ရိပ်ခြောက်

ရိပ်ခြောက် Contact information, map and directions, contact form, opening hours, services, ratings, photos, videos and announcements from ရိပ်ခြောက်, Publisher, Mandalay.

ရေစီးအလင်းစလေး တစ်စ လှမ်းမြင်နိုင်ဖို့စိတ်တွေကို အကြိမ်ကြိမ် လောင်ကျွမ်းပေးခဲ့ဖူးပါတယ်။ဖြေဆည်စရာကလည်း ရောက်မလာသေးချည်ထား...
01/09/2025

ရေစီး

အလင်းစလေး တစ်စ လှမ်းမြင်နိုင်ဖို့
စိတ်တွေကို အကြိမ်ကြိမ် လောင်ကျွမ်းပေးခဲ့ဖူးပါတယ်။

ဖြေဆည်စရာကလည်း ရောက်မလာသေး
ချည်ထားတဲ့ ကြိုးကလည်း မပြတ်သေး။

ဒီလောက် တောမီးတွေ လောင်နေတဲ့ ကြားထဲ
ခင်ဗျားက တရားထိုင်နေတာလား
ထထ
ခင်ဗျားကို တက်နင်းသွားကြလိမ့်မယ်။

ဒုက္ခဆိုတာ မြေသြဇာပါ
ကျိုးကျမသွားတဲ့ အကိုင်းက
ပန်းပွင့်တစ်ပွင့်တော့ ဖူးပွင့်လာပါလိမ့်မယ်။ ။

-ကွန်စစ်ကောင်း
၇၊ ၆၊ ၂၀၁၉
"ငါ့ပင်စည်၊ ငါ့အကိုင်းအခက်များ" ကဗျာစာအုပ်မှ

01/09/2025

Dream Catcher

သူ့ခေါင်းသူ ဖြုတ်ပစ်ဖို့ သူ ကြိုးစားနေတယ်။ နံရံပေါ် က လှုပ်ရမ်းနေတဲ့ Dream Catcher ထဲမှာ သူ့အဘွား ရှိတယ်။ သူဟာ Dream Catcher ထဲက အဘွားကို ကြည့်ပြီးမှ အိပ်ရာဝင်တာ ထုံးစံလိုမျိုး ဖြစ်နေပြီ။ ဒါပေမဲ့ ဒီညမှာ Dream Catcher ကို မတွေ့ရဘူး။ ပြီးတော့ သူ့လည်ပင်းက တအားကျပ်နေပြီ။ သူ ခေါင်းကို နှစ်ခါ‌လောက် ဖြုတ်ခဲ့ဖူးတယ်။ ပထမ ငါးတစ်ကောင်အနေနဲ့ ဖြုတ်တာ၊ နောက်တစ်ခါကျ သူဟာ ယိုကိုင်းပုံစံပြောင်းပြီး ခေါင်းနဲ့ကိုယ် နှစ်ပိုင်းခွဲပစ်လိုက်တာ။ အခု ဘာပုံစံပြောင်းရမလဲ။ လမ်းထိပ်က ဝပ်‌ရှော့ဆရာလို သူ့ခေါင်းသူ ပလာယာနဲ့ လှည့်ဖြုတ်ရင်း တွေးနေမိတယ်။ သူ အိပ်မက်မက်တယ်။ Upton Sinclair ရဲ့ The Jungle ဝတ္ထုထဲက သားသတ်ရုံထဲမှာ သူရောက်နေတယ်။ ယူရဂီဟာ ခြေသလုံးထိ မြုပ်နေတဲ့ သွေးတွေကို လှည်းထုတ်ရင်း သူ့ကို စိုက်ကြည့်နေတယ်။ မထင်မှတ်ဘဲ သူ့ခေါင်းဟာ ပြုတ်ထွက်သွားတယ်။ သူ အိပ်မက်ကနေ နိုးလာတော့ ကုတင်တစ်လုံးကို မြင်နေရတယ်။ ကုတင်ပေါ်က ကောင်မလေးဟာ သူ့ကို တစ်ချက် လှမ်းကြည့်ပြီး အိပ်ရာဝင်သွားတာပဲ။သူ ဘာမှမလုပ်ရသေးခင်မှာ သူဟာ တစ်ခုခုလုပ်ပြီးသွားပြီလို့ ဒဿနိကပညာရှင်တစ်ယောက်ဟာ သူ့ကို တိုးတိုးလေးပြောနေတယ်။ အခုလေးတင်ပဲ။ မင်း အခန်းထဲက Dream Catcher ကို ကြည့်ကြည့်လိုက်။

