31/08/2023
ဆရာလူသာမန်နှင့် ဇင်အရူး ရိုကန်
'ရိုကန်'အား တစ်စုံတစ်ယောက်က " တကယ်လို့ လမ်းပေါ်မှာ ပိုက်ဆံကောက်ရရင် ခင်ဗျား အရမ်းပျော်လိမ့်မယ် " ဟုပြောလေသည်။
တစ်နေ့ ရိုကန် အလှူခံသွားရာတွင် ဒင်္ဂါးအချို့ ရရှိခဲ့သည်။ ထိုအခါ သူသည် ဒင်္ဂါးပြားများကို လမ်းတလျှောက် ကြဲဖြန့်လိုက်ပြီး ယင်းဒင်္ဂါးပြားများကို ပြန်ကောက်ယူလေသည်။ ယင်းသို့ပြုလုပ်နေစဥ် သူသည် ထူးထူးခြားခြားပျော်ရွှင်မှုကို မခံစားရပေ။ ထို့ကြောင့် " ပိုက်ဆံတွေ ကောက်ရရင် အရမ်းပျော်လိမ့်မယ် " ဟူသောစကား၏အဓိပ္ပာယ်ကို အံ့အားသင့်ကာ ထိုနည်းအတိုင်း ထပ်မံလုပ်ကြည့်ပြန်သည်။ ထိုအခါ ဒင်္ဂါးပြားများအားလုံး မြက်ပင်တွေကြားထဲ ပျောက်သွားလေ၏။
အချိန်အတော်ကြာ ရှာဖွေပြီးနောက်မှ ပျောက်ဆုံးသွားသည့် သူ၏ဒင်္ဂါးပြားများအားလုံးကို ပြန်ရှာတွေ့လေသည်။ ရိုကန် အလွန်အမင်း ပျော်ရွှင်သွားပြီး " အခု ငါ သဘောပေါက်သွားပြီ။ ဟုတ်ပါ့၊ လမ်းပေါ်မှာ ပိုက်ဆံကောက်ရတာ အရမ်းပျော်ဖို့ကောင်းတယ် " ဟု ဆိုလိုက်လေသည်။
🌳
တစ်နေ့သောညနေခင်းတွင် သူခိုးတစ်ယောက်သည် ရိုကန်၏တောင်ပေါ်တဲငယ်လေးရှိရာသို့ ရောက်လာပြီး တစ်ခုခုကို ခိုးယူရန် ရှာဖွေရာ မည်သည့်ပစ္စည်းမှ မတွေ့ရချေ။
ရိုကန်ပြန်ရောက်လာပြီးနောက်၊ တစ်ခုခု ခိုးယူရန် ရှာဖွေနေသော သူခိုးကို " မင်း ငါ့ဆီကို အဝေးကြီးကနေ လာရောက်လည်ပတ်ရတာ၊ လက်ချည်းသက်သက်တော့ ပြန်မသွားသင့်ဘူး။ ကျေးဇူးပြုပြီး ငါ့အဝတ်အစားတွေကို လက်ဆောင်အဖြစ် ယူသွားပါ " ဟု ပြောပြီး အဝတ်အစားများကို ချွတ်ကာ သူခိုးလက်ထဲသို့ ထည့်ပေးလိုက်လေ၏။ သူခိုးလည်း မွှန်ထူသွားပြီး ရိုကန်၏အဝတ်အစားများကို ယူကာ ထွက်ပြေးသွားလေသည်။
ရိုကန်သည် အဝတ်အစားမပါဘဲ ထိုင်ချကာ လကို ကြည့်နေ၏။ ထို့နောက် " သိပ်သနားစရာကောင်းတဲ့လူပဲ။ ဒီ သိပ်လှတဲ့လကို ပေးလိုက်လို့ရရင် သူ့ကို ပေးလိုက်ပါတယ် " ဟု စိတ်ထဲ ပြောဆိုကာ အောက်ပါဟိုက္ကုကဗျာကို ချရေးလိုက်လေ၏။
ငါ့ပြတင်းပေါက်မှာ
သူခိုးချန်ထားရစ်ခဲ့တဲ့
လမင်းကြီးတစ်စင်း။
🌳🌳
စိတ်မပါရှိဘဲ ပန်းပွင့်လေးတွေဟာ
