Диоген човекот, цели 5 години .

Жално е тоа што, што сѐ повеќе се сомневам дека истата еден ден ќе ја дочекам. Не е само чувство туку факт дека живееме во држава заробена од криминал и корупција .

Во етерот се појавуваат колумни од т.н. Оштетени штедачи на Еуростандард банка кои пишуваат небулози, а официјално не се ни регистрирани како Здружение на оштетени штедачи.

Штедачите на Еуростандард банка се 100% обештетени. Денес нема необештетен штедач од Еуростандард банка, меѓутоа поединци кои се кријат зад овој неофицијален субјект, во јавноста уппрно промовираат лаги.

Очигледно е дека се работи за личности коишто не ги познавам. Можеби и ги познавам, но истите се кријат зад вакви текстови кои имаат цел да го заштитат криминалот и корупцијата кои владеат со нашето секојдневие.

Еуростандард банка е единствена банка во светот, на светско ниво, која не смеела да се носи во стечај. Небулозите за криминалот во Еуростандард банка и натаму раснат без никакви аргументи и докази.

Цели 5 години се чувствувам како невино обесен, токму од својата сакана татковина и од системот во кој што верував. Сакав да верувам .

Полни 5 години се води истрага против мене во Јавното обвинителство. Во изминатите 5 години само еднаш бев повикан на распит, кој повеќе личеше на кафеански муабет отколку трагање по вистината.

Полни 5 години имам замрзнат имот кој не смеам да го отуѓам и стопанисувам.

Системот кој што треба да го реши ова прашање и натаму молчи, бидејќи истиот е заробен од криминогените структури кои владеат со Македонија.

Згора на тоа, ваквите криминогени структури се присутни на социјалните мрежи. Напаѓани сме со моето семејство како криминалци и иницијатори за стечајот на Еуростандард банка. Небулоза до крај. На мојата држава и сограѓаните им имам подарено повеќе десетици милиони евра. Ставен сум во ист кош со останатите криминалци кои денес се симбол за успешност во нашата Македонија.

Невин обесен, но и понатаму осудуван дека сум виновен. За што сум виновен? Дајте ми една, повторувам една замерка за мојата љубов кон саканата татковина, моите пријатели и сограѓани. Љубовта и вербата кон татковина е искористивте за мое уништување.

Ве убедувам дека додека сум физички и ментално здрав , нема да ме убиете. Ќе продолжам со мојата борба, само што ми е мака што не сум во состојба, и јас и многумина како мене, да им понудиме на нашите деца и идни генерации удобен и безбеден живот.

Со вакви криминални потези како што беше стечајот на Еуростандард банка не се гради држава. Се разградува.

Разбудете се мои сограѓани. Не дозволувајте да владее криминалот кој ги ништи сите човечки вредности, стручноста и чесноста на посветените луѓе.

15/08/2025

Цели 5 години се чувствувам како невино обесен, токму од својата сакана татковина и од системот во кој што верував. Сакав да верувам .

Полни 5 години се води истрага против мене во Јавното обвинителство. Во изминатите 5 години само еднаш бев повикан на распит, кој повеќе личеше на кафеански муабет отколку трагање по вистината.

Полни 5 години имам замрзнат имот кој не смеам да го отуѓам и стопанисувам.

Системот кој што треба да го реши ова прашање и натаму молчи, бидејќи истиот е заробен од криминогените структури кои владеат со Македонија.

Ова е извадок од мојата утрешна колумна насловена „Прогласен за виновен и невин обесен“

Збогум, наша македонска Кармен Македонија тагува, нѐ погоди жална вест... Нашата оперска дива и певица ...
13/08/2025

Збогум, наша македонска Кармен

Македонија тагува, нѐ погоди жална вест... Нашата оперска дива и певица од светски ранг, замина на sвезденото небо. Нејзиниот убав лик, како првенка на Македонскиот народен театар, редовен професор на Факултетот за музичка уметност, уметница со исклучително богат оперски репертоар, ќе нѐ грее од вечноста. Нејзините настапи на светските оперски сцени, како наш врвен културен амбасадор, како моќен мецосопран, нѐ прават горди Македонци. Вечна ѝ слава на нашата Кармен и Мадам Батерфлај, Орфеј и Евридика, Пикова дама и Кабаниха, на нашата македонска вечна убавина, една и неповторлива дива, Милка Ефтимова.

