24/07/2025
CNO/ CNDF Sawisel Hram Hlah Uh
=======================
Tu lai takih CNDF boruak cu “A unau ih a ruah mi pa in, rin-loh-paral ah a dunglam ihsin namte thawn a dawh ruangah hliamhma thawn a himnak ah a tuamhlawmaw rero” a si. A hliamhma a dam tikah cak zet le fit zetin a ra kirsal leh ding. Curuangah kan ralkap a duhdawttu pauhpauh cun sawisel loin thazang pe sawn uhsi. Ṭanpi sawn uhsi.
CNDF cun kan Chinram ah ralhrang thianfai dingin nunnak thapin theih tawpin ral a do. Falam khawpi laknak ah a neih mi thazang nasa tukin a hmang! A sumpai, a cerek le ralthuam tampi a hmangral. Kalaymyo ihsin a hung so mi ralhrang khamnak ah nasa takin a ṭang bet. Culaiah can ṭha rak bawhtu CNF cun an cau, an bang lai takah CDF Hualngoram hmangin Falam pengah buainak a tuah.
Cutin CNO le HPO cu tawngawin CDF Hualngoram cu CNA thawn kawpaw nawn lo dingin an lung a kim. Hminkhen ding lawng a tang.
Cutikah Falam peng sungih remnak le lungrualnak a um ding phang zettu CNF cun Camp Rihli le Falam do an thawk a si mei. Himi hi CNDF cun a zum ban lo mi a si. Hi hi ziang thawn ha kan tahthim ding?
Pacang pakhat in a hnaṭuannak ah hliamhma a ngah. A hliamhma tuamhlawmnak ah a neihsiah a hmang thluh. Cuti damlo cak lo zetih a um laiah a innhnenpa cun misual pahnih thum sawmin an vung luhhnawh ih an thawi. A theitawp cun a rak ṭang ve nan, a tlin nawn lo tikah a tlansuak thei fangfang. Cutin innhnenpa cun ral ka neh tiin a inn sungih thilri cu a duh mi pauhpauh a laksak, ningzahnak nei loin pakhat hnu pakhat a fir rero. Himi thu ah zohman nan riahsiatnak thu langter nawn hlah uh. Nan cakzia le kan ralkap hrangih nan din hngehzia langter sawn uh.
Hrekkhat cun, “Ziangah an dungtawlh, ziangah an ṭih” tla an ti men thei. Meithal thawn ral do cu cerek a ṭul. Nam thawn sahawk, asilole k*t thawn thawngawk vek a si lo. Cerek a um nawn lo hnuhnu cun meithal cu funghreu hman a tluk nawn lo! Cerek a khatih pai veve, minung zataw cun CNDF hin CNA hi ti thamah an ruat lo
Cupa cun a unaupa mi ṭhalo a si ti cu tui hlan ihsin a thei cia. Asinan hi tluk lawmmamin a sual ding ti a rak zum ban dah lo. Tu cu a theifiang tuk thlang. A unaupa cu a ral hnak hmanin a sualsawn, a aa sawn ti hi! A unaupa cun ralhrang do hnakin amah siatsuah hi a ret thupi sawn ti a thei thlang!
Hi thil hi CNA le CNDF karlak buainak men a si lo. An mipipawl khalin Falam siatsuah dingah cun an phur zet. Sumpai a tawm tawmin an thawh! An pastorpawl khalin an dawnkham lo hleiah tha an pe sawn riangri! An mipi Cathiam lo, mihlim sang tiangin Falam siatsuah dingah cun an phur zet ringring. Hi**er in Juda miphun a rak thah thluh laiah khan German kawhhran hruaitupawl in an rak lungkimpi zet vek kha a si! Atnak le huatnak in an khat!
Culaiah Falam mipi in ziang kan tuah ding? Kan ralkap mawhthluk loin kan cakter sawn a ṭul. Kan ralkap cak zet le hardam zetih an ra kirsal a ṭul. Cumi hrangah theihtawpih kan dinpi a ṭul. Hawipi ṭha ser ding. Asinan hawipi parah ṭhumaw tuk loih mahte kilhimawk thei a ṭul. Kan unau parih phuba kan lak duh lo, kan airul duh lo hmanah kanmahte kan cak a ṭul. Kan kilhimawk thei a ṭul. Kan kiangah unau aa belbel, huatnak le iksiknakih khat kan nei ti kha hngilh hlah uhsi.
-Phun Duh