လိပ်ပြာလေးတွေကို ဖိတ်ခေါ်တယ်
စိတ်မပါရှိဘဲ လိပ်ပြာလေးတွေဟာ
ပန်းပွင့်လေးတွေဆီ အလည်လာတယ်
ပန်းလေးတွေပွင့်တော့
လိပ်ပြာလေးတွေလာ
လိပ်ပြာလေးတွေလာတော့
ပန်းလေးတွေပွင့်
တခြားလူတွေကို ငါမသိ
ငါ့ကိုလည်း တခြားလူတွေမသိ
တစ်ဦးနဲ့တစ်ဦး မသိကြဘဲ
ငါတို့အားလုံး လမ်းစဥ်နောက်ကို
သဘာဝအလျောက်လိုက်လို့။
* 'ခန်းရှိ'ကဗျာများ အခန်းမှ
🌳🌳🌳
စမ်းချောင်းငယ်လေးလို
ရေညှိတက်နေတဲ့အက်ကွဲကြောင်းကို ဖြတ်ပြီး
သူ့လမ်းသူဖောက်နေ
ငါလည်းပဲ ညင်ညင်သာသာ
ပြန်ကြည်လင်သွားရဲ့
ထုတ်ချင်းခတ်ပြန်မြင်နိုင်သွားရဲ့။
---
မှောင်မိုက်နေတဲ့လောကကို
ပြန်ပြီးစင်ကြယ်ဖို့ ငါမပြောဘူး
တောင်ကျချောင်းငယ်လေးထဲမှာ
ငါ့ကိုယ်ငါ သန့်စင်ပြီး
ငါ့ပုံရိပ်ကို ဆန်းစစ်တယ်။
* 'ဝါက'နှင့် 'ဟိုက္ကု'ကဗျာများ အခန်းမှ
🌳🌳🌳🌳
'ရိုကန်'သည် ဂျပန်ဇင်ဘုန်းတော်ကြီးတစ်ပါးဖြစ်သည်။ သူသည် ကျောင်းတိုက်တွင် သီတင်းသုံးနေထိုင်ပြီး တရားပြခြင်း၊ ကျမ်းပြုခြင်းတို့ဖြင့် အချိန်ကုန်ခဲ့သည့်ဘုန်းကြီးတစ်ပါးမဟုတ်ချေ။ လူ့အဖွဲ့အစည်းနှင့် ဇင်သံဃအဖွဲ့အစည်းကို စွန့်ခွာခဲ့သူဖြစ်၍ သူ့ကို ကဗျာခရီးသည်၊ တောရဆောက်တည်သောဘုန်းကြီး၊ ဖုန်းတောင်းယာစကာဘုန်းကြီးဟု လူသိများသည်။
ရိုကန်သည် သူ၏ကဗျာများကို တရုတ်စာဖြင့်လည်းကောင်း၊ ဂျပန်စာဖြင့်လည်းကောင်း ရေးဖွဲ့ခဲ့သည်။ ရိုကန်၏ကဗျာပုံသဏ္ဍာန်များမှာ ဟိုက္ကု၊ ဝါက၊ ကျေးလက်သီချင်း၊ မန်ရိုပုံစံကဗျာနှင့် ဂန္ထဝင်တရုတ်ပုံစံကဗျာများဖြစ်သည်။
ရိုကန်ကဗျာများကို ဖတ်ရှုရာတွင် မတွယ်တာခြင်းသဘော၊ ကြိုးကုတ်အားထုတ်ခြင်းမရှိသည့်သဘော၊ မိမိကိုယ်မိမိစွန့်ပစ်လိုက်ခြင်းသဘောတို့ကို တွေ့ရသည်။ အဓိကနှစ်ချက်အဖြစ် မရှိခြင်းသဘော(မုရှင်) နှင့် မမြဲခြင်းသဘော(မုဂျို)တို့ကို တွေ့ရသည်။ ဤစာအုပ်၌ 'ရိုကန်၏ဇင်'ကို ထင်ထင်ရှားရှား တွေ့မြင်နိုင်မည့် ကဗျာများကို ဖတ်ရှုရပါလိမ့်မည်။
#ဇင် #အရူးရိုကန်၏ #ဇင်ကဗျာများ
လှိုင်ထွန်းနိုင်
၂၀၁၆၊ ဒီဇင်ဘာ၊ ပထမအကြိမ်
အုပ်ရေ - ၅၀၀
၂၅၀၀ ကျပ်
ဝါးလည် society
09 420145393
#လူသာမန်
7.12.2016; 6:33 am