Со почит, Трифун Костовски

Цената на македонската незрелостДеновиве во етерот одекнаа информации за промена на имиња на постоечки училишта и нивно ...
12/08/2025

Цената на македонската незрелост

Деновиве во етерот одекнаа информации за промена на имиња на постоечки училишта и нивно преименување со имиња на луѓе коишто работеле против создавањето на македонската држава! Стравувам дека и катадневно се работи и на преименување на имињата на улиците во сите градови и села низ цела Македонија.

Најнапред прашувам, зошто се врши промена на имињата на постоечките училишта, како на пример во општина ,,Гази Баба”, каде основното училиште ,,25 Мај” е преименувано во ,,22 Ноември” - денот на албанската азбука? Многумина како мене 25 Мај е датум кој го доживувавме како Ден на младоста, како аманет од бившата СФРЈ. Штафетата на младоста со сиот младешки ентузијазам носеше елан од Вардар па до Триглав. Се создаваше и ширеше силна социјална и општествена комуникација меѓу младите од тогашните шест сојузни републики и двете автономни покраини. Денес, кај многумина веќе одамна не се почитува таа историја, бидејќи се поврзува со комунистичкиот систем на владеење.

Да, денот беше посветен и на роденденот на Маршал Тито. Тој ден го доживувавме емотивно, со радост, восхит и почит. Беше престиж да се учествува на спектакуларните слетови кои се одржуваа на големите стадиони. Ние младите, ,,омладинци и омладинке” живеевме својот живот, без политичко оптоварување, во безбедна држава со загарантирано бесплатно образование и здравство. Целата бивша СФРЈ ја доживувавме како една држава, а не како сојуз на шест републики и две покраини. Со промената на името на училиштето во општина ,,Гази Баба” се ништи еден минат период, кој што денешните модерни историчари го сметаат за диктаторски. Цели 45 години ,,Денот на младоста” се празнуваше секоја година! Меморија за мирен, спокоен и убав живот, не се брише. Кога ќе споредам каков живот сум имал во бившата СФРЈ како Македонец и како живеам сега, во денешна независна Македонија, ќе ми простите, има драстична разлика во нашиот углед низ светот. Почитта за нас и за мене како Македонец, ја снемува. Се брише. Баш како имињата на улиците. Во некогашна СФРЈ бев почитуван на светско ниво само како Македонец. Денес како Македонци немаме никаква почит во светот, особено од страната на нашите соседи и водечката сила кон која тежнееме, ЕУ. Цела Европска заедница нѐ доживува како питачи и коленичари, кои бараат и изнудуваат помош. Таквиот пристап нема мрвка достоинство, а слабоста ни ја користат нашите соседи кои се трудат од петни жили да нѐ уништат како нација.

Повеќе од очигледно е дека и ние самите си ја ништиме нашата државотворност, стекната во 1945 година. Нашата крвава независност ја стекнавме со положување илјадници жртви за денешната Македонија. Паднатите жртви во Втората светска војна се бореа против фашизмот (таканаречените администратори) кои владееја во Македонија, како ипротив таканаречените домашни колаборационисти кои соработуваа со тогашните фашисти и нивните “администратори”.

Во Општина Студеничани се отвара ново основно училиште. Ќе го носи името на бившиот колаборационист кој во Втората светска војна го подржувал фашизмот и бил соработник со ,,администраторите”. Станува збор за Азем Морани, осуден за дела против создавање на нашата независност. Со ваквиот чин ги понижуваме паднатите борци за независна Македонија! Ги понижуваме и плукаме по нивните имиња и идеали за независна Македонија. Со ваквиот чин покажуваме понизност.