-ဇဲရဇ်
၃၁/၈/၂၀၂၅

26/08/2025

သိပွံဝတ္ထု

လမ်းမှာ အင်္ဂါဂြိုလ်သားတစ်ယောက်နဲ့ ပက်ပင်းတိုးတယ်။
သူဟာ ငါရဲ့ ဂွစာတိုက်မှုကြောင့် တွန့်ဆုတ်သွားတယ်။
ရှင်သန်နေတဲ့ အနေအထားမှာပဲ ရှင်သန်ခြင်းကို ငြင်းဆိုတဲ့ သတ္တဝါမျိုး
ဘယ်လိုလုပ်ပြီး ရှိနေတာလဲလို့ သူ တွေးပါတယ်။

ဂြိုလ်သား ငါ့ရှေ့ကနေ ထွက်သွားတယ်။ သူ့အနောက်ကို ငါ လိုက်တယ်။
သက်သေခံတစ်ခုအဖြစ်နဲ့ ငါ သူ့ကို လိုအပ်တယ်လေ။
ဒါပေမဲ့ သူက စကားပြန်မပြောတော့ဘူး။
ပြဿနာပေါင်း သောင်းခြောက်ထောင် ရှိတဲ့ အာကာသထဲကို
ဝင်ရောက် ပျောက်ကွယ်သွားပါတယ်

မိမိထံကနေ မိမိပျောက်ဆုံးရင်း ငါတစ်ယောက်တည်း ကျန်ရစ်တယ်။

-ကားလို့စ် ဒရူးမွန့်ဒ် ဒီးအန်ဒရာဒီး
-(မောင်ဒေး မြန်မာပြန်)

17/08/2025

အိုက်လန် - ၅

အနောက်ရိုးမပေါ်
နွားတွေကို ထားခဲ့တယ်
ချောင်းရိုးမှာ ရိက္ခာစုကြစို့
ထမင်းစားတဲ့ အခါတိုင်း
သီချင်းဖွင့်ဖွင့်ထားတတ်တာ
ဦးထီးရဲ့ 'သဘာဝ' ကို ကြိုက်တဲ့ အိုက်လန်။

-အယ်ခမ်း

16/08/2025

"လျှုတတ်ရင် ကုသိုလ်ရတယ်"

လေထိုးတံတစ်ချောင်း
ကောင်းကောင်း ပြုပြင်ထားတယ်။

ရေအကျိုး ဆယ်ပါးရှိ
လေအကျိုး ဘယ်နှစ်ပါးမသိ
ရှိရှိ မရှိရှိ
သိသိ မသိသိ
လေဖြည့်လိုတဲ့စက်ဘီး
ခရီးတွင်ချင်ရင်လာ
ငွေအသပြာမယူ
စေတနာဖြူတဲ့
လေအလျှု။

-ဆွေမောင်(တောင်တွင်း)

