27/09/2025
သာစည်- ရွှေညောင် ရထားများ ပြန်လည်ပြေးဆွဲမှုနဲ့အတူ ၁၅ ယောက်စီး အောင်ပန်း-ကလော၊ ကလော-မြင်းဒိုက် Tour Train (RGC)ရထားများပါ ပြေးဆွဲပေးနေ
------------------------------------------------------------------------------------
MFN
ရန်ကုန်။ ၂၀၂၅ ၊ ဇန်နဝါရီ ၂၇ ရက်
မြန်မာ့မီးရထားအနေဖြင့် သာစည်- ရွှေညောင် ရထားခရီးစဉ် ပြန်လည်ပြေးဆွဲမှုနဲ့အတူ အောင်ပန်း-ကလော၊ ကလော-မြင်းဒိုက် Tour Train (RGC) ရထားများပါ ပြေးဆွဲပေးနေတယ်လို့သိရပါတယ်။
ကုန်ခဲ့တဲ့ ၂၀၂၄ ခုနှစ်၊ စက်တင်ဘာလအတွင်းမှာ ရာဂိစူပါတိုင်ဖွန်းမုန်တိုင်း သဘာဝဘေးဒဏ်ရေကြီးရေလျှံ မှုကြောင့် လမ်းပိုင်းပျက်စီးမှုများဖြစ်ပွားကာ ရပ်နားခဲ့ရတဲ့ သာစည်- ရွှေညောင် ရထားခရီးစဉ်ကို လာမယ့် ဇန်နဝါရီ ၃၁ ရက်မှစတင်ကာ ပြန်လည် ပြေးဆွဲဝန်ဆောင်မှုပေးသွားမှာ ဖြစ်တယ်လို့ မြန်မာ့မီးရထားမှ သိရပါတယ်။
အဆိုပါလမ်းပိုင်းတွင် အမှတ်(၁၄၁)အဆန် သာစည်-ရွှေညောင်လူစီးရထားကို ဇန်နဝါရီလ ၃၁ ရက်မှစ၍ အပတ်စဉ် သောကြာနေ့တွင်လည်းကောင်း၊ အမှတ်(၁၄၂) အစုန် ရွှေညောင်-သာစည်လူစီးရထားကို ဖေဖော်ဝါရီလ ၃ ရက်နေ့မှ စ၍ အပတ်စဉ် တနင်္လာနေ့တွင်လည်းကောင်း ပုံမှန်အတိုင်းပြန်လည် ပြေးဆွဲပေးသွားမှာဖြစ်တယ်လို့ သိရပါတယ်။
အမှတ်(၁၄၁)အဆန် ရထားမှာ သာစည်မှ နံနက် ၆ နာရီ ထွက်ခွာ၍ ရွှေညောင်သို့ ညနေ ၅ နာရီတွင်လည်းကောင်း၊ အမှတ်(၁၄၂) အစုန်ရထားသည် ရွှေညောင်မှ နံနက် ၇ နာရီ ထွက်ခွာ၍ သာစည်သို့ ည ၆ နာရီတွင်လည်းကောင်း ရောက်ရှိမည်ဖြစ်ပြီး ခရီးစဉ်အစအဆုံးအတွက် လက်မှတ်ခမှာ ရိုးရိုးတန်းအတွက် ငွေကျပ် ၉,၀၀၀ နှုန်းနှင့် အထက်တန်း လက်မှတ်ခမှာ ငွေကျပ် ၁၂,၀၀၀ နှုန်းဖြစ်တယ်လို့ သိရပါတယ်။
ထို့အပြင် ပြည်တွင်းမှ ခရီးသွားလာမည့် ပြည်သူများ၊ နိုင်ငံခြားသားခရီးသွားလာသူများအား ရှမ်းပြည်နယ် တောင်ပိုင်းအတွင်းရှိ ရေမြေတောတောင်သဘာဝရှုခင်းများ၊ ဒေသခံပြည်သူများနှင့် ချစ်ကြည်ရင်းနှီးမှုရရှိစေရန်နှင့် ဒေသန္တရဗဟုသုတများ ရရှိစေရန်ရည်ရွယ်ကာ ဇန်နဝါရီလ ၂၄ ရက်မှစတင်၍ အောင်ပန်း-ကလော (အသွား-အပြန်)ခရီးစဉ်နှင့် ကလော-မြင်းဒိုက်(အသွား-အပြန်)ခရီးစဉ်များကို ခရီးသည် ၁၅ ဦး လိုက်ပါစီးနင်းနိုင်သည့် Tour Train (RGC)ရထားစင်းလုံးငှားခရီးစဉ်အဖြစ် ပြေးဆွဲပေးနေတယ်လို့ သိရပါတယ်။
အဆိုပါ Tour Train (RGC) ရထားစင်းလုံးငှားခရီးစဉ်ကို ပုဂ္ဂလိက ခရီးသွားလာရေးအဖွဲ့များ၊ မိသားစုများ၊ လေ့လာရေးအဖွဲ့များအနေဖြင့် ခရီးစဉ်တစ်ခုအတွက်(အသွား-အပြန်) ငွေကျပ် ၁၂၀,၀၀၀ နှုန်းဖြင့် ငှားရမ်းစီးနင်းနိုင်တယ်လို့ သိရပါတယ်။
လက်ရှိမှာ မြန်မာ့မီးရထားအနေနဲ့ အဓိက ရထားလမ်းပိုင်းများဖြစ်သည့် ရန်ကုန်-မန္တလေးလမ်းပိုင်း၊ ရန်ကုန်-ပြည်လမ်းပိုင်း၊ ရန်ကုန်-မော်လမြိုင်လမ်းပိုင်းများနှင့် ရန်ကုန်မြို့ပတ်နှင့် ဆင်ခြေဖုံးလမ်းပိုင်းများတွင် သာမက အခြားလမ်းပိုင်းများဖြစ်သော ပုသိမ်-ဟင်္သာတ-ကြံခင်းလမ်းပိုင်း၊ ပျဉ်းမနား-တောင်တွင်းကြီးလမ်းပိုင်း၊ ရန်ကုန်-ပြည်-ပုဂံလမ်းပိုင်း၊ မြစ်ကြီးနား- မိုးကောင်းလမ်းပိုင်း၊ လက်ပံတန်း-သာရဝေါလမ်းပိုင်းစသည့် လမ်းပိုင်းများတွင် လူစီးရထားခရီးစဉ်များကို စီစဉ်ပြေးဆွဲပေးနေတယ်လို့လည်း သိရပါတယ်။
#မြန်မာ့မီးရထား #သာစည်_ရွှေညောင် # အောင်ပန်း_ကလော #ကလော_မြင်းဒိုက်
Photo - MOI