Разбудете се Македонци!

Будењето не значи вербално јакнење на македонскиот национализам со кој поткопуваме немир со останатите етнички заедници со кои што живееме. Будењето е освестување. Избистрување од заспаноста и мамурлукот. Будењето е зајакнување на нашиот национален идентитет на ниво на респект од сите етнички заедници со коишто живееме во Македонија и секаде низ светот . Ако не се почитуваме, не очекувајте дека ќе нѐ почитуваат.

За време на мојот мандат како Градоначалник на Град Скопје од 2005-2009, стигна предлог од тогашната влада предводена од Г-динот Груевски, да го менувам името на Гимназијата ,,Јосип Броз – Тито”. Овој предлог го одбив. Причина за ваквиот став е искуството кое го стекнав живеејќи во Виена полни 20 години. Во Виена, до ден денешен, во епицентарот на градот, стои споменикот на советски војник. Ниту една влада или градоначалници не помислиле да го тргнат или преименуваат грандиозниот споменик.

Нивниот одговор и денеска гласи: ,,ТОА Е НАШАТА ИСТОРИЈА”, наше минато! Советски Сојуз денеска не постои, ама советскиот војник во Виена и понатака постои.

Не треба и не смее да се бега од историјата. Од нејзе треба да учиме како да градиме уште подобро општество за сите граѓани во светот.

Луѓето кои се жртвувале за создавањето на нашата независност се наш света историја. Недозволиво е нивните имиња да се заменат! Во дадениов случај вината за ваквото нешто што ни се случува ја гледам во актуелната влада на РМ.

Вратете ни го името на училиштето ,,25 Мај”! Тој датум е симбол за еден минат, но респектабилен и прогресивен живот.

Разбудете се! Влада на Р.Македонија, дали се слушаме?!

Ви дадовме поддршка да ја водите државата, без право на повторување грешки! Потези кои во основа значат самоуништување на крваво создадената независност, не смеете да дозволите. Цената на незрелоста долгорочно ќе се плаќа...

Изминаа полни 5 години од убиството на Еуростандард банка.Живееме во држава во која виновниците се заштитени и вистината...
12/08/2025

Изминаа полни 5 години од убиството на Еуростандард банка.
Живееме во држава во која виновниците се заштитени и вистината можеби никогаш нема да испадне на виделина.

Жална Македонија.

Слушаш значи постоиш,,Слушалателот е како бабица, го асистира вашето тешко раѓање на зборот" - М.Селимовиќ во романот ,,...
10/08/2025

Слушаш значи постоиш

,,Слушалателот е како бабица, го асистира вашето тешко раѓање на зборот" - М.Селимовиќ во романот ,,Тврдина”. Добар слушател не само што е потенцијално најдобриот соговорник, туку и доктор по трпеливост, најтешката комуникациска вештина, да слушаш некого до крај и да го разбереш. Добриот слушател е добар беседник, знае да ,,купува” дур слуша и да го ,,продаде” како своја лична интерпретација. Добриот слушател е како добар читател, внимателно ги памети најбитните реченици и ги чува како драгоцен духовен капитал во своето скапоцено ,,ковчеже” со мудрости. Додека разговараме со луѓето, неумесно е да се наметнуваме со своите лични ,,фалоспеви” во стилот ,,јас па јас и само јас”, туку да ги оставиме и другите да кажат по нешто. Тоа е основа на секоја здрава комуникација, време и простор за заемен разговор. Човекот тежнее кон потребата за допадливост, но никако не е допадливо да се наметнуваш во разговорот, па нека си најпаметниот на свет. Обично, токму тие мудрите мудро молчат, додека другите зборуваат без да се слушаат, за на крајот со малку да кажат многу. Тоа е секому допадливо. Човекова исконска потреба е да се допадне некому. Да им биде допадлив на луѓето. Затоа внимава на својот изглед и израз при јавната комуникација. Но вистинскиот изглед и израз на секој човек е далеку од очите на јавноста. Ти не си ти пред јавноста, туку кога си сам со себеси, со своите слабости и стравови. Најреалното огледало на човекот е во неговата мака, кога е под стрес, под напон, нервозен и исфрлен од такт. Во маката ни е вистинското лице без маски, што би рекол Његош ,,На мака јунак се познава”!