13/08/2025

ည

အနောက်ကနေ သိုင်းဖက်လိုက်တဲ့ အရာဝတ္ထု
ကိုယ့်ဆီ တည့်တည့် ဖြန်းပက်လိုက်တဲ့ နီယွန်မီးရောင်
လမ်းဘေးခွေးတွေရဲ့ တလက်လက် မျက်ဆန်များ
ကိုယ်ပေါ်ကနေ တစ်ခုချင်းစီ ချွတ်ချလိုက်တဲ့
နီကျင်ကျင်စာရွက်အသားတွေ
ဒါမှမဟုတ် ၉၀° အချိုးအကွေ့တစ်ခု
အိပ်ရာဝင်ချိန်တိုင်း ဝှက်ထားခဲ့တဲ့ ကြယ်တွေဟာ
အခု‌တော့ ကိုယ့်ခေါင်းအုံးထဲမှာ အပြည့်ပဲ
နီးနီးလေးမှ မဟုတ်ဘူး
ကိုယ် အဝေးကြီးကိုလဲ လှမ်းမျှော်ကြည့်ဖူးပါတယ်
ညရဲ့ လက်ဖဝါးကို ပါးမှာ ကပ်ရင်း ကိုယ် ငိုဖူးတယ်
အခုတော့ ကိုယ် ငုတ်တုတ်ထိုင်နေတယ်
တစ်ခါတ‌လေ လမ်းထလျှောက်တယ်
ပျောက်သွားခဲ့တဲ့ ညတွေကို ဘယ်လိုပြန်ရှာရမယ်လို့
ကိုယ်ဟာ ခွေးတစ်ကောင်ရဲ့ မျက်လုံးကို ကြည့်ရင်း အချိန်တိုင်း စဥ်းစားနေမိတယ်
ကိုယ် အိပ်စက်လိုက်တော့မယ်
ည ပျောက်သွားတဲ့ လူတွေအတွက်
နီယွန်မီးရောင်ဟာ ခြုံစရာ စောင်တစ်ထည်။ ။

-ဇဲရဇ်
၁၃/၈/၂၀၂၅

မဖြစ်နိုင်တာတွေ အများကြီးနဲ့ မဖြစ်သေးတာတွေ အများကြီးနဲ့ နေ့ရက်တွေ အများကြီးနဲ့ လုပ်ချင်တာတွေ အများကြီးနဲ့ တကယ်မှာ မတတ်နိ...
09/08/2025

မဖြစ်နိုင်တာတွေ အများကြီးနဲ့
မဖြစ်သေးတာတွေ အများကြီးနဲ့
နေ့ရက်တွေ အများကြီးနဲ့
လုပ်ချင်တာတွေ အများကြီးနဲ့
တကယ်မှာ မတတ်နိုင်တာတွေ အများကြီးနဲ့
ဒါကြောင့်ပင်
ကျွန်တော်တို့ ဆက်လက်ရှင်သန်နေတာ ။

-အောင်ချိမ့်

09/08/2025

နိုင်ငံတော်သီချင်း ၆

စိန်ပန်းတွေ ပန်ထားသလို
စွေးစွေးနီသော ဦးပြည်းများ
မျက်ရည်တွေခန်းနေတဲ့ အရပ်မှာ
မျက်ရည်ယိုဗုံးဆိုတာ ပြက်လုံးပမာ
ရေဒီယိုကနေ ရယ်သံတွေ
အချိန်မှန် ထုတ်လွှင့်ပေးပါတယ်
ပြည်သူတွေ ရွှင်မြူးစေဖို့
သွေးစုပ်ဖုတ်ကောင် ဂိမ်းတွေ
အလှဓာတ်ပုံ ရိုက်ဖို့
လူထုအုံကြွမှု နောက်ခံဆက်တင်တွေ
လည်နေတဲ့ ချားရဟတ်ကြီးပေါ်မှာ
ဗုဒ္ဓဟာ မျက်လုံးမှိတ်ရင်း ထိုင်လို့
ပြဇာတ်ထဲမှာ ပိုးလောက်လမ်းများအဖြစ်
ငါတို့ သရုပ်ဆောင်ကြတယ်
သင်၏ ပျော်ရွှင်ဖွယ် နိုင်ငံတော်။

-အောင်ခင်မြင့်

ကွန်ဗာဇေးရှင်း စစ်မှန်တဲ့ အရာဆိုတာ မိန်းမပေါင်ကြားထဲက မရိတ်မသိမ်းဘဲ ထားတဲ့ အမွေးအမျှင်တွေပဲပေါ့ကွာ။ မင်း သေချာကော မြ...
01/08/2025

