26/06/2025
Më 23 qershor 2020, u nda nga jeta profesori Irijan Mamuti; i lehtë i qoftë trualli ku ai do të prehet në amshim.
RA EDHE NJË YLL, POR NUK U SHUA! 🇦🇱
I lindur më 05.10.1948, në fshatin Kalisht të Gostivarit. Mësimet e para i morri në fshatin e lindjes, në Kalisht, ciklin e dytë të fillores e vazhdoi në Negotinë dhe shkollën e mesme e kreu në Tetovë.
Dëshira për dije dhe përparim ishte e madhe tek ai, nuk e zmbrapsën asnjëherë të vetme sfidat e jetës. I pati vazhduar studimet për Gjuhë shqipe dhe letërsi në Universitetin e Shkupit.
Me të kryer studime, kthehet në fshatin e lindjes dhe punon si mësues i gjuhës në shkollën e fshatit. Kontributi i tij, si mësues, ka qenë përkushtim pa hezitim për të edukuar dhe për të udhëzuar brezat drejt shtigjeve të dijes e emancipimit. Gjatë kohës që punoi si mësues në vendlindje, qe përkushtuar edhe në fushën e folklorit dhe të traditës etnike të kësaj zone. Arriti të grumbullojë vargjet e këngëve më të bukura të filklorit dhe, më pas, një pjesë të mirë të tyre e interpretoi para auditorimut të asaj kohe, ku morri pjesë edhe në Shoqërinë Kulturore-Artistike "Besa" të Gostivarit, u dallua për origjinalitet në interpretim të gurrës së folklorit.
Më vonë kalon me banim në fshatin Debresh të Gostivarit, kurse veprimtarinë si mësues i gjuhës e pati vazhduar në shkollën e Vrapçishtit. Pas disa viteve punë në këtë shkollë, ku u shqua për aftësi mësimdhënie dhe qëndrimi tejet korrekt për çështjen etnike, nuk e pati të lehtë të ballafaqohej me një mentalitet që nuk ishte në gjendje të dallonte përkatësinë etnike nga ajo religjioze.
Pas ca viteve punë e përkushtim në Shkollën e Vrapçishtit, kaloi në Shkollën e Mesme Teknike të qytetit të Gostivarit. Në këtë shkollë u shqua për aftësi mësimdhënie, si profesor i Gjuhës shqipe dhe letërsisë, për afinitete në organizimin e aktiviteteve për përshenjimin e manifestimeve të karakterit etnik në nivel të rrethinës dhe më gjerë. Në këtë shkollë punoi derisa u pensionua.
Me dinjitet dhe respekt do ta përkujtojnë familja dhe brezat të cilët ai i mësoi dhe edukoi.
I lehtë të qoftë trualli, profesor!
Krijuesi i gjithësisë, Hyjnori, të shpërbleftë me dritën e parajsës. Kështu u bëftë!🇦🇱👇
Mel Ylliriani🇦🇱👇