И не случајно во праисторијата луѓето се кителе! Не само да обележат племенска припадност или хиерархија, предизвикаат страв или симболика, туку да привлечат внимание и восхит, да се допаднат. Секако, времето си носи свои различни естетски критериуми за допадливост и убавина. За вкусовите да не говориме, особено не сега, во ерата на естетската вештачка машинерија.

Легитимна и природна е човековата желба за допадливост. Но преголемата потреба и желба да оставиме добар впечаток, да ни е премногу важно што мислат или што ќе кажат другите за нас, може да направат контра ефект. Ако во позадина на желбата за допадливост, не е само потребата за прифаќање во новиот круг на потенцијални пријатели или друштво (природно е да сакаме да сме културни и дадеме позитивна слика за себе), туку е оптовареноста со натпреварувачки амбиции за себепромоција и докажување колку сме успешни, колку сме почитувани, посакувани, колку сме имотни, со каков материјален капитал располагаме и сл. веќе не е ниту искреност, ниту спонтаност, ниту едноставност. Едноставно, може да биде нарцисоидна карактеристика и потреба за глорификација. Нарцисите се социјални камелеони, менуваат бои според потребите за да дојдат до целта. А целта им е да бидат во центар на внимание, видени, допадливи и глорифицирани. Апсолутна успешност, умешност, убавина и знаење се апсолутно невозможни. Успехот е релативен исто колку и убавината. Може да научиме многу стихови, цитати или добри вицеви, ама да не научиме нивна добра интерпретација, стравувајќи дека нема да оставиме добар впечаток. Тој страв прави тензичност во комуникацијата и води во крајност. Или стануваме навалентни , дури и агресивни во убедувањето на околината во нашето неприкосновено знаење, или се затвораме во социјална анксиозност. Интерпретација се учи со слушање. Кого го слушаш и од кого учиш е твој избор по основ на допадливост. Ти си тоа што ти се допаѓа.

Многу е тешко долго време да се глуми допадливост преку наменска или селективна добрина, висок морал, великодушност, духовитост, информираност, сестраност, а притоа да се остане спонтан и ненаметлив. Патетично е да почнеме дружење или пак романтична врска само за да восхитиме некого, за да нѐ засака и прифати со лажната лична карта зад која стои интерес без љубов и почит. Потребата постојано да воодушевуваме и да се покажуваме во најдобро светло може да бидат мимикрија на несигурност и страв, за површноста да не излезе на површина. Не може и не треба да сме најдобри во сѐ, да знаеме сѐ. Сократ знаел дека ништо не знае и останал философски колос до ден денешен.

Човек треба да се научи да прифати критика во четири очи, кога нѐ критикуваат или советуваат спротивно од нашите ставови, но добронамерно. Секоја јавна критика изложена на Фб ветриштата може да се смета за атак. Во очи може да биде добронамерна, но во јавност е навредливо. Вулгарна јавна критика по туѓ грб е одраз на лична слабост и фрустрација

Луѓето кои не умеат да создадат близок и спонтан однос во својата непосредна околината, остануваат неприфатени и неразбрани. Често немаат разбирање од комуникативните луѓе, а најважното во социјалниот живот е да те разберат.

Вашите деца не мора и не треба во сѐ да се најдобри. Доволно е да се здрави и задоволни. Ако претерано му ,,дишете во врат” на детето, тоа ќе биде несигурно за самостојно да почне слободно да дише. Ќе биде несигурен за своите постапки и одлуки. Постојано ќе зависи од ваше или туѓо мислење. Зависноста не е слобода. Не можеме да сакаме некого од кого сме зависни во било кој поглед. Дури и нашето расположение да зависи од тоа како нѐ гледаат. Ние можеме од страв да слушаме, да почитуваме, да се подредуваме и стравуваме. Но тоа не е љубов, тоа е стравопочит. Така се создаваат трајни бариери за спонтаност, комуникација и дружељубивост. Кога ќе научите да бидете добар слушател и да ја разберете тишината на личноста која ви значи, ќе станете и добар соговорник и добар говорник. А добриот говорник може во сѐ да ве убеди...