ကွန်ဗာဇေးရှင်း

စစ်မှန်တဲ့ အရာဆိုတာ မိန်းမပေါင်ကြားထဲက မရိတ်မသိမ်းဘဲ ထားတဲ့ အမွေးအမျှင်တွေပဲပေါ့ကွာ။ မင်း သေချာကော မြင်ဖူးခဲ့ရဲ့လား? ဒီလိုသာဆို ဘုရားတွေကကော?၊ ဘုရားတွေက ?၊ အေးဟုတ်တယ်၊ ဘုရားတွေက ငါတို့ရဲ့ စကားသံတွေကို ဘယ်တုန်းကများ လက်သင့်ခံ နားထောင်ပေးခဲ့တယ်ဆိုတာ၊ ဒါမှမဟုတ် ဘယ်တုန်းကမှ နားမထောင်ပေးခဲ့ဘူးဆိုတာ၊ p***o ကောလိပ်ကျောင်းသားတွေရဲ့ ဖက်ရှင်လောက် ငါတို့ဟာ ဘယ်တုန်းက ဘယ်သူတွေရဲ့ ဂရုပြုခြင်းကို ခံခဲ့ရဖူးသလဲ၊ အနည်းဆုံး ဂရုပြုခံရတယ်ထားတော့ တစ်ပတ်စာ ထူးခြားဖြစ်စဉ်လောက်နဲ့ပဲ ပြီးသွားမှာပဲ၊ ဘုရားတွေဟာ ဘယ်တုန်းကမှ သတင်းစာခေါင်းကြီးပိုင်းတွေကိုပဲ ရွေးမဖတ်ဘူးဆိုပါတော့၊ မင်းကော ငါကော လူသတ်မှုဖြစ်လို့ အကောင်းဆုံးအချိန်တွေနဲ့၊ မီးနီကို ဖြတ်ကူးလို့ အကောင်းဆုံး အချိန်တွေကိုပဲ ရွေးစောင့်နေဖို့မှ မလိုတာ၊ အေး ဒါပေမဲ့ ငါ၊ ငါ့ရဲ့ ဦးခေါင်းကို အက်တမ်ဗုံးတစ်လုံးလိုပဲ ပေါက်ကွဲထွက်သွားအောင် လုပ်ပစ်ဖို့ ဝန်မလေးဘူးဆိုတာတော့ ငါ ရဲရဲကြီး မင်းအတွက် အာမခံရဲတယ်၊

