23/03/2025
ဒီတစ်ခေါက်
တိုင်းပြည် အေးချမ်းသွားရင်
ရွှေပေါ် ရွှေချင်းထပ်နေတဲ့ ဘယ်ဘုရား ကိုမှ
ရွှေထပ် မကပ်တော့ဖို့ ဆုံးဖြတ်ထား သလို
နောက်ဆုံးပေါ် ကားကြီးနဲ့ ရောက်ချ လာပြီး
သိန်း ရာချီတန်တဲ့ တရားတော်ကြီးကို ဟောကြားပြသ
သိမ်းဆည်း ပြန်ကြွသွားတော်မူ သွားတဲ့
ဘယ်ကိုယ်တော်ရဲ့ တရားပွဲကိုမှလဲ
သိန်းချီပြီး အလှူငွေ မထဲ့တော့ဘူး
ရွှေကျောင်းပြောင်ပြောင် ဝမ်းခေါင်ခေါင်
အဖြစ် မခံတော့ဘူး
တကယ် လိုအပ်နေတဲ့
တိုင်းရင်းသားတွေဆီ အရောက် သွားလှူမယ်
ပညာ မသင်ခဲ့ရတဲ့ ခလေးတွေအတွက်
စာတက်ဖို့ ကူညီမယ်.
နိဗ္ဗာန် နဲ့ မြှောက်လိုက် ငရဲ နဲ့ ခြောက်လိုက်
လုပ်စားနေကြတဲ့ အတုယောင် ဘာသာရေး
ဂျင်းတွေ ကိုယ့်မျိုးဆက် တစ်ခုမှာ အပြတ်
ဖြတ်ပစ်ရမယ်.
သူခိုး အားပေးဘာသာ လူသတ်သမား အားပေးဘာသာ ဝင်,မဖြစ်ဖို့ ကိုယ်ကျင့်တရား သည်သာ အဓိက
အမှန်တရား နဲ့ စာနာ နားလည်တဲ့ လက်တစုံ
ရှိဖို့ လိုတယ်ဆိုတာ သိခွင့် ရခဲ့ပြီ
အမှန်တရားသိဖို့ တအားနောက်ကြခဲ့ ပြီးပြီ
အဓမ္မ နဲ့ ဓမ္မကို ကောင်းကောင်းကြီး ခွဲခြား,ပရစေတော့
မီတာခ စျေးတက်တော့ အသံထွက်ပြီး
လူသတ်မှ အသံတိတ်နေတဲ့
အသေဝနာ စ ဗာလာနံ " ပါဏာတိပါတာ ပါးစပ်ကမချသော အယောင်ဆောင်တွေနဲ့ ဒီဘဝ ဒီမျှသာ.
