Miao Shan

10/10/2024

06/10/2024

ဗလငါးတန်ဖွံ့ဖြိုးဖို့ စာကြည့်တိုက်သို့ သွားကြစို့

မင်းသုတ(တပ်ကုန်း)

လူသားမျိုးနွယ်အဖြစ် ပေါက်ဖွားလာသည်နှင့် တစ်ဦးတစ်ယောက်တည်းနေ၍ မရပေ။ လူ့ပတ်ဝန်းကျင်နှင့် လူ့အဖွဲ့အစည်း၊ အသင်းအဖွဲ့နှင့်ပင် နေရမည်သာ။ အိမ်တစ်အိမ်၊ မိသားစုတစ်စုမှသည် အိမ်နီးချင်းများနှင့် ထိတွေ့ဆက်ဆံလာရပေသည်။ ထိုမှတစ်ဆင့် ရွာချင်း၊ မြို့ချင်း၊ ပြည်နယ်နှင့် တိုင်းဒေသကြီးအချင်းအချင်း ကူးလူးဆက်သွယ်သွားလာနေထိုင်ကြရပေသည်။ ထို့နည်းတူစွာ နိုင်ငံတစ်နိုင်ငံဖြစ်တည်လာလျှင် ပတ်ဝန်းကျင်အိမ်နီးချင်း နိုင်ငံများ၊ ကမ္ဘာ့ဒေသအသီးသီးရှိ နိုင်ငံများနှင့် နိုင်ငံရေး၊ စစ်ရေး၊ စီးပွားရေး၊ လူမှုရေး၊ ကျန်းမာရေး၊ ပညာရေး၊ နိုင်ငံတကာဆက်ဆံရေးစသဖြင့် ကဏ္ဍ အသီးသီး ပူးပေါင်းဆောင်ရွက်လာကြသည်။ ကမ္ဘာကြီးသည် ရွာတစ်ရွာပင်ဖြစ်လာခဲ့သည်။ ထိုရွာကြီး၌ မှီတင်နေထိုင်ကြကုန်သော လူသားတိုင်းသည်လည်း ဗလငါးတန်တည်းဟူသော ကာယဗလ၊ ဘောဂ​ဗလ၊ စာရိတ္တဗလ၊ မိတ္တဗလ၊ ဉာဏဗလများသည်က မရှိမဖြစ် ပြည့်စုံကြရန် လိုအပ်လှပေသည်။

“အာရောဂျံ၊ ပရမံ၊ လာဘံ” ကျန်းမာခြင်းသည် လာဘ်တစ်ပါး ဆိုသည့်အတိုင်း ကျန်းမာသန်စွမ်းသော လူတစ်ယောက်ဖြစ်ရန် အရေးကြီးလှပါသည်။ ကျန်းမာရန် ကိုယ်ကာယလေ့ကျင့်ခန်းများ နေ့စဉ်ပုံမှန်ဆောင်ရွက်သင့်ပါသည်။ ဆောင်းရာသီ အေးစိမ့်သော ဒီဇင်ဘာလတွင် လူထုစုပေါင်းလမ်းလျှောက်ပွဲများ ကျင်းပလျက်ရှိကြပေသည်။ ထိုလတွင်သာ ပြုလုပ်ခြင်းမျိုးမဟုတ်ဘဲ နှစ်စဉ်၊ လစဉ်၊ နေ့စဉ်ပြုလုပ်သင့်ပါသည်။ နံနက်စောစော အိပ်ယာထ အပြေးတက်ခြင်း၊ လမ်းလျှောက်ခြင်း၊ စက်ဘီးစီးခြင်း၊ အိမ်တွင်းကိုယ်ကာယကြံ့ခိုင်ရေး လေ့ကျင့်ခန်းများ ဆောင်ရွက်သင့်ပါသည်။ ကြိုတင်ကာကွယ်ခြင်းသည် ကုသခြင်းထက်ပိုကောင်းသည်ဆိုသည့်စကားအတိုင်းမဖြစ်ခင်က ကြိုတင်ကာကွယ်သင့်ပေသည်။

သာသနာတော်ထွန်းကားပြန့်ပွားရေးဦးစီးဌာနက ထုတ်ဝေသည့် “ဗုဒ္ဓဘာသာကောင်းတစ်ယောက်” စာအုပ်တွင် ဆရာတော်ဦးဗုဗ်က “သေစာသောက်စား၊ လမ်းသွားခါမဲ့၊ ရှုငဲ့သဘင်၊ ပျော်ရွှင်အန်လောင်း၊ မကောင်းမိတ်ဖျင်း၊ ပျင်းရိခြင်းကား၊ ယိုယွင်းဥစ္စာ ပျက်ကြောင်းတည်း”ဟု စည်းစိမ်ပျက်ရခြင်းအကြောင်း ခြောက်ပါးကို ရေးသားထားသည်။ ၎င်းစာအုပ်သည် ဗုဒ္ဓဘာသာဝင်တိုင်း အိမ်တိုင်း၊ မိသားစုတိုင်း၌ ရှိသင့်သည့် စာအုပ်တစ်အုပ်ပင်ဖြစ်ပါသည်။ ငွေကြေးပစ္စည်းဥစ္စာဆိုရာ၌ ရွှေငွေရတနာတွင်းထွက်ပစ္စည်းများ၊ ကောက်ပဲသီးနှံ၊ လယ်ယာစပါးစသည့် ပစ္စည်းဥစ္စာများပင် မဟုတ်ပါလော။ မိသားစုစားဝတ်နေရေးအတွက် အလုပ်လုပ်ရပေမည်။ အလုပ်လုပ်မှ ငွေရမည်။ အလုပ်လုပ်မှ ကောက်ပဲသီးနှံများ၊ ဆန်၊ ရေ၊ စပါး ပေါကြွယ်ဝမည်။ ​အခြေခံလူတန်းစားများဖြစ်သည့် အလုပ်သမားများ၊ ဆိုက်ကားသမားများ၊ ဆိုင်ကယ်ကယ်ရီများ၊ တက္ကစီများသည်ပင် သမုဒ္ဒရာဝမ်းတစ်ထွာအတွက် နေ့စဉ်ကြိုးစားရုန်းကန်နေရသည်။ နိုင်ငံ့ဝန်ထမ်းကျောင်းဆရာ ဆရာမများ၊ အမှုထမ်းအရာထမ်းများ၊ လုပ်ငန်းရှင်များ၊ အသိပညာရှင်၊ အတတ်ပညာရှင်များသည်ပင် ကိုယ့်တာဝန် ကိုယ်ထမ်း ကျေပွန်စွာထမ်းဆောင်နေကြရသည်။ မိမိ၏စားဝတ်နေရေးအဆင်ပြေအောင် နိုင်ရာဝန်ကိုထမ်း အလုပ်လုပ်နေကြရသည်သာ။

လူနေမှုအဆင့်အတန်းမြင့်မားလာသည်နှင့် ဆင်းရဲမွဲတေမှု၊ အလုပ်အကိုင်ရှားပါးမှုပြဿနာများ၊ ခိုးဆိုးလုနှိုက်များ ပပျောက်လာမည်။ ထိုမှတစ်ဆင့် နိုင်ငံအတွင်းရှိ လူတစ်ဦးချင်းသည်လည်း အကျင့်စာရိတ္တကောင်းမွန်သူများ ဖြစ်လာပေမည်။ မြန်မာနိုင်ငံတွင် ဗုဒ္ဓဘာသာကိုးကွယ်သူအများဆုံးနေထိုင်ကြသည်။ “ထီးနဲ့ ဖိနပ်မပါ နွေအခါမှသိ၊ ဒါနနဲ့ သီလမပါ သေခါမှ သိမည်”ဆိုသည့်အတိုင်း သီလတောင့်မှ ဝမ်းတောင့်နိုင်ပေမည်။