မြင်ကွင်း တစ်ခုလုံးကို အစအန မကျန် နာကျင်စွာ အကဲဖြတ်ဖို့ မင်းအချိန်ဘယ်လောက်၊ ဘယ်နှစ်နာရီ ယူခဲ့ဖူးသလဲ?၊ ငါ မင်းလောက် အချိန်မဆွဲတတ်ဘူး၊ ငါ လုပ်ချင်ရင် လုပ်လိုက်တယ်။ ငါ မလုပ်ချင်တော့ရင်လဲ ရောက်တဲ့နေရာကနေ ငါ လှည့်ပြန်တယ်၊ အို… ကုန်ကုန်ပြောရရင်ကွာ နာကျင်တယ်ဆိုတာ ငါ့အတွက် မရှိတော့ဘူး၊ မင်းလို ငါ အချိန်မဖြုန်းနိုင်ဘူး၊ ငါ အကြောက်ဆုံးက ငါ့အတွက် ညဘက်မှာ ထမြည်တဲ့ ဖုန်းသံတွေပဲ၊ ဖုန်းသံ?၊ အေး… အဟုတ်ပဲ၊ အဲဒီအသံတွေက ခေါင်းဖြတ်စက်ပေါ်က ဓားရဲ့ကြိုးကို ယတိပြတ် လွှတ်ချလိုက်သလိုမျိုး ငါ့ကို သတိမူစေတယ်၊ ထားပါ၊ နာကျင်စရာဆိုလို့လဲ မယ်မယ်ရရ ရှိတော့မယ်မထင်ဘူး၊ ဘယ်တုန်းက?၊ လွန်ခဲ့ပြီဆိုပါတော့၊ မင်းကော ငါကော ဆိုပါတော့၊ မင်း ဘာဖြစ်နေတာလဲ?၊ မင်းကြည့်ရတာ ငါ့ကို တဖြည်းဖြည်း အိပ်ငိုက်လာအောင် အိပ်ဆေးကျွေးနေသလိုပဲ၊ ငါ အိပ်ငိုက်လာပြီ၊ တကယ်တော့ ငါစိတ်ဓာတ်ကျခဲ့တာ၊ ဘာလို့ စိတ်ဓာတ်ကျနေတာ?၊ ငါ အများကြီး သောက်နေခဲ့မိလို့နေမယ်၊ ဘာလို့ သောက်ခဲ့တာ?၊ ငါ စိတ်ဓာတ်ကျနေခဲ့လို့ပေါ့ကွာ၊ ဒီမယ် ငါ့မှာ မင်းကိုပြောပြချင်စရာ တစ်ခုလောက်တော့ လုံလုံလောက်လောက် ကျန်ပါသေးတယ်၊ ငါ ပြောချင်ရင်လဲ ပြောမယ်၊ မပြောရင်လဲ မပြောဘူး၊ စိတ်ဓာတ်ကျရတဲ့ အကြောင်းအရင်းက လွဲလို့ပေါ့၊ ဒီလိုကွာ အဝတ်စအနက်ရောင်တွေလို အပုံလိုက်ကြီး ဖြစ်နေတဲ့ ငါ့ရဲ့ ကိုယ်စောင့်နတ်ကို ငါ့မျက်စိနဲ့ တစ်ခါလောက်တော့ မြင်ဖူးခဲ့သေးတယ်ဆိုတာ၊ ဘယ်တုန်းက?၊ လွန်ခဲ့ပြီဆိုပါတော့၊ အဲဒီငနဲက တောင်ဆိတ်တစ်ကောင်မှာ ရှိသင့်တဲ့ ချိုအကွေးကြီးတွေနဲ့ပေါ့၊ ဒါပေမဲ့ကွာ မင်းအသိမဟုတ်လား၊ ငါ့ရဲ့ ခန္ဓာက သေးသွယ်တယ်ဆိုတာ၊ အင်း…၊ ဘယ်လိုလုပ်ပြီး ဦးချိုအကွေးနဲ့ ကောင်တစ်ကောင်က ငါ့ရဲ့ သေးသွယ်တဲ့ ခန္ဓာကိုယ်ထဲ ပူးကပ်ပြီး နေနိုင်သလဲ၊ အေး…မင်းပြောတာလဲ ဟုတ်တယ်၊ ငါ ထောက်ခံပါတယ်၊ ငါတို့အတွက် စဉ်းစားစရာဖြစ်စေတယ်၊ ဒါပေမဲ့ ငါ့မျက်မြင် မဟုတ်ခဲ့တော့ မင်း မြင်ခဲ့ရတာတွေကို ဆွေးနွေးနေဖို့ဆိုတာ ငါ့အတွက် ခဲရင်းလှတယ်၊ သေးသွယ်တဲ့ မင်းရဲ့ ခန္ဓာကြောင့် မင်းကို စွန့်ပစ်ကောင်း စွန့်ပစ်နိုင်တယ်၊ အဲဒီစွန့်ပစ်ပြီးတဲ့ အစောပိုင်းအချိန်မှာပဲ မင်းကို တစ်ခေါက်လောက် မြင်ဖူးစေချင်ခဲ့တာကြောင့် သူ ကိုယ်ထင်ပြ နှုတ်ဆက်ခဲ့တာလဲ ဖြစ်နိုင်တယ်၊ ထင်ရတာပဲ…၊ ဒါပေမဲ့လို့ အပုံလိုက်ကြီး ဖြစ်နေတာတွေကတော့ ရုပ်ပျက်ဆင်းပျက်နိုင်လွန်းတယ် မင်းအတွက်တော့၊ ငါ့အတွက်?၊ ဘာကိစ္စရယ်ကြောင့်?၊ ဘာလို့ မင်းက မင်းရဲ့ ဖဲတွေကိုပဲ ထုတ်ပြနေရတာလဲ?၊ မေးခွန်းတွေ သိပ်များလွန်းတယ် ငါ့အတွက်၊ မင်းအတွက်?၊