Мега БугаријаБугарија е евидентирана како држава од дамнешни времиња. Во својата историја честопати била под ропство губ...
07/08/2025

Мега Бугарија

Бугарија е евидентирана како држава од дамнешни времиња. Во својата историја честопати била под ропство губејќи ја својата независност. Денес е модерна држава со независен статус. Сепак, историјата и минатото се сѐ уште активни во бугарскиот политички врв, каде може да се забележи упорно настојување за правење притисок врз одредени територии каде што некогаш владееле. Имаат агресивна желба да ги вратат под своја контрола. Границите на сите балкански држави се непроменливи. Очигледно, ваквиот статус на постоечки граници е неприфатлив за денешниот политички врв на Бугарија. Идејата за голема Бугарија и денес е присутна во официјалната политика на Бугарија.

Моја лична перцепција е дека Бугарија има територијални аспирации кон сите свои соседи. Претензиите за нејзините територијални апетити кон Турција, Грција и Романија се ограничени, бидејќи се работи за силни држави, патем членки на ЕУ и НАТО, Молкот кон Турција е разбирлив, затоа што Турција е силна економско-воена сила и секаков предизвик може да биде кобен по самата Бугарија. Македонија и Србија не се членки на ЕУ, но за разлика од Србија, Македонија е членка на војниот сојуз НАТО.

Македонија, како кревка држава кои цели 35 години стои пред портите на ЕУ, се доживува како вештачка држава од страна на нашите соседи Бугарија и Грција.

Мојата лична перцепција се должи пред сѐ на перфидноста со која ЕУ заедницата нѐ држи пред нивните порти цели 35 години, без да покаже вистински интерес за нашето македонско членство во оваа заедница. Перфидноста на ЕУ заедницата кон Македонија ја гледам и преку Францускиот предлог за признавање на Бугарите во уставот на нашата земја. На овој начин ЕУ заедницата директно влегува во билатералните односи помеѓу Македонија и Бугарија, подржувајќи ја, или поточно бранејќи го барањето на Бугарија во уставот на Република Македонија да влезат евидентирани 3500 Бугари.

Во Францускиот предлог воопшто не се споменуваат Македонците кои што се денес жители на соседна Бугарија кои немаат право да се изјаснат како Македонци.

Зошто Францускиот предлог не ја обврза соседна Бугарија да го промени уставот во кој би влегле, покрај Бугарите и останатите етнички заедници како што се Македонци, Турци, Грци, Срби, Романци и други. Хипокризијата на ЕУ се гледа токму во овој чин на фаќање една страна во билатералниот однос помеѓу две независни држави.

Ваквиот однос на ЕУ заедницата само ги отвора мегаломанските апетити на соседна Бугарија, за нејзино територијално проширување вон нејзините граници, кон земји како што се Македонија и Србија, држави без европски статус и во фаза на преговори.

Отворено прашувам, зошто Бугарија не нуди пасоши на таканаречените Бугари во северна Добруѓа, денеска дел од Романија, денешна Тракија во Грција и европскиот дел на Турција, туку пасошите ги нуди во Македонија и јужниот дел на Србија? Замислете за добивање на бугарски пасош мора да се изјасните дека имате бугарско потекло! Перфидноста на ваквата бугарска политика, која се практикува полни 30 години, сѐ повеќе зајакнува по нејзиното влегување во Европската заедница. Бугарија сѐ уште го негува историскиот мотив за голема Бугарија. Тенденциозно го кочи отпочнувањето на преговори на Македонија за влез во ЕУ, директно казнувајќи нѐ нас Македонците, коишто сакаме да си останеме Македонци.