“လူမှာအဝတ်၊ တောင်းမှာအကွပ်”ဆိုသလို တောင်းမှာ အကွပ်မပါက ပျက်စီးမှုမြန်သည်။ လူမှာ သီလနှင့်တူသော အကျင့်စာရိတ္တ အဝတ်မပါက ပတ်ဝန်းကျင်၌ မသင့်တော်ပေ။ ထို့ကြောင့် စီးပွားရေးလုပ်သည့်အခါ သီလမဂ္ဂင်သုံးပါးဖြစ်သည့် သမ္မာဝါစာ၊ သမ္မာကမ္မန္တနှင့် သမ္မာအာဇီဝ မှန်ကန်သောစကားကို ပြောဆိုခြင်း၊ လိမ်လည်မပြောဆိုခြင်း၊ ကောင်းစွာအလုပ်လုပ်ကိုင်ဆောင်ရွက်ခြင်းနှင့် ကောင်းစွာအသက်မွေးဝမ်းကျောင်းခြင်းတို့သည် အလွန်အရေးကြီးလှသည်။

“အနဝဇ္ဇာနိ ကမ္မာနိ၊ ဧတံ မင်္ဂလ မုတ္တမံ” အကုသိုလ်ကင်းသောအလုပ်ကို လုပ်ခြင်းသည် မြတ်သောမင်္ဂလာဖြစ်၏လို့ ဘုရားဟောကြားခဲ့လေသည်။ အကျင့်စာရိတ္တသည် မရှိမဖြစ်လိုအပ်သည်။ စာရိတ္တညံ့ဖျင်းသူအား ပတ်ဝန်းကျင်တွင် မည်သူမျှ အပေါင်းအသင်း မလုပ်ချင်ကြပေ။ သူတစ်ပါးအသက်အား သတ်ဖြတ်သူ၊ သူတစ်ပါးပစ္စည်း ခိုးယူသူ၊ သူတစ်ပါးသားမယားအား ဖျက်ဆီးသူ၊ လိမ်လည်ပြောဆိုသူ၊ နောက်ကွယ်၌ သူတစ်ပါးအကြောင်း ကဲ့ရဲ့သူ၊ အပြစ်တင်တတ်သူနှင့် အရက်သေစာသောက်စားမူးယစ်သူတို့သည်ကား မကြာမီပျက်စီးခြင်းသို့ ရောက်ရလေသည်။ ပတ်ဝန်းကျင်မှ ရှောင်ကြဉ်ခြင်းခံရသောသူသာ ဖြစ်သွားတတ်သည်။ မိမိအား ကူညီရိုင်းပင်းတတ်သူများပင် စွန့်ခွာသွားတတ်ကြသည်။ လူကြီးသူမများနှင့် မိတ်ကောင်း ဆွေကောင်းများ၏ ကူညီစောင့်ရှောက်မှုများနှင့်လည်း ကွေကွင်းသွားရတတ်သည်။ ကြီးပွားတိုးတက် မှုတို့သည်လည်း ဆုတ်ယုတ်ရပေလိမ့်မည်။
သုတရသစာအုပ်ကောင်းများစွာ ရှိကြပါသည်။ ဆရာကြီးပီမိုးနင်း၏ “စိတ်ပညာ”စာအုပ်ကောင်းများသည်လည်း ကျွန်တော့်အတွက် ပြုပြင်စရာများစွာ တွေ့ရှိခဲ့ရပါသည်။ အားလပ်ချိန်တိုင်းကိုင်ခဲ့သည့် ဖုန်းလေး၏နေရာတွင် စာအုပ်များဖြင့် အစားထိုးနိုင်ခဲ့ပါသည်။ အဖေ့စာအုပ်စင်လေးက ကျွန်တော့် အတွက် အကောင်းဆုံးအဖော်မွန် မိတ်ဆွေကောင်းတစ်ဦးဖြစ်ခဲ့ပါသည်။ ငယ်ငယ်က ရိုသေရကောင်းမှန်းမသိဘဲ ဆုတ်ဖြဲခဲ့ဖူးသည့်စာအုပ်များကို ကျွန်တော် ချစ်တတ်ခဲ့ပါသည်။ စာဖတ်ခြင်းဖြင့် ဗဟုသုတများစွာ ရရှိခဲ့ပါသည်။ စိတ်ဖိစီးမှုများ လျော့ကျခဲ့ပါသည်။ မှတ်ဉာဏ်များ တိုးပွားလာခဲ့ပါသည်။ ကျန်းမာရေးဗဟုသုတများစွာ ရရှိခဲ့ပါသည်။ ဘဝနေထိုင်နည်းများကို သိရှိလာခဲ့ပါသည်။ နာကျင်မှု၊ စိတ်ဓာတ်ကျမှု၊ အားငယ်မှုများကို ကုစားပေးနိုင်ခဲ့ပါသည်။ စိတ်ကောင်းစေတနာကောင်းများဖြင့် ကိုယ်ချင်းစာနာတတ်ခဲ့ပါသည်။ ထို့ကြောင့် ကျွန်တော့်သူငယ်ချင်းတွေကိုလည်း အမှာစကားလေးပြောလိုက်ချင်ပါသည်။ “ဗလငါးတန်ဖွံ့ဖြိုးဖို့ စာကြည့်တိုက်သို့ သွားကြစို့။”

https://t.me/myanmarnewspaper/149667

MOI News Application အား အောက်ပါ link တွင် Download ပြုလုပ်နိုင်ပါသည်-

For Andriod
shorturl.at/myABQ

For IOS
https://rb.gy/vgdhqc

Subscribe to Myanmar Newspaper
https://t.me/myanmarnewspaper

Subscribe to The Global New Light of Myanmar
https://t.me/gnlmon

Subscribe to MOI
https://t.me/iprdrnd

25/09/2024

နိိုင်ငံခြား(ပြည်ပ)လေ့လာရေးခရီးသွားဗဟုသုတမှတ်စုအကျဉ်း။
၁။ နိုင်ငံခြားသွားပါ ဒေါသကို စီမံခန့်ခွဲတတ်လာမယ်။
၂။ မိတ်ဆွေနဲ့ ရန်သူကို ခွဲခြားတတ်လာမယ်။
၃။ ကိုယ့်မြေကိုယ့်ရေကို တွယ်တာတတ်လာမယ်။
၄။ ပညာရဲ့ အရေးပါမှုကို ပိုသိလာမယ်။
၅။ ကျန်းမာခြင်းဟာ လာဘ်တစ်ပါးလို့
သဘောပေါက်လာမယ်။
၆။ မတူကွဲပြားမှုတွေကို လက်ခံနိုင်လာမယ်။
၇။ နိုင်ငံကြီးသားစိတ်ဓာတ်ဆိုတဲ့ စကားလုံးကို နားလည်လာမယ်။
၈။ အချိန်ကိုလေးစားတတ်လာမယ်။
၉။ ကိုယ့်အားကိုယ်ကိုး တတ်လာမယ်။
၁၀။ ကိုယ့်ကိုယ်ကို ယုံကြည့်မှု ပိုရှိလာမယ်။
၁၁။ ပတ်ဝန်းကျင် လေ့လာမှုအားပိုကောင်းလာမယ်။
၁၂။ အထီးကျန်ခြင်းကို ခံနိုင်ရည်ရှိလာမယ်။
၁၃။ မြန်မာယဉ်ကျေးမှုကို ပိုတန်ဖိုးထားတတ်လာမယ်။
၁၄။ မြန်မာအစားအစာတွေ ပိုခံတွင်းတွေ့လာမယ်။
၁၅။ သည်းခံခြင်းတရား ကြီးမားလာမယ်။
၁၆။ ဒေါသကို စီမံခန့်ခွဲတတ်လာမယ်။
၁၇။ ပတ်ဝန်းကျင်ကို ရှုမြင်ပုံ ကွဲပြားလာပါလိမ့်မယ်။
၁၈။ အရေးမကြီးတာ နဲ့ အရေးကြီးတာ ခွဲခြားတတ်လာလိမ့်မယ်။
၁၉။ အချိန်ကို စီမံခန့်ခွဲတတ်လာမယ်။
၂၀။. လုပ်အားတန်ဖိုး ချစ်မြတ်နိုးနိုင်းလာလိမ့်မယ်။
၂၁။ အစားအစာကို ခြိုးခြံခြွေတာတတ်လာမယ်။
၂၂။ ငွေကို တန်ဖိုးထားတတ်လာမယ်။
၂၃။ နိုင်ငံခြားသွားပါ ကိုယ့်နိုင်ငံ ရဲ့ မတူကွဲပြားနေတာကို သင့်တွေ့ကြုံသင်ခန်းစားရလာလိမ့်မယ်။

