03/08/2025
Ramkhel calai nei lo tikah ziangmi pawl a hnong siat?
========
No Al
Kan Lai cabu suak pawl ka thinlung mitthlam in ka vun thlir sal tikah ramkhel cabu suak hi a mal ngaingai. Ni k*m le k*m hmasa ih cabu suakmi cazin pawl ka zoh ih ramkhel rimnam cabu hi k*m khat ah bu hnih veve lawng a um. Ramkhel ruhrel nganmi cabu tla cu a um lo.
2010 hlan kan thlir sal sile Pu No Than Kap ih cabu suahmi miphun duhdawtnak lam hoimi cabu ti lo bak ramkhel cabu kan nei lo ti sehla ka sual tam lo ding. 2011 hnu rampi a hung zalen deuh tikah ramkhel lam hoimi cabu a suak phahphah. 2013 ah Pu Van Tuah Piang ih “Inn ihsin a hlatnak ah”, Robert Pa ih nganmi “Nittung rau lang Politics zalam tluanah”, daan lam thawn pehpar in Sihni Pu Thang Ci ih “Penol Code Upadi (Criminal Law)” cabu, Cun 2019 k*m ah Pu Mang Kham Zahau ih “Chin miphun le Kawlram naing nganzi” Cun Pu B Lal Lian Thang ih “Vankau Bingbi Par mawi Vol.I” tivek hi an si. Hi lo ah ka ngan hrelhmi tla a um lai ko ding nan a tam lemlo ding.
Himi lai ah Kawl ca in cun ramkhel cabu hi tawr le seng in an suah zutzo. Mipi lei duhmi a si tin market zoh in an suah.
Kannih Lai cabu ah ramkhel cabu a suak a malnak thu thawn pehpar in bezai ngantu Arti Dahte in a hmuhdan hi tin a sim.
Tlawng saya, zung hnatuan, cozah bawi, tawkhawng...timi pawl hi cu Kawl pawl ti dingah kan ngai top a bang. Alulu in, kannih cu ukmi kan si, timi hi kan thinlug ah a tumtuk cia. Curuangah ramkhel thuhla va zingzoi ding hnak cun leilet thiam le cawkhalh thiam kha kan rak ret thupi. Curuangah 2000s khalah cumi ih affect cu kan tuar bet vivo. Tu khalah mipi ralkap ih tuanrel hnakin chainsaw thawi thing ah ih innsang cawm kan ti thupi. Hi rambuainak thawi hnoihnih loawk kan khihhmuh aw. Asinan, ram a tha taktak hrih lo thawn Politics vun khel vohvoh ding khawpih fit aw dingih zir aw cu kan mal nasa lai si a. Tui rambuai hi canthi (opportunity) ih hman thiam ih politics thluak thehdarh cu a fuh vio ding.
Himi thu ah Pu No Than Kap in a hmuhdan hitin a sim ve. Kan tongin politics thu ngannak cabu a um tuk lonak san cu:_
1- Kan ca siartu (readers) an mal tuk lai.. Cutikah, cabu ngantu hrangah sumpai zawng khalin sung, cabu nganmi khalin tumtah tlukin hmual a nei ban lo.
2- Politics hi miphun pakhat hrangah politicians lawngih theih tul, mipiin theih tul lem lo ih ruahnak mi tam sawn thinlung ah a um. Cutikah, politics lam thu ngan duhnak a mal phah, a phurum lo phah a ti.
An simmi pawl hi an dik thluh. Sile ramkhel calai a nei mumal lomi miphun lole khawtlang ah ziangvek hnong siatmi a nei ti’n AI Chat GPT ka suh tikah hitin famkim zet in I run let. A simmi pawl hi kan ram dinhmun rori a si fawn.
(a)Ramkhel thu theihnak a mal
Ramkhel fehphung, mai’ covo le tuanvo pawl theithiamtu an mal ih ramkhel ah centralization a um thei. Mipi in mai’ covo an theih lo tikah uktu pawl ih tuahmi parah mahte khawruat theinak an nei mal.
(b)Khawtlang thlengawknak a hnufual ter
Ramkhel calai hi tluktlanawknak, democracy, vote thlak le milai covo pawl pholangtu a si tikah ramkhel cabu a mal le zatlang ah rualran lonak a hnget sinsin ter. Tahthimnak ah hrinhnam buainak, nunau le mipa tluktlan lonak, sumdawnnak lam theihnak a mal.