နောက်တော့ ငါ့အတွက် ခပ်ဝါးဝါး အဝါပါပဲ၊ မှုန်ဝါးသွားအောင် လုပ်ပစ်လိုက်တယ် အဲဒီအဝါတွေကပဲ၊ ခုတော့ မင်းအသံက မာတောက်တောက်ရယ် ငါ မကြိုက်ချင်တော့ဘူး…၊ ငါတိုလဲ ငါတို့ကို ပူနွေးပေးနိုင်တဲ့ အမျိုးသမီးတစ်ယောက်ရဲ့ ရင်ခွင်တစ်စုံ​လောက်တော့ လိုအပ်တာပဲမဟုတ်လား?၊ ဒီလိုခေတ်ဆိုးကြီးထဲမှာ ထီးတည်းကျန်နေရတာက ကိုယ့်ကိုယ်ကိုယ် ဘယ်လောက် မိုက်ရိုင်းရာ ရောက်လိုက်သလဲ?၊ ဒီမယ် မင်း ကိုယ့်အခြေနေကိုယ် ပြန်ကြည့်ပြီး သတိကပ်သင့်တယ်၊ ငါတို့ရဲ့ ခုလက်ရှိဖြစ်တည်နေတဲ့ အခိုက်အတန့်တွေကို ဆိုပါတော့၊ ခုက ဆင်းတုရုပ်တစ်ခုမှာ ကပ်ထားတဲ့ ဆွမ်းထမင်းကို ဦးဦးဖျားဖျား စားနေကြရတာမဟုတ်လား?၊ တစ်ချိန်ချိန်မှာ မျက်နှာကြက်ပေါ်က မဟုတ်ရင်တောင် စင်ပေါ်ကနေ ပြုတ်ကျပြီး သေမသွားဘဲ နေနေရတာနဲ့တင် ငါတို့ရဲ့ နေထိုင်မှုတွေက တန်လှပြီ၊ အနည်းဆုံးတော့ ငါတို့မစင်ကို ငါတို့ စွန့်ချင်သလို စွန့်လို့ ရနေတယ်မဟုတ်လား၊ မင်း သဘောမကျတဲ့ လူတွေရဲ့ ခေါင်းပေါ်၊ ဆင်းတုရုပ်တွေရဲ့ နောက်ကျောနဲ့ မမြင်ရတဲ့ အခြမ်းတွေပေါ့၊ ဆိုလိုချင်တာ?၊ ငါတို့ဟာ ဒီနေရာရဲ့ စောင့်ကြည့်သူတွေပဲ၊ စောင့်ကြည်သူ…?၊ ဆင်းတုရုပ်တွေရဲ့ နောက်ကျောမှာ နေရင်း ဘုရားတွေကိုယ်စား ငါတို့ဟာ စောင့်ကြည့်နေရတာ၊ ငါတို့က တတိယမျက်လုံးတွေပဲ… မင်းအသိမဟုတ်လား?၊ ငါတို့မျက်လုံးတွေဆီကနေ သူတို့က သတင်းပြန်ယူနေတာ၊ မင်းယုံတယ် မဟုတ်လား?၊ ဒီလိုသာဆို ငါတို့ဟာ ဘုရားတွေရဲ့ ဂရုပြုခြင်းကို ခံနေရတာပေါ့… ဟုတ်လား?၊ အဟုတ်ပေါ့၊ ဒီမယ် ရှည်ဝေးမနေချင်နဲ့၊ မင်း စစ်မှန်တယ်ပြောတဲ့ အရာကို ကြည့်တဲ့ ချောင်းကြည့်ပေါက်ကိုလဲ ငါ မရောက်ဖူးဘူး၊ ဒါပေမဲ့ မင်းမြင်နေတာတွေကို သူတို့လဲ မြင်နေတာဖြစ်လို့ မင်းအကြည့်တွေကို ဆင်ခြင်ဖို့ ငါ ပြောလိုတယ်၊ ငါဆိုလိုချင်တာ မင်းချောင်းကြည့်ပေါက်တွေကနေ သူတို့ကို ချောင်းကြည့်ခိုင်းနေသလို ဖြစ်နေတယ်၊ ခုဆို မင်းကြည့်သမျှ သူတို့က သိနေမှာပဲ၊ မင်း မစင်တုံးတွေကို သူတို့ရဲ့ နောက်ကျောမှာ စွန့်ပစ်ချင်သလို စွန့်ပစ်နေတာတွေ၊ အမျိုးသမီးတစ်ယောက်ကို လိုချင်တပ်မက်နေတဲ့ မင်းရဲ့ စိတ်နေစိတ်ထားတွေ၊ မင်းဘာသာမင်း စောက်တလွဲ ဆယ်ခုမက လုပ်ခဲ့တယ်ထားတော့ မင်းကိုယ်တိုင် သတိမမူခဲ့တဲ့ စောင့်ကြည့်သူ တစ်ယောက်ရဲ့ မျက်လုံးအစုံတွေဟာ မင်းကိုယ်တိုင် ဖြစ်နေခဲ့တယ်ဆိုတာပဲ၊ ဘုရားတွေက ဘာစောက်လုပ်မှ မလုပ်သမျှ သူတို့ဖန်တီးပေးထားတဲ့ သူတို့ရဲ့ တတိယမျက်လုံးဖြစ်တဲ့ ငါတို့က တစ်ယောက်-ယောက်အတွက် တစ်ယောက်-ယောက်က အမြဲသေပေးရတယ်ဆိုတဲ့ သဘောမျိုး ဖြစ်သွားတယ်၊ ကြိုးတစ်ချောင်း ချည်တာက အစ၊ စီးကရက်ကို တစ်နည်းတစ်ဖုံ ကိုင်ပြီး သောက်လိုက်တာ အဆုံး၊ ပုံစံတစ်ခု ပြောင်းလိုက်တာနဲ့ ရည်ရွယ်ချက်က ကွဲသွားတယ်၊ ငါတို့ဟာ ဒီနေရာမှာ ဒီအတိုင်းလေး ယဉ်မောင်းနေရုံ သက်သက်မှ မဟုတ်ဘဲ၊ ထိုင်ဝမ်ဇာတ်ဝင်ခန်းတွေနဲ့ သူတို့ရဲ့ မီးရောင်တချို့ကို အသားကျဖို့ ခဲယဉ်းနေတဲ့ လူတစ်ယောက်အဖြစ်လောက်တော့ နေဖို့ ပ်ိုလွယ်နေပါသေးတယ်။