21/09/2024

အလှူရှင်များသို့ တိုက်တွန်းပန်ကြားချက်
**************************************
၂၀၂၄ ခုနှစ် စက်တင်ဘာလ ၁၉ ရက်

၁။ နိုင်ငံအတွင်း လတ်တလောဖြစ်ပွားခဲ့သော ရေကြီးရေလျှံမှုများကြောင့် ယာယီကယ်ဆယ်ရေး စခန်းများတွင် ခေတ္တလာရောက် နေထိုင်နေသူများနှင့် ရေဘေးသင့်ကျေးရွာ၊ ရပ်ကွက်များရှိ မိမိတို့ ၏ နေအိမ်များတွင် နေထိုင်လျက်ရှိသည့် ပြည်သူများအတွက် အလှူရှင်များက စေတနာသဒ္ဓါတရား ထက်သန်စွာဖြင့် အစားအသောက်များ လာရောက်လှူဒါန်းနေမှုများအား ဝမ်းမြောက်ဝမ်းသာစွာ တွေ့ရှိရပါသည်။

၂။ သို့ရာတွင် ပတ်ဝန်းကျင်ရာသီဥတု အခြေအနေအရ အလှူရှင်များမှ ပြင်ဆင်ချက်ပြုတ်လာ သော အစားအသောက်များအား ချက်ချင်းစားသုံးခြင်းမပြုဘဲ သိုလှောင်သိမ်းဆည်းထားစဉ် အစာ အဆိပ်သင့်ဖြစ်ပွားစေသော ရောဂါပိုးများ ပေါက်ပွားရှင်သန်စေမှုဖြစ်စေနိုင်ခြင်း၊ စားသုံးရန်မသင့် သည့် အခြေအနေများသို့ ရောက်ရှိစေနိုင်ခြင်းနှင့် အဆိုပါ အစားအသောက်များအား စားသောက်မိပါ က အော့အန်ခြင်း၊ ဝမ်းပျက်ဝမ်းလျှောဖြစ်ခြင်း စသည့်ကျန်းမာရေးဆိုင်ရာ နောက်ဆက်တွဲ ရောဂါများ ဖြစ်ပေါ်နေမှုများကြောင့် ရေဘေးသင့်ပြည်သူများအတွက် ပိုမို ဒုက္ခကြုံတွေ့စေကြောင်း တွေ့ရှိရပါသည်။

၃။ သို့ပါ၍ အလှူရှင်များအနေဖြင့် အစားအသောက်များ လာရောက်လှူဒါန်းရာတွင် ပြင်ဆင် ချက်ပြုတ်ထားသော အစားအစာများဖြင့် လှူဒါန်းခြင်းမျိုး မပြုဘဲ စခန်းများတွင် နေထိုင်သူများအား ပူပူနွေးနွေး ချက်ပြုတ်ကျွေးမွေးနိုင်ရန် ဆန်၊ ဆီ၊ ဆား၊ ပဲ၊ ငါးခြောက်၊ ကြက်ဥ၊ ဘဲဥနှင့် ချက်ပြုတ်ရန် လတ်ဆတ်သော အသား၊ ငါး စသည်တို့ကို ပေးပို့လှူဒါန်းခြင်း၊ ပေးပို့လှူဒါန်းရာတွင် မြို့နယ်အလိုက် မြို့နယ်အုပ်ချုပ်ရေးမှူးရုံးရှိ ကြီးကြပ်ရေးအဖွဲ့၊ စီမံခန့်ခွဲမှု အဖွဲ့များမှတစ်ဆင့်သာ ပေးပို့ လှူဒါန်းခြင်းနှင့် ယာယီကယ်ဆယ်ရေးစခန်းများတွင် တာဝန်ယူဆောင်ရွက်နေကြသော စီမံခန့်ခွဲမှု အဖွဲ့နှင့် ကျန်းမာရေးဝန်ထမ်းများက စခန်းများတွင် လှူဒါန်းကြသော အစားအသောက်များအား ကျန်းမာရေးနှင့် ညီညွတ်စေရန်နှင့် သန့်ရှင်းမှုရှိစေရန် ကြီးကြပ်စစ်ဆေးခြင်းတို့ကို ဆောင်ရွက် ပေးကြပါရန် တိုက်တွန်းနှိုးဆော် ပန်ကြားအပ်ပါသည်။
_
အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲမှုကော်မတီ

20/09/2024

"ကတိစကားတစ်ခွန်းကြောင့် အသက်ပါဆုံရှုံးခဲ့ရတဲ့ တော်ဝင်စုဖုရားမင်းသမီး"

သီပေါမင်းရဲ့ မိဖုရားခေါင်ကြီး စုဖုရားလတ်ဟာ လင်တော်မောင်ကို အလွန်သဝန်တိုပြီး ဘယ်သူနဲ့မှ မမျှဝေနိုင်တာ အားလုံးသိပြီးသား ​ဖြစ်တယ်။အမတော်ရင်း မိုင်းနောင်စုဖုရားကြီး ကိုတောင်မှ တောင်နန်းမတော် ရာထူးကနေ သူ့ဘာသာ အရှက်ရ ဆင်းပြေးအောင် လုပ်ဆောင်ခဲ့သူဖြစ်တယ်။ မိုင်းနောင်စုဖုရားကြီးဟာ ဘုရားတရား အလွန်လုပ်ပြီး စိတ်ဓာတ်ဟာလည်း မင်းတုန်းမင်းတရားနဲ့ အလွန်တူလို့ အေးချမ်းငြိမ်းအေးစွာ နေတတ်သူဖြစ်တယ်။ ညီမဖြစ်သူနဲ့ ပြိုင်ပြီး လင်လုရမှာ အလွန်ရှက်ရွံ့သူဖြစ်တဲ့ အတွက် စုဖုရားလတ်ကို အရှုံးပေးပြီး နန်းမတော်ဆောင်ကနေ သူ့ဘာသာ မယ်တော်ဆင်ဖြူမရှင်အဆောင်ကို ပြန်ပြေးခဲ့ပါတယ်။