Деновиве се појави во етерот филмувана серија за така наречената српска шарена револуција која сѐ уште е активна во Србија. Оваа ,,револуција” ѝ нанесува на соседна Србија нестабилност, економски пад во стопанството и намалување на странските инвестиции во земјата.

Во првата епизода од овој серијал се спомнаа учесници на странските служби кои директно учествувале во поддржувањето на овој немир. Овие информации се добиени од сигурни светски извори. Замислете, на челно место се агентите од соседна Бугарија. Секој човек ќе се праша, што бараат агенти од мала држава кај своите соседи! Според моето сознание доаѓам до заклучок, дека Бугарија има територијални претензии и кон јужниот дел на Србија, во регионот на градовите Пирот, Бор и Ниш. Не можам да им ја разберам воздржаноста, без апетити кон некогашните нивни територии во денешна Романија, Турција и Грција? Стрвни се само за Македонија и Србија.

Ваквиот однос на соседна Бугарија неминовно ќе го дестабилизира Балканот.

Вината не ја гледам во бугарскиот политички врв. Тие не можат да се ослободат од желбата за создавање на голема Бугарија. Вината ја гледам во ЕУ заедницата која молчеливо ги потхранува Бугарите во нивните територијални апетити.

Разбудете се големи велесили во светот! Првенствено САД, ЕУ, Велика Британија, Русија и Кина. Зарем не ви се доволни воените жаришта во Украина и Палестина? Жариштата веќе можат да го урнат светот во невидена катастрофа. Не дозволувајте и на Балканот да се создадат нови воени конфликти кои уште повеќе ќе го поткопаат светскиот мир. Замолчете ја бугарската држава. Укажете ѝ дека е крајно време да ги заборави територијални апетити и соништа за Голема Бугарија.

Рани куче да те лаеВо последниве неколку месеци екс премиерот на Република Македонија Љубчо Георгиевски често е присутен...
04/08/2025

Рани куче да те лае

Во последниве неколку месеци екс премиерот на Република Македонија Љубчо Георгиевски често е присутен со своите ставови по социјалните мрежи, портали и поткасти кои директно задираат во националното чувство на нас Македонците.

Најпровокативниот вербален атак врз нас Македонците се неговите ставови дека ние сѐ уште се чувствуваме како Југословени дозволувајќи србизмот како идеологија, па и србизмите како непотребни ,,упадици” во нашиот говор, владеат во Македонија и со нас Македонците.

Ваквиот приод го прифаќам за обичниот мој сограѓанин како негов личен став за кој што можам да спорам или да го оставам да си живее во својот свет. Почитувани мои сограѓани, се работи за бивш премиер кои владееше во нашата држава полни четири години. Денес, покрај тоа што е лидер на сопствена партија и познат бизнисмен, од петни жили се обидува јавно да интерпретира историските факти, иако не е историчар. Упорно тврди и сака да докаже дека ние Македонците сме поводлив и лесно поткуплив народ. Дури не сум сигурен дека и во мене гледа Македонец. Замислете, изјавува дека денес нас Македонците нѐ купуваат Србите! Каква небулоза. Тој човек бил на власт, владеел и со мене и со моите сограѓани, но како да не нѐ запознал доволно. Иронија е што неговиот образовен процес, школувањето на премиерот Љупчо Георгијевски беше финансирано од тогашната Социјалистичка Република Македонија како дел од тогашната СФРЈ. Бесплатно школување.