(c)Dictatorship a hnget ter
Ramkhel cabu a nei malmi ram ah dictator lole a bur ih miuknak dokalh ding ih hmuhthiamtu a mal. Zatlang cangvaihnak, duhphawrhnak tuah ding ih huaihotawk a harsa.
(d)Mibur thurelkhawmnak tha a mal
Ramkhel calai hi mibur thurelkhawm, ruahdan hlawmawk tha a pemi a si ruangah ramkhel cabu a mal le mibur ih t**i khawmnak a ti mal. Cutikah Facts hrambun ih thuthluknak tuah hi a harsat.
(e)San thuanthu le ramkhel hminsinnak pawl a hlo
Ramkhel calai hi miphun ih san thuanthu le ramkhel pawl san khat hnu san khat kutkaih a sawng aw vivo. Himi a um lo cun a liamcia thu ih hminsinnak pawl a hlo ding.
(f)A thar sersuah le fakselnak tha a zawr
Ramkhel calai in thil thar sersuah, a dik le sual khaikhin thei ding in tha a pe. Himi a um lo cun mipi hi olsam te’n bum an tong ding.
Curuangah ramkhel calai a thangso lomi khawtlang ah thuneihnak kha faksel theitu an mal, zatlang le sumdawnnak ah thleng danglamnak a fung ter ih Dictatorship a hngetkhoh ter sinsin. Mipi au aw a dim sinsin. Cunah ramkhel cabu tampi a suah hi democracy le milai covo hrangah a thupi tuk.
Sile ramkhel calai thangso ding in ziang tin kan tuah ding? Ziang tin hma kan la thok pei? Hi tin Chat GPT ka suh tikah in rak letmi cu.
(a)Casiartu tam ding in
Mipi in casiar an hlawptlo theinak dingah casiar puai tivek tuah ding. Cabu thu relkhawmnak Book Clubs, Political Dialogues tivek tawlrel ding. Zangkhai te’n siar theihmi zukben cabu tivek, essays cabu tampi suah ding.
(b)Cangantu tha pek
Ramkhel cangantu pawl kha sumpai in siseh, fimnak in siseh, humhimnak lam siseh bom ding. Cangan zuamawknak tuah ding ih ramkhel essay, thuanthu tawi ngan zuamawknak tivek tuah ding. Cangantu pawlkom din ih ramkhel cangandan zirhawknak tuah ding.
(c)Cabu suah lam thangsoter ding
Tu san ah cabu suah olsambik cu eBooks, PDFs le Online blogs tivek tuah ding. Khawte lam ah cabu thleng ding ih tawlrel pi ding. Cabu dawr lole calai buk ah cabu pek ding. Ramkhel khurkhuaruahdan cabu pawl tampi let ding.
(d)Tlawngca ah zirh ding
Tlawng ca pawl ah ramkhel khawruahnak, democracy le milai covo thu pawl zir tel ding. Calai simfawrhnak tivek tuah ih tlawngta nauhak pawl ramkhel an theihnak thangso ter ding.
(e)Media thawn kop ding
TV, Youtube, Podcast ah ramkhel thuhla le cabu pawl suah ding. ramkhel thuhla telmi short video, animation tivek tuah ding. Hihi casiar lo pawl hrang tampi a thathnempi ding.
Kan mipi ah ramkhel cabu siar paihtu hi kan um ko tin ka rel duh. An tam le mal cu thu khat. Ziangah tile Kawl ca ih suahmi ramkhel cabu pawl kan hawl in kan siar rero. Ca kan suah lo ahcun zo in saw siar ding. Curuangah ramkhel calai siar duh an tam maw, an mal ah si maw suah ko uh si. Cangantu pawl in a suah kha kan tuanvo si ih a siar kha mipi tuanvo a si. Suah cingcing cu a siartu an rak um cingcing. Ca rit zet si lo hman ah tu ih Saya Lal Tin Hre ih suahmi Nelson Mandela thuanthu cabu vek in ram hruaitu ropi pawl ih nun thuanthu hi tampin suah rero a tha tin ka hmu. Cumi ihsin mipi in ramkhel thuhla theih duhnak an nei sinsin pei ih ca dangdang an hawl vivo ding.
Ka tleirawl tuatir lai ih ka rak siarmi Cuba Si-Ar Sen timi Fidal Castro ih thuanthu Lin Yung Mg Mg ih letmi cabu kha tu tiang thinlung ah a cam lai. Ramkhel cabu siar pek pawl hivek in siar hmaisa ding ka fawrhaw duh.