ကြားထဲမှာ ဒိုင်းခင်ခင် အပါအဝင် တခြားခင်နှစ်ခင်ကိုပါ မိဖုရားငယ်များအဖြစ် သီပေါမင်းကိုဆက်ဖို့ ကြံစည်လို့ ရနောင်မောင်မောင်တုတ် နဲ့ တောင်သမန်လယ်စား မောင်ဖေငယ်တို့ တစ်စု အသက်နဲ့ကိုယ်အိုးစားကွဲခဲ့တာလည်း အားလုံးသိ​ပြီးသား ဖြစ်တယ်။ ဒီလို မိဖုရားအဖြစ် ဆက်တာမဟုတ်ပဲ မယ်တော်မိဖုရားနှစ်ပါးရဲ့ သားတော်သမီးတော်တွေ ငယ်ရွယ်စဥ်က ပေးခဲ့တဲ့ နှုတ်ကတိစကားကြောင့် အသက်ဆုံးရှုံး အရှက်ကွဲခဲ့ရတဲ့ မင်းသမီးတစ်ပါးရှိပါသေးတယ်။ သူကတော့ မင်းခင်းစုဖုရား ဖြစ်ပါတယ်။

မင်းခင်းမင်းသမီးဟာ မင်းတုန်းမင်းတရားနဲ့ မကွေးမိဖုရားက ဖွားမြင်ခဲ့တဲ့ သမီးတော်ကြီး ဖြစ်ပါတယ်။ သီရိသုရတနာဒေဝီ ဘွဲ့အသနားခံရပြီး မင်းမျိုးမယ်တော်က မွေးဖွားလို့ စုဖုရား တပ်ခေါ်ခံရတဲ့ သမီးတော်ကြီး တစ်ပါးဖြစ်ပါတယ်။ ဒီမင်းသမီးလိုမျိုး စုဖုရားတပ်ခေါ်ရတဲ့ မင်းသမီးများကတော့ အလယ်နန်းဆင်ဖြူမရှင်က မွေးတဲ့ မိုင်းနောင်စုဖုရားကြီး၊မြတောင်စုဖုရားလတ်နဲ့ ရမည်းသင်းစုဖုရားကလေး၊ သီပေါမင်းမယ်တော် လောင်းရှည်မိဖုရားက မွေးတဲ့ ပခန်းကြီးစုဖုရား၊ မိတ္ထီလာစုဖုရား၊ အရပ်သူမိဖုရားကမွေးပေမယ့် မင်းတုန်းမင်း အထူးသဒ္ဒါတော်မူလို့ စုဖုရားတပ်ခေါ်ရတဲ့ ပင်တိုင်စံ စလင်းစုဖုရား နဲ့ မင်းခင်းစုဖုရား ရဲ့ ညီမတော်ရင်း ပြင်စည်စုဖုရားတို့ဖြစ်တယ်။

ဒီနေရာမှာ အနည်းငယ် ရှင်းပြချင်တာက မင်းတုန်းမင်းရဲ့ မိဖုရားကြီး စကြာဒေဝီနဲ့မြောက်နန်းတော်ခင်သဲတို့ဟာ သားသမီး မရတဲ့အတွက်ကြောင့် နန်းတော်ထဲမှာ မယ်တော်တွေရဲ့မျိုးရိုးအရ အဆင့်အတန်း မြင့်တဲ့ မိဖုရားတွေဖြစ်တဲ့ ဆင်ဖြူမရှင်ရဲ့သမီးတော်တွေနဲ့ လောင်းရှည်မိဖုရား၊မကွေးမိဖုရားကမွေးတဲ့ သမီးတော်တွေသာ စုဖုရား တပ်ခေါ်ခံခွင့်ရခဲ့​ပါတယ်။ ကျန်တဲ့မင်းသမီးတွေကိုတော့ အိမ်တော်ပါ တုန်းကပဲမွေးမွေး မယ်တော်ရဲ့ ရာထူး ဘယ်လောက်ကြီးကြီး ထိပ်ခေါင်တင်သာ တပ်ခေါ်ရပါတယ်။ စလင်းစုဖုရား ကတော့ ချွင်းချက်ပေါ့နော်။

မင်းတုန်းမင်းဟာ သူ့ရဲ့ ညီမတော်တွေ ဖြစ်တဲ့ လောင်းရှည်မိဖုရား၊မကွေးမိဖုရားနဲ့စိန်တုံးမိဖုရား တို့ကို နန်းရမိဖုရားကြီး လေးပါးအောက် ဆောင်ရမိဖုရားကြီးလေးပါး အထက်မှာ ထားပြီးမြှောက်စားခဲ့တဲ့
ထူးထူးခြားခြား မင်းတစ်ပါးဖြစ်ပါတယ်။ ရှေ့သမိုင်းမှာအဲ့လို ရာထူးရတဲ့ မိဖုရားတွေ မရှိပါဘူး။ အဲ့တော့ ရာထူးတူတဲ့အပြင် လောင်းရှည်နဲ့မကွေးမိဖုရားဟာ မင်းတုန်းမင်းက မိဖုရား မမြှောက်ခင် ကိုက မင်းသမီးတွေ ဖြစ်ခဲ့​ကြလို့ တခြားသူတွေနဲ့စာရင် အတော်ရင်းနှီးပုံပေါ်ပါတယ်။ နှစ်ယောက်လုံး သားတော်သမီးတော်တွေ ထွန်းကားလာတဲ့အခါ အရွယ်တူ​ ဖြစ်တဲ့ သားတော်သီပေါနဲ့သမီးတော်မင်းခင်းကို အရွယ်ရောက်ရင် ပေးစားမယ်လို့ ကတိစကား ထားခဲ့ကြတယ်။
ဒါပေမယ့် အရွယ်ရောက်တဲ့အခါ သီပေါမင်းက စုဖုရားလတ်နဲ့ ရည်ငံတာက တစ်ကြောင်း၊မင်းခင်းစုဖုရားမယ်တော် မကွေးမိဖုရားဟာ သာမန်အရပ်သူလုပ်ပြီး အပြင်လူနဲ့ နောက်အိမ်ထောင်ပြုသွားတာက တစ်ကြောင်းမို့ ဒီမင်္ဂလာကိစ္စဟာ ဖြစ်မြောက်မလာပါဘူး။

သီပေါမင်း နန်းတက်လာတဲ့ အခါ မင်းခင်းစုဖုရားဟာ အသတ်ခံရတဲ့ အထဲ မပါပဲ နန်းတော်ထဲက သူ့အဆောင်မှာပဲ ဆက်ကျန်နေရစ်ပါတယ်။ စုဖုရားလတ်ဟာ သူ့အမတော်အရင်းကိုတောင် ရအောင်ဖယ်ထုတ်ခဲ့တဲ့အပြင် တခြား မိဖုရားဖြစ်လာနိုင်သူမှန်သမျှကိုလည်း တစ်နည်းနည်းနဲ့ ရှင်းထုတ်တတ်တာ အားလုံးသိပြီးသားဖြစ်တယ်။ မင်းခင်းစုဖုရားဟာ နန်းတော်မှာ မယ်တော်ကလည်း မရှိ ခမည်းတော်ကလည်း မရှိတော့တာမို့ ညှိုးငယ်စွာနေထိုင်ရစဥ်မှာ သူတို့ငယ်စဥ်က ပေးခဲ့တဲ့ မယ်တော်တွေရဲ့ ကတိစကားတွေကြောင့် စုဖုရားလတ်က သူ့ကို မျက်စိစပါးမွှေးစူးလာပါတယ်။

မင်းခင်းမင်းသမီး ဟာ အရွယ်ရောက်နေတဲ့ မင်းသမီး တစ်ပါးဖြစ်တာမို့ ထိမ်းမြားမယ့်အရွယ်မှာ မြောက်သားတော် ရှိရပါတော့မယ်။ ဒါပေမယ့် အရွယ်ရောက်ပြီးသား မင်းသားအများစုက အဲ့အချိန်မှာ နန်းတွင်းလူသတ်ပွဲကြီးထဲ အကုန်ပါသွားလို့ လက်ထပ်ယူစရာ အရွယ်ရောက်မင်းသားဆိုတာ မရှိသလောက် ရှားနေပါတယ်။ အဲ့တော့ ဖြစ်နိုင်စရာက မိဖုရားလည်းအများအပြားမရှိတဲ့ သီပေါမင်းက မိဖုရားအဖြစ် မြှောက်စားရဖို့ရှိပါတယ်။