И јас сум дете на истиот тој систем кој ни овозможи да имаме многу подостоинствен живот во таа СФРЈ отколку што имаме денес, во така наречената независна Северна Република Македонија. За жал, тоа е вистината. На екс премиерот треба да му е јасно дека ние Македонците, за времето на Балканските војни на почетокот на минатиот век, во бившата СХС во периодот меѓу двете светски војни, бевме третирани како Срби, Бугари или Грци. Нашите Македонци со исламска вероисповед беа третирани како Турци или Албанци. Заедничкиот живот во бившата СФРЈ вроди со плод да сите бивши Ју републики вклучително и Србија разберат дека македонската национална посебност е реална. Денес од страната на сите бивши Ју републики немаме никаков проблем околу прашањето за нашиот македонски идентитет. Причина за вакво разбирање и прифаќање е токму во заедничкиот живот полни 45 години во една држава каде што сите републики беа рамноправни.

Сакам да му укажам на господинот екс премиер дека, доколку Македонија била исто така функционална со рамноправен статус во заедница со Бугарија, Грција и Албанија во релативно подолг период, проблемот кој го имаме денеска како Македонци ќе беше минато. Во такви заедници многу подлабоко ќе се запознававме меѓусебно на сите можни полиња. Со такво реципроцитетно запознавање ќе раснеше меѓусебната почит на сите национални заедници и денес ќе бевме признаени како посебна нација со сопствен јазик, литература, култура и историја.

За жал, до завршувањето на Втората светска војна ние Македонците немавме рамноправен статус ниту во тогашна СХС, ниту во Бугарија, Грција па и Албанија.

Екс премиерот Љупчо Георгијевски е човек со минимум двојно државјанство, и бугарско и македонско. Би било многу чесно од негова страна да се изјасни да ли се чувствува како Македонец или како Бугарин. Јасно е дека за добивање бугарско државјанство и пасош треба да се потпишеш во барањето дека се чувствуваш како Бугарин. Ваквиот начин, поточно условување за давање државјанство на страни лица вон Бугарија, е многу редок случај во светот. Во Бугарија барателот мора да се изјасни и потпише дека се чувствува како Бугарин.

Господине екс премиер престанете со Вашите небулозни и лични перцепции за нас Македонците. Очигледно немате ништо вградено во себе како човек кој што ја познава нашата култура, уметност, музика и спорт. Ви пречи што во Македонија се полнат салите со музички концерти на пејачи од бившите Ју републики. Господине Георгијевски, овие концерти ги посетуваат и нашите деца кои се родени после распадот на бившата СФРЈ и таа музика ја чувствуваат како своја. Знаете ли зошто е така? Убеден сум дека тешко ќе разберете, но тоа се случува од причина што генерации на Македонци кои што се родиле и живееле во бившата СФРЈ наследиле нешто што тогаш ги чинело среќни и таа среќа ја пренесуваат на своите поколенија. Младите генерации често и ни завидуваат на нас повозрасните дека сме живееле во вистинска правна држава со сите квалитетни и морални начела. Се создаваше музика која нѐ спојуваше сите бивши Ју републики и многумина ја чувствуваат како вториот јазик на сите бивши Ју републики. Јазикот на музиката нѐ обединува. Секако, зборувам за квалитетна музика од времето на СФРЈ. Дали ова можете да го разберете? Денес живееме во нефункционална држава речиси на сите полиња. Владеат криминалот и корупција вгнездени во секоја пора од системот. Не фрлајте камења по бившите трајни вредности наследени од СФРЈ, сите ние излеговме на прав пат токму од тој систем. Македонскиот народ е исклучително музикален, не случајно се вели во Србија немој да играш, во Босна да пееш, а во Македонија ни да играш ни да пееш затоа што ќе те натпеат и надиграат... Впрочем, ние немаме никаква конкуренција кога ни доаѓаат музичари од соседството. Само може да видиме колку сме добри.

*Извор: Георгиевски за „Лајм“: „Југословенството“ или „Српството“ денеска е уште по силно од деведесеттите години
https://libertas.mk/georgievski-za-la-m-ugoslovenstvoto-ili-srpstvoto-deneska-e-ushte-po-silno-od-devedesettite-godini/

Address

Skopje

Website

Alerts

Be the first to know and let us send you an email when Човекот Пред Сè posts news and promotions. Your email address will not be used for any other purpose, and you can unsubscribe at any time.

Shortcuts

Share

Category