17/08/2026
Zungzal nunnak kan hmuh khawhnak dingah zei thil dah kan tuah lai?
***************
RVA Hakha || 17 August 2026 (Daily Reflection)
Nihin ni Pathian bia kan rel hnga dingmi (Mt. 19:16) chungah khan pakhatte ruat ṭi hna u sih. “Cun mipa khat cu a ra i, “Saya zungzal nunnak co awkah zei thilṭha dah ka tuah lai”, tiah a ti.
Nihin ni caan i kan relmi thawngṭhabia hi kan theih pengmi, kan rel pengmi, kan ngai pengmi a si i hi chungte ah hin a tlangtar in chim ka duhmi cu “Zungzal nunnak kan hmuh khawhnak dingah zei thil dah kan tuah lai?” timi kha a si lai. Mirum pa pakhat i biahalmi “zungzal nunnak co awk caah zei thilṭha dah kan tuah lai” timi kong he pehtlai in thazaang lak ṭi hna usih.
Hika biahalnak hi kan zoh tikah Khrihfa pakhat sining in cun a biapi tukmi biahalnak pakhat a si. Khrihfa kan si ṭung i, zungzal nunnak a sungmi kan si sual ahcun kan Khrihfa sinak kha man a ngei lo i, pakpalawng a si hnga. Cucaah cun Khrihfa pakhat nih zungzal nunnak kan ngeih khawh nakhnga zeitindah kan um awk a si timi zong kha hi biahalnak nih hin a kan cawnpiak.
Cucaah cun hi biahalnak nih kan zoh tikah kan Khrihfa zumhnak ah a hrampi pakhat zong a si i, cun Jesuh Khrih zong nih a chimmi cu: Mipa pakhat nih hi vawleipi hi a ningpi in hei co hmanh sehlaw, zungzal nunnak kha a sungh ṭung ahcun zeital a miak hnga maw? tiah a ti.
Khrihfa zumhnak hi Mithiang Paul zong nih Khrihfa pawl sinah ca a kuat tikah ‘thawhṭhannak hi um hlah sehlaw, nang le kei kan zumhnak hi pakpalawng a si hnga,’ tiah a ti. Cucaah zungzal nunnak timi hi a biapi tukmi pakhat a si. Vawlei cung biaknak vialte lakah Khrihfa biaknak kan i thimmi zong cu hi zungzal nunnak kan co khawh nakhnga ding caah a si timi zong kha kan hmuh khawh. Hika biahalnak hi kan zoh tikah mirum pa pakhat nih a halmi hi a hal dan hi aa palh rua tiah kei cu ka ruah. Zeicahtiah cun hi miram pa pakhat nih Jesuh sinah bia a halmi hi zungzal nunnak ka co khawh nakhnga zeithil ṭha dah kan tuah lai, tiah a ti. Khatlei kan chim ahcun zungzal nunnak hi amah a hmuh ning ahcun minung zuamnak, minung tuahsernak in co khawhmi ah khin a ruah. Asinain bible kan zoh tikah zungzal nunnak timi hi minung nih tuah khawhmi a si lo, Pathian nih a kan pekmi a si, zumhnak thawngin co khawhmi a si, timi zong kha kan hmuh khawh.
(Jn. 3:16) chungah, “Pathian nih vawlei hi a dawt tuk hringhran caah a Fapa ngeihchunh te kha a pek, cucaah amah a zummi vialte cu zungzal nunnak an ngei lai” tiah a ti. Zungzal nunnak kan co khawhnak cu Jesuh Khrih zumhnak thawngin a si. Cun mizapi sinah Jesuh nih thawngṭha a chim i, “Pa duhnak kha nan tuah a si ahcun” ti kha a chim tikah mizapi nih zeitindah an hal, “Pa duhnak cu zeidah a si? kan cawnpiak tuah, kan chim tuah” tiah an tikah zeitindah a leh hna tiah cun, “Pa duhnak cu a thlahmi zumh hi a si” tiah a ti. Amah Jesuh Khrih zumh kha Pa i a duhnak bik cu a si.
Farasi hna le phungbia cawnpiaktu hna nih zeiruang ah dah zungzal nunnak an co lo kan ti ahcun, “Jesuh cu Pathian Fapa a si” tiah an zum lo i an pom lo caah khan zungzal nunnak an sunghnak cu a si. Cucaah cun Jesuh nih a timi hna cu, “Nannih Farasi mi le phungbia cawnpiaktu saya hna, nan caah ngaihchia a va si dah! Hlawhhlang nu le ngunkhuai khawltu hna nih Vancung Pennak chungah an in luh kanh dih cang hna” tiah a ti.
A chimduhnak cu zungzal nunnak kan timi cu mah Jesuh Khrih zumhnak thawngin a si timi kha hi nih hin fiang tein a langhtermi cu a si. Cucaah cun zungzal nunnak kan hmuhnak dingah cun Pathian nih a thlahmi amah Jesuh Khrih zumh kha a si i, cu Jesuh Khrih kan zumh kan timi cu ,biadang kan chim ahcun sualnak huat i Pathian duhnak kha kan duhnak nganbik i chiah kha a si. Pathian fa kan si, Pathian kan zumh kan ti tikah, zumhnak thawngin zungzal nunnak kan co kan ti tikah, thilṭha tuah a herh lo tinak a si lo. Cheukhat caah cun kan zumh ahcun a za kan ti i, cu zumhnak kan ngeih ahcun a za kan ti i, thil ṭhalo tuahnak laisen a ngeimi bantukin aa ruatmi zong tampi kan um i midang a cawnpiaktu zong hi tampi kan um hna.
Hi nih a langhtermi cu zumtu kan timi hna cu kan zumhmi pa i a duhnak kha kan duhnak nganbik i a chiami hna kha “Khrihfa” ti cu a si. “Khrihfa” ti a sullam cu Khrih duhnak a tuah i, Khrih hnu a zulmi pawl kha “Khrihfa” tiah auh an si. Kha bantuk pawl kha Jesuh kan zumh i amah Jesuh Khrih kan zumhnak thawng cun “Pa le Fap le Thiang Thlarau” min in tipil kan ing i Pathian fa sinak kan co i, thiang thlarau a cotu kan si i, zungzal nunnak a ngeitu kan si.
Zungzal nunnak timi cu kanmah i zuamnak le tuahsernak in hmuhmi a si lo i, Jesuh Khrih kan zumhnak thawngin kan hmuhmi a si. Cu zungzal nunnak a hmuh cangmi Pathian fanu fapa vialte hna cu kan pumsa duhnak kha si loin Pathian duhnak kha tuah in zungzal nunnak he aa tlakmi fanu fapa ṭha kan si ding kha Bawipa nih a kan sawmmi, a kan auhmi cu kan si. Kan dihlak caah Pathian nih thluachuah kan pek piak hram ko seh. Amen
Thazang petu /- Saya Simon Hram Ling
👉Website ah kan leng ve......👇
https://rvahakhachin.org/2026/08/17/zungzal-nunnak-kan-hmuh-khawhnak-dingah-zei-thil-dah-kan-tuah-lai/