ဒါတွေကို ကြိုမြင်နေတဲ့ စုဖုရားလတ်ဟာ မင်းခင်းစုဖုရားကို မကွေးမိဖုရားရဲ့ဘကြီးတော်အိမ်က ခိုင်းတဲ့ ငတုဆိုတဲ့ အခိုင်းအစေနဲ့ နန်းတော်ထဲ ဖောက်ပြားပါတယ်လို့ အမည်တပ်ပြီး ချောက်ချပါတယ်။ စာတွေ ၈၀၀ ကျော်တောင် ကူးလူးပြီးတွေ့တယ်လို့ စွပ်စွဲပေမယ့်
တကယ့်အမှန်က အဲ့ငတုဆိုတဲ့ လူက စာတောင်မရေးတတ်ပါဘူး။
မဖြစ်နိုင်တဲ့ လုပ်ကြံဇာတ်မှန်း သိနေကြပေမယ့် စုဖုရားလတ် ဓားအရမ်းထက်နေတဲ့ကာလမို့ ဘယ်သူမှလည်း ဝင်ရောက်မကယ်ဆယ်ရဲပါဘူး။ မြေနိမ့်ရာ လှံစိုက်ခံရစမြဲမို့ မင်းခင်းမင်းသမီးဟာ စုဖုရားလတ် ချောက်ချကြံစည်သမျှ အကုန်ခံရပြီး ထောင်တွင်းအကျဥ်းချထားစဥ် အစီရင်ခံလိုက်ရပါတယ်။ ကျန်တဲ့ မယ်တော်မကွေးမိဖုရားနဲ့ ညီမတော် ပြင်စည်စုဖုရားတို့ဟာလဲ ချီးမြှင့်မြောက်စားခံရဖို့ဝေး အသက်မသေအောင်သာ နေခဲ့ရပါတယ်။ စုဖုရားလတ်ရဲ့ လင်တော်မောင်အပေါ် သဝန်ကြောင်မှုကတော့ တကယ် အံမခန်းပါပဲ။

ကိုးကား
ဦးမောင်မောင်တင် "ကုန်းဘောင်ခေတ် မဟာရာဇဝင်တော်ကြီး"
မောင်သန်းဆွေ(ထားဝယ်) "ကုန်းဘောင်ရှင်းတမ်း"

crd_to_owner MyatMinHtatKyaw
နော်ဂဲလယ်ထူး (စာပေပရဟိတ)

15/09/2024

အရေးပေါ်ပစ္စည်းလေးတွေ စုံပြီလား

15/09/2024

ကိုယ့်ကိုယ်ကို ဘယ်တော့မှ အပြစ်မတင်ပါနဲ့

12/09/2024

ရေကြီးတဲ့အခါ သတိထားရမယ့် အချက်များ

✅ မိုးတွင်းရောက်ပြီဆိုတော့ မိုးများတဲ့အခါ ရေကြီးနိုင်ပါတယ်။ ရေကြီးတာက သဘာဝဘေးပဲ ဖြစ်တာကြောင့် တကယ်တမ်း ကြုံလာပြီဆိုရင် အန္တရာယ်များပါတယ်။ ဒါကြောင့် ကိုယ်နေတဲ့ဒေသမှာ ရေကြီးတဲ့အခါ ဘာတွေသတိထားရမလဲ၊ ဘယ်လိုတွေ ပြင်ဆင်ထားသင့်လဲဆိုတာကို ပြောပြပေးချင်ပါတယ်။

ရေကြီးတဲ့အခါ ကြုံရနိုင်တဲ့ အန္တရာယ်တွေကတော့

🔸ရေနဲ့အတူ မြောပါသွားတာ
ဒါက အန္တရာယ်အများဆုံးပါပဲ။ NOAAရဲ့ အဆိုအရဆိုရင် ၆လက်မလောက်ပဲ နက်ရင်တောင် ရေစီးအရှိန်ပါနေမယ်ဆိုရင် လူကြီးတစ်‌ယောက်လောက်ကို ကောင်းကောင်းကြီး မြောပါစေနိုင်ပါသတဲ့။ ဒါကြောင့် တိမ်တိမ်လေးပဲဆိုပြီး မစွန့်စားပါနဲ့။

🔸အကောင်ကိုက်ခံရနိုင်တာ
ရေနဲ့အတူ မြွေလိုမျိုး အကောင်တွေ ပါလာနိုင်သလို ရေပြန်ကျသွားရင်တောင် ဟိုကြား ဒီကြားမှာ အောင်းနေနိုင်တာကြောင့် ပစ္စည်းတွေ ရှင်းရင်း၊ သန့်ရှင်းရေးလုပ်ရင်း အဆိပ်ရှိ အကောင်တွေ ကိုက်ခံရနိုင်ပါတယ်။

🔸ကျန်းမာရေးပြဿနာ
ရေမသန့်တာကြောင့် ဝမ်းပြဿနာ၊ အရေပြားရောဂါတွေ ဖြစ်နိုင်ပါတယ်။ ဒါ့ပြင် ဓာတုအရည်တွေက ဖိတ်စင်ပြီး လူသုံးရေနဲ့ ရောသွားတာကြောင့် အဆိပ်သင့်တာတွေလည်း ဖြစ်နိုင်ပါတယ်။

🔸မတော်တဆထိခိုက်အန္တရာယ်
မီးကြိုးတွေက ရေထဲကျနေတာကို မသိလိုက်ဘဲ ထိမိတာ၊ မြောလာတဲ့ ပစ္စည်းတွေနဲ့ မတော်တဆ ထိခိုက်မိတာ၊ ပြတ်ရှဒဏ်ရာ၊ ချော်လဲတာ၊ မြောင်းပေါက်ကျွံတာ စတဲ့ မတော်တဆ ထိခိုက်မှုတွေလည်း ဖြစ်နိုင်ပါသေးတယ်။

✅ ဒါကြောင့် ရေကြီးပြီဆိုတာနဲ့ အောက်ပါတို့ကို ကြိုတင်ပြင်ဆင်ထားသင့်ပါတယ်။

🔹ရေမကြီးခင် ပညာရှင် ကြိုတင်သတိပေးတာကို ဂရုစိုက်ပါ။
🔹အိမ်မှာ သောက်ရေ၊ သုံးရေသန့်သန့်ကို ကြိုတင်သိုလှောင်ထားပါ။
🔹အရေးကြီးပစ္စည်းတွေကို ရေမစိုအောင် သိမ်းဆည်းပါ။
🔹အိမ်ပြင်ပမှာရှိပြီး ရေစီးနဲ့အတူ မြောနိုင်တာတွေ၊ ပျက်စီးနိုင်တာတွေကို အိမ်ထဲ သွင်းပါ။
🔹နေရာရွှေ့ပြောင်းရမယ်ဆိုရင် အသင့်ဖြစ်စေဖို့ အရေးကြီး စာရွက်စာတမ်း၊ ဆေးဝါး၊ အဝတ်အစား၊ အခြောက်အခြမ်း၊ ရေနဲ့ တခြားလိုအပ်တဲ့ ပစ္စည်းတွေကို အရေးပေါ် အိတ်ထဲ ထည့်ထားပါ။
🔹ရေကြီးနေချိန်မှာ မိန်းခလုတ်တွေ ချထားပါ။

