13/05/2026
Trump ih Hmaisialtu Vanzam Beijing a Thleng Venven Zo
--------------------------------------------------------------
Sumdawnnak le khurkhua ramkhel (Geopolitics) thu poimawh reltlang dingin American President Donald Trump cu tui siimlam (May 13, 2026) ah hin China ram Beijing khawpi ah Air Force One vanzam in a rung thleng thlang ding.
US tlunvan ralkapbu ih C-17 Globemaster III vanzam pi cu zingpit ihsin China ram Beijing International Airport ah a ttum venven zo. President D. Trump ih to ding US President mawtaw le a bodygaurd-pawl ih to ding mi mawtawpawl, kilhimnak lam le pehtlaihawknak thilripawl famkimte’n a rak sek khawl cia.
Chinese President Xi Jinping thawn, May 13 ihsi 15 tiang, ni 3 sung thu khungkhai zet zet relkhawm ding an siih, leitlun khurkhua thuhla ih hngong tumpi a neih a zumum.
An thurel tlang ding mipawl cu:
1. Sumdawnnak: China le US sumdawn tonnak sangka ziangmaw cin onsal theinak lamzin hawl tlang ding.
2. US-Israel-Iran doawknak Thu: Ahleicein Hormuz Tipirek onsal theinak ding hrangah China in Iran nor bawm dingah Trump hin pungbawm sawm a beisei a si hmel. Ahlan ah kha cun Iran thuhla ah China bomnak kan ttul lo tiah Trump hin zapi theih ah a rak au dah nan, ni le caan a rei vivo ih a hriamnem zawngin thu a feh theidan ding lamzin a hawl a si thei.
3. Taiwan Boruak: China hin US ih Taiwan hriamhrei a rak zawrh ttheu cu a lungawi lo zet. Tu hi $ billion 14 man lai man tawdap lak cia zawrh ding a nei laiih, hi thu ah China thawn ti kuiko ih an reltlang tengteng cu a ttul ding.
4. Santhar Thiamnak le Kilhimnak Thu: AI hmang hriamhrei le santhar thiamnak thu, nuclear thawi’ pehpar mi kilhimnak thuhla ah leitlun pabik tiih ruah theih ram hnih an si vekin thungaithlak ih reltlang dingah thu an bur veve cia.
Trump hin sumtuahnak lamih leitlun mi callang rual 18 lai a hun khor tel ding. Tesla ih CEO Elon Musk, Apple CEO Tim Cook, Boeing CEO Kelly Ortberg, Goldman Sachs CEO David Solomon le Nvidia CEO Jensen Huang tipawl khal US President ih vanzam hleice Air Force One in an rung khawm ding. Jensen Huang tla cu tuizing vanzam ti an thun rero laifang ah Trump in tlacop ih a vun sawm mi a si hngehnge.
Sumtuahnak lam hleiah, kilhimnak lam le ramkhel thuhla ih relkhawmnak hrangah US Secretary of State Marco Rubio, Defense Secretary Pete Hegseth, le Treasury Secretary Scott Bessent pawl khalin Trump ih kaiza an rung kil ding tiah AIR thuthang cun a run tarlang.
Ni Thum sung Caan an Hmandan Ding Tlangpi:
May 13 (Wed): Beijing khawpi ih vanzam ttumhmun ah siim zawngah an thleng dingih, China acozah pi in hlunghlai zetin rak hmuah an tum. Hmuahnak ceremony an hman ngahin riahbuk hotel an pan cih ding.
May 14(Thurs): China ram caansiar ih zinglam 10:00 ah Beijing khawpi ih the Great Hall of the People ah zungpom hmuahnak caan an hmang sal dingih, cunah meeting an nei cih ding. Inntek si tlin takin, Xi hin Trump hi, siimnem ah Temple of Heaven khal fanpit a tum.
May 15 (Fri): Hmaton ih relkhawmnak thupi zet an peh sal dingih, ram hnih palai poimawhpawl thawn suncaw an hil khawm ding. Siimlam ah Air Force One vanzam in US panin an tlung cih ding.