လှိုင်းရူး​ဝေ၏ စာအုပ်အပြည့်အစုံအား ​အောက်ပါလင့်မှတစ်ဆင့်ဝင်​ရောက်ဖတ်ရှုနိုင်ပါသည်။
https://t.me/yatechauk

ယခင်နှစ်၊ စက်တင်ဘာလက အမှာ​ကောက်ခဲ့​သော ဇဲရဇ်၏ စာအုပ်က​လေးမှာ ထွက်ရှိခဲ့ပြီး ပို့​ဆောင်​ပေးခဲ့ပြီ ဖြစ်ပါသည်။ အ​ကြောင်းအမ...
31/07/2025

ယခင်နှစ်၊ စက်တင်ဘာလက အမှာ​ကောက်ခဲ့​သော ဇဲရဇ်၏ စာအုပ်က​လေးမှာ ထွက်ရှိခဲ့ပြီး ပို့​ဆောင်​ပေးခဲ့ပြီ ဖြစ်ပါသည်။ အ​ကြောင်းအမျိုးမျိုး​ကြောင့် အချိန်ကြန့်ကြာသွားခဲ့ခြင်းကိုလည်း အနူးအညွတ်​တောင်းပန်အပ်လိုက်ရပါသည်။ paperbackဖြင့် အ​သေအချာ​လေး ပြုလုပ်ထားပါ​ကြောင်းနှင့် ဤစာအုပ်က​လေး၏ digital versionကို ​အောက်ပါလင့်မှ ဖတ်ရှုနိုင်ပါ​ကြောင်း အသိ​ပေးလိုက်ရပါသည်။