✅တကယ်လို့ ရေကြီးနေချိန် အပြင်ရောက်နေတယ်ဆိုရင်တော့
🔹ရေမတက်နိုင်တဲ့ အမြင့်တစ်နေရာမှာ ရှောင်နေပါ။
🔹ရေစီးနေတဲ့နေရာတွေ၊ ရေကြီးနေတဲ့နေရာတွေကို ဖြတ်ပြီး မသွားပါနဲ့။
🔹ကားထဲရောက်နေတုန်း ရေကြီးလာတယ်ဆိုရင် ရေမကြီးတဲ့နေရာကို ပြန်လှည့်ပါ။

🔹ရေပြန်ကျသွားပြီဆိုရင်လည်း
အလောတကြီးနဲ့ ဟိုဟိုဒီဒီမကိုင်ပါနဲ့။
🔹အိမ်မှာ အပျက်အစီးတွေ၊ ပြိုကျနိုင်တာတွေကို အရင်စစ်ဆေးပါ။
🔹အိမ်ထဲမှာ ရေကျမှ အိမ်ထဲဝင်ပါ။
🔹အိမ်ထဲဝင်တဲ့အခါ လည်ရှည်ဖိနပ်လိုမျိုး လုံခြုံတာကို စီးပါ။
🔹ပစ္စည်းတွေ၊ ချောင်တွေကို ကိုင်တော့မယ်ဆိုရင် မြွေနဲ့ အခြားသတ္တဝါတွေ ထွက်သွားအောင် အရင်ခြောက်လှန့်ပါ။
🔹ဓာတ်ကြိုးတွေ၊ မီးကြိုးတွေ ပြတ်ကျနေလားဆိုတာ အရင်စစ်ဆေးပါ။ အလျင်စလို မီးမဖွင့်ရပါ။
🔹အိမ်ရဲ့ ရေပိုက်ခေါင်းတွေ၊ ရေရင်းမြစ်တွေကို စစ်ဆေးပါ။ အထူးသဖြင့် တခြားဓာတုအရည်တွေ၊ မိလ္လာတွေ ရောနေလားဆိုတာကို စစ်ဆေးရပါမယ်။
🔹မိလ္လာပိုက် ပေါက်သွားလားဆိုတာလည်း စစ်ဆေးပါ။ မိလ္လာပိုက်ပေါက်နေရင် ရေညစ်ညမ်းနိုင်လို့ပါ။
🔹အစားအသောက်တွေ၊ သောက်သုံးရေတွေက ရေကြီးတဲ့ရေနဲ့ ထိတွေ့ထားရင် အကုန်လွှင့်ပစ် ရပါမယ်။
🔹ရေကျသွားပြီး ရက်ပိုင်းလောက်ထိ သောက်ရေ၊ သုံးရေကို သန့်စင်ပြီးမှ အသုံးပြုရပါမယ်။

✅ရေကြီးတာက သာမန်လည်း ဖြစ်နိုင်သလို သိပ်ဆိုးလွန်းရင် အသက်အန္တရာယ်ထိခိုက်တာတွေ ဖြစ်နိုင်ပါတယ်။ ရေကြီးချိန်မှာ အန္တရာယ်ကင်းစေဖို့ ရေမကြီးခင်တည်းက ကြိုတင်ပြင်ဆင်ရမှာဖြစ်သလို ရေပြန်ကျသွားရင်လည်း သတိကြီးကြီးနဲ့ ပြန်လည်ရှင်းလင်းရပါမယ်။ ဒါမှ ရေကြီးခြင်းကြောင့် ဖြစ်လာတဲ့ နောက်ဆက်တွဲပြဿနာတွေကို ကာကွယ်နိုင်မှာ ဖြစ်ပါတယ်။