https://t.me/yatechauk

20/07/2025

*
ရိုက်ကွင်းတစ်ခုပေါ်မှာ
သရုပ်ဆောင်
နေတဲ့မောင်ဒေး

စားပွဲတစ်ခုမှာ မောင်ဒေး ထိုင်နေတယ်၊ စားပွဲက သစ်သားစားပွဲ၊ မောင်ဒေးရဲ့ ထိုင်ခုံက ပလတ်စတစ်နဲ့ လုပ်ထားတဲ့ အနီရောင်ခုံ၊ မောင်ဒေးနဲ့ ကပ်လျက်မှာ လမင်းကြီး၊ ကြမ်းပြင်ပေါ်မှာဆိုတော့ လမင်းကြီးက နံပြားတစ်ချပ်လိုလို၊ ဒိုင်းကြီးတစ်ခုလိုလို၊ နံရံပေါ်က နာရီကို မောင်ဒေးကြည့်တယ်၊ ပြီးတော့ စားပွဲပေါ်မှာ ရှိတဲ့ အိပ်ဆေးတစ်ပြားကို ပါးစပ်ထဲ ထည့်လိုက်တယ်၊ နည်းနည်းကြာတဲ့အခါ နောက်ထပ် အိပ်ဆေးတစ်ပြားကို ပါးစပ်ထဲထည့်လိုက်တယ်၊ ခဏနေတော့ တတိယမြောက်အိပ်ဆေးပြားကို ပါးစပ်ထဲထည့်လိုက်တယ်၊ နည်းနည်းထပ်ကြာတော့ နာရီကို တစ်ချက်လှမ်းကြည့်ပြီး နောက်ထပ်အိပ်ဆေးပြားတစ်ပြားကို ပါးစပ်ထဲပစ်ထည့်လိုက်တယ်၊ ပြီးတော့ နောက်ထပ်အိပ်ဆေးပြားတစ်ပြား၊ နောက်ထပ်အိပ်ဆေးပြားတစ်ပြား၊ နောက်ထပ်အိပ်ဆေးပြားတစ်ပြား၊ ပြီးတော့ နောက်ထပ် - ဒီရိုက်ကွင်းကို မောင်ဒေး ‌တော်တော်ပဲ ကြိုက်တယ်၊ ဒါပေမယ့် ဒီရုပ်ရှင်ထဲမှာသူမပါ

-မောင်ဒေး
"မိမိကိုယ်မိမိ ရိုက်ယူထားသောဓါတ်ပုံများ" မှ

08/07/2025

ငါးပြတိုက်ထဲမှာ

ငါးတစ်ကောင်
အခြားငါးတစ်ကောင်နဲ့ တွေ့ဆုံတယ်
ပြီးတော့ ဥတွေ ဥတယ်
သူ့ဆူးတောင်တွေက ပင်လယ်ရေညှိတွေကို
အချက်ပြတာကြောင့်
သူ့အရောင်တွေ
တစ်ခုပြီးတစ်ခု ထွက်လာတယ်
သူ့ရေမြှုပ်တွေဟာ
ဘယ်သူ့အတွက်မှ မရည်ရွယ်တဲ့
စကားလုံးတွေ
ငါးတစ်ကောင်ရဲ့ မျက်လုံးတွေကို ဖြတ်ပြီး
ကမ္ဘာကြီးဟာ
တစ်နေ့ပြီးတစ်နေ့
တက်လိုက်၊ ကျလိုက်။ ။

-ဒူနျာ မီခါအီးလ်
-မျိုးတေဇာမောင် ဘာသာပြန်ဆိုသည်

Address

Mandalay

Website

Alerts

Be the first to know and let us send you an email when ရိပ်ခြောက် posts news and promotions. Your email address will not be used for any other purpose, and you can unsubscribe at any time.

Shortcuts

Share

Category