Dr Htet Htet Zaw Win

29/08/2024

မင်းလုပ်နိုင်တယ်လို့ ယုံကြည်လိုက်ပါ။
အဲ့ဒါနဲ့တင် မင်း လမ်းတစ်ဝက်ရောက်နေပြီ။

26/08/2024

မျောက်ဥပုသ်
တစ်ခါက မျောက်အုပ်တစ်အုပ်ရဲ့ခေါင်းဆောင် မျောက်ဟာ
သူ့ငယ်သားမျောက်တွေကို စုဝေးစေပြီး ၊တရားဓမ္မ ဟောပြပါသတဲ့။
သူက "ငါ မနေ့က လူတွေနေတဲ့ ရွာက ဘုန်းကြီးကျောင်း
ဘေးက မန်ကျည်းပင်ပေါ်ရောက်ခဲ့တယ်။
ငါမန်ကျည်းသီးစားနေတုန်း ဘုန်းကြီးကျောင်းထဲက
ဘုန်းကြီးရဲ့တရားဟာ ငါ့ကို သတိသံဝေဂ ပေးခဲ့တယ်။
အဲဒီတရားကို မင်းတို့ကိုလည်းငါပြန်ဟောပြမယ်"
လို့ပြောရင်း ဘုန်းကြီးရဲ့ဟန်ပန်အတိုင်း ချောင်းဟန့်
တင်ပျဉ်ခွေထိုင်ပြီး သူကြားခဲ့ရတဲ့တရားကို ပြန်လည်ဟောပြခဲ့ပါသတဲ့..။
အဲဒီလို မျောက်ခေါင်းဆောင်ရဲ့ တရားကို နာပြီးတဲ့နောက်မှာ မျောက်တွေဟာလည်း လူတွေပြုမူပုံ၊ပြုမူနည်းအတိုင်း ဥပုသ်သီလ ဆောက်တည်ကြဖို့
သဘောတူကြပါသတဲ့။
အဲဒီအခါ
မျောက်ခေါင်းဆောင်က ဒီလိုပြောတယ်
"ငါတို့ ဥပုသ်စောင့်တာကတော့ ဟုတ်ပါပြီ
ဒါပေမယ့် ဥပုသ်ထွက်တဲ့အခါ ဗိုက်ဆာပြီး
အားနည်းနေကြမှာပဲ အဲဒီတော့ ဥပုသ်ထွက်တဲ့အခါ
စားဖို့အတွက် အစားအစာကို ကြိုတင်ရှာထားကြ
ရင် ကောင်းမယ်"
အဲဒီအခါ မျောက်တွေဟာ ငယ်ရွယ် သန်မာတဲ့မျောက်တွေကို စေလွှတ်ပြီး အစားအစာ ရှာဖွေစေတယ်။
အစာရှာဖွေတဲ့မျောက်တွေ ပြန်ရောက်လာတဲ့အခါမှာတော့ မှည့်၀င်းမွှေးကြိုင်နေတဲ့ ငှက်ပျောခိုင်တွေ ပါလာကြတယ်။
မျောက်တွေက ငှက်ပျောသီးကိုကြည့်လိုက်တာနဲ့ အရသာရှိပြီး စားလို့ကောင်းမယ်ဆိုတာကို သိနေကြတယ်။
ဥပုသ် စောင့်ဖို့ထက် ဥပုသ်ထွက်တဲ့အခါ ငှက်ပျောသီး စားဖို့ကို ပိုပြီး စိတ်ထက်သန်လာကြပြန်တယ်။
အဲဒီလို ငှက်ပျောသီးတွေကို မြင်တဲ့အခါ မျောက်အုပ်ထဲက မျောက်အိုကြီးတစ်ကောင်က
"ငါတို့ငှက်ပျောသီးတွေကို ဒီနေရာမှာထားမယ့်အစား ကိုယ့်ဝေစုအလိုက် ကြိုတင်ဝေငှထားရင် မကောင်းဘူးလား။ ဒါမှ ဥပုသ်ထွက်တဲ့အခါ အလုပ်ရှုပ်သက်သာတာပေါ့" လို့ပြောပြန်တယ်။
မျောက်တွေလည်း မျောက်အိုကြီးစကားကို သဘောတူကြပြီး မိမိတို့ရမယ့်ဝေစုကို အသီးသီးခွဲဝေ ယူထားကြပြန်တယ်။
အဲဒီလိုခွဲဝေယူပြီးတဲ့အခါမှာလည်း အစားမက်တဲ့ မျောက်တစ်ကောင်က ဒီလိုပြောပြန်တယ်
"ဒီလို ဝေစု ခွဲပြီးနေမှတော့ မထူးတော့ပါဘူး.. တစ်ခါတည်း အခွံပါနွှာထားလိုက်ကြရအောင်။ ဥပုသ် ထွက်တာနဲ့ အသင့်ကောက်စားလိုက်ရုံပဲ"
အဲဒီအခါ မျောက်တွေလည်း သဘောတူကြပြီး မိမိတို့ရရှိတဲ့ ဝေစုငှက်ပျောသီးတွေကို အခွံနွာလိုက်ကြပြန်တယ်။
အဲဒီလို နွှာပြီးတဲ့အခါ မျောက်ငယ်လေးတစ်ကောင်က
"ကျနော်ငှက်ပျောသီးကို အခွံနွှာပြီး ဘယ်နားထားရမှန်းမသိဖြစ်နေတယ်။
ကျနော့်ပါးစပ်ထဲ ထည့်ပြီး သိမ်းထားလို့ရမလားမသိဘူး။ ကျနော် မျိုမချဘူးလို့ ကတိပေးပါတယ်" လို့ပြောပြန်တယ်။ အဲဒီအခါ မျောက်ခေါင်းဆောင်က
"မထူးတော့ပါဘူးကွာ.. အားလုံးပါးစပ်ထဲမှာ ငှက်ပျောသီးတွေ ထည့်ထားကြ၊ မြိုတော့ မချကြနဲ့" လို့ အမိန့်ပေးလိုက်တယ်။
အဲဒီလိုနဲ့ မျောက်တွေဟာ ငှက်ပျောသီးတွေကို ပါးစပ်ထဲမှာ ငုံပြီး ဥပုသ်စောင့်ကြတယ်။
ဒါပေမယ့် မကြာခင်ကာလမှာပဲ မျောက်တွေအားလုံးရဲ့ ပါးစပ်ထဲက ငှက်ပျောသီးတွေ ဟာ အသီးသီး ပျောက်ကွယ်သွားကြတော့တယ်။
မျောက်တွေရဲ့ ဥပုသ်ကြီးလည်း တိတ်တဆိတ်ပဲ ပြီးဆုံးခဲ့တယ်။
တကယ်တော့ ဒီပုံပြင်လေးတွေဟာ ကျွန်တော်တို့ရဲ့ ဆုံးဖြတ်ချက် မခိုင်မာခြင်း၊ စိတ်ရဲ့ မစောင့်စည်းခြင်း ကို ထောက်ပြနေတဲ့ပုံပြင်လေးပဲဖြစ်တယ်။
ကျွန်တော်တို့တွေဟာ တစ်စုံတစ်ခုကို သင်ခန်းစာရလို့ပဲဖြစ်ဖြစ်၊ တွေးတောမိလို့ပဲဖြစ်ဖြစ် မျောက်တွေရဲ့ ဥပုသ်စောင့်လိုစိတ်နဲ့တူတဲ့ "မှန်ကန်တဲ့ဆုံးဖြတ်ချက်" တွေကို ချလေ့ရှိကြတယ်။
ဥပမာအားဖြင့်- ဒီလ ငါ "လက်ဖက်ရည်ဆိုင်ထိုင်တဲ့အချိန်တွေလျော့မယ်"၊
"ဇာတ်လမ်းတွဲတွေကြည့်တာ အချိန်ကုန်တယ် မကြည့်တော့ဘူး"၊
"အပြင်စာတွေမစားတော့ဘူး အသုံးစရိတ်ချွေတာမယ်"
"ဒီအလုပ်မပြီးမချင်း Facebook ကို ယောင်လို့တောင်လှည့်မကြည့်ဘူး" စတဲ့ ကောင်းမွန်မှန်ကန်တဲ့ဆုံးဖြတ်ချက်တွေကို ချလေ့ရှိကြတယ်။
အဲဒီလို ဥပုသ်စောင့်ခြင်းနဲ့တူတဲ့ စောင့်စည်းခြင်းဆုံးဖြတ်ချက်တွေကို ချလေ့ရှိကြပေမယ့်၊မခိုင်မာတဲ့စိတ်ဓါတ်ကြောင့် "တစ်ခါတစ်လေ ဆိုင်ထိုင်တာတော့ ကိစ္စ မရှိပါဘူးလေ" "ဒီဇာတ်ကားလေးက မဆိုးလောက်ဘူး တစ်ပိုဒ်တစ်လေလောက်ကြည့်ရင်ဘာမှမဖြစ်ပါဘူး"
"အင်း.. ဒီတစ်ကြိမ်တော့ အပြင်စာလေး စားလိုက်ဦးမှ နောက်တစ်ကြိမ်မှဆင်ခြင်တော့မယ်"
"ခဏလေး Facebook ပေါ်တက်လိုက်ဦးမှ ငါးမိနစ်လောက်နဲ့ ဘာမှဖြစ်မသွားပါဘူး" စတဲ့ Excuse တွေပေးရင်း မျောက်ဥပုသ်ကို စောင့်လေ့ရှိကြသူများပဲဖြစ်တယ်။
ငယ်စဉ်ကာလတုန်းက လို စာသင် နှစ်စမှာ တက်ကြွနေတဲ့စိတ်ဟာ နှစ်လည်နဲ့ နှစ်ဆုံးမှာ တစ်ဖြည်းဖြည်း မျောက်ဥပုသ် ဖြစ်လာကြပြန်တယ်။
ဆေးလိပ်ဖြတ်ဖို့ ဆုံးဖြတ်ပြီးခါမှာ ပြန်သောက်မိတဲ့စိတ်မျိုးဟာလည်း မျောက်ဥပုသ်စိတ်မျိုးပဲဖြစ်တယ်။
တကယ်တော့ ရည်ရွယ်ချက် တစ်ခုကို အောင်မြင်အောင် ကြိုးစားတဲ့သူဟာ မျောက်ဥပုသ်နဲ့တူတဲ့ ပျော့ညံ့တဲ့၊ မခိုင်မာတဲ့စိတ်ကို ရဲဝံ့ပြတ်သားသောစိတ်နဲ့ ဖယ်ခွာသင့်တယ်။
တစ်ခုခုဆုံးဖြတ်ပြီးရင် ဆင်ခြေဆင်လက်မပေးတော့ပဲ ရည်ရွယ်ချက်အောင်မြင်ပြည့်မြောက်သည်အထိ တစ်စိုက်မတ်မတ် ပြုလုပ်သင့်တယ်။
အောင်မြင်သောသူတွေနဲ့ သာမာန်လူတွေကြားရဲ့ အဓိက ကွာဟချက်ဟာလည်း အဲဒီဆင်ခြေပေးတတ်တဲ့ မျောက်ဥပုသ် စိတ်မျိုးလို့ဆိုတယ်။
"I don't stop when I am tired, I stop when I am done."
"ငါဘယ်လောက်ပဲမောပန်းနေပါစေ၊ ရည်ရွယ်ချက်မပြည့်မချင်းငါမရပ်ဘူး"
ဆိုတဲ့စကားလို ရည်ရွယ်ချက်မပြည့်မချင်း ၊ခိုင်ကျည်သောစိတ်နဲ့ စောင့်စည်းဖို့၊ကြိုးစားဖို့ လိုမှာပဲဖြစ်ပါတယ်။ ။
မှန်ကန်တဲ့ဆုံးဖြတ်ချက်များကို လေးလေးနက်နက် ချမှတ်မယ်ဆိုရင် ၊
မယိုင်မလဲ ခိုင်မာစွာဆောက်တည်နိုင်ကြပါစေ။
(မေတ္တာဖြင့်မျှဝေပါ၏။)

17/08/2024

ခု၈လပိုင်း၁၅ရက်နေ့မှာ အင်္ဂါနဲ့ကြာသာပတေးပြိဿရာသီမှာပူးပါတယ်။အားပြိုင်ကြတယ်ဆိုပါတော့...
*အဲဒီလိုအားပြိုင် ဆွဲအားတွေပြိုင်ကြတော့ လေထုဖောက်ပြန်မှုတွေ၊ငလျင်တွေ ဖြစ်တတ်ပါတယ်။
*နိုင်ငံတွေကြည့်ရင်...
ဘာသာရေးကိစ္စ၊ငွေကြေးကိစ္စတွေမှာအဖုအထစ်အ
နှောက်အယှက်ဖြစ်တတ်ပါတယ်။
ဆိုင်ရာတိတ်စွဲနိုင်ငံတွေမှာပြည်တွင်းမငြိမ်သက်မှုတွေဖြစ်နေတတ်တယ်လို့ဆိုပါတယ်။
*အဓိကတိုင်းပြည်တွေကတော့...
-ရုရှ၊အာရှမိုင်းနားကျွန်းစွယ်နိုင်ငံတွေ၊ဂရိ၊ဟော်လန်
စတဲ့နိုင်ငံတွေ
-ပြင်သစ်၊အီတလီ၊ဒိန်းမတ် စတဲ့နိုင်ငံတွေ
-ပရပ်ရှား၊ရုရှ၊ပိုလန်၊ဆူဒန်စတဲ့နိုင်ငံတွေက တိုက်ရိုက်ဆိုးကျိုးခံစားရနိုင်ပါတယ်။

*ရိုက်ခတ်ပြီးအကျိုးဆက်ခံရတဲ့နိုင်ငံတွေကတော့...
-တူရကီ၊အနောက်အိန္ဒိယကျွန်းစု၊အိန္ဒိတောင်ပိုင်း၊ဘရာဇီး
-အိန္ဒိယမြောက်ပိုင်း၊အာဖဂန်၊မက္ကစီကို၊မြန်မာပြည်အထက်ပိုင်း၊ဘော့စနီးယား စတဲ့နိုင်ငံတွေကအကျိုးဆက်တွေခံစားရနိုင်ပါတယ်။
အဲဒီနိုင်ငံတွေထဲက တနိုင်ငံ၊နှစ်နိုင်ငံစသဖြင့်ဖြစ်တတ်တာပါ...
အားလုံးဖြစ်မယ်လို့တော့ကျမ်းတွေမှာမပါပါဘူး။
တခုက တိုက်ရိုက်မဟုတ်ပေမယ့် သွယ်ဝိုက်ဆိုကျိုးခံစားရမယ်ဆိုတဲ့အထဲမှာ* မြန်မာပြည်အထက်ပိုင်း*ဆိုပြီး ပါနေတာတွေ့ရပါတယ်။
ပြည်တွင်းမငြိမ်သက်မှု၊ငွေကြေး၊ဘာသာရေးတွေမှာ အဖုအထစ်ကြုံရမှုတွေဖြစ်တတ်ပါတယ်။
မြန်မာပြည်အထက်ပိုင်းသားများ သတိရှိနိုင်အောင်..ရတနာ ၃ပါးမမေ့ရလေအောင်သတိပေးပါရစေဗျား...

ကူးယူဖော်ပြခြင်းဖြစ်ပါသည်။
မူရင်းရေးသားသူကို Crd ပေးပါတယ်။🙏

16/08/2024

ရန်နှင့် အတိုက်အခံများ ပျောက်လွင့်စေသောအဆောင်လေးတစ်ခု
************************************************************
“ငါ ဗေဒင်လက္ခဏာ ဟောစားတုန်းက သုံးတဲ့နည်းကလေးတော့ရှိ တယ်ကွ။ အဲဒါက အိန္ဒိယက “အာနန္ဒာလဟီးရီး” (Ananda Lahari) ဆိုတဲ့ ဆရာကြီးတစ်ဦးရေးတဲ့ ယန္တြစာအုပ် စာမျက်နှာ နံပါတ် ၃၇ မှာ ဖော်ပြထားတဲ့ ယန္တြလေး အကြောင်းပဲကွာ။ ဘာပုံကလေးမှန်း မသိပါဘူးကွာ။ ကောက်ကောက်ကွေ့ ကွေ့ကလေးပါပဲ။ အဲဒီယန္တြလေးအပေါ်မှာ ပူဇော်ရမယ့်ပစ္စည်းတွေလည်း ဖော်ပြထားတယ်။ ရွတ်ရမယ့် မန္တန်တွေလည်းဖော်ပြထားတယ်။ ငါက တစ်ခုမှမလုပ်ဘူး။ ငါ့မှာ ရန်ရှိလာတဲ့အခါမှာ အဲဒီယန္တြလေးကို စားပွဲပေါ်တင်လိုက်တယ်ကွာ။ ပြီးတော့ အဲဒီအပေါ်က မီးထွန်းလိုက်တယ်ကွာ။ အဲဒီအခါမှာ ထူးထူး ခြားခြား ရန်တွေပျောက်သွားတယ်။ အတိုက်အခံတွေလည်း ပျောက်သွားတယ်ကွ။ အဲဒါနဲ့ ငါလည်း ငါ့မိတ်ဆွေတွေကို ပေးတယ်။ အဲဒီတုန်းကတော့ ဖိုတိုစတက်မပေါ်သေးဘူးကွ။ ဓာတ်ပုံရိုက်ရိုက်ပြီး ပေးရတယ်။ ဓာတ်ပုံဖိုး တော့ မနည်းဘူး ကုန်ခဲ့ဖူးတာပေါ့ကွာ။ ဒါပေမယ့် ငါ့မိတ်ဆွေတွေက အားကြီးသဘောကျတယ်။ ငါကတော့ ပိုက်ဆံတွေကုန်လှပေါ့ကွာ။ ပြီးတော့ ငါက ဗေဒင်လက္ခဏာ ဟောတဲ့အခါမှာလည်း ရန်များတဲ့လူ၊ အတိုက် အခံများတဲ့ လူကိုအဲဒီယန္တြတလေးသုံးဖို့ ပေးခဲ့ဖူးတယ်။ အခုလည်းပဲ ငါ့ဆီကိုလာတဲ့ လူတွေကိုဖိုတိုစတက်ကူးပြီး အဲဒါလေးတွေကို ပေးနေတာပဲ။ အိတ်ရန်နှင့် အတိုက်အခံများ ပျောက်လွင့်စေသောအဆောင်လေးတစ်ခုထဲမှာ ဆောင်ထားရင်လည်း ကောင်းတယ်။ ငါက အဲဒီယန္တြပုံလေးကို အလွတ်ဆွဲတတ်နေပြီ” ဟု ဆိုကာ ကျွန်ုပ်သည် ထမင်းစားပြီးသောအခါ၌ စားပွဲပေါ်တွင် မြေဖြူခဲဖြင့် အောက်ပါယန္တြပုံကို ဆွဲပြလိုက်လေတော့၏